Mopadayon Ka ba sa “Paglakaw Pinaagi sa Espiritu”?
“Magpadayon sa paglakaw pinaagi sa espiritu ug kamo dili gayod makahimo ug unodnong tinguha.”—GALACIA 5:16.
1. Sa unsang paagi mahanaw ang kabalaka nga nakasala ka batok sa espiritu?
ADUNAY paagi sa paghanaw sa kabalaka nga nakasala ka batok sa balaang espiritu ni Jehova. Kana mao ang pagbuhat sa gisulti ni apostol Pablo: “Magpadayon sa paglakaw pinaagi sa espiritu ug kamo dili gayod makahimo ug unodnong tinguha.” (Galacia 5:16) Kon magpagiya kita sa espiritu sa Diyos, dili nato pahinuntan ang dili-angay nga unodnong tinguha.—Roma 8:2-10.
2, 3. Unsa ang epekto kanato kon mopadayon kita sa paglakaw pinaagi sa espiritu?
2 Samtang kita “magpadayon sa paglakaw pinaagi sa espiritu,” ang aktibong gahom sa Diyos magdasig kanato sa pagsugot kang Jehova. Sundogon nato ang iyang mga hiyas diha sa atong ministeryo, sa kongregasyon, sa balay, ug sa ubang dapit. Ang atong tinagdan sa atong kapikas sa kaminyoon, sa mga anak, sa mga isigkamagtutuo, ug sa ubang mga tawo magpadayag kon naimpluwensiyahan ba kita sa mga bunga sa espiritu.
3 Kay nagkinabuhi man “sumala sa espiritu sa panglantaw sa Diyos,” dili na kita magpakasala. (1 Pedro 4:1-6) Kon naimpluwensiyahan kita sa espiritu, dili gayod kita makahimo sa sala nga dili mapasaylo. Apan unsa pay ubang maayong mga epekto sa atong kinabuhi kon mopadayon kita sa paglakaw pinaagi sa espiritu?
Magpadayong Suod sa Diyos ug Kang Kristo
4, 5. Sa unsang paagi maapektohan ang atong pagtuo kang Jesus tungod sa atong paglakaw pinaagi sa espiritu?
4 Tungod kay naglakaw kita pinaagi sa balaang espiritu, kita padayong masuod sa Diyos ug sa iyang Anak. Sa pagsulat bahin sa espirituwal nga mga gasa, si Pablo miingon ngadto sa mga isigkamagtutuo sa Corinto: “Buot ko nga inyong [kanhing mga tigsimbag diyosdiyos] mahibaloan nga walay bisan kinsa nga kon magasulti pinaagi sa espiritu sa Diyos moingon: ‘Si Jesus tinunglo!’ ug walay usa nga makaingon: ‘Si Jesus maoy Ginoo!’ gawas kon pinaagi sa balaang espiritu.” (1 Corinto 12:1-3) Ang espiritu nga magdasig sa mga tawo sa pagtunglo kang Jesus naggikan gayod ni Satanas nga Yawa. Apan, isip mga Kristohanong nagalakaw pinaagi sa balaang espiritu, kombinsido kitang si Jesus gibanhaw ni Jehova gikan sa mga patay ug siya gihimong mas hataas kay sa tanang ubang linalang. (Filipos 2:5-11) Nagtuo kita sa halad lukat ni Jesu-Kristo ug nga siya mao ang Ginoo nga gitudlo sa Diyos sa pagmando kanato.
5 Ang pipila ka nag-angkong mga Kristohanon sa unang siglo K.P. wala motuo nga si Jesus mianhi sa unod. (2 Juan 7-11) Tungod sa maong sayop nga panghunahuna, gisalikway sa pipila ang matuod nga mga pagtulon-an bahin kang Jesus, ang Mesiyas. (Marcos 1:9-11; Juan 1:1, 14) Atong isalikway ang maong apostasya kon kita nagalakaw pinaagi sa balaang espiritu. Apan pinaagi lamang sa padayong pagtukaw sa espirituwal nga kita padayong makapahimulos sa dili-takos nga kalulot ni Jehova ug ‘magpadayon sa paglakaw diha sa kamatuoran.’ (3 Juan 3, 4) Busa angay natong ihukom nga isalikway ang tanang apostasya aron magpabiling lig-on ang atong relasyon uban sa atong langitnong Amahan.
6. Sa tabang sa espiritu sa Diyos, unsang mga hiyas ang maugmad sa mga tawong naglakaw pinaagi sa espiritu?
6 Gitala ni apostol Pablo ang apostasya, idolatriya, ug mga sekta nga apil sa “mga buhat sa unod” sama sa pakighilawas ug malaw-ayng panggawi. Apan siya nagpatin-aw: “Kadtong iya ni Kristo Jesus naglansang sa unod uban sa mga pangibog ug mga tinguha niini. Kon kita nagkinabuhi pinaagi sa espiritu, magpadayon usab kita sa paglakaw nga mahusay pinaagi sa espiritu.” (Galacia 5:19-21, 24, 25) Sa tabang sa aktibong gahom sa Diyos, unsang mga hiyas ang maugmad sa mga tawong nagkinabuhi ug naglakaw pinaagi sa espiritu? “Ang mga bunga sa espiritu mao ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon,” misulat si apostol Pablo. (Galacia 5:22, 23) Hisgotan nato ang maong mga bunga sa espiritu.
“Maghigugmaay sa Usag Usa”
7. Unsay gugma, ug unsa ang pipila ka kinaiyahan niini?
7 Ang gugma, nga usa ka bunga sa espiritu, sagad naglakip sa tiunay nga pagkamabination ug dili-mahakogong paghunahuna sa uban nga may mainiton ug suod nga relasyon uban kanila. Ang Kasulatan nag-ingon nga “ang Diyos gugma” tungod kay siya natingban nianang hiyasa. Ang dakong gugma sa Diyos ug sa iyang Anak alang sa katawhan gipasundayag diha sa halad lukat ni Jesu-Kristo. (1 Juan 4:8; Juan 3:16; 15:13; Roma 5:8) Isip mga sumusunod ni Jesus, kita nailhan tungod sa atong gugma alang sa usag usa. (Juan 13:34, 35) Sa pagkatinuod, gisugo kita nga “maghigugmaay sa usag usa.” (1 Juan 3:23) Ug si Pablo nag-ingon nga ang gugma hataas-ug-pailob ug maluloton. Kini dili abughoan, ug dili manghambog, dili bastos, ug dili mangita sa kaugalingong kaayohan niini. Ang gugma dili mapasuko o maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Ang gugma moantos, motuo, molaom, ug molahutay sa tanang butang. Dugang pa, kini dili gayod mapakyas.—1 Corinto 13:4-8.
8. Nganong angay natong ipakita ang gugma alang sa mga isigkamagsisimba ni Jehova?
8 Kon atong maugmad ang gugma sa tabang sa espiritu sa Diyos, ang maong hiyas madayag diha sa atong pag-alagad sa Diyos ug sa pagtagad sa atong isigkatawo. (Mateo 22:37-39) “Siya nga wala mahigugma nagpabilin diha sa kamatayon,” misulat si apostol Juan. “Ang matag usa nga nagadumot sa iyang igsoon maoy usa ka mamumuno, ug kamo nahibalo nga walay mamumuno nga kaniya nagpabilin ang kinabuhing walay kataposan.” (1 Juan 3:14, 15) Ang usa ka mamumuno makapuyo lamang sa siyudad nga dalangpanan sa Israel kon siya wala magdumot sa tawo nga napatay. (Deuteronomio 19:4, 11-13) Kon giniyahan kita sa balaang espiritu, atong ipakita ang gugma alang sa Diyos, sa mga isigkamagtutuo, ug sa uban.
“Ang Kalipay ni Jehova Mao ang Imong Salipdanan”
9, 10. Unsay pipila ka hinungdan nga kita magmalipayon?
9 Si Jehova maoy “malipayong Diyos.” (1 Timoteo 1:11; Salmo 104:31) Ang Anak nagakalipay sa pagbuhat sa kabubut-on sa iyang Amahan. (Salmo 40:8; Hebreohanon 10:7-9) Ug “ang kalipay ni Jehova mao ang [atong] salipdanan.”—Nehemias 8:10.
10 Tungod sa hinatag-sa-Diyos nga kalipay, kita may dakong katagbawan sa dihang kita nagbuhat sa iyang kabubut-on bisan sa panahon sa kalisdanan, kasub-anan, o paglutos. Pagkadako sa atong kalipay tungod sa “mismong kahibalo sa Diyos”! (Proverbio 2:1-5) Ang atong malipayong relasyon sa Diyos gipasukad sa tukmang kahibalo ug sa pagtuo kaniya ug sa halad lukat ni Jesus. (1 Juan 2:1, 2) Ang laing hinungdan sa atong kalipay mao nga kita sakop sa bugtong matuod nga internasyonal nga kapunongan sa mga igsoon. (Sofonias 3:9; Haggeo 2:7) Ang atong paglaom sa Gingharian ug ang talagsaong pribilehiyo sa pagsangyaw sa maayong balita makahatag kanato ug kalipay. (Mateo 6:9, 10; 24:14) Ingon man usab ang umaabot nga kinabuhing walay kataposan. (Juan 17:3) Tungod kay atong nabatonan ang maong kahibulongang paglaom, kita “magmalipayon gayod.”—Deuteronomio 16:15.
Magmakigdaiton ug Magbaton ug Hataas-nga-Pailob
11, 12. (a) Ipatin-aw ang kahulogan sa pakigdait o kalinaw. (b) Unsay epekto sa diyosnong kalinaw diha kanato?
11 Ang pakigdait o kalinaw, nga maoy laing bunga sa espiritu, mao ang kahimtang nga walay kasamok ug kabalaka. Ang atong langitnong Amahan mao ang Diyos sa pakigdait ug kalinaw, ug kita gipasaligan: “Si Jehova magapanalangin sa iyang katawhan sa pakigdait.” (Salmo 29:11; 1 Corinto 14:33) Si Jesus miingon sa iyang mga tinun-an: “Ibilin ko kaninyo ang kalinaw, ihatag ko kaninyo ang akong kalinaw.” (Juan 14:27) Sa unsang paagi makatabang kana sa iyang mga sumusunod?
12 Tungod sa kalinaw nga gihatag ni Jesus sa iyang mga tinun-an, ang ilang mga kasingkasing ug mga kaisipan nahimong kalmado ug ang ilang mga kabalaka nahupay. Sila ilabinang may kalinaw sa dihang ilang nadawat ang gisaad nga balaang espiritu. (Juan 14:26) Ubos sa impluwensiya sa espiritu ug ingong tubag sa atong mga pag-ampo karon, atong natagamtam ang walay-ingong “kalinaw sa Diyos,” nga tungod niana ang atong kasingkasing ug kaisipan nahimong kalmado. (Filipos 4:6, 7) Dugang pa, ang espiritu ni Jehova makatabang kanato nga mahimong kalmado ug makigdaiton sa mga isigkamagtutuo ug sa uban.—Roma 12:18; 1 Tesalonica 5:13.
13, 14. Unsay hataas-nga-pailob, ug nganong angay natong ipakita kini?
13 Ang hataas-nga-pailob nalangkit sa pagkamakigdaiton, tungod kay kini mao ang atong mapailobong pag-antos sa makapasuko o sa daotan nga buhat samtang kita naglaom nga moarang-arang ang kahimtang. Ang Diyos hataas ug pailob. (Roma 9:22-24) Kanang hiyasa gipadayag usab ni Jesus. Ang pagpadayag ni Jesus nianang hiyasa makahatag usab kanatog kaayohan kay si Pablo misulat: “Ang hinungdan kon nganong ako gipakitaag kaluoy mao nga pinaagi kanako ingong kinalabwang pananglitan si Kristo Jesus makapasundayag sa tanan niyang hataas-nga-pailob ingong usa ka sanglitanan niadtong magabutang sa ilang pagtuo kaniya alang sa kinabuhing walay kataposan.”—1 Timoteo 1:16.
14 Ang hataas-nga-pailob makatabang kanato sa pag-antos sa sakit nga sinultihan ug dinanghag nga mga lihok sa uban. Giagda ni Pablo ang iyang mga isigka-Kristohanon: “Magmataas-ug-pailob sa tanan.” (1 Tesalonica 5:14) Sanglit kitang tanan dili man hingpit ug masayop, gusto natong pailoban kita sa mga tawo, nga sila magpakitag hataas-nga-pailob kanato kon may mga kasaypanan kitang nahimo kanila. Busa, maningkamot gayod kita nga “magpakitag hataas-nga-pailob uban ang kalipay.”—Colosas 1:9-12.
Ipasundayag ang Kalulot ug Pagkamaayo
15. Isaysay ang kahulogan sa kalulot, ug paghatag ug pipila ka pananglitan niana.
15 Ang kalulot ikapasundayag sa dihang kita magpakitag interes sa uban pinaagi sa makapalig-ong mga pulong ug sa mga buhat nga makatabang kanila. Si Jehova maluloton ingon man ang iyang Anak. (Roma 2:4; 2 Corinto 10:1) Ang mga alagad sa Diyos ug ni Kristo kinahanglang magmaluloton. (Miqueas 6:8; Colosas 3:12) Ang pipila gani ka tawo nga dili mga alagad sa Diyos nagpakitag “talagsaong tawhanon nga kalulot.” (Buhat 27:3; 28:2) Busa, makapakita kitag kalulot kon kita mopadayon sa ‘paglakaw pinaagi sa espiritu.’
16. Unsay pipila ka kahimtang nga angayng magdasig kanato sa pagpasundayag ug kalulot?
16 Ang kalulot ikapasundayag bisan pag kita may katarongang masuko tungod sa sakit nga sinultihan o dinanghag nga mga lihok sa usa ka tawo. “Pagkapungot, apan ayaw pagpakasala,” matod ni Pablo. “Ayaw pasalopi sa adlaw ang inyong kasuko, ni maghatag ug luna sa Yawa. . . . Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.” (Efeso 4:26, 27, 32) Haom kaayo ang pagpasundayag ug kalulot ngadto sa mga tawo nga nag-antos ug mga pagsulay. Apan kon ang usa ka Kristohanong ansiyano dili motambag sa usa ka tawo nga nameligrong mahilayo sa dalan sa “pagkamaayo ug pagkamatarong ug kamatuoran” aron lang dili siya makapasilo, siya maoy dili maluloton.—Efeso 5:9.
17, 18. Unsay kahulogan sa pagkamaayo, ug unsa ka hinungdanon ang maong hiyas diha sa atong kinabuhi?
17 Ang pagkamaayo maoy pagkaekselente sa panggawi ug sa moralidad. Ang Diyos maoy maayo sa bug-os nga diwa. (Salmo 25:8; Zacarias 9:17) Si Jesus may ekselenteng panggawi ug maayong moralidad. Apan, iyang gibalibaran ang titulong “Maayo” sa dihang gitawag siyang “Maayong Magtutudlo.” (Marcos 10:17, 18) Tungod kadto kay iyang giila ang Diyos ingong kinalabwang panig-ingnan sa pagkamaayo.
18 Ang atong katakos sa pagbuhat ug maayo mababagan sa atong napanunod nga sala. (Roma 5:12) Bisan pa niana, atong ikapasundayag kining hiyasa kon mag-ampo kita sa Diyos nga ‘tudloan kitag pagkamaayo.’ (Salmo 119:66) Giingnan ni Pablo ang iyang mga isigkamagtutuo sa Roma: “Ako usab nakombinsir bahin kaninyo, mga igsoon ko, nga kamo usab puno sa pagkamaayo, ingon nga kamo natugob sa tanang kahibalo.” (Roma 15:14) Ang Kristohanong magtatan-aw kinahanglang “mahigugmaon sa pagkamaayo.” (Tito 1:7, 8) Kon giniyahan kita sa espiritu sa Diyos, mailhan kita sa atong pagkamaayo, ug si Jehova ‘mahinumdom kanato tungod sa maayo nga atong gibuhat.’—Nehemias 5:19; 13:31.
“Pagtuo nga Walay Pagkasalingkapaw”
19. Isaysay ang kahulogan sa pagtuo sumala sa Hebreohanon 11:1.
19 Ang pagtuo, nga usa usab ka bunga sa espiritu, “mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita.” (Hebreohanon 11:1) Kon kita may pagtuo, segurado kita nga ang tanang gisaad ni Jehova matuman gayod. Ang makapatuo nga ebidensiya o pagpasundayag sa dili-makitang mga katinuoran lig-on kaayo nga ang pagtuo giisip nga katumbas sa dayag nga pagpasundayag niana. Pananglitan, ang paglungtad sa mga butang nga nalalang magkombinsir kanato nga adunay Maglalalang. Kana ang matang sa pagtuo nga atong ipasundayag kon kita magpadayon sa paglakaw pinaagi sa espiritu.
20. Unsa “ang sala nga daling makasabod kanato,” ug sa unsang paagi makalikay kita niini ug sa mga buhat sa unod?
20 Ang pagkawalay-pagtuo mao “ang sala nga daling makasabod kanato.” (Hebreohanon 12:1) Kinahanglan kitang mosalig sa espiritu sa Diyos aron malikayan ang mga buhat sa unod, materyalismo, ug ang bakak nga mga pagtulon-an nga makapahugno sa pagtuo. (Colosas 2:8; 1 Timoteo 6:9, 10; 2 Timoteo 4:3-5) Sa tabang sa espiritu sa Diyos, ang mga alagad ni Jehova karon makabaton ug pagtuo nga sama sa pagtuo sa mga saksi una pa sa Kristohanong panahon ug sa uban nga natala sa Bibliya. (Hebreohanon 11:2-40) Ug ang ato mismong “pagtuo nga walay pagkasalingkapaw” makapalig-on sa pagtuo sa uban.—1 Timoteo 1:5; Hebreohanon 13:7.
Ipasundayag ang Kalumo ug Pagpugong-sa-Kaugalingon
21, 22. Unsay kahulogan sa kalumo, ug nganong angay natong ipasundayag kini?
21 Ang kalumo maoy kabugnaw sa hunahuna ug dili-haras nga panggawi. Ang usa sa mga hiyas sa Diyos mao ang pagkalumo ug buot. Nahibalo kita niini tungod kay si Jesus, kinsa usa ka tawong malumog-buot, hingpit nga nagpabanaag sa personalidad ni Jehova. (Mateo 11:28-30; Juan 1:18; 5:19) Nan, unsay kinahanglan natong buhaton ingong mga alagad sa Diyos?
22 Isip mga Kristohanon, gidahom kita nga ‘magpasundayag ug kalumo sa tanang tawo.’ (Tito 3:2) Magpasundayag kitag kalumo diha sa atong ministeryo. Kadtong may espirituwal nga mga katakos gitambagan sa pagpasibo pag-usab sa nakasala nga Kristohanon “diha sa espiritu sa kalumo.” (Galacia 6:1) Kitang tanan makapausbaw sa Kristohanong panaghiusa ug kalinaw pinaagi sa pagpasundayag sa “pagpaubos sa hunahuna ug kalumo.” (Efeso 4:1-3) Ikapasundayag nato ang kalumo kon kita maglakaw pinaagi sa espiritu ug magpakitag pagpugong-sa-kaugalingon.
23, 24. Unsay pagpugong-sa-kaugalingon, ug sa unsang paagi makatabang kini kanato?
23 Kon kita may pagpugong-sa-kaugalingon, kita makapugong sa atong kaugalingon batok sa daotang mga hunahuna, sinultihan, ug mga lihok. Si Jehova “nagpadayon sa pagpugong-sa-kaugalingon” sa pagpakiglabot sa Babilonyanhong mga tiglaglag sa Jerusalem. (Isaias 42:14) Ang iyang Anak ‘nagbilin kanatog sulondan’ pinaagi sa pagpakitag pagpugong-sa-kaugalingon samtang siya nakaagom ug mga pagsulay. Ug si apostol Pedro nagtambag sa mga isigka-Kristohanon nga ‘ipuno sa ilang kahibalo ang pagpugong-sa-kaugalingon.’—1 Pedro 2:21-23; 2 Pedro 1:5-8.
24 Ang Kristohanong mga ansiyano gidahom nga magmapugnganon sa ilang kaugalingon. (Tito 1:7, 8) Sa pagkatinuod, ang tanan nga giniyahan sa balaang espiritu makahimo sa pagpugong sa kaugalingon ug sa ingon sila makalikay sa imoralidad, malaw-ayng sinultihan, o sa bisan unsang buhat nga dili mauyonan ni Jehova. Kon maugmad nato ang pagpugong-sa-kaugalingon sa tabang sa espiritu sa Diyos, mamatikdan kini sa uban tungod sa atong diyosnong sinultihan ug panggawi.
Magpadayon sa Paglakaw Pinaagi sa Espiritu
25, 26. Kon kita magalakaw pinaagi sa espiritu, unsay epekto niini diha sa atong mga relasyon karon ug sa atong mga palaaboton?
25 Kon magalakaw kita pinaagi sa espiritu, kita mahimong madasigong mga magmamantala sa Gingharian. (Buhat 18:24-26) Kita mahimong maayong mga kauban, ug ang diyosnong mga tawo malipayng makig-uban kanato. Sama sa mga tawo nga giniyahan sa balaang espiritu, makapalig-on usab kita sa atong mga isigkamagsisimba ni Jehova. (Filipos 2:1-4) Dili ba kana ang gitinguha sa tanang Kristohanon?
26 Dili sayon ang paglakaw pinaagi sa espiritu samtang ania pa kita sa kalibotan nga gigamhan ni Satanas. (1 Juan 5:19) Apan milyonmilyon na ang nagbuhat niana karon. Kon mosalig kita kang Jehova uban sa bug-os natong kasingkasing, kita magkalipay sa kinabuhi karon ug makalakaw hangtod sa kahangtoran diha sa matarong nga mga dalan sa mahigugmaong Magtatagana sa balaang espiritu.—Salmo 128:1; Proverbio 3:5, 6.
Unsay Imong Tubag?
• Sa unsang paagi maapektohan ang atong relasyon sa Diyos ug sa iyang Anak tungod sa ‘paglakaw pinaagi sa espiritu’?
• Unsang mga hiyas ang nalakip sa mga bunga sa balaang espiritu?
• Sa unsang mga paagi atong ikapasundayag ang mga bunga sa espiritu sa Diyos?
• Sa unsang paagi maapektohan ang atong kinabuhi karon ug ang atong kaugmaon tungod sa paglakaw pinaagi sa espiritu?
[Hulagway sa panid 23]
Ang balaang espiritu ni Jehova makapausbaw sa gugma alang sa atong mga isigkamagtutuo
[Hulagway sa panid 24]
Ipasundayag ang kalulot pinaagi sa makapalig-ong mga pulong ug mga buhat nga makatabang