Kini ba ang Kinamaayohang Karera Alang Kanimo?
KON ikaw usa ka bawtismadong Kristohanon, ang gugma alang sa Diyos sa walay duhaduha ang nagpalihok kanimo sa pagbuhat sa iyang kabubut-on. Dugang pa, ang ministeryo seguradong mao gayod ang imong gipabilhang buluhaton. Kon hunahunaon, gisugo ni Jesu-Kristo ang tanan niyang mga sumusunod nga maghimog mga tinun-an. (Mateo 28:19, 20) Oo, ikaw tingali karon dunay sekular nga trabaho sa pagsuportar sa imong kaugalingon. Apan ingong sumusunod ni Jesus ug usa sa mga Saksi ni Jehova, una ug labaw sa tanan ikaw usa ka Kristohanong ministro—usa nga nag-una sa buluhatong pagsangyaw sa Gingharian diha sa imong kinabuhi.—Mateo 24:14.
Hapit ka na tingaling mag-edad ug 20 o kapin lang ug diyutay sa 20. Lagmit, naghunahuna ka pag-ayo bahin sa dalan nga imong subayon sa kinabuhi. Sa pagtimbangtimbang sa mga kapilian nga bukas kanimo, tingali ang katagbawan sa kaugalingon maoy usa ka hinungdanong butang.
Nan, palandonga ang giingon ni Jørgen nga taga-Denmark bahin sa dalan nga iyang gipili. Gihubit kini ni Jørgen ingong “usa ka mithianong dalan sa kinabuhi nga niana imong mahatagan ug bug-os nga pagtagad ang labing hinungdanong buluhaton.” Si Eva, usa ka 31-anyos nga babayeng taga-Gresya, nag-ingon: “Kon itandi ko ang akong kinabuhi nianang sa akong mga isigkaingon, kanunay kong mahinapos nga kini mas makahuloganon, mas makapatagbaw, ug mas makapahinam.” Unsang kareraha ang mohatag ug ingon niana nga katagbawan? Unsaon mo pagkab-ot ang ingon nianang dalana sa kinabuhi?
Nagagiya ba Kanimo ang Diyos?
Ang pagpilig usa ka karera malisod tingali kaayo. Ngani, nanghinaot pa ang uban nga tukmang ipakita sa Diyos kon unsay buot niya nga ilang buhaton.
Sa dihang si Moises didto sa Midian, gisugo siya ni Jehova nga mobalik sa Ehipto ug manguna sa pagpagawas sa mga Israelinhon gikan sa pagkaulipon. (Exodo 3:1-10) Ang manulonda sa Diyos nagpakita kang Gideon, kinsa gitudlo sa pagluwas sa Israel gikan sa pagpanglupig. (Maghuhukom 6:11-14) Si David nagbantay sa karnero sa dihang gisugo sa Diyos si Samuel nga dihogan siya ingong sunod nga hari sa Israel. (1 Samuel 16:1-13) Karong adlawa wala kita giyahi sa ingon niana nga mga paagi. Hinunoa, kinahanglang timbangtimbangon nato ang mga butang ug mohukom kon unsaon nato paggamit ang mga katakos nga hinatag sa Diyos.
Gibuksan ni Jehova ang “usa ka dakong pultahan nga nagatultol ngadto sa kalihokan” alang sa batan-ong mga Kristohanon karong adlawa. (1 Corinto 16:9) Sa unsang paagi? Sa miaging dekada, ang gidaghanon sa mga magmamantala sa Gingharian miuswag gikan sa kapin sa 2,125,000 ngadto sa kapin sa 6,000,000 sa tibuok yuta. Kinsay mitabang sa pagtaganag milyonmilyong Bibliya, libro, brosyur, magasin, ug mga tract nga gikinahanglan sa espirituwal nga pagpakaon ug sa tibuok kalibotan nga buluhatong pagsangyaw sa maayong balita? Kining makalilipayng pribilehiyo ginatagamtam sa mga membro sa pamilyang Bethel sa tibuok yuta.
Usa ka Magantihong Kinabuhi
Ang Bethel nagkahulogang “Balay sa Diyos,” ug ang mga puy-anang Bethel maoy mga puy-anan sa Kristohanong mga boluntaryo nga nag-alagad sa hedkuwarter ug sa mga sangang buhatan sa Watch Tower Society. (Genesis 28:19, potnot) Ang mga pamilyang Bethel karon mahimong ipakasama sa maayong pagkaorganisar nga ‘mga panimalay nga gitukod pinaagi sa kaalam’ ug gipasukad sa gugma alang kang Jehova.—Proverbio 24:3.
Unsay ikasulti bahin sa samag-pamilya nga kahimtang sa Bethel? Usa ka 25-anyos nga membro sa pamilyang Bethel sa Estonia nag-ingon: “Gibati ko ang kalipay nga makauban ang mga higala ni Jehova sa tanang panahon. Kini gihapon ang labing bililhon alang kanako dinhi sa Bethel.”—Salmo 15:1, 2.
Sa tibuok yuta, duolan sa 19,500 ka indibiduwal ang nagpahimulos karon sa pribilehiyo sa pag-alagad sa Bethel. (Salmo 110:3) Sa Tinipong Bansa, 46 porsiyento niadtong anaa sa Bethel nag-edad ug 19 ngadto sa 29. Sama kang Isaias, sila miingon: “Ania ako! Ipadala ako.” (Isaias 6:8) Si Isaias—nga dedikado na kang Jehova—miboluntaryo alang sa dugang pribilehiyo sa pag-alagad. Dayag nga nagpasabot kinig pagsakripisyo sa pipila ka personal nga bentaha. Gibiyaan niadtong nag-alagad sa Bethel ang ilang mga balay ug sinating mga palibot, ingon man ang mga inahan, amahan, igsoong lalaki ug babaye, ug mga higala. Kining maong mga pagsakripisyo kinabubut-ong gihimo “alang sa maayong balita.”—Marcos 10:29, 30.
Sa baylo, pagkadaghan sa espirituwal nga mga panalangin diha sa Bethel! Usa ka batan-ong membro sa pamilyang Bethel sa Rusya nag-ingon: “Pinaagi sa pagsakripisyo sa kaugalingon, daghan kitag makat-onan nga motabang kanato sa pagkinabuhi sa bag-ong kalibotan. Makaingon ko nga sa akong kahimtang ang mga panalangin ni Jehova mas daghan kaayo kay sa akong mga pagsakripisyo.”—Malaquias 3:10.
Kinabuhi sa Bethel
Sama sa unsa ang kinabuhi sa Bethel? Ang mga membro sa pamilyang Bethel mouyon nga kini maayo ug makapatagbaw, gani makapahinam pa. Si Jens, nga 43 anyos na, nalipay sa pag-alagad sa Bethel. Ngano? Siya miingon: “Tungod sa pagbati nga kita maoy bahin sa usa ka dakong paningkamot sa pagbuhat sa usa ka hinungdanong buluhaton. Nasabtan ko ang gidak-on ug ang kahinungdanon sa buluhaton ni Jehova.”
Gikan sa Lunes hangtod sa Sabado, sugdan ang adlaw sa Bethel pinaagi sa pagsimba sa buntag. Usa kini ka panaghisgot sa Bibliya, nga gidumala sa usa ka eksperyensiyadong ansiyano. Sa mga gabii sa Lunes usa ka oras ang gigahin sa pamilya sa pagtuon sa Bibliya sa tabang sa Ang Bantayanang Torre, nga sundan usahay sa usa ka pakigpulong nga gipasukad sa usa ka tema sa Kasulatan nga gipahaom gayod sa pamilyang Bethel.
Komosta kon bag-o lang sa Bethel ang usa ka indibiduwal? Aron masinati ang bag-ong mga membro sa kinabuhi sa Bethel, ang hamtong nga mga igsoong lalaki sa pamilya mohatag ug mga pakigpulong nga maghisgot sa nagkalainlaing mga bahin sa pag-alagad sa Bethel. Sa ubay-ubayng semana sulod sa unang tuig, ang usa ka bag-ong membro sa pamilyang Bethel motambong sa usa ka ekselenteng senemanang pagtuon nga gidisenyo aron mapasangkad ang iyang pagsabot sa Kasulatan. Ang bag-ong mga membro makapahimulos usab sa usa ka linaing programa sa pagbasa sa Bibliya. Sulod sa ilang unang tuig sa pag-alagad sa Bethel, humanon sa bag-ong mga membro sa pamilya ang pagbasa sa tibuok Bibliya.
Unsay epekto niining tanang pagbansay? Si Joshua, usa ka 33-anyos nga membro sa pamilyang Bethel sa Hong Kong, mitubag: “Ang Bethel nagpalawom gayod sa akong pagpabili kang Jehova. Makauban ko ang daghang eksperyensiyadong mga igsoon nga migugol ug dakong bahin sa ilang mga kinabuhi sa pag-alagad kang Jehova. Gikalipay ko ilabina ang espirituwal nga mga programa, sama sa pagsimba sa buntag ug sa Pagtuon sa Bantayanang Torre sa pamilya. Dugang pa, nagustohan ko ang hapsay ug yanong paagi sa pagkinabuhi. Nagpahigawas kini kanako gikan sa wala kinahanglanang kabalaka. Nakakat-on usab ako kon unsaon pagdumala sa mga butang diha sa Kristohanong paagi, ug kanunay kining napamatud-an nga mapuslanon.”
Ginagugol sa mga membro sa pamilyang Bethel ang kadaghanan sa ilang panahon ug paningkamot sa pagbuhat sa giboluntaryohan nilang buhaton. Sa ato pa, ang paggamit sa ilang pisikal ug mental nga mga kahinguhaan ilabina sa pag-atiman sa asaynment nga gihatag kanila sa Bethel. Kinahanglang buhaton ang daghang nagkadaiya nga mga butang. Ang uban nagpaandar ug mga makina sa pag-imprenta o nagtrabaho sa tahianan ug mga libro, naghimog mga libro nga ipadala ngadto sa daghang kongregasyon. Ang uban nagtrabaho sa kosina, sa kan-anan, o sa labhanan. Ang mga asaynment naglakip sa pagpanghinlo, pagpanguma, pagtrabaho sa konstruksiyon, ug uban pa. Ang uban dunay responsibilidad sa pagmentinar sa mga kasangkapan niining mga departamentoha. Ang uban nag-atiman sa panglawas sa pamilya o nagtrabaho sa opisina. Ang tanang giasayn nga mga buluhaton sa Bethel dunay makalingawng mga hagit ug sa pagkatalagsaon magantihon. Ang buluhatong ginabuhat sa Bethel ilabinang makapatagbaw sanglit nagpalambo kini sa mga intereses sa Gingharian ug ginabuhat tungod sa gugma alang sa Diyos.
Ang mga membro sa pamilyang Bethel giasayn sa mga kongregasyon, diin masinati nila mismo ang mga kaayohan sa ilang buluhaton. Malipay sila sa pagtambong sa mga tigom sa kongregasyon ug sa pagpakig-ambit sa buluhatong pagsangyaw. Tungod niana, ang mga membro sa pamilyang Bethel nakaugmad ug suod nga relasyon sa ilang mga igsoong lalaki ug babaye diha sa lokal nga mga kongregasyon.—Marcos 10:29, 30.
Si Rita, usa ka membro sa pamilyang Bethel sa Britanya, nag-ingon: “Mapasalamaton kaayo ako sa kongregasyon! Kon nagatambong ako sa mga tigom ug nagapakig-ambit diha sa ministeryo, gipalig-on pag-ayo ang akong pagtuo nga makitang atua didto ang minahal nga mga igsoong lalaki, babaye, kabataan, ug mga tigulang! Bisag unsa pay mahitabo, sila atua didto! Kana nagtabang kanako nga magmasiboton pa diha sa akong pag-alagad sa Bethel.”
Ang kinabuhi sa Bethel dili pulos trabaho, mga tigom, pag-alagad sa kanataran, ug pagtuon. Ang pamilya may mga panahon usab sa pagpahayahay. Sa matag karon ug unya, dunay makalingaw ug magantihon-sa-espirituwal nga mga programa sa “Family Night,” nga naghatag ug higayon nga malingaw sa mga talento sa daghan ug sa pagkat-on sa makapadasig nga mga butang bahin sa mga kinabuhi sa uban nga nag-alagad sa Bethel. Ang maayo ug makapalig-ong mga pagduaw sa uban makalingaw usab. Ang pipila ka pasilidad sa paglingawlingaw mahimong itagana, ingon man ang mga librarya alang sa personal nga pagbasa ug panukiduki. Ug dili gayod kalimtan ang alegreng kokabildohay diha sa mga lamesa sa mga panahon sa pagpangaon.
Si Tom, usa ka membro sa pamilyang Bethel sa Estonia, nag-ingon: “Duol ra sa Bethel ang dagat, ug dili layo niana anaay matahom nga lasang diin ang akong asawa ug ako malingaw sa paglakawlakaw. Usahay modula usab ako ug golf, hockey, ug tenis uban sa mga higala sa kongregasyon ug sa Bethel. Ug kon maayo ang panahon, magbisikleta mi.”
Unsay Imong Buhaton Aron Mokuwalipikar?
Siyempre, ang Bethel sa panguna maoy usa ka dapit diin ang hamtong nga mga Kristohanon nagahatag ug sagradong pag-alagad kang Jehova ug nagatrabaho alang sa mga isigkamagtutuo sa tibuok kalibotan. Kadtong mahimong mga membro sa pamilyang Bethel kinahanglang makakab-ot sa pipila ka mga kinahanglanon. Unsay imong buhaton aron mokuwalipikar sa pag-alagad sa Bethel?
Sama kang Timoteo, kinsa nag-alagad uban kang apostol Pablo, kadtong pagadawaton sa pag-alagad sa Bethel kinahanglang adunay maayong baroganan diha sa kongregasyon. (1 Timoteo 1:1) Si Timoteo “gikatahong maayo sa mga igsoon sa Listra ug Iconio.” (Buhat 16:2) Bisag batan-on pa siya, nasinati si Timoteo sa Kasulatan ug lig-ong nakagamot sa kamatuoran. (2 Timoteo 3:14, 15) Sa susama, kadtong gidawat sa pag-alagad sa Bethel gidahom nga dunay kahibalo sa Bibliya.
Ang mga membro sa pamilyang Bethel nagkinahanglan nga dunay espiritu nga nagasakripisyo-sa-kaugalingon. Dayag kaayo ang nagasakripisyo-sa-kaugalingon nga espiritu ni Timoteo ug ang iyang pagkaandam nga unahon ang mga intereses sa Gingharian imbes ang iyang kaugalingong mga intereses nga si Pablo nakaingon labot kaniya: “Ako walay lain nga may sama kaniya ug tinamdan kinsa tiunay nga moatiman sa mga butang maylabot kaninyo. Kay ang tanang uban pa nagatinguha sa ilang kaugalingong kaayohan, dili nianang kang Kristo Jesus. Apan kamo nahibalo sa pamatuod nga iyang gihatag labot sa iyang kaugalingon, nga sama sa usa ka anak uban sa amahan siya nagpaulipon uban kanako sa pagpauswag sa maayong balita.”—Filipos 2:20-22.
Ang pag-alagad sa Bethel nagkinahanglan ug espirituwal nga mga lalaki ug mga babaye. Gihimo ang mga kahikayan aron ang mga membro sa pamilyang Bethel makapauswag sa ilang espirituwalidad pinaagi sa pagtuon sa Bibliya, regular nga pagtambong sa Kristohanong mga tigom ug pagpakig-ambit diha sa ministeryo sa kanataran, ug pagpakig-uban sa hamtong nga mga Kristohanon. Busa ginatabangan kadtong nag-alagad sa Bethel nga sundon ang tambag ni Pablo: “Padayon sa paglakaw nga nahiusa [kang Kristo Jesus], nga gipagamot ug ginatukod diha kaniya ug ginalig-on diha sa pagtuo, ingon sa pagkatudlo kaninyo, nga manag-awas sa pagtuo diha sa pagpasalamat.”—Colosas 2:6, 7.
Tungod sa matang sa trabaho sa Bethel, kadtong gidawat alang niini nga pribilehiyo sa pag-alagad kinahanglang lig-on ug himsog ug panglawas. Kon ikaw nakakab-ot sa mga kuwalipikasyon nga among gihisgotan, nag-edad ug 19 anyos o kapin pa, ug labing menos usa ka tuig na sukad sa pagbawtismo, ikaw gidasig namo nga palandongon ang pag-alagad sa Bethel.
Kitang Tanan Dunay Bahin
Ingong mga Kristohanon, kitang tanan nagtinguha gayod sa pag-una sa mga intereses sa Gingharian diha sa atong kinabuhi ug sa pagkahimong bug-os-kalag diha sa atong pag-alagad kang Jehova. (Mateo 6:33; Colosas 3:23) Makadasig usab kita niadtong nag-alagad sa Bethel nga magpadayon sa paghatag ug sagradong pag-alagad didto. Ug ilabina nga angayng awhagon ang batan-ong mga igsoong lalaki nga kuwalipikadong moalagad sa Bethel nga mangab-ot niining makalilipayng pribilehiyo.
Ang pag-alagad sa Bethel maoy usa ka makapatagbaw-sa-espirituwal nga dalan sa kinabuhi—usa nga mahimong kinamaayohang karera alang kanimo. Kini ang karera ni Nick, kinsa nagsugod sa pag-alagad sa Bethel sa edad nga 20. Human sa napulo ka tuig nga pag-alagad sa Bethel, siya nag-ingon: “Nag-ampo ako kanunay kang Jehova aron sa pagpasalamat kaniya tungod sa iyang dili takos nga kalulot. Unsa pa bay akong pangayoon? Sa Bethel, ginalibotan kami sa matinumanong mga Kristohanon nga nagabuhat sa ilang kinamaayohan sa pag-alagad kang Jehova.”
[Kahon/Hulagway sa panid 22]
UNSAY MAHIMO SA MGA ANSIYANO UG SA MGA GINIKANAN?
Ang mga ansiyano ug nagapanawng mga magtatan-aw ilabinang angay nga magdasig sa batan-ong mga lalaki nga moaplay sa Bethel. Niining bag-o lang, gipakita sa usa ka di-pormal nga surbi taliwala sa batan-ong mga membro sa pamilyang Bethel nga 34 porsiyento kanila giawhag ilabina sa Kristohanong mga magtatan-aw nga ilang himoong tumong ang pag-alagad sa Bethel. Oo, mingawon tingali kanila ang ilang lokal nga mga kongregasyon. Apan maayong hinumdoman nga bisag si Timoteo sa walay duhaduha dihay maayong impluwensiya sa ubang mga batan-on sa Listra ug Iconio, wala siya pugngi sa mga ansiyano didto sa pag-alagad uban kang Pablo. Wala sila maghunahuna nga ang pagkuyog ni Timoteo sa apostol makadaot gayod sa ilang kongregasyon.—1 Timoteo 4:14.
Ilabinang angay nga maningkamot ang Kristohanong mga ginikanan nga mahimong positibong impluwensiya diha sa ilang mga anak niining bahina. Sa surbi nga bag-o lang gihisgotan, 40 porsiyento niadtong gipangutana miingon nga ang ilang mga ginikanan maoy pangunang tinubdan sa pagdasig nga moalagad sa Bethel. Usa ka igsoong babaye nga nag-alagad sa Bethel sa pipila na ka tuig miingon: “Ang kinabuhi sa akong mga ginikanan diha sa pag-alagad kang Jehova maoy kusganong panukmod alang kanako nga moalagad sa Bethel. Sa pagkakita sa ilang panig-ingnan diha sa bug-os-panahong ministeryo, nakaseguro gayod ako nga kini mao ang kinamaayohan ug labing makapatagbaw nga dalan sa kinabuhi nga pilion.”
[Kahon sa panid 24]
GIPABILHAN NILA ANG PAG-ALAGAD SA BETHEL
“Gipabilhan ko ang akong pag-alagad sa Bethel. Makapatagbaw nga masayod nga ako nag-alagad kang Jehova sa tibuok adlaw ug nga buhaton ko ang samang buluhaton ugma, sa sunod ugma, ug sa sunod pang panahon. Naghatag kini kanako ug maayong tanlag ug nagpuno sa akong pangisip uban sa positibong mga panghunahuna.”
“Ang Bethel maoy usa ka dapit diin makagugol ka sa tanan nimong panahon ug kusog sa pag-alagad kang Jehova nga walay babag. Makahatag kinig kalipay sa kahiladman. Apan makita usab nimo ang organisasyon ni Jehova gikan sa lahing panglantaw. Ikaw mobating mas suod sa sentro sa maong organisasyon, ug kini ang nagpahimo niana nga makapahinam kaayo.”
“Ang pag-alagad sa Bethel mao ang kinamaayohang butang nga nahitabo kanako sukad masukad. Dinhi walay hunong ang edukasyon. Ug dinhi ang edukasyon maoy, dili alang sa akong personal nga kahimoan, kondili alang kang Jehova. Dinhi ang akong buluhaton dili gayod makawang.”
“Ang paggamit sa akong mga katakos dinhi sa Bethel naghatag kanakog pagbati sa pagkakontento ug kalinaw tungod kay gigamit kini alang kang Jehova ug sa mga igsoon.”
“Wala ko makaplagi ang tinuod nga katagbawan ug kalipay sa akong karera niadto. Gipangandoy ko sulod sa daghang tuig nga makatrabaho duyog ug alang sa akong mga igsoong lalaki ug babaye. Mao nga misulod ako sa Bethel. Nakaplagan ko ang tinuod nga katagbawan sa pagkahibalo nga ang tanan nakong mga paningkamot makahatag ug kaayohan sa uban sa espirituwal nga paagi ug makahatag ug pagdayeg kang Jehova.”