Unsa ang Balaang Espiritu?
KAS-A, gipangutana ni Jesus ang iyang mga disipulo: “Kinsang amahana taliwala kaninyo nga, kon ang iyang anak mangayog isda, tingali maghatag kaniyag serpente inay isda? O kon siya usab mangayog itlog, hatagan siyag tanga?” (Lucas 11:11, 12) Ang mga bata sa Galilea ganahan kaayong mokaon ug itlog ug isda; sila nahibalo gayod kon unsay gusto nilang kaonon.
Si Jesus miingon nga magpadayon gayod kita sa pagpangayo sa balaang espiritu, samag gigutom nga bata nga nangayog pagkaon. (Lucas 11:9, 13) Ang pagkasayod kon unsa gayod ang balaang espiritu makatabang kanato nga masabtan ang kabililhon niana sa atong kinabuhi. Busa, susihon una nato kon unsay gitudlo sa Bibliya bahin sa balaang espiritu.
“Gahom sa Labing Hataas”
Ang Kasulatan tin-awng nagtudlo nga ang balaang espiritu maoy usa ka puwersa nga gigamit sa Diyos sa pagpatuman sa iyang kabubut-on. Sa dihang ang manulondang si Gabriel nagpahibalo kang Maria nga siya manganak ug usa ka batang lalaki bisag siya usa ka ulay, ang manulonda miingon: “Pagakunsaran ikaw sa balaang espiritu, ug pagalandongan ikaw sa gahom sa Labing Hataas. Tungod niana usab ang matawo pagatawgong balaan, Anak sa Diyos.” (Lucas 1:35) Ang mga pulong ni manulondang Gabriel nagpadayag nga ang balaang espiritu nalangkit sa “gahom sa Labing Hataas.”
Kana gisuportahan sa ubang mga teksto sa Bibliya. Ang propetang si Miqueas miingon: “Ako napuno sa gahom, pinaagi sa espiritu ni Jehova.” (Miqueas 3:8) Si Jesus misaad sa iyang mga disipulo: “Kamo magadawat ug gahom sa dihang ang balaang espiritu mokunsad kaninyo.” (Buhat 1:8) Ug si apostol Pablo naghisgot usab bahin sa “gahom sa balaang espiritu.”—Roma 15:13, 19.
Busa, base sa mga teksto sa itaas, unsay atong ikahinapos? Ang balaang espiritu nalangkit gayod sa gahom sa Diyos. Ang balaang espiritu maoy gigamit ni Jehova sa pagpasundayag sa iyang gahom. Sa laing pagkasulti, kini mao ang aktibong puwersa sa Diyos. Makapahingangha gayod ang maong puwersa! Dili nato matugkad ang gahom nga gigamit sa Diyos sa paglalang sa tibuok uniberso. Pinaagi ni propetang Isaias, si Jehova nag-awhag kanato sa pagpalandong niini: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”—Isaias 40:26.
Oo, ang Bibliya nagpakita nga ang uniberso, uban sa talagsaong pagkaorganisar niini, mitungha tungod sa “dinamikong kusog,” o gahom sa Labing Gamhanang Diyos. Dayag nga gamhanan kaayo ang aktibong puwersa sa Diyos, ug ang atong paglungtad nagdepende niini.—Tan-awa ang kahon nga “Kon sa Unsang Paagi Gigamit sa Diyos ang Balaang Espiritu.”
Mahimong gamiton ni Jehova ang iyang balaang espiritu sa dakong sukod, sama sa paglalang sa uniberso. Apan mahimo usab niya kining gamiton sa pagtabang sa mga tawo. Ang Bibliya naghisgot ug daghang pananglitan nga nagpakita kon sa unsang paagi ang balaang espiritu sa Diyos naghatag ug gahom sa iyang mga alagad.
“Ang Espiritu ni Jehova Ania Kanako”
Ang ministeryo ni Jesus naghatag kanatog ideya kon sa unsang paagi ang balaang espiritu makatabang sa mga alagad sa Diyos. “Ang espiritu ni Jehova ania kanako,” miingon si Jesus sa mga taga-Nasaret. (Lucas 4:18) Unsay mga nahimo ni Jesus tungod sa “gahom sa espiritu”? (Lucas 4:14) Siya nag-ayo sa tanang matang sa sakit, nagpakalma sa dagat nga gikusokuso sa unos, nagpakaon sa linibo ka tawo sa pipila lang ka tinapay ug isda, ug nagbanhaw pa gani ug patay. Gihubit ni apostol Pedro si Jesus ingong “usa ka tawo nga dayag nga gipakita sa Diyos . . . pinaagi sa gamhanang mga buhat ug mga tilimad-on ug mga ilhanan nga gibuhat sa Diyos pinaagi kaniya.”—Buhat 2:22.
Sa atong panahon, ang balaang espiritu wala na magpahinabo ug samang mga milagro. Bisan pa niana, kini makahimog talagsaong mga butang alang kanato. Sama sa gipasalig ni Jesus sa iyang mga disipulo, si Jehova gusto gayong mohatag sa iyang balaang espiritu ngadto sa iyang mga alagad. (Lucas 11:13) Busa, si apostol Pablo miingon: “Sa tanang butang ako adunay kusog pinaagi kaniya nga naghatag ug gahom kanako.” (Filipos 4:13) Ang balaang espiritu ba makatabang usab kanimo? Kini tubagon sa mosunod nga artikulo.
[Kahon/Hulagway sa panid 5]
Kon nganong ang balaang espiritu dili usa ka persona
Sa Bibliya, ang balaang espiritu gitandi sa tubig. Sa dihang ang Diyos nagsaad nga sa umaabot iyang panalanginan ang iyang katawhan, siya miingon: “Buboan ko ug tubig ang giuhaw, ug nagdagayday nga mga sapa ang mala nga dapit. Igabubo ko ang akong espiritu sa imong binhi, ug ang akong panalangin sa imong mga kaliwat.”—Isaias 44:3.
Sa dihang gibubo sa Diyos ang iyang espiritu ngadto sa iyang mga alagad, sila “napuno sa balaang espiritu.” Si Jesus, Juan Bawtista, Pedro, Pablo, Bernabe, maingon man usab ang mga disipulo nga nagtigom sa adlaw sa Pentekostes niadtong 33 C.E. gihubit sa Bibliya nga napuno sa balaang espiritu.—Lucas 1:15; 4:1; Buhat 4:8; 9:17; 11:22, 24; 13:9.
Hunahunaa kini: Mahimo bang ‘ibubo’ ang usa ka persona ngadto sa lainlaing mga tawo? Mahimo ba nga ang usa ka grupo sa mga tawo ‘mapuno’ ug usa ka persona? Dili gayod. Ang Bibliya naghisgot bahin sa mga tawo nga napuno sa kaalam, pagsabot, o bisan gani sa tukmang kahibalo, apan kini wala gayod maghisgot nga dunay tawo nga napuno ug laing persona.—Exodo 28:3; 1 Hari 7:14; Lucas 2:40; Colosas 1:9.
Ang Gregong pulong nga gihubad ug “espiritu” maoy pneuʹma, nga nagkahulogan usab ug dili-makitang gahom. Sumala sa An Expository Dictionary of New Testament Words ni Vine, ang pulong pneuʹma “pangunang nagkahulogang hangin . . . ug gininhawa; ilabina gayod espiritu, nga sama sa hangin, dili makita ug gamhanan.”
Busa, tin-aw gayod nga ang balaang espiritu dili usa ka persona.a
[Footnote]
a Alang sa dugang impormasyon, tan-awa ang ulohang “Ang Kamatuoran Bahin sa Amahan, Anak, ug Balaang Espiritu,” panid 201-204, sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
[Credit Line]
Photodisc/SuperStock