Nagaalagad Ingong mga Mangingisdag mga Tawo
“Si Jesus miingon kang Simon: ‘Ayaw kahadlok. Sukad karon mangisda ka nag mga tawo nga buhi.’”—LUCAS 5:10.
1, 2. (a) Unsang papel ang gidula sa pagpangisda diha sa kasaysayan sa katawhan? (b) Unsang bag-ong matang sa pagpangisda ang gipailaila sa mga 2,000 ka tuig kanhi?
SULOD sa kaliboan ka tuig, ang katawhan nagapangisda alang sa pagkaon diha sa mga dagat, mga lanaw, ug mga suba. Ang isda gikan sa Nilo maoy importanteng bahin sa pagkaon sa karaang Ehipto. Sa dihang ang mga tubig sa Nilo gihimong dugo sa panahon ni Moises, ang mga Ehiptohanon nag-antos tungod kay dili lamang kanihit sa tubig ang misangpot niadto kondili tungod usab kay nangamatay ang mga isda, nga nakaapektar sa ilang suplay sa pagkaon. Sa ulahi, diha sa Sinai, sa gihatag ni Jehova sa Israel ang Kasugoan, iyang gisultihan sila nga ang pipila ka isda mahimong kan-on apan ang uban mga mahugaw, nga dili pagakan-on. Kini nagpaila nga magakaon ang mga Israelinhon ug isda inig-abot nila sa Yutang Saad, busa ang uban kanila mahimong mga mangingisda.—Exodo 7:20, 21; Levitico 11:9-12.
2 Apan, halos 2,000 ka tuig kanhi, laing matang sa pagpangisda ang gipailaila ngadto sa katawhan. Kini maoy usa ka espirituwal nga matang sa pagpangisda nga makahatag kaayohan dili lamang sa mga mangingisda kondili sa isda usab! Kining matanga sa pagpangisda ginahimo gihapon karong adlawa, nga may dakong mga kaayohan sa milyonmilyon sa tibuok-kalibotan.
“Pagpangisdag mga Tawo nga Buhi”
3, 4. Kinsa ang duha ka mangingisda nga nagpakitag dakong kaikag kang Jesu-Kristo?
3 Sa tuig 29 K.P., si Jesus, ang Usa nga maoy mipailaila niining bag-ong matang sa pagpangisda, gibawtismohan sa suba sa Jordan ni Juan Bawtista. Sa milabay ang pipila ka semana, gitudlo ni Juan si Jesus ngadto sa duha sa iyang mga tinun-an ug miingon: “Tan-awa, mao kana ang Kordero sa Diyos!” Ang usa niining maong tinun-an, kansang ngalan mao si Andres, miingon gilayon sa iyang igsoong si Simon Pedro: “Nakaplagan namo ang Mesiyas”! Makaiikag, si Andres ug Simon maoy mga mangingisda.—Juan 1:35, 36, 40, 41; Mateo 4:18.
4 Sa milabay ang pipila ka panahon, nagwali si Jesus sa mga tawo diha sa daplin sa Dagat sa Galilea, dili halayo sa dapit nga gipuy-an ni Pedro ug Andres. Iyang gisultihan ang mga tawo: “Paghinulsol kamo, kay ang gingharian sa mga langit haduol na.” (Mateo 4:13, 17) Atong mahanduraw nga maikagon si Pedro ug Andres sa pagpamati sa iyang mensahe. Apan, tingali sila wala mahibalo nga si Jesus may isulti kanila nga mobag-o sa ilang mga kinabuhi sa walay kataposan. Dugang pa, ang isulti ug buhaton ni Jesus sa ilang atubangan adunay usa ka hinungdanong kahulogan alang kanatong tanan karong adlawa.
5. Sa unsang paagi ang mangingisdang si Pedro nakaalagad kang Jesus?
5 Atong mabasa: “Samtang ang mga tawo midotdot kaniya aron sa pagpatalinghog sa pulong sa Diyos, siya nagtindog sa daplin sa lanaw sa Genesaret. Ug iyang nakita ang duha ka sakayan diha sa daplin sa lanaw, apan ang mga mangingisda mikawas na niini ug nagwaswas sa ilang mga pukot.” (Lucas 5:1, 2) Niadtong panahona, ang propesyonal nga mga mangingisda kasagarang gabii mangisda, ug giwaswasan niining mga tawhana ang ilang mga pukot human sa gabii nga pagpangisda. Si Jesus mihukom sa paggamit sa usa sa ilang mga sakayan aron mas epektibo pang makawali sa panon sa mga tawo. “Sa paghisakay niya sa usa sa mga sakayan, nga iya ni Simon, siya mihangyo kaniya sa pagtulod niini ug diyutay gikan sa mamala. Unya siya milingkod, ug misugod sa pagtudlo sa mga tawo gikan sa sakayan.”—Lucas 5:3.
6, 7. Unsang milagro labot sa pagpangisda ang gihimo ni Jesus, nga misangpot sa unsang mga pulong bahin sa pagpangisda?
6 Matikdi nga may labaw pa ang anaa sa hunahuna ni Jesus kay sa pagtudlo sa mga tawo: “Sa pagkahuman niyag sulti, siya miingon kang Simon: ‘Palawod kamo ug itaktak didto ang inyong mga pukot aron makakuha kamo.’” Hinumdomi, kining mga mangingisdaa nagpulaw na sa pagpangisda sa tibuok gabii. Dili ikahibulong, si Pedro mitubag: “Magtutudlo, tibuok gabii kaming naghago ug kami wala gayoy nakuha, apan kay nagsugo ka man akong itaktak ang mga pukot.” Unsay nahitabo sa dihang ilang gihimo kini? “Nakakuha silag mabagang duot sa isda. Gani, nagkabusbos ang ilang mga pukot. Ug ilang gikamay ang ilang mga kauban nga didto sa laing sakayan aron sa pagduol ug sa pagtabang kanila; ug nanuol sila, ug ilang gipuno ang duha ka sakayan nga tungod niana hapit kini malunod.”—Lucas 5:4-7.
7 Si Jesus naghimog usa ka milagro. Kadtong bahina sa dagat wala gayoy isda sa tibuok gabii; karon kini puno sa mga isda. Kining milagroha dunay dako kaayong epekto kang Pedro. “Si Simon Pedro mihapa sa tiilan ni Jesus ug miingon: ‘Palayo kanako, Ginoo, kay makasasala ako.’ Kay siya nahibulong ug ang tanan niyang kauban tungod sa isda nga ilang nakuha, ug maingon man usab si Santiago ug si Juan, ang mga anak ni Zebedeo, nga mga kauban ni Simon.” Gipakalma ni Jesus si Pedro ug unya gisulti ang mga pulong nga nakabag-o sa kinabuhi ni Pedro. “Ayaw kahadlok. Sukad karon mangisda ka nag mga tawo nga buhi.”—Lucas 5:8-10.
Mga Mangingisdag mga Tawo
8. Sa unsang paagi ang upat ka propesyonal nga mangingisda misanong sa panapit sa ‘pagpangisda ug mga tawo nga buhi’?
8 Sa ingon gipakasama ni Jesus ang mga tawo sa isda, ug iyang gidapit kining mapaubsanong mangingisda nga ihunong na ang iyang sekular nga trabaho baylo sa mas dakong matang sa pangisda—ang pagpangisdag mga tawo nga buhi. Si Pedro, ug ang iyang igsoong si Andres, midawat sa panapit. “Dihadiha ilang gibiyaan ang ilang mga pukot ug mikuyog kaniya.” (Mateo 4:18-20) Gitawag sunod ni Jesus si Santiago ug si Juan, nga didto sa ilang sakayan nga nagtapak sa ilang mga pukot. Iyang gidapit usab sila aron mahimong mga mangingisdag mga tawo. Unsay ilang pagsanong? “Dihadiha gibiyaan nila ang ilang sakayan ug ang ilang amahan ug mikuyog kaniya.” (Mateo 4:21, 22) Gipakita ni Jesus ang iyang katakos ingong mangingisdag mga kalag. Niining okasyona nakakuha siyag upat ka tawo nga buhi.
9, 10. Unsang pagtuo ang gipakita ni Pedro ug sa iyang mga kauban, ug sa unsang paagi gibansay sila diha sa espirituwal nga pagpangisda?
9 Ang propesyonal nga mangingisda mangitag kapanginabuhian pinaagi sa pagbaligya sa iyang nakuhang isda, apan kana dili mahimo sa usa ka espirituwal nga mangingisda. Busa, kining maong mga tinun-an nagpakitag dakong pagtuo dihang ilang gitalikdan ang tanan aron mosunod kang Jesus. Sila wala magduhaduha, hinunoa, nga molampos ang ilang espirituwal nga pagpangisda. Nahimo ni Jesus ang walay mga isdang tubig nga napuno sa literal nga isda. Sa susama, dihang ilang gitaktak ang ilang mga pukot sa mga tubig sa nasod sa Israel, ang mga tinun-an makaseguro nga, uban sa tabang sa Diyos, sila makapangisdag mga tawo nga buhi. Ang trabaho sa espirituwal nga pagpangisda nga nagsugod balik sa maong panahon nagapadayon, ug si Jehova nagahatag gihapon ug daghang abot.
10 Kapin sa duha ka tuig, ang maong mga tinun-an gibansay ni Jesus sa pagpangisdag mga tawo. Sa usa ka okasyon iyang gihatagan sila ug bug-os nga mga instruksiyon ug gipadala silag una kaniya sa pagwali. (Mateo 10:1-7; Lucas 10:1-11) Sa dihang gibudhian ug gipatay si Jesus, ang mga tinun-an nakurat. Apan ang kamatayon ba ni Jesus nagkahulogan nga natapos na ang pagpangisdag mga tawo? Ang mga hitabo sa ulahi ang mihatag sa tubag.
Pagpangisda Diha sa Dagat sa Katawhan
11, 12. Human sa iyang pagkabanhaw, unsang milagro ang gihimo ni Jesus labot sa pagpangisda?
11 Wala magdugay human nga namatay si Jesus sa gawas sa Jerusalem ug sa iyang pagkabanhaw, ang mga tinun-an mibalik sa Galilea. Diha sa usa ka okasyon pito silang nagtipon duol sa Dagat sa Galilea. Si Pedro miingon nga mangisda siya, ug ang uban mikuyog kaniya. Sa naandan, gabii silang nangisda. Gani, ilang gitaktak na usab ang ilang pukot sa dagat sa tibuok gabii ug wala gayoy nakuha. Unya sa mibanagbanag na, nakita ang daw usa ka tawo nga nagtindog sa baybayon nga nanawag kanila sa tubig: “Mga anak, nakakuka ba kamog ikasula?” Ang mga tinun-an mitubag: “Wala!” Busa gisugo sila sa usa nga nagtindog sa baybayon: “‘Itaktak ninyo ang pukot sa tuong dapit sa sakayan ug makakuha kamo.’ Unya ilang gitaktak kini, apan sila wala makadaog sa pagbitad niini tungod sa kadaghan sa mga isda.”—Juan 21:5, 6.
12 Pagkatalagsaon nga kasinatian! Tingali ang mga tinun-an nahinumdom sa sayosayo nga milagro nga nalangkit sa pagpangisda, ug labing menos usa kanila nakaamgo kon kinsa kanang diha sa baybayon. “Ang tinun-an nga gimahal ni Jesus miingon kang Pedro: ‘Ang Ginoo kana!’ Busa si Simon Pedro, sa pagkadungog nga ang Ginoo diay kadto, misul-ob sa iyang pang-ibabaw nga sapot, kay naghukas man siya, ug milukso ngadto sa tubig. Apan ang ubang mga tinun-an nangabot sakay sa gamayng sakayan, kay dili man sila layo sa daplin, mga kasiyaman ka metros lamang.”—Juan 21:7, 8.
13. Human nga mikayab si Jesus sa langit, unsang internasyonal nga programa sa pagpangisda ang gisugdan?
13 Unsay gipaila niining milagroha? Nga ang buluhaton sa pagpangisdag mga tawo wala pa matapos. Kining kamatuorana gipasiugda dihang tulo ka higayong gisultihan ni Jesus si Pedro—ug pinaagi kaniya ang tanang mga tinun-an—sa pagpakaon sa mga karnero ni Jesus. (Juan 21:15-17) Oo, usa ka espirituwal nga programa sa pagpakaon ang anaa sa unahan. Sa wala pa siya mamatay, siya mitagna: “Kining maayong balita sa gingharian igawali sa tanang ginapuy-ang yuta sa pagpamatuod sa tanang kanasoran.” (Mateo 24:14) Karon mao na kadto ang panahon nga sugdan ang unang siglong katumanan sa maong tagna. Gitaktak sa iyang mga tinun-an ang ilang mga pukot ngadto sa dagat sa katawhan, ug may nakuha ang mga pukot.—Mateo 28:19, 20.
14. Sa unsang paagi gipanalanginan ang pagpangisda sa mga sumusunod ni Jesus sa mga tuig sa wala pa laglaga ang Jerusalem?
14 Sa wala pa siya mokayab sa trono sa iyang Amahan didto sa langit, si Jesus miingon sa iyang mga sumusunod: “Kamo magadawat ug gahom sa diha nga kakunsaran na kamo sa balaang espiritu, ug kamo mao unya ang akong mga saksi sa Jerusalem ug sa tibuok Judea ug Samaria ug hangtod sa kinatumyan sa yuta.” (Buhat 1:8) Sa dihang gibubo ang balaang espiritu diha sa mga tinun-an sa Pentekostes 33 K.P., ang dakong buluhaton sa espirituwal nga pagpangisda sa tibuok yuta gisugdan. Sa adlaw sa Pentekostes lamang, tulo ka libo ka kalag ang nakuhang buhi, ug human niadto “ang gidaghanon sa mga tawo miabot na ug mga lima ka libo.” (Buhat 2:41; 4:4) Ang pag-uswag nagpadayon. Ang rekord nag-asoy kanato: “Ang mga magtutuo sa Ginoo midaghan, mga panon sa mga lalaki ug mga babaye.” (Buhat 5:14) Sa ulahi, ang mga Samarianhon midawat sa maayong balita, ug wala magdugay human niadto midawat usab ang dili-sirkunsadong mga Hentil. (Buhat 8:4-8; 10:24, 44-48) Sa mga 27 ka tuig human sa Pentekostes, si apostol Pablo misulat ngadto sa mga Kristohanon sa Colosas nga ang maayong balita “gikawali na ngadto sa tanang binuhat sa silong sa langit.” (Colosas 1:23) Klaro, ang mga tinun-an ni Jesus nakapangisda sa layo gikan sa mga dagat sa Galilea. Ilang nataktak na ang ilang mga pukot diha sa mga Hudiyo nga nakatag sa tibuok Imperyo sa Roma, ug tingali sa dili-mabungahong kadagatan sa mga tawong dili-Hudiyo. Ug puno ang ilang mga pukot. Alang sa mga panginahanglan sa unang-siglong mga Kristohanon, ang tagna ni Jesus diha sa Mateo 24:14 natuman sa wala pa malaglag ang Jerusalem sa 70 K.P.
Pagpangisdag mga Tawo sa “Adlaw sa Ginoo”
15. Diha sa basahon sa Pinadayag, unsang dugang buluhaton sa pagpangisda ang gitagna, ug kanus-a kadto gihimo?
15 Apan, daghan pa ang naghulat sa unahan. Sa hapit nang matapos ang unang siglo, gihatagan ni Jehova ang kataposang buhi nga apostol, si Juan, ug usa ka kapadayagan sa mga butang nga mahitabo sa panahon “sa adlaw sa Ginoo.” (Pinadayag 1:1, 10) Ang usa ka talagsaong bahin mao ang pagpahayag sa maayong balita sa tibuok-kalibotan. Atong mabasa: “Nakita ko ang laing manulonda nga naglupad taliwala sa kalangitan, ug siya adunay gidalang walay kataposang maayong balita ngadto sa mga nagpuyo sa yuta, ug sa tanang kanasoran ug kabanayan ug katawhan.” (Pinadayag 14:6) Ilalom sa pagtultol sa manulonda iwali sa mga alagad sa Diyos ang maayong balita sa literal sa tanang ginapuy-ang yuta, dili lamang sa tibuok Imperyo sa Roma. Usa ka tibuok-yutang buluhaton sa pagpangisdag mga kalag ang ginahimo, ug ang atong adlaw nakakita sa katumanan sa maong panan-awon.
16, 17. Kanus-a gisugdan ang ulahing-adlaw nga espirituwal nga pagpangisda, ug sa unsang paagi gipanalanginan kini ni Jehova?
16 Unsa may lakat sa pagpangisda niining ika-20ng siglo? Sayosayo pa, ang mga mangisngisda diyutay ra. Human nga natapos ang Gubat sa Kalibotan I, diha lamay mga upat ka libong aktibong mga magwawali sa maayong balita, madasigong mga lalaki ug mga babaye diin ang kadaghanan dinihogan. Ilang gitatak ang ilang mga pukot matag higayong magbukas si Jehova ug dalan, ug daghang mga kalag ang nakuhang buhi. Human sa ikaduhang gubat sa kalibotan, gibuksan ni Jehova ang bag-ong mga tubig nga kapangisdaan. Ang mga misyonaryo nga nakaeskuyla sa Watchtower Bible School of Gilead maoy nanguna sa buluhaton diha sa daghang kayutaan. Ang mga nasod sama sa Hapon, Italya, ug Espanya, nga sa sinugdan daw dili isdaanon, sa ulahi nakaanig daghang mga kalag. Bag-o pa usab natong nahibaloan kon unsa ka malamposon ang pagpangisda sa Sidlakang Uropa.
17 Karong adlawa, diha sa daghang mga nasod ang mga pukot halos nangabusbos. Tungod sa dakong ani sa mga kalag giorganisar ang bag-ong mga kongregasyon ug mga sirkito. Aron sila masulod, bag-ong mga Kingdom Hall ug mga Assembly Hall ang ginatukod kanunay. Dugang mga ansiano ug ministeryal nga mga alagad ang gikinahanglan sa pag-atiman sa pag-uswag. Usa ka dakong buluhaton ang gisugdan sa mga matinumanon balik sa 1919. Sa literal nga paagi, ang Isaias 60:22 natuman. ‘Ang gamay nahimong usa ka libo,’ samtang kadtong upat ka libong mga mangingisda nahimong kapin sa upat ka milyon karong adlawa. Ug ang kataposan wala pa moabot.
18. Sa unsang paagi atong masundog ang maayong panig-ingnan sa unang-siglong espirituwal nga mga mangingisdag mga tawo?
18 Unsay kahulogan niining tanan alang kanato ingong mga indibiduwal? Ang kasulatan nag-ingon nga sa dihang si Pedro, Andres, Santiago, ug Juan gidapit aron mahimong mga mangingisdag mga tawo, “ilang . . . gibiyaan ang tanan ug mikuyog kang [Jesus].” (Lucas 5:11) Pagkamaayong panig-ingnan sa pagtuo ug dedikasyon! Ato bang maugmad ang samang espiritu sa pagsakripisyo sa kaugalingon, ang samang kaandam sa pag-alagad kang Jehova bisag unsa pay bili? Minilyon ang misanong nga sila makahimo. Sa unang siglo, ang mga tinun-an nangisdag mga tawo bisag asa nga itugot ni Jehova. Kon kaha diha sa mga Hudiyo o mga Hentil, sila nangisda sa bug-os. Kita usab mosangyaw ngadto sa tanan nga walay pagpugong o pagpihig.
19. Unsay angay natong buhaton kon ang mga tubig nga atong pangisdaan daw dili mabungahon?
19 Apan, komusta kon ang imong teritoryo sa pagkakaron daw dili-mabungahon? Ayaw ug kaluya. Hinumdomi, gipuno ni Jesus ang mga pukot sa mga tinun-an human nga sila nangisda sa tibuok gabii nga walay nakuha. Ang sama mahimong mahitabo sa espirituwal nga paagi. Sa Ireland, pananglitan, ang matinumanong mga Saksi naghago sa daghang tuig nga diyutay lamag mga sangpotanan. Bisan pa, karong bag-o kana nausab. Ang 1991 Yearbook of Jehovah’s Witnesses nagtaho nga sa kataposan sa 1990 nga tuig sa pag-alagad, gitagamtam sa Ireland ang sunodsunod nga 29 ka kinatas-ang ihap! Tingali ang imong teritoryo sa pila ka adlaw mobunga ug sama. Basta itugot pa ni Jehova, padayon sa pagpangisda!
20. Kanus-a kita makigbahin sa pagpangisdag mga tawo?
20 Sa Israel, ang mga mangingisda nangisda sa gabii, samtang ang tanan mainit ug komportable sa higdaanan. Sila nanggawas, dili sa panahong kombenyente nila, kondili sa panahong makakuha silag labing daghang isda. Kinahanglang tun-an usab nato ang atong teritoryo aron kita makapangisda, ingnon ta, sa panahong ang kadaghanan sa mga tawo anaa sa balay ug madinawaton. Tingali himoon kini magabii, o sa mga hinapos sa semana, o sa ubang mga panahon. Bisag unsa pang panahona, buhaton nato ang kutob sa atong mahimo aron atong makita ang mga tawong matarong ug kasingkasing.
21. Unsay angay natong hinumdoman kon kanunay nga ginabalikbalikan ang atong teritoryo?
21 Komusta kon kanunay nga ginabalikbalikan ang atong teritoryo? Ang propesyonal nga mga mangingisda sa kalibotan kanunay nagreklamo nga ang ilang dapit nga pangisdaan nasobrahan sa pagpangisda. Apan ang ato bang espirituwal nga mga dapit nga pangisdaan mapasobrahan sa pagpangisda? Dili gayod! Daghang mga teritoryo may pag-uswag gihapon bisag kanunay nga ginabalikbalikan. Ang uban nagapatungha ug mas maayo pa tungod kay maayong pagkatrabaho. Bisan pa, kon kanunay nga ginabisitahan ang mga balay, paneguroa gayod nga ang tanang wala-sa-balay malista ug duawon sa ulahi. Tun-i ang nagkalainlaing mga ulohan sa panaghisgot. Hunahunaa nga may moduaw pa pag-usab, busa ayaw pagdugay kon abiabihon ka o kaha ayaw pakiglalis sa tagbalay. Ug palamboa ang imong mga katakos sa pagsangyaw sa kadalanan ug sa dili-pormal nga pagsangyaw. Itaktak ang inyong espirituwal nga pukot sa tanang higayon ug sa tanang posibleng paagi.
22. Unsang dakong pribilehiyo ang atong ginatagamtam karong panahona?
22 Hinumdomi, niining matanga sa pagpangisda ang mga mangingisda ug ang mga isda makabaton ug kaayohan. Kon ang mga tawo nga atong makuha molahutay, sila mahimong mabuhing walay kataposan. Gidasig ni Pablo si Timoteo: “Magpadayon ka niining mga butanga, kay sa pagbuhat niini maluwas mo ang imong kaugalingon ug ang mga magpatalinghog kanimo.” (1 Timoteo 4:16) Si Jesus mao ang unang mibansay sa iyang mga tinun-an diha sa espirituwal nga pagpangisda, ug kining buluhatona ginahimo gihapon ubos sa iyang pagtultol. (Itandi ang Pinadayag 14:14-16.) Pagkadakong pribilehiyo ang atong nabatonan sa pagbuhat ilalom kaniya sa pagtuman niini! Atong padayong itaktak ang atong mga pukot samtang nagatugot pa si Jehova. Unsa pang buluhatona ang molabaw pa niini kay sa pagpangisda ug mga kalag nga buhi?
Makahinumdom Ka Ba?
◻ Unsang buluhatona nga gibansay ni Jesus ang iyang mga sumusunod nga maoy buhaton?
◻ Sa unsang paagi gipakita ni Jesus nga ang espirituwal nga buluhaton sa pagpangisda wala matapos human nga siya namatay?
◻ Sa unsang paagi gipanalanginan ni Jehova ang espirituwal nga buluhaton sa pagpangisda sa unang siglo?
◻ Unsang abundang ani sa isda ang nakuha sa panahon “sa adlaw sa Ginoo”?
◻ Sa unsang paagi kita ingong indibiduwal mas magmalamposon pa sa pagpangisdag mga tawo?
[Hulagway sa panid 15]
Human gibanhaw si Jesus, gipadako sa iyang mga apostol ang balaang buluhaton sa pagpangisdag mga tawo