Hupti ang Pagtuo sa Diyos ug Kang Kristo
Mga Pangunang Punto Gikan sa Colosas
ANG pagtuo kang Jehova nga Diyos ug kang Jesu-Kristo hinungdanon alang sa kaluwasan. Apan ang paghupot sa maong pagtuo maoy usa ka hagit. Mao man usab alang sa mga Kristohanon sa Colosas, usa ka siyudad sa sidlakan sa Efeso sa Asia Minor. Ngano? Tungod kay ang mini nga mga magtutudlo didto sa sayop nagtuo nga ang kaluwasan nagadepende sa sirkunsisyon, sa gikaon sa usa, ug sa pagbantay sa pipila ka tulomanon.
Nan, hisabtan nga si apostol Pablo nabalaka bahin sa espirituwal nga kaayohan sa mga Kristohanon sa Colosas, ug siya buot gayod nga huptan nila ang ilang pagtuo sa Diyos ug kang Kristo. Busa sa hinapos sa unang pagkabilanggo sa apostol sa Roma (mga 60-61 K.P.), siya misulat sa mga taga Colosas ug usa ka sulat nga gilaraw sa pagsumpo sa sayop nga hunahuna ug sa paglig-on sa ilang pagtuo. Atong tan-awon kon sa unsang paagi kita makabatog kaayohan gikan sa iyang mahigugmaong mga pulong.
Pabilhi ang Posisyon ni Kristo
Sayo pa sa iyang sulat, gipasiugda ni Pablo ang pagpabili alang sa posisyon ni Jesus. (1:1–2:12) Gidayeg niya ang mga taga Colosas tungod sa ilang pagtuo maylabot kang Kristo ug sa ilang gugma alang sa isigkamagtutuo. Gipunting ni Pablo ang kadungganan ni Kristo ingong Usa nga pinaagi kaniya gibuhat ang tanang mga butang, ang Ulo sa kongregasyon, ug ang panganay gikan sa mga patay. Ang pagkanapasig-uli uban sa Diyos nahimo pinaagi ni Kristo, nga kaniya natago ang tanang bahandi sa kaalam ug kahibalo. Tungod niining tanan, ang mga Kristohanon kinahanglang magpadayon sa paglakaw nga nahiusa uban kang Kristo ug kinahanglang dili sila magpabiktima pinaagi sa tawhanong pilosopiya.
Pinaagi ni Kristo, gikuha sa Diyos ang Kasugoan. (2:13-23) Kini sa mahulagwayon gilansang diha sa estaka nga diha niini si Jesus namatay. Ang mga kinahanglanon sa Kasugoan sa yano maoy “usa ka landong sa mga butang sa umaabot, apan ang katumanan iya ni Kristo.” Pinaagi sa pagbarog nga malig-on diha kang Kristo, dili sila motugot nga may mohikaw kanila sa ganti sa dili-mamatay nga kinabuhi sa mga langit.
Pabilhi ang Diyos ug si Kristo
Sunod giagda ni Pablo ang mga taga Colosas nga isul-ob ang bag-ong personalidad ug magpasakop sa awtoridad ni Jesu-Kristo. (3:1-17) Pinaagi sa pagpunting sa ilang mga hunahuna sa mga butang sa itaas, ilang hatagan ang espirituwal nga mga intereses nga maoy panguna sa kinabuhi. Kini nagkinahanglan sa pagsalikway sa sayop nga mga tinamdan ug sinultihan. Pagkadako sa ilang panalangin kon isul-ob nila ang mga hiyas sama sa kaluoy, pagkamapainubsanon, ug gugma! Ang kalinaw ni Kristo maoy mogahom sa ilang mga kasingkasing kon ilang buhaton ang tanang butang sa ngalan ni Jesus, pasalamatan ang Diyos pinaagi kaniya.
Ang pagpabili kang Jehova nga Diyos ug kang Jesu-Kristo angayang makaimpluwensiya usab sa relasyon sa usa ka Kristohanon ngadto sa uban. (3:18–4:18) Ginalaoman nga ang mga asawa, bana, anak, ulipon, ug mga agalon motuman sa ilang mga katungdanan uban ang kahadlok sa Diyos ug sa pag-ila kang Kristo. Ug pagkahinungdanon ang paglahutay sa pag-ampo ug sa paglakaw diha sa kaalam!
Ang sulat ni Pablo ngadto sa mga taga Colosas makatabang kanato sa paglikay sa bakak nga mga pagtulon-an nga mohikaw kanato sa atong ganti sa kinabuhi. Ang pagpasiugda sa apostol sa pag-ila sa awtoridad ni Jehova ug sa iyang Anak adunay usa ka maayong impluwensiya diha sa atong mga pakiglabot sa uban. Ug ang tugob nga mga panalangin gipasalig kanato kon atong huptan ang atong pagtuo sa Diyos ug kang Kristo.
[Kahon/Hulagway sa panid 26]
Sulat ngadto sa Laodicea: “Tapos mabasa kining sulat ko diha kaninyo,” sulat pa ni Pablo sa mga taga Colosas, “ipabasa usab kini diha sa kongregasyon sa mga taga Laodicea ug paningkamoti nga makabasa usab kamo sa akong sulat ngadto sa Laodicea.” (Colosas 4:16) Ang Laodicea maoy usa ka adunahang siyudad sa kasadpang Asia Minor, nga nasumpay sa mga karsada uban sa mga siyudad sama sa Piladelpia ug Efeso. Malagmit, ang buluhaton ni Pablo sa Efeso nakaabot hangtod sa Laodicea, bisan tuod nga siya wala mag-alagad didto. Siya nagpadala ug sulat sa mga Kristohanon sa Laodicea, bisan pag ang pila ka mga eskolar nagtuo nga kini maoy usa ka kopya sa usa nga gisulat niya ngadto sa mga taga Efeso. Ang sulat ngadto sa mga taga Laodicea dili makita diha sa Bibliya, tingali tungod kay kini wala masudli sa impormasyon nga gikinahanglan nato karong adlawa, o tingali gisubli niini ang mga punto nga igong nakobrehan diha sa ubang kanonikal nga mga sulat.
[Hulagway]
Mga kagun-oban sa Laodicea