Si Jehova Mohatag ug Gahom sa Gikapoy

“[Si Jehova] naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom.”—ISAIAS 40:29.

 1. Iilustrar ang gahom nga anaa sa mga butang nga gilalang sa Diyos.

ANG gahom ni Jehova walay kinutoban. Ug pagkadagaya sa dinamikong kusog nga anaa sa mga butang nga iyang gilalang! Ang gamay kaayong atomo—ang blokeng igtutukod sa tanang butang—gaming gayod kaayo nga ang usa ka tulo sa tubig nasudlan ug usa ka gatos ka bilyon bilyong atomo.a Ang tanang kinabuhi sa atong kalibotan nagadepende sa enerhiya nga ipatungha tungod sa reaksiyon sa atomo diha sa adlaw. Apan unsa ka daghang enerhiya sa adlaw ang gikinahanglan aron masustinehan ang yutan-ong kinabuhi? Ang yuta nagdawat lamang ug gamay nga tipik sa tanang enerhiya nga ginabuga sa adlaw. Bisan pa niana, ang gamay kaayong tipik sa enerhiya sa adlaw nga mahulog sa yuta mas daghan pa kay sa tanang enerhiya nga gigamit sa mga industriya sa kalibotan.

 2. Sa paninugdan, unsay giingon sa Isaias 40:26 bahin sa gahom ni Jehova?

² Kon maghunahuna man ugaling kita bahin sa atomo o mobali sa atong pagtagad sa dakong uniberso, kita makadayeg sa pagkadako sa gahom ni Jehova. Dili ikahibulong nga siya nakaingon: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Tungod sa kadagaya sa dinamikong kusog, kay siya usab mabaskog sa gahom, walay usa kanila ang nawala”! (Isaias 40:26) Oo, si Jehova “mabaskog sa gahom,” ug siya ang Tuboran sa “dinamikong kusog” nga gigamit sa pagpatungha sa tibuok uniberso.

Labaw pa sa Normal nga Gahom ang Gikinahanglan

3, 4. (a) Unsa ang pipila ka butang nga makapakapoy kanato? (b) Unsang pangutana ang kinahanglang tagdon?

³ Bisag ang gahom sa Diyos walay kinutoban, ang tawo kapoyon. Bisag asa kita moadto, kita makakita ug mga tawong gikapoy. Sila momata nga gikapoy, motrabaho o moeskuyla nga gikapoy, mopauli nga gikapoy, ug matulog nga dili lamang gikapoy kondili nangaugtas. Ang uban nangandoy nga makaadto sila ug usa ka dapit ug makabaton sa gikinahanglan kaayong pahulay. Ingong mga alagad ni Jehova, kita usab kapoyon, kay ang atong kinabuhi sa diyosnong debosyon nagkinahanglan ug dakong paghago. (Marcos 6:30, 31; Lucas 13:24; 1 Timoteo 4:8) Ug daghan pang ubang mga butang nga makatiti sa atong kusog.

⁴ Bisan pag kita mga Kristohanon, dili kita makalingkawas sa mga problema nga ginaagoman sa mga tawo sa katibuk-an. (Job 14:1) Ang sakit, mga kalisod sa panalapi, o ubang mga problema nga kasagaran sa kinabuhi mohatag ug kahigawad, nga makawala sa kadasig. Dugang pa niining mga problemaha mao ang mga pagsulay nga kasagarang giantos niadtong gilutos tungod sa pagkamatarong. (2 Timoteo 3:12; 1 Pedro 3:14) Tungod sa adlaw-adlawng mga kalisod gikan sa kalibotan ug sa pagsupak sa atong buluhaton sa pagsangyaw sa Gingharian, ang uban kanato tingali gikapoy na kaayo nga morag gusto na natong maghinayhinay sa pag-alagad kang Jehova. Dugang pa, sa pagpaningkamot sa pagbungkag sa atong integridad ngadto sa Diyos, gigamit ni Satanas nga Yawa ang tanang paagi nga iyang magamit. Nan, sa unsang paagi kita makabaton ug espirituwal nga kalig-on nga gikinahanglan aron dili kapoyon ug mohunong?

 5. Nganong labaw pa sa tawhanong kusog ang gikinahanglan aron mahimo ang Kristohanong ministeryo?

⁵ Aron malig-on sa espirituwal, kita kinahanglang mosalig kang Jehova, ang gamhanan sa ngatanan nga Maglalalang. Gihisgotan ni apostol Pablo nga ang Kristohanong ministeryo nagkinahanglan ug labaw pa kay sa normal nga gahom sa mga tawong dili-hingpit. Siya nagsulat: ‘Nabatonan namo kini nga bahandi diha sa mga sudlanang kulonon, aron ang gahom nga labaw sa kasarangan maiya sa Diyos ug dili gikan sa among kaugalingon.’ (2 Corinto 4:7) Ang dinihogang mga Kristohanon nagabuhat sa ‘ministeryo sa pagpasig-uli’ uban sa tabang sa ilang mga kauban nga dunay yutan-ong paglaom. (2 Corinto 5:18; Juan 10:16; Pinadayag 7:9) Sanglit kita nga mga tawong dili-hingpit nagabuhat man sa buluhaton sa Diyos bisan pa sa paglutos, dili nato mahimo kini pinaagi sa atong kaugalingong kusog lamang. Si Jehova motabang kanato pinaagi sa iyang balaang espiritu, ug busa ang atong kahuyangan makahatag ug himaya sa iyang gahom. Ug pagkadako sa atong bation nga kahupayan tungod sa pasalig nga si “Jehova magasapnay sa mga matarong”!—Salmo 37:17.

‘Si Jehova Mao ang Atong Dakong Kusog’

 6. Sa unsang paagi ang Kasulatan nagpasalig kanato nga si Jehova mao ang atong Tuboran sa kusog?

⁶ Ang atong langitnong Amahan maoy “mabaskog sa gahom” ug makahatag dayon kanato ug kalagsik. Sa pagkamatuod, kita gisultihan: “[Si Jehova] naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom. Ang mga batang lalaki kapoyon ug maluya, ug ang mga batan-ong lalaki sa walay pakyas mangapandol, apan kadtong naglaom kang Jehova maulian sa kusog. Sila manglupad nga may mga pako nga sama sa mga agila. Sila managan ug dili maluya; sila manglakaw ug dili kapoyon.” (Isaias 40:29-31) Tungod sa nagdaghang kalisod, kita tingali mobati usahay nga sama sa usa ka gikapoy nga magdadagan kansang mga tiil daw dili na makadaog kaniya sa pagpadayon ug dagan. Apan ang dag-anan diha sa lumba sa kinabuhi anaa na sa unahan, ug kinahanglang dili kita mohunong. (2 Cronicas 29:11) Ang atong Kaaway, ang Yawa, nagsuroysuroy “sama sa usa ka leyon nga nagangulob,” ug buot niya nga kita mohunong. (1 Pedro 5:8) Atong hinumdoman nga si ‘Jehova mao ang atong kusog ug ang atong taming,’ ug siya naghatag ug dagayang mga tagana aron sa ‘paghatag ug gahom sa gikapoy.’—Salmo 28:7.

7, 8. Unsay pamatuod nga si Jehova naglig-on kang David, Habacuc, ug Pablo?

⁷ Gihatagan ni Jehova si David ug kusog nga gikinahanglan aron makapadayon atubangan sa dagkong mga babag. Uban sa bug-os nga pagtuo ug pagsalig, si David nakasulat: “Pinaagi sa Diyos makabaton kami ug dakong kusog, ug iyang pagayatak-yatakan ang among mga kaaway.” (Salmo 60:12) Gihatagan usab ni Jehova si Habacuc ug kusog aron matapos niya ang iyang buluhaton ingong manalagna. Ang Habacuc 3:19 nag-ingon: “Si Jehova nga Soberanong Ginoo mao ang akong dakong kusog; ug ang akong mga tiil iyang himoon nga sama sa mga tiil sa mga bayeng osa, ug iya akong palakton sa akong hatag-as nga mga dapit.” Hinungdanon usab ang panig-ingnan ni Pablo, kinsa nagsulat: ‘Sa tanang butang ako adunay kusog pinaagi [sa Diyos] nga naghatag ug gahom kanako.’—Filipos 4:13.

⁸ Sama kang David, Habacuc, ug Pablo, kita angayng magpasundayag ug pagtuo sa katakos sa Diyos sa paglig-on kanato ug sa iyang gahom sa pagluwas kanato. Kay nahibalo nga ang Soberanong Ginoong Jehova mao ang Tuboran sa “dakong kusog,” ato karong hisgotan ang pipila ka paagi aron makakuha ug espirituwal nga kusog gikan sa mga tagana nga madagayaong gihatag sa Diyos.

Espirituwal nga mga Tagana nga Makapabaskog Kanato

 9. Unsang papel ang gidula sa Kristohanong mga publikasyon sa pagpabaskog kanato?

⁹ Ang kugi nga pagtuon sa Kasulatan pinaagi sa tabang sa Kristohanong mga publikasyon makapabaskog ug makapalig-on kanato. Ang salmista miawit: “Malipayon ang tawo . . . [kansang] kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii. Ug siya mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.” (Salmo 1:1-3) Sama nga kinahanglang mokaon kita aron makabaton ug pisikal nga kusog, kita kinahanglang mokaon ug espirituwal nga pagkaon nga gitagana sa Diyos pinaagi sa iyang Pulong ug sa Kristohanong mga publikasyon aron masustinehan ang atong espirituwal nga kusog. Busa, ang makahuloganong pagtuon ug pagpamalandong hinungdanon.

10. Kanus-a kita makakitag panahon alang sa pagtuon ug pagpamalandong?

¹⁰ Tinuod nga magantihon ang pagpamalandong sa “lawom nga mga butang sa Diyos.” (1 Corinto 2:10) Apan kanus-a kita makakitag panahon aron makapamalandong? Ang anak ni Abraham nga si Isaac “naglakawlakaw aron mamalandong didto sa kapatagan sa hapit na mogabii.” (Genesis 24:63-67) Ang salmistang David ‘namalandong sa Diyos panahon sa mga pagbantay magabii.’ (Salmo 63:6) Kita makatuon sa Pulong sa Diyos ug makapamalandong niana sa buntag, sa hapon, sa gabii—sa pagkatinuod, sa bisan unsang panahon. Ang pagtuon ug pagpamalandong motultol ngadto sa usa sa mga tagana ni Jehova nga makapalig-on sa espirituwal—ang pag-ampo.

11. Nganong kinahanglan nga hatagan natog dakong importansiya ang makanunayong pag-ampo?

¹¹ Ang makanunayong pag-ampo ngadto sa Diyos makatabang sa pagpabaskog kanato. Busa hinaot nga kita ‘molahutay sa pag-ampo.’ (Roma 12:12) Usahay, kita kinahanglang espesipiko nga mangayog kaalam ug kusog nga gikinahanglan aron maantos ang pagsulay. (Santiago 1:5-8) Kita usab magpasalamat ug magdayeg sa Diyos sa dihang makita nato ang katumanan sa iyang mga katuyoan o sa dihang makakita nga kita iyang gilig-on aron makapadayon diha sa iyang pag-alagad. (Filipos 4:6, 7) Kon kita magpabiling suod kang Jehova pinaagi sa pag-ampo, kita dili gayod niya pagabiyaan. “Tan-awa!” miawit si David, “ang Diyos mao ang akong magtatabang.”—Salmo 54:4.

12. Nganong angay kitang mangayo sa Diyos alang sa iyang balaang espiritu?

¹² Ang atong langitnong Amahan nagpabaskog ug naglig-on kanato pinaagi sa iyang balaang espiritu, o aktibong puwersa. Si Pablo nagsulat: ‘Ako moluhod atubangan sa Amahan . . . aron itugot unta niya sumala sa bahandi sa iyang himaya nga kamo mahimong kusganon diha sa inyong pagkatawo sa sulod uban sa gahom pinaagi sa iyang espiritu.’ (Efeso 3:14-16) Kita kinahanglang mag-ampo alang sa balaang espiritu, masaligon nga panalanginan kita ni Jehova niana. Si Jesus nangatarongan: Kon ang usa ka bata mangayog isda, hatagan ba siya ug bitin sa usa ka mahigugmaong amahan? Siyempre dili gayod. Busa, siya mihinapos: ‘Kon kamo, bisan tuod [makasasala ug busa kapin kun kulang] daotan, mahibalong mohatag ug maayong mga gasa ngadto sa inyong mga anak, labaw na nga mohatag ang inyong Amahan sa langit ug balaang espiritu niadtong nagapangayo kaniya!’ (Lucas 11:11-13) Kita mag-ampo nga may ingon niana nga pagsalig ug hinumdoman kanunay nga ang matinumanong mga alagad sa Diyos “mahimong kusganon” pinaagi sa iyang espiritu.

Ang Kongregasyon Usa ka Makapalig-ong Tabang

13. Sa unsang paagi angay natong tamdon ang Kristohanong mga tigom?

¹³ Si Jehova nagpabaskog kanato pinaagi sa mga tigom sa Kristohanong kongregasyon. Si Jesus miingon: “Kay diin gani may duha o tulo nga nagkatigom sa akong ngalan, anaa ako sa ilang taliwala.” (Mateo 18:20) Sa dihang gisaad kadto ni Jesus, siya naghisgot sa mga butang nga kinahanglang atimanon niadtong nagapanguna sa kongregasyon. (Mateo 18:15-19) Apan, ang prinsipyo sa iyang mga pulong ikapadapat sa tanan natong mga tigom, mga asembliya, ug mga kombensiyon, nga pagabuksan ug pagatiklopan sa pag-ampo pinaagi sa iyang ngalan. (Juan 14:14) Busa usa ka pribilehiyo ang pagtambong niining Kristohanong mga panagkatigom, bisag pipila lang o libolibo ang nanambong. Busa ipakita nato ang dakong pasalamat alang niining mga okasyona nga gilaraw aron sa paglig-on kanato sa espirituwal ug sa pagpukaw kanato sa paghigugma ug sa maayong mga binuhatan.—Hebreohanon 10:24, 25.

14. Unsang kaayohan ang atong makuha gikan sa mga paningkamot sa Kristohanong mga ansiyano?

¹⁴ Ang Kristohanong mga ansiyano motaganag espirituwal nga tabang ug pagdasig. (1 Pedro 5:2, 3) Si Pablo nagtabang ug nagdasig sa mga kongregasyon nga iyang gialagaran, sama sa ginahimo sa nagapanawng mga magtatan-aw karong panahona. Sa pagkatinuod, siya nangandoy nga makauban ang mga isigkamagtutuo aron magdinasigay sa usag usa. (Buhat 14:19-22; Roma 1:11, 12) Hinaot nga magpakita kita ug apresasyon sa atong lokal nga mga ansiyano ug sa ubang Kristohanong mga magtatan-aw, nga nagdulag dakong bahin sa pagpalig-on kanato sa espirituwal.

15. Sa unsang paagi ang mga isigkamagtutuo sa atong kongregasyon mahimong usa ka “makapalig-on nga tabang”?

¹⁵ Ang mga isigkamagtutuo nga naglangkob sa atong kongregasyon mahimong usa ka “makapalig-on nga tabang.” (Colosas 4:10, 11) Ingong ‘tinuod nga mga kauban’ sila makatabang kanato sa panahon sa kalisod. (Proverbio 17:17) Pananglitan, sa dihang ang 220 ka alagad sa Diyos gikuha gikan sa kampong konsentrasyon sa Sachsenhausen nga giguwardiyahan sa Nazi sa 1945, sila nag-atubang ug 200 kilometros nga panaw. Sila nagbiyahe nga grupo-grupo, ug ang mga kusgan maoy moguyod sa mga luya diha sa pipila ka gagmayng mga karomata. Ang resulta? Diha sa martsa sa kamatayon nga nakakalas ug kinabuhi nga kapin sa 10,000 ka binilanggo sa kampong konsentrasyon, walay usa sa mga Saksi ni Jehova ang namatay. Kining maong mga asoy migula sa mga publikasyon sa Watch Tower, apil ang Yearbook of Jehovah’s Witnesses ug Mga Saksi ni Jehova—Mga Magmamantala sa Gingharian sa Diyos, nagpamatuod nga ang Diyos mohatag ug gahom sa iyang katawhan, aron sila dili mohunong.—Galacia 6:9.b

Napalig-on Pinaagi sa Atong Pag-alagad sa Kanataran

16. Sa unsang paagi ang makanunayong pagpakigbahin sa ministeryo makalig-on kanato sa espirituwal?

¹⁶ Ang makanunayong pagpakigbahin sa buluhaton sa pagsangyaw sa Gingharian makalig-on kanato sa espirituwal. Kining buluhatona motabang kanato sa pagpunting sa atong pagtagad diha sa Gingharian sa Diyos ug lantawon kanunay ang pagkawalay-kataposan ug ang mahimayaong mga panalangin niini. (Judas 20, 21) Ang mga saad sa Kasulatan nga atong ginahisgotan diha sa atong ministeryo naghatag kanato ug paglaom ug naghimo kanato nga sama ka determinado sa manalagnang Miqueas, kinsa miingon: “Kita . . . magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.”—Miqueas 4:5.

17. Unsang mga sugyot ang gihatag labot sa mga pagtuon sa Bibliya diha sa balay?

¹⁷ Ang atong kaugalingong relasyon kang Jehova molig-on samtang pahimuslan pa natog maayo ang Kasulatan sa pagtudlo sa uban. Pananglitan, sa dihang magdumala ug mga pagtuon sa Bibliya pinaagi sa tabang sa librong Kahibalo nga Motultol sa Kinabuhing Walay Kataposan, maalamong basahon ug hisgotan ang pipila ka gisitar nga mga teksto. Kini makatabang sa estudyante ug makalig-on sa atong kaugalingong espirituwal nga pagsabot. Kon ang estudyante maglisod sa pagsabot sa usa ka hunahuna o sa usa ka ilustrasyon sa Bibliya, labaw pa sa usa ka sesyon sa pagtuon ang gikinahanglan aron makobrehan ang usa ka kapitulo sa librong Kahibalo. Pagkamalipayon nato nga mangandam ug maayo ug maghimog dugang paningkamot sa pagtabang sa uban nga masuod sa Diyos!

18. Iilustrar kon sa unsang paagi ang librong Kahibalo gigamit sa epektibong paagi.

¹⁸ Matag tuig, ang librong Kahibalo epektibong gigamit sa pagtabang sa libolibo nga mahimong dedikadong mga alagad ni Jehova, ug apil na niini ang daghan niadtong walay kahibalo sa Bibliya. Pananglitan, sa bata pa siya, usa ka tawong Hindu sa Sri Lanka nakadungog sa usa ka Saksi nga naghisgot bahin sa Paraiso. Sa milabay ang pipila ka tuig iyang giduol ang babaye, ug wala magdugay ang bana sa babaye nagsugod sa pagtuon sa Bibliya uban kaniya. Sa pagkatinuod, ang batan-ong lalaki moabot aron sa pagtuon adlaw-adlaw, ug ang librong Kahibalo natapos sa mubo lamang nga panahon. Siya nagsugod sa pagtambong sa tanang tigom, mibulag sa iyang relihiyon kanhi, ug nahimong usa ka magmamantala sa Gingharian. Sa dihang siya gibawtismohan, siya nagdumala na ug pagtuon sa Bibliya uban sa iyang kaila.

19. Samtang atong unahon pagpangita ang Gingharian, bahin sa unsa nga kita makasalig?

¹⁹ Ang pagpangita ug una sa Gingharian mohatag kanato ug makalig-on nga kalipay. (Mateo 6:33) Bisan pag makaagom kita ug lainlaing mga pagsulay, kita magpadayon nga malipayon ug madasigon sa pagmantala sa maayong balita. (Tito 2:14) Naabot sa daghan kanato ang mga kinahanglanon alang sa bug-os-panahong pag-alagad, ug ang uban nag-alagad sa dapit nga mas dako ang panginahanglan alang sa mga magwawali. Kon kaha kita malipayong nagpasiugda sa intereses sa Gingharian niini o sa ubang mga paagi, kita masaligon nga si Jehova dili makalimot sa atong buhat ug sa gugma nga atong gipakita alang sa iyang ngalan.—Hebreohanon 6:10-12.

Padayon Diha sa Kusog ni Jehova

20. Sa unsang paagi ikapasundayag nato nga kita nagsalig kang Jehova alang sa kusog?

²⁰ Sa kinasingkasing, ipasundayag nato nga kita nagalaom kang Jehova ug nagsalig kaniya alang sa kusog. Atong mahimo kini pinaagi sa bug-os nga pagpahimulos sa espirituwal nga mga tagana nga iyang gihimo pinaagi sa ‘matinumanong ulipon.’ (Mateo 24:45) Ang personal ug kongregasyonal nga pagtuon sa Pulong sa Diyos uban sa tabang sa Kristohanong mga publikasyon, kinasingkasing nga pag-ampo, espirituwal nga tabang sa mga ansiyano, maayong mga panig-ingnan sa matinumanong mga isigkamagtutuo, ug regular nga pagpakigbahin sa ministeryo maoy apil sa mga tagana nga makalig-on sa atong relasyon kang Jehova ug mohatag kanato ug gahom aron makapadayon sa iyang balaang pag-alagad.

21. Sa unsang paagi gipadayag ni apostol Pedro ug Pablo ang panginahanglan ug hinatag-sa-Diyos nga kusog?

²¹ Bisan pa sa atong tawhanong kaluyahon, si Jehova molig-on kanato sa pagtuman sa iyang kabubut-on kon kita mosalig kaniya alang sa tabang. Kay nahibalo nga nagkinahanglan sa maong tabang, si apostol Pedro nagsulat: “Kon ang usa magaalagad, paalagara siya ingon nga nagasandig diha sa kusog nga ginahatag sa Diyos.” (1 Pedro 4:11) Ug gipakita ni Pablo ang iyang pagsalig sa hinatag-sa-Diyos nga kusog sa dihang siya miingon: ‘Ako nagakalipay sa kaluyahon, sa mga pag-insulto, sa mga higayon sa panginahanglan, sa mga paglutos ug mga kalisdanan, alang kang Kristo. Kay sa dihang ako maluya, ako gamhanan hinuon.’ (2 Corinto 12:10) Hinaot nga ipasundayag nato ang samang pagtuo nga mohatag ug kahimayaan sa Soberanong Ginoong Jehova, kinsa mohatag ug gahom sa gikapoy.—Isaias 12:2.

[Mga footnote]

Unsaon Nimo Pagtubag?

• Nganong ang katawhan ni Jehova nagkinahanglan ug labaw kay sa kasarangang gahom?

• Unsay pamatuod sa Kasulatan nga ang Diyos mohatag ug kusog sa iyang mga alagad?

• Unsa ang pipila ka espirituwal nga mga tagana nga gihimo ni Jehova sa paglig-on kanato?

• Sa unsang paagi ikapakita nato nga kita nagsalig sa Diyos alang sa kusog?

[Hulagway sa panid 12]

Ang atong kaugalingong relasyon kang Jehova molig-on sa dihang atong gamiton ang Bibliya sa pagtudlo sa uban