Ibutang Gayod sa Hunahuna ang Adlaw ni Jehova

“Ang adlaw ni Jehova haduol na sa walog sa hukom.”​—JOEL 3:14.

 1. Nganong ang umaabot nga balaang gubat nga ipahayag ni Jehova malahi sa “balaang” mga gubat sa katawhan?

“IMANTALA ninyo kini taliwala sa mga nasod, ‘Balaana ang gubat!’” (Joel 3:9) Nagkahulogan ba kini sa usa ka balaang gubat? Sa pagdumdom sa mga Krusada, sa mga gubat relihiyoso, ug sa duha ka gubat sa kalibotan​—nga dakog bahin niana ang Kakristiyanohan—​basin mangurog ta nga maghunahuna bahin sa usa ka “balaang” gubat. Hinuon, ang balaang gubat diha sa tagna ni Joel dili usa ka gubat taliwala sa mga nasod. Kini dili usa ka punog-pagdumot nga panagbugno alang sa teritoryo o mga kabtangan, nga gamitong pasangil ang relihiyon. Kini usa ka matarong nga gubat. Kini mao ang gubat sa Diyos aron wagtangon gikan sa yuta ang kahakog, panag-away, kahiwian, ug pagpanglupig. Magbayaw kini sa may-katungod nga pagkasoberano ni Jehova ibabaw sa tibuok dominyo sa iyang kalalangan. Ang maong gubat maghinlo sa dalan aron pasudlon sa Gingharian ni Kristo ang katawhan ngadto sa Milenyo nga may tibuok-kalibotan nga kalinaw, kauswagan, ug kalipay nga gitagna sa mga manalagna sa Diyos.​—Salmo 37:9-11; Isaias 65:17, 18; Pinadayag 20:6.

 2, 3. (a) Unsa “ang adlaw ni Jehova” nga gitagna sa Joel 3:14? (b) Nganong ang kanasoran angay sa butang ilang atubangon sulod nianang adlawa?

² Nan, unsa ba “ang adlaw ni Jehova” nga gitagna sa Joel 3:14? “Alaot ang adlaw,” si Jehova mismo mituwaw, “kay ang adlaw ni Jehova haduol na, ug ingon sa usa ka paglaglag gikan sa Labing Makagagahom moabot kini!” Sa unsang paagi kini usa ka paglaglag? Ang manalagna sa ulahi nagpatin-aw: “Mga panon sa katawhan, mga panon sa katawhan atua sa walog sa hukom, kay ang adlaw ni Jehova haduol na sa walog sa hukom.” (Joel 1:15; 3:14) Kini ang adlaw nga ipatuman ni Jehova ang iyang hudisyal nga hukom nganha sa walay-diyos nga mga panon sa katawhan nga nagasalikway sa iyang may-katungod nga pagkasoberano ibabaw sa langit ug sa yuta. Maoy hukom ni Jehova nga laglagon ang satanasnong sistema sa mga butang nga dugay nang naghakop sa katawhan diha sa iyang mga gaway.​—Jeremias 17:5-7; 25:31-33.

³ Ang daotang sistema sa yuta kinahanglang moatubang sa maong hukom. Apan tinuod bang daotan ang sistema sa kalibotan? Usa ka pagtan-aw sa rekord niini paigo na! Si Jesus nagpahayag ug usa ka prinsipyo sa Mateo 7:16: “Pinaagi sa ilang mga bunga inyo silang maila.” Dili ba ang dagkong mga siyudad sa kalibotan nahimong mga imburnal sa mga droga, krimen, kalisang, imoralidad, ug polusyon? Sa daghan nga kayutaan ang bag-ong-kaplag nga mga kagawasan gituok sa politikanhong kaguliyang, mga kanihit sa pagkaon, ug kakabos. Kapin sa usa ka bilyong katawhan nabuhi sa mga rasyon nga makapakuraw. Dugang pa, ang epidemya sa AIDS, nga gisugnoran sa mga droga ug imoral nga mga estilo sa pagkinabuhi, nagsabwag ug dakong dag-um ibabaw sa dakong bahin sa yuta. Ilabina sukad sa pag-ulbo sa Gubat sa Kalibotan I niadtong 1914, may pag-us-os sa tanang bahin sa kinabuhi sa tibuok-kalibotang gilapdon.​—Itandi ang 2 Timoteo 3:1-5.

 4. Unsang hagit ang gipahamtang ni Jehova sa kanasoran?

⁴ Bisan pa niana, si Jehova nagtigom gikan sa tanan nga nasod ug usa ka katawhan​—nga malipayong nagadawat ug instruksiyon mahitungod sa iyang mga dalan ug nagalakaw diha sa iyang mga alagianan. Kining lukop-sa-kalibotan nga katawhan nagsalsal na sa mga espada ngadto sa mga punta sa daro, nga nagasalikway sa mabangisong mga paagi sa kalibotan. (Isaias 2:2-4) Oo, ang mga pinuti nahimong mga punta sa daro! Apan dili ba kini ang kasukwahi sa awhag nga gipamantala ni Jehova sa Joel 3:9, 10? Didto atong mabasa: “Imantala ninyo kini taliwala sa mga nasod, ‘Balaana ang gubat! Pukawa ang kusganong mga tawo! Paduola sila! Patungasa sila, ang tanang tawo nga iggugubat! Salsala nga mga pinuti ang inyong mga punta sa daro ug ang inyong mga galab nga mga bangkaw.’” Ah, dinhi si Jehova nagahagit sa mga magmamando sa kalibotan nga dad-on ang giipon nilang armadong kusog batok kaniya sa Armageddon. Apan dili sila molampos! Kinahanglang sila mapukan sa bug-os nga kaparotan!​—Pinadayag 16:16.

 5. Unsa unya ang resulta sa dihang pagaanihon “ang parras sa yuta”?

⁵ Sa pagsukol sa Soberano Ginoong Jehova, ang gamhanang mga magmamando nagtukod ug mga pondohanan sa makalilisang nga armas​—apan sa kakawangan! Si Jehova nagahatag sa mando sa Joel 3:13: “Idagpas ninyo ang galab, kay hinog na ang alanihon. Umari kamo, dulhog, kay ang pug-anan puno na. Ang mga kawa nagaawas; kay dako kaayo ang ilang pagkadaotan.” Kanang mga pulonga sama sa Pinadayag 14:18-20, diin ang usa ka manulonda nga nagdala ug hait nga galab gisugo sa “pagpupo sa mga bulig sa parras sa yuta, tungod kay ang mga ubas niini hinog na.” Ang manulonda midagpas sa iyang galab ug nagtambog nianang masukolong mga nasod “ngadto sa dakong pug-anan sa bino sa kasuko sa Diyos.” Sa masambingayong paagi, ang dugo migawas sa pug-anan sa bino nga may kahabog nga mosangko sa bokado sa kabayo, sa distansiya nga 1,600 ka furlongs​—mga 300 kilometros! Pagkamakalilisang nga palaaboton alang sa mga nasod nga nagpakaulaw kang Jehova!

Masundanon-sa-Balaod nga mga Lungsoranon

 6. Unsay pag-isip sa mga Saksi ni Jehova sa kanasoran ug sa ilang mga magmamando?

⁶ Nagpasabot ba kini nga ang mga Saksi ni Jehova dili matinahoron sa mga nasod ug sa ilang mga magmamando? Halayo kana! Sa yano sila nagamulo sa kahiwian nga sa tin-aw makita sa tanan, ug sila nagapasidaan mahitungod sa tulin nagsingabot nga adlaw ni Jehova sa pagpatuman sa iyang hukom. Sa samang panahon, mapaubsanon silang nagasugot sa sugo ni apostol Pablo sa Roma 13:1: “Ang matag kalag magpasakop sa labawng mga pagbulot-an.” Niining tawhanong mga magmamando, sila nagahatag ug nahiangayng pasidungog apan dili sa pagsimba. Ingong masundanon-sa-balaod nga mga lungsoranon, sila nagasunod sa mga sukdanan sa Bibliya sa kamatinud-anon, pagsulti sa tinuod, ug kahinlo ug nagaugmad sa maayong mga pamatasan diha sa ilang mga pamilya mismo. Sila nagatabang sa uban sa pagkat-on kon sa unsang paagi sila makabuhat usab niini. Sila nagapuyo nga malinawon uban sa tanang tawo, nga dili makiglambigit sa mga demonstrasyon o sa politikanhong mga rebolusyon. Ang mga Saksi ni Jehova nagatinguha nga mahimong sulundan sa pagsugot sa mga balaod sa tawhanon labawng mga pagbulot-an, samtang sila nagahulat sa Supremong Pagbulot-an, ang Soberano Ginoong Jehova, aron ipasig-uli ang hingpit nga kalinaw ug matarong nga kagamhanan nganhi niining yutaa.

Pagpatuman sa Iyang Hukom

 7, 8. (a) Sa unsang paagi ang kanasoran pagauyogon ug ang kangitngitan molukop kanila? (b) Kinsay gihulagwayan ni Joel karong adlawa, ug kasukwahi sa kalibotan sa linangkob, sa unsang paagi sila gipanalanginan?

⁷ Sa tin-aw masambingayong pinulongan, si Jehova naghatag niining dugang pagbatbat sa pagpatuman sa iyang hukom: “Ang adlaw ug bulan mismo mongitngit, ug ang mga bituon mismo mapagngan sa ilang kahayag. Ug gikan sa Sion si Jehova mopadahunog sa iyang tingog, ug gikan sa Jerusalem ipagula niya ang iyang tingog. Ug ang langit ug ang yuta mauyog; apan si Jehova mahimong dalangpanan sa iyang katawhan, ug usa ka salipdanan sa mga anak sa Israel.” (Joel 3:15, 16) Ang dayag masanag, mauswagon nga kahimtang sa katawhan mahimong ngiob, makahahadlok, ug kining nagakabahing sistema sa kalibotan pagauyogon hangtod sa pagkahanaw, nga laglagon nga daw pinaagig usa ka dakong linog!​—Haggeo 2:20-22.

⁸ Matikdi ang makalipay nga pasalig nga si Jehova mahimong dalangpanan ug salipdanan sa iyang katawhan! Nganong ingon man? Kay sila mao ang usa ka katawhan​—usa ka internasyonal nga katawhan—​nga misanong sa mga pulong ni Jehova: “Kamo makaila nga ako mao si Jehova nga inyong Diyos.” (Joel 3:17) Sanglit ang ngalang Joel nagkahulogang “Si Jehova Mao ang Diyos,” siya tukmang nagahulagway sa dinihogang mga Saksi ni Jehova sa modernong panahon, nga nagaalagad nga maisogon sa pagmantala sa pagkasoberano ni Jehova. (Itandi ang Malakias 1:11.) Sa pagtagad sa unang mga pulong sa tagna ni Joel, makaplagan nato nga tin-aw kaayo ang iyang pagtagna sa kalihokan sa katawhan sa Diyos karong adlawa.

Usa ka Panon sa Dulon

 9, 10. (a) Unsang hampak ang gitagna ni Joel? (b) Sa unsang paagi ang Pinadayag nagapalanog sa tagna ni Joel bahin sa usa ka hampak, ug unsa ang epekto sa maong hampak diha sa Kakristiyanohan?

⁹ Pamatii karon “ang pulong ni Jehova nga midangat kang Joel”: “Pamatii kini, kamong mga tigulang nga tawo, ug patalinghogi, kamong tanan nga pumuluyo sa yuta. Nahitabo ba kini sa inyong mga adlaw, o bisan sa mga adlaw sa inyong mga amahan? Suginli ninyo ang inyong mga anak mahitungod niini, ug ipasugilon kini sa inyong mga anak ngadto sa ilang mga anak, ug sa ilang mga anak ngadto sa sunod nga kaliwatan. Kadtong gibiyaan sa ulod nga dangaw-dangaw, gikaon sa dulon; ug ang gibiyaan sa dulon, gikaon sa nagkamang, way-pako nga dulon; ug ang gibiyaan sa nagkamang, way-pako nga dulon, gikaon sa uk-ok.”​—Joel 1:1-4.

¹⁰ Kini talagsaong pagsulong, usa nga pagadumdomon sa tanang panahon. Panonpanon sa mga dangan, ilabina ang mga dulon, milampornas sa yuta. Unsa ang kahulogan niini? Ang Pinadayag 9:1-12 naghisgot usab mahitungod sa usa ka hampak sa mga dulon, nga gipadala ni Jehova ubos sa “usa ka hari, ang manulonda sa kahiladman,” si kinsa walay lain kondili mao si Kristo Jesus. Ang iyang mga ngalang Abaddon (Hebreohanon) ug Apollyon (Grego) nagkahulogang “Kalaglagan” ug “Manlalaglag.” Ang maong mga dulon naghulagway sa dinihogang nahibilin sa mga Kristohanon si kinsa, karon sa adlaw sa Ginoo, nagapanlakaw nga nagalaglag sa sibsibanan sa Kakristiyanohan pinaagi sa bug-os nga pagyagyag sa bakak nga relihiyon ug pagmantala sa pagpanimalos ni Jehova niana.

11. Sa unsang paagi ang modernong-adlaw nga mga dulon nadugangan sa kusog, ug kinsa ilabina ang mga tumong sa ilang mga pag-atake?

¹¹ Sumala sa gipaila sa Pinadayag 9:13-21, ang hampak sa dulon gisundan sa usa ka dako kaayong hampak sa kasundalohan. Pagkatinuod niini karong adlawa, samtang ang pila ka libong nahibilin dinihogang mga Kristohanon nadugangan sa kusog sa kapig upat ka milyong “ubang mga karnero” nga naglangkob sa usa ka dili-masuklan nga kasundalohan! (Juan 10:16) Sila naghiusa sa pagmantala sa masakit nga mga paghukom ni Jehova sa mga tigsimbag diyosdiyos sa Kakristiyanohan ug niadtong ‘wala maghinulsol sa ilang mga pagpatay ni sa ilang espiritistikanhong mga buhat ni sa ilang pakighilawas ni sa ilang mga pagpangawat.’ Ang klero​—Katoliko ug Protestante—​nga aktibong nagpaluyo sa mopatay nga mga gubat niining sigloha, ingon man ang mga pari nga maibog ug mga bata ug mahilayong mga magwawali sa TV, naapil sa gitumong niining mga mahukmanong mensahe.

12. Nganong ang mga pangulo sa Kakristiyanohan angay magadawat sa mga mensahe sa paghukom, ug unsay mahitabo kanila sa dili madugay, uban sa tanang membro sa Bantogang Babilonya?

¹² Alang nianang mahilayong klero, ang awhag ni Jehova molanog: “Pagmata na, kamo nga mga palahubog, ug panghilak; ug tiyabaw, kamong tanan nga palainom ug bino, tungod sa matam-is nga bino, kay kini gibulag gikan sa inyong mga baba.” (Joel 1:5) Niining ika-20ng siglo, ang pagkamatugoton sa kalibotan maoy giilis sa relihiyon sa Kakristiyanohan sa mahinlo moral nga mga prinsipyo sa Pulong sa Diyos. Morag tam-is alang sa bakak nga relihiyon ug sa iyang mga parokyano ang pagdimdim sa mga dalan sa kalibotan, apan pagkadako sa abot sa espirituwal ug lawasnong sakit ang naani nila! Sa dili na madugay, sumala sa gibatbat sa Pinadayag 17:16, 17, maoy “hunahuna” unya sa Diyos nga ang politikanhong mga gahom mosumbalik sa pag-atake sa tibuok kalibotan nga imperyo sa bakak nga relihiyon, ang Bantogang Babilonya, ug laglagon siya. Nianang panahona lamang, samtang iyang makita nga ginatuman batok kaniya ang hukom ni Jehova, siya “mahigmata” gikan sa iyang kalipong sa kahubog.

“Usa ka Katawhan nga Dako ug Kusganon”

13. Sa unsang paagi ang panon sa dulon mopatim-aw nga “dako ug gamhanan” alang sa Kakristiyanohan?

¹³ Ang manalagna ni Jehova nagpadayon sa pagbatbat sa panon sa dulon ingong “usa ka katawhan nga dako ug kusganon,” ug mipatim-aw nga kini maoy ingon alang sa Bantogang Babilonya. (Joel 2:2) Pananglitan, ang klero niini nagmulo sa kamatuoran nga napakyas ang mga relihiyon sa Kakristiyanohan sa paghimog mga kabig sa Buddhistang Hapon. Bisan pa, karong adlawa, kapig 160,000 ka Hapones nga mga Saksi ni Jehova nanghugpa sa maong nasod ug nagadumalag personal nga mga pagtuon sa Bibliya diha sa kapig 200,000 ka balay sa katawhan. Sa Italya ang 180,000 ka mga Saksi ni Jehova karon giila ingong ikaduha lang sa mga Katoliko sa gidaghanon. Sa kawang usa ka Romano Katolikong monsenyor nagmulo sa kamatuoran nga ang mga Saksi ni Jehova nagkuha gikan sa simbahan ug ‘labing menos 10,000 ka matinuohong Katoliko’ kada tuig.a Malipay ang mga Saksi sa pagdawat niini nila.​—Isaias 60:8, 22.

14, 15. Giunsa pagbatbat ni Joel ang panon sa dulon, ug sa unsang paagi kini natuman karong adlawa?

¹⁴ Sa pagbatbat sa panon sa dulon nga dinihogang mga Saksi, ang Joel 2:7-9 nagaingon: “Sama sa mga tawong gamhanan sila nagadalagan. Sama sa mga tawong iggugubat sila nagasaka sa usa ka kuta. Ug sila sa tagsatagsa nagalakat sa iyang kaugalingong mga dalan, ug dili nila usbon ang ilang mga alagianan. Ug sila dili magtinuloray sa usag usa. Sama sa usa ka tawong kusgan diha sa ilang dalan, sila nagapadayon sa paglakat; ug bisan sila mangapukan taliwala sa mga udyong, ang uban dili mosimang. Modali sila sa pagsulod sa siyudad. Manalagan sila ibabaw sa kuta. Manaka sila sa mga kabalayan. Mangagi sila sa mga tamboanan sama sa usa ka kawatan.”

¹⁵ Usa gayod ka tin-aw nga paghulagway sa panon sa dinihogang “mga dulon,” nga karon gikuyogan sa kapig upat ka milyon nga kauban, ang ubang mga karnero! Walay “kuta” sa relihiyosong panagkaaway makapugong kanila. Sa maisogon, sila “nagapadayon sa paglakaw nga mahapsay sa maong naandang buluhaton” sa publikong pagsangyaw ug sa ubang Kristohanong mga kalihokan. (Itandi ang Filipos 3:16.) Inay mokompromiso, sila andam moatubang ug kamatayon, sama sa gihimo sa libolibong Saksi nga ‘napukan taliwala sa mga udyong’ kay midumili sila sa pagdayeg sa Katolikong Hitler sa Nazi nga Alemanya. Ang panon sa dulon nakahatag ug bug-os nga pamatuod diha sa “ang siyudad” sa Kakristiyanohan, nga nangatkat sa tanang kababagan, nga nakasulod, ingnon ta, samag kawatan ngadto sa mga balay samtang ilang gipanagtag ang bilyonbilyong mga basahon sa Bibliya pinaagi sa ilang balay-balay nga kalihokan. Kabubut-on ni Jehova nga igahatag kini nga pamatuod, ug walay gahom sa langit o sa yuta ang makapugong.​—Isaias 55:11.

“Puno sa Balaang Espiritu”

16, 17. (a) Kanus-a ang mga pulong sa Joel 2:28, 29 may dakong katumanan? (b) Unsang matagnaong mga pulong ni Joel ang wala pa bug-os matuman sa unang siglo?

¹⁶ Si Jehova nagasulti sa iyang mga Saksi: “Inyong mahibaloan nga ako anaa sa taliwala sa [espirituwal] nga Israel, ug ako mao si Jehova nga inyong Diyos ug wala nay lain.” (Joel 2:27) Ang iyang katawhan nahidangat sa maong bililhong kaamgohan sa gisugdan ni Jehova pagtuman ang iyang mga pulong sa Joel 2:28, 29: “Ug mahitabo gayod nga igabubo ko ang akong espiritu ibabaw sa tanang matang sa unod, ug ang inyong mga anak nga lalaki ug ang inyong mga anak nga babaye managna.” Kana nahitabo sa Pentekostes 33 K.P., sa dihang ang nagkatigom nga mga tinun-an ni Jesus nadihogan “ug silang tanan napuno sa balaang espiritu.” Sa gahom sa balaang espiritu, sila nangwali, ug sa usa ka adlaw, “mga tulo ka libo ka kalag ang nadugang.”​—Buhat 2:4, 16, 17, 41.

¹⁷ Niadtong malipayong okasyon, gikutlo usab ni Pedro ang Joel 2:30-32: “Igahatag ko ang mga ilhanan sa kalangitan ug sa yuta, ang dugo ug kalayo ug mga haligi nga aso. Ang adlaw mahimong kangitngitan, ug ang bulan mahimong dugo, sa dili pa moabot ang dako ug makalilisang nga adlaw ni Jehova. Ug mahitabo nga ang tagsatagsa nga magatawag sa ngalan ni Jehova mamaluwas.” Kining mga pulonga may bahin nga katumanan sa nalaglag ang Jerusalem niadtong 70 K.P..

18. Kanus-a nagsugod ang mas dakong katumanan sa Joel 2:28, 29?

¹⁸ Hinuon, adunay dugang pagpadapat sa Joel 2:28-32. Sa pagkatinuod, kining tagnaa may talagsaon nga katumanan sukad sa Septiyembre 1919. Niadtong panahona ang usa ka halandumon nga kombensiyon sa katawhan ni Jehova gihimo sa Cedar Point, Ohio, U.S.A. Ang espiritu sa Diyos napadayag sa tin-aw, ug ang iyang dinihogang mga alagad nadasig sa pagsugod sa tibuok-yutang kampanya sa pagwali nga nakaabot karong adlawa. Pagkadakong kauswagan ang misangpot! Ang kapig 7,000 nga tumatambong niadtong kombensiyon sa Cedar Point miusbaw ngadto sa katibuk-ang gidaghanon nga 10,650,158 nga mitambong sa Memoryal sa kamatayon ni Jesus sa Marso 30, 1991. Niini nila, 8,850 lamang ang dinihogang mga Kristohanon. Pagkadako sa kalipay nianang tanan sa pagkakita sa tibuok-yutang mga bunga nga gipatungha sa gamhanang espiritu ni Jehova!​—Isaias 40:29, 31.

19. Tungod sa pagkaduol sa adlaw ni Jehova, unsay angay nga mahimong tinamdan sa matag usa kanato?

¹⁹ Anaa lang sa unahan “ang pag-abot sa dako ug makalilisang nga adlaw ni Jehova” nga maglaglag sa sistema sa mga butang ni Satanas. (Joel 2:31) Ikalipay, “ang tagsatagsa nga magatawag sa ngalan ni Jehova mamaluwas.” (Buhat 2:21) Sa unsang paagi? Si apostol Pedro nagsulti kanato nga “ang adlaw ni Jehova moabot sama sa kawatan” ug midugang: “Sanglit kining tanan nga butang sa ingon pagatunawon, unsang matang sa mga tawo angay nga mamahimo kamo diha sa balaang mga buhat sa kagawian ug mga binuhatan sa diyosnong debosyon, nga nagapaabot ug nagabutang gayod sa hunahuna sa presensiya sa adlaw ni Jehova.” Sa pagbutang sa hunahuna nga haduol na ang adlaw ni Jehova, kita magkalipay usab sa pagkakita sa katumanan sa saad ni Jehova nga mao ang matarong “bag-ong mga langit ug usa ka bag-ong yuta.”​—2 Pedro 3:10-13.

[Footnote]

Makasaysay Ka Ba?

◻ Unsa “ang adlaw ni Jehova”?

◻ Sa unsang paagi pagaanihon ‘ang parras sa yuta,’ ug ngano?

◻ Sa unsang paagi ang Kakristiyanohan nakaagom sa usa ka hampak sa dulon sukad sa 1919?

◻ Sa unsang paagi ang espiritu ni Jehova gibubo diha sa iyang katawhan sa 33 K.P., ug unya sa 1919 na usab?