Ang Yawi sa Usa ka Malipayong Kalibotan

“ANG bugtong labing gamhanang persona—dili lamang sulod niining duha ka milenyo kondili sa tibuok kasaysayan sa tawo—mao si Jesus sa Nasaret,” nag-ingon ang magasing Time. Sa dinhi pa si Jesus sa yuta, libolibo ka matinud-anog-kasingkasing nga mga tawo nag-ila, dili lamang sa iyang pagkabantogan, kondili sa iyang kabalaka sa uban. Busa, dili ikatingala nga buot nilang himoon siya nga hari. (Juan 6:10, 14, 15) Apan, sumala sa gihisgotan sa nag-unang artikulo, si Jesus midumili sa pag-apil-apil sa politika.

ANG sanong ni Jesus gipasukad sa labing menos tulo ka hinungdan: ang panglantaw sa iyang Amahan sa pagpasundayag sa pagkinaugalingon sa tawo, nga nag-apil sa tawhanong pagmando; ang pagkasayod ni Jesus nga dunay gamhanan, natago nga mga puwersa nga supak bisan sa labing maayong mga paningkamot sa pagmando; ug ang katuyoan sa Diyos sa pagtukod ug langitnong gobyerno nga maoy magmando sa tibuok yuta. Samtang atong susihon pag-ayo kining tulo ka punto, masabtan nato kon nganong napakyas ang mga paningkamot sa tawo sa paghimo sa kalibotan nga usa ka mas maayong dapit. Mahibaloan usab nato kon sa unsang paagi mabatonan ang kalamposan.

Makamando ba ang mga Tawo sa Ilang Kaugalingon?

Sa dihang gilalang sa Diyos ang mga tawo, iyang gihatagan sila ug awtoridad ibabaw sa kahayopan. (Genesis 1:26) Apan ang katawhan anaa ilalom sa pagkasoberano sa Diyos. Kinahanglang pamatud-an sa unang lalaki ug babaye ang ilang pagpasakop sa Diyos pinaagi sa masinugtanong pag-ayad sa bunga sa usa ka partikular nga kahoy, ang “kahoy sa kahibalo sa maayo ug sa daotan.” (Genesis 2:17) Ikasubo, si Adan ug Eva nag-abusar sa ilang kagawasan sa pagpili ug misupak sa Diyos. Ang pagkaon sa gidili nga bunga dili kay yanong buhat sa pagpangawat. Kini maoy pagrebelde batok sa pagkasoberano sa Diyos. Ang potnot sa Genesis 2:17 diha sa The New Jerusalem Bible nag-ingon nga giangkon ni Adan ug Eva ang “bug-os nga moral nga independensiya nga pinaagi niana ang tawo midumili sa pag-ila sa iyang kahimtang ingong usa ka linalang . . . Ang unang sala maoy pag-atake sa pagkasoberano sa Diyos.”

Tungod sa hinungdanon kaayong moral nga mga isyu nga nalangkit, gitugotan sa Diyos si Adan ug Eva ug ang ilang mga kaliwat sa pagpili sa ilang kaugalingong paagi sa kinabuhi, ug naghimo sila sa ilang kaugalingong mga sukdanan sa husto ug sayop. (Salmo 147:19, 20; Roma 2:14) Sa diwa, ang pag-eksperimento sa tawo sa pagkinaugalingon nagsugod nianang panahona. Nagmalamposon ba kini? Sa paglabay sa libolibo ka tuig human sa maong hitabo, makaingon kita nga wala! Ang Ecclesiastes 8:9 nag-ingon: “Ang tawo nagmando sa tawo alang sa iyang kadaotan.” Kining makapasubong rekord sa tawhanong pagmando-sa-kaugalingon nagpamatuod sa pagkatinuod sa Jeremias 10:23: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” Napamatud-an sa kasaysayan nga ang mga tawo walay katakos nga magmalamposon sa pagmando nga wala ang ilang Maglalalang.

Si Jesus bug-os nga miuyon. Ang pagkinaugalingon nga bulag sa Diyos maoy dulumtanan kaniya. “Ako walay ginahimo sa akong kaugalingong pagbuot,” siya miingon. “Ginabuhat ko kanunay ang mga butang nga makapahimuot [sa Diyos].” (Juan 4:34; 8:28, 29) Busa, kay walay awtorisasyon gikan sa Diyos sa pagdawat sa pagkahari gikan sa mga tawo, si Jesus wala gani maghunahuna sa pagdawat niini. Apan, wala kini magpasabot nga nagpanuko siya sa pagtabang sa iyang isigkatawo. Sa kasukwahi, gihimo niya ang iyang tanang maarangan sa pagtabang sa mga tawo nga makaplagan ang labing dakong kalipay nianang panahona ug sa umaabot. Gihatag pa gani niya ang iyang kinabuhi alang sa katawhan. (Mateo 5:3-11; 7:24-27; Juan 3:16) Apan nasayod si Jesus nga “adunay tinudlong panahon alang sa tanang butang,” apil ang panahon sa Diyos sa pagpamatuod sa iyang pagkasoberano ibabaw sa katawhan. (Ecclesiastes 3:1; Mateo 24:14, 21, 22, 36-39) Apan, hinumdomi nga didto sa Eden ang atong orihinal nga mga ginikanan nagpasakop sa kabubut-on sa daotang espirituhanong linalang nga misulti pinaagi sa makita nga bitin. Motultol kini kanato ngadto sa ikaduhang rason kon nganong si Jesus wala mag-apil-apil sa politika.

Ang Wala Hiilhi nga Magmamando sa Kalibotan

Gisuginlan kita sa Bibliya nga gitanyag ni Satanas kang Jesus ang “tanang gingharian sa kalibotan ug ang ilang himaya” baylo sa usa ka buhat sa pagsimba. (Mateo 4:8-10) Sa panguna, gitanyag kang Jesus ang pagmando sa kalibotan—apan sumala sa mga kondisyon sa Yawa. Si Jesus wala mabiktima niini nga tentasyon. Apan, kadto ba maoy tinuod nga tentasyon? Makahimo ba gayod si Satanas ug ingon ka mapagawalong tanyag? Oo, tungod kay si Jesus mismo nagtawag sa Yawa nga “magmamando niining kalibotana,” ug si apostol Pablo naghubit kaniya ingong “ang diyos niini nga sistema sa mga butang.”—Juan 14:30; 2 Corinto 4:4; Efeso 6:12.

Siyempre, nahibalo si Jesus nga ang Yawa wala maghunahuna sa kaayohan sa katawhan. Iyang gihubit si Satanas ingong “usa ka mamumuno” ug “ang amahan sa kabakakan ug sa tanan nga bakak.” (Juan 8:44, The Amplified Bible) Dayag, ang usa ka kalibotan nga “nailalom sa gahom” sa maong daotang espiritu dili gayod mahimong tinuod nga malipayon. (1 Juan 5:19) Apan dili hangtod sa hangtod nga ang Yawa magbaton niini nga awtoridad. Si Jesus, nga karon usa na ka gamhanang espirituhanon nga linalang, sa dili madugay magpapahawa na kang Satanas ug magwala sa iyang impluwensiya sa bug-os.—Hebreohanon 2:14; Pinadayag 20:1-3.

Si Satanas mismo nahibalo nga ang iyang mga adlaw ingong magmamando sa kalibotan hapit nang mapupos. Busa determinado kaayo siya, nga naggamit sa tanang mabatonang paagi sa pagdaot sa mga tawo sa punto nga dili na sila matul-id, sama sa iyang gibuhat sa wala pa ang Lunop sa adlaw ni Noe. (Genesis 6:1-5; Judas 6) “Alaot ang yuta ug ang dagat,” nag-ingon ang Pinadayag 12:12, “tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” Ang tagna sa Bibliya ug ang mga hitabo sa kalibotan nagpakita nga kita nagkinabuhi nga duol na sa kataposan niining ‘hamubo na lamang nga panahon.’ (2 Timoteo 3:1-5) Haduol na ang kahupayan.

Usa ka Gobyerno nga Maghatag ug Kalipay

Ang ikatulong rason kon nganong si Jesus wala mag-apil-apil sa politika mao nga nasayod siya nga sa gitakdang panahon sa umaabot, ang Diyos magtukod ug langitnong gobyerno nga magmando sa tibuok yuta. Ang Bibliya nagtawag niini nga gobyerno nga Gingharian sa Diyos, ug mao kini ang pangunang tema sa pagtulon-an ni Jesus. (Lucas 4:43; Pinadayag 11:15) Gitudloan ni Jesus ang iyang mga tinun-an sa pag-ampo alang niana nga Gingharian nga moabot, kay ilalom lamang sa pagmando niana nga ‘matuman ang kabubut-on sa Diyos sa yuta maingon sa langit.’ (Mateo 6:9, 10) Basin mahibulong ka, ‘Kon kini nga Gingharian magmando sa tibuok yuta, unsa nay mahitabo sa mga gobyerno nga hinimo sa tawo?’

Ang tubag makaplagan sa Daniel 2:44: “Sa mga adlaw nianang mga haria [nga nagmando sa panahon sa kataposan sa presenteng sistema] ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian [nga hinimo sa tawo], ug kini mobarog hangtod sa panahong walay tino.” Ngano man nga ang Gingharian sa Diyos kinahanglang “magadugmok” sa yutan-ong mga pagmando? Tungod kay kini sila nag-insistir sa pagpatunhay sa mabatokon-sa-Diyos nga espiritu sa pagkinaugalingon nga gipasiugda ni Satanas kaniadto sa tanaman sa Eden. Gawas pa nga sukwahi kini sa kaayohan sa katawhan, kadtong naningkamot sa pagpatunhay niana nga espiritu naghimo sa ilang kaugalingon nga kaaway sa Maglalalang. (Salmo 2:6-12; Pinadayag 16:14, 16) Busa, kinahanglang pangutan-on nato ang atong kaugalingon, ‘Kita ba dapig o batok sa pagmando sa Diyos?’

Kang Kansang Pagkasoberano ang Imong Pilion?

Aron matabangan ang mga tawo sa paghimog desisyon pinasukad sa tukma nga kahibalo bahin sa pagmando, gisugo ni Jesus ang iyang mga tinun-an sa pagsangyaw sa “maayong balita sa gingharian . . . sa tibuok gipuy-ang yuta ingon nga pagpamatuod ngadto sa tanang kanasoran” sa dili pa moabot ang kataposan sa presenteng sistema. (Mateo 24:14) Kinsa karon ang nailhan sa tibuok kalibotan tungod kay nagsangyaw sa Gingharian sa Diyos? Ang mga Saksi ni Jehova. Kini nga magasin, sa pagkatinuod, dugay nang nagpatik diha sa atubangang hapin niini sa mga pulong “Nagapahayag sa Gingharian ni Jehova.” Karong adlawa, mga unom ka milyong Saksi sa kapin sa 230 ka nasod ang nagatabang sa mga tawo sa pagbaton ug tukmang kahibalo bahin niana nga Gingharian.a

Mga Panalangin Alang sa mga Sakop sa Gingharian

Si Jesus kanunay nga nagbuhat sa mga butang sumala sa paagi sa Diyos. Busa, inay mopili ug independenteng dalan ug maningkamot sa pagpaluyo o pagpauswag sa naglungtad nga sistema sa mga butang pinaagi sa politika, naghago siya sa pagpauswag sa intereses sa Gingharian sa Diyos, ang bugtong solusyon sa mga problema sa kalibotan. Tungod sa iyang pagkamaunongon gigantihan siya ug mahimayaong trono sa langit ingong ang nahiangayng Hari niana nga Gingharian. Pagkanindot nga ganti tungod sa iyang pagpasakop sa Diyos!—Daniel 7:13, 14.

Minilyon karon niadtong nagsundog kang Jesus sa pag-una sa Gingharian sa Diyos ug sa pagpasakop sa kabubut-on sa Diyos magtagamtam usab unya sa usa ka nindot nga gasa—ang pribilehiyo nga mahimong yutan-ong mga sakop sa Gingharian sa Diyos. (Mateo 6:33) Ubos sa mahigugmaong pagmando niini, sila ituboy ngadto sa tawhanong kahingpitan, uban ang paglaom sa kinabuhing walay kataposan. (Pinadayag 21:3, 4) Ang 1 Juan 2:17 nag-ingon: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” Kay nalaglag na si Satanas ug ang iyang mga sumusunod ug ang yuta nahimo nang globonhong paraiso nga nahigawas sa makapabahinbahin nga nasyonalismo, dunot nga mga sistema sa komersiyo, ug bakak nga relihiyon, pagkadakong kalipay unya nga magpuyo dinhi sa walay kataposan!—Salmo 37:29; 72:16.

Oo, ang Gingharian sa Diyos mao ang tinuod nga yawi sa usa ka malipayon gayod nga kalibotan, ug ang mensahe nga nagpahibalo niini haom nga gihubit ingong maayong balita. Kon wala pa nimo mahimo kini, sa sunod higayon nga moduaw ang mga Saksi ni Jehova sa imong balay, nganong dili nimo sulayang maminaw niining maayong balita nga gihatod diha kanimo?

[Footnote]

[Mga hulagway sa panid 5]

Gipamatud-an sa kasaysayan nga ang mga tawo dili magmalamposon sa pagmando nga wala ang Diyos

[Hulagway sa panid 5]

Tungod kay siya ang nagmando sa presenteng “sistema sa mga butang,” si Satanas makahimo sa pagtanyag sa “tanang gingharian sa kalibotan” ngadto kang Jesus

[Mga hulagway sa panid 7]

Si Jesus nagtudlo nga ilalom sa kahikayan sa Gingharian sa Diyos, ang kalibotan mahimong usa ka maanindot nga dapit