“Usa ra ang Inyong Pangulo, si Kristo”

“Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo.”—MAT. 23:9, 10.

 1. Kinsay giila nga Pangulo sa mga Saksi ni Jehova, ug ngano?

ANG mga relihiyon sa Kakristiyanohan dunay tawhanong pangulo, sama sa papa sa Roma, mga patriarka ug arsobispo sa Eastern Orthodox, ug mga kadagkoan sa ubang relihiyon. Ang mga Saksi ni Jehova walay giilang tawhanong pangulo. Sila dili mga disipulo o sumusunod ni bisan kinsang tawo. Nahiuyon kini sa gitagna ni Jehova bahin sa iyang Anak: “Tan-awa! Ingong saksi ngadto sa nasodnong mga pundok akong gihatag siya, ingong pangulo ug komandante ngadto sa nasodnong mga pundok.” (Isa. 55:4) Ang internasyonal nga kongregasyon sa dinihogang mga Kristohanon ug ang “ubang mga karnero” nagpasakop sa bugtong pangulo nga gihatag ni Jehova kanila. (Juan 10:16) Sila miuyon sa giingon ni Jesus: “Usa ra ang inyong Pangulo, si Kristo.”—Mat. 23:10.

Manulonda nga Prinsipe sa Israel

2, 3. Unsay papel sa Anak sa Diyos diha sa Israel?

² Mga siglo una pa matukod ang Kristohanong kongregasyon, si Jehova nagtudlo ug manulonda nga mangulo sa Israel. Human luwasa ang mga Israelinhon gikan sa Ehipto, si Jehova miingon kanila: “Ania, ako nagpadalag usa ka manulonda nga mag-una kanimo aron sa pagbantay kanimo sa dalan ug aron sa pagdala kanimo ngadto sa dapit nga akong giandam. Magbantay ka tungod kaniya ug tumana ang iyang tingog. Ayaw paggawi nga masuklanon batok kaniya, kay dili niya pasayloon ang inyong kalapasan; tungod kay ang akong ngalan anaa kaniya.” (Ex. 23:20, 21) Dayag nga ang maong manulonda, nga ang ‘ngalan ni Jehova anaa kaniya,’ mao ang panganay nga Anak sa Diyos.

³ Sa wala pa siya matawo sa yuta, ang Anak sa Diyos dayag nga ginganlag Miguel. Sa basahon ni Daniel, si Miguel gitawag ug “prinsipe” sa Israel. (Dan. 10:21) Ang tinun-ang si Judas naghisgot nga si Miguel nalangkit sa kalihokan sa Israel una pa sa adlaw ni Daniel. Human mamatay si Moises, hayan nagtinguha si Satanas nga gamiton ang lawas ni Moises alang sa iyang katuyoan, tingali pinaagi sa paghaylo sa Israel sa pagbuhat ug idolatriya. Si Miguel milihok aron babagan kana. Si Judas miasoy: “Sa dihang si Miguel nga arkanghel may panagbingkil sa Yawa ug nakiglalis bahin sa lawas ni Moises, siya wala mangahas sa pagpakanaog ug hukom batok kaniya sa mapasipalahong mga pulong, kondili miingon: ‘Hinaot si Jehova magabadlong kanimo.’” (Jud. 9) Wala madugay human niana, una pa sa paglikos sa Jerico, walay duhaduha nga si Miguel, ang “prinsipe sa kasundalohan ni Jehova,” mao ang mipakita kang Josue aron pasaligan siya sa tabang sa Diyos. (Basaha ang Josue 5:13-15.) Sa dihang gibabagan sa usa ka prinsipe nga demonyo ang manulonda nga nagdalag importanteng mensahe para kang Daniel, si Miguel nga arkanghel miabot aron sa pagtabang sa maong manulonda.—Dan. 10:5-7, 12-14.

Miabot ang Gitagnang Pangulo

 4. Unsay gitagna bahin sa pag-abot sa Mesiyas?

⁴ Sa wala pa tabangi ni Miguel ang maong manulonda, si Jehova nagpadala kang manulondang Gabriel ngadto kang Daniel aron ipahibalo kaniya ang tagna bahin sa pag-abot sa “Mesiyas nga Pangulo.” (Dan. 9:21-25)a Ingon sa gitagna, si Jesus gibawtismohan ni Juan sa tinghunlak sa 29 K.P. Ang balaang espiritu gibubo kang Jesus, nga naghimo kaniyang Dinihogan—Kristo, ang Mesiyas. (Mat. 3:13-17; Juan 1:29-34; Gal. 4:4) Sa ingon, siya mahimong Pangulo nga walay sama.

 5. Sa unsang paagi si Jesus milihok ingong Pangulo panahon sa iyang ministeryo?

⁵ Sukad sa sinugdanan sa ministeryo ni Jesus, iyang gipamatud-an nga siya ang “Mesiyas nga Pangulo.” Sulod lang sa pipila ka adlaw, siya nagtigom ug mga tinun-an, ug naghimo sa iyang unang milagro. (Juan 1:35–2:11) Ang iyang mga tinun-an miuban kaniya samtang nagsangyaw siya sa maayong balita sa Gingharian sa tibuok Israel. (Luc. 8:1) Siya nagbansay kanila sa buluhatong pagsangyaw ug nanguna sa pagsangyaw ug pagpanudlo, nga naghatag kanilag maayong panig-ingnan. (Luc. 9:1-6) Ang mga ansiyano karon angayng mosundog kaniya niining bahina.

 6. Unsay pamatuod nga si Kristo mao ang Magbalantay ug Pangulo?

⁶ Si Jesus nagpunting sa laing bahin sa iyang pagkapangulo pinaagi sa pagtandi sa iyang kaugalingon sa usa ka mahigugmaong magbalantay. Sa librong The Land and the Book, gipatin-aw ni W. M. Thomson kon sa unsang paagi ang mga magbalantay sa karnero sa Sidlakan manguna sa ilang panon: “Ang magbalantay mag-una sa mga karnero, dili lamang sa pagtultol kanila sa dalan, kondili sa pagtino usab kon kini ba luwas ug maagian sa mga karnero. . . . Gamit ang iyang baston, siya maggiya sa panon ngadto sa lunhawng sibsibanan, ug manalipod kanila batok sa mga kaaway.” Aron ipakita nga siya mao ang tinuod nga Magbalantay ug Pangulo, si Jesus miingon: “Ako ang maayong magbalantay; ang maayong magbalantay magatugyan sa iyang kalag alang sa mga karnero. Ang akong mga karnero magapatalinghog sa akong tingog, ug ako nakaila kanila, ug sila magasunod kanako.” (Juan 10:11, 27) Sumala sa iyang giingon, si Jesus naghalad sa iyang kinabuhi alang sa iyang mga karnero, apan si Jehova “nagbanhaw kaniya ingong pangulo ug Manluluwas.”—Buh. 5:31, New Jerusalem Bible; Heb. 13:20.

Magtatan-aw sa Kristohanong Kongregasyon

 7. Pinaagi sa unsa nga si Jesus nagdumala sa Kristohanong kongregasyon?

⁷ Sa hapit na siyang mokayab sa langit, ang binanhawng si Jesus miingon sa iyang mga tinun-an: “Ang tanang awtoridad gihatag na kanako sa langit ug sa yuta.” (Mat. 28:18) Gipiyal ni Jehova kang Jesus ang pagbubo sa balaang espiritu ngadto sa iyang mga tinun-an aron mapalig-on sila. (Juan 15:26) Gihimo niya kana niadtong Pentekostes 33 K.P. (Buh. 2:33) Nagtimaan kadto sa pagkatukod sa Kristohanong kongregasyon. Si Jehova naghimo sa iyang Anak nga pangulo ibabaw sa tanang kongregasyon sa yuta. (Basaha ang Efeso 1:22; Colosas 1:13, 18.) Si Jesus naggiya sa Kristohanong kongregasyon pinaagi sa balaang espiritu ni Jehova, ug mahimo niyang sugoon ang mga manulonda nga “gipailalom [sa Diyos] kaniya.”—1 Ped. 3:22.

 8. Kinsay gigamit ni Kristo sa pagpanguna sa iyang mga tinun-an sa unang siglo, ug kinsay iyang gigamit karon?

⁸ Dugang pa, pinaagi sa balaang espiritu si Kristo naghatag ug “mga gasa nga mga lalaki,” ang pipila “ingong mga magbalantay ug mga magtutudlo” sa kongregasyon. (Efe. 4:8, 11) Si apostol Pablo nag-awhag sa mga magtatan-aw: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos.” (Buh. 20:28) Sa dihang natukod ang Kristohanong kongregasyon, ang tanang magtatan-aw maoy mga dinihogan sa espiritu. Ang mga apostoles ug mga ansiyano sa kongregasyon sa Jerusalem naglihok ingong nagamandong lawas. Gigamit kini ni Kristo sa pagpanguna sa tanan niyang dinihogang “mga igsoon” dinhi sa yuta. (Heb. 2:11; Buh. 16:4, 5) Niining panahon sa kataposan, gipiyal ni Kristo ang “tanan niyang mga kabtangan”—tanang intereses sa Gingharian dinhi sa yuta—ngadto sa iyang “matinumanon ug maalamong ulipon” ug sa hawas niini ang Nagamandong Lawas, usa ka grupo sa dinihogang Kristohanong mga lalaki. (Mat. 24:45-47) Ang mga dinihogan ug ang ubang mga karnero nahibalo nga pinaagi sa ilang pagpasakop sa pagpanguna sa modernong-adlaw nga Nagamandong Lawas, sila sa pagkatinuod nagpasakop sa ilang Pangulo, si Kristo.

Gisugdan ni Kristo ang Buluhatong Pagsangyaw

9, 10. Sa unsang paagi si Kristo nagdumala sa pagpakaylap sa maayong balita sa Gingharian?

⁹ Sukad sa sinugdan, si Jesus mismo ang nanguna sa tibuok-kalibotang buluhaton nga pagsangyaw ug pagpanudlo. Iyang gipakita kon asa unang iwali ang maayong balita sa Gingharian. Panahon sa iyang ministeryo, siya nagsugo sa iyang mga apostoles: “Ayaw pag-adto sa dalan sa mga nasod, ug ayaw pagsulod sa usa ka siyudad sa mga Samarianhon; apan, hinunoa, adto kanunay sa nawalang mga karnero sa balay sa Israel. Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mat. 10:5-7) Masiboton nila kining gihimo taliwala sa mga Hudiyo ug mga kinabig, ilabina human sa Pentekostes 33 K.P.—Buh. 2:4, 5, 10, 11; 5:42; 6:7.

¹⁰ Sa ulahi, pinaagi sa balaang espiritu, gisugo ni Jesus ang iyang mga tinun-an nga imantala ang Gingharian ngadto sa mga Samarianhon ug dayon sa ubang mga dili-Hudiyo. (Buh. 8:5, 6, 14-17; 10:19-22, 44, 45) Aron mokaylap pa ang maayong balita sa kanasoran, si Jesus mismo ang nagpalihok kang Saulo sa Tarso nga mahimong Kristohanon. Gisugo ni Jesus ang iyang tinun-ang si Ananias: “Tindog, umadto ka sa dalan nga gitawag ug Tul-id, ug sa balay ni Judas pangitaa ang usa ka tawo nga ginganlag Saulo, nga taga-Tarso. . . . Umadto ka, tungod kay kining tawhana maoy usa ka piniling sudlanan alang kanako aron magdala sa akong ngalan ngadto sa tanang kanasoran maingon man sa mga hari ug sa mga anak sa Israel.” (Buh. 9:3-6, 10, 11, 15) Ang maong tawo nahimong si apostol Pablo.—1 Tim. 2:7.

11. Sa unsang paagi gigamit ni Kristo ang balaang espiritu sa pagpakaylap sa buluhatong pagsangyaw?

¹¹ Sa dihang kinahanglan nang ipakaylap ang maayong balita ngadto sa dili-Hudiyong mga nasod, ang balaang espiritu nagsugo kang Pablo sa pag-adto sa Asia Minor ug sa Uropa ingong misyonaryo. Ang asoy ni Lucas diha sa Buhat nag-ingon: “Samtang sila [Kristohanong mga manalagna ug magtutudlo sa kongregasyon sa Antioquia sa Sirya] dayag nga nag-alagad kang Jehova ug nagpuasa, ang balaang espiritu miingon: ‘Ilain alang kanako gikan sa tanan si Bernabe ug si Saulo alang sa buluhaton nga niini gitawag ko sila.’ Unya sila nagpuasa ug nag-ampo ug nagpandong sa ilang mga kamot diha kanila ug nagpalakaw kanila.” (Buh. 13:2, 3) Si Jesus mismo ang nagtawag kang Saulo sa Tarso aron mahimong Iyang “piniling sudlanan” nga magdala sa Iyang ngalan sa kanasoran; busa, kining dugang pagdasig sa buluhatong pagsangyaw naggikan kang Kristo, ang Pangulo sa kongregasyon. Ang paggamit ni Jesus sa balaang espiritu aron sa pagdumala sa buluhaton nahimong tin-aw kaayo panahon sa ikaduhang misyonaryong panaw ni Pablo. Ang asoy nag-ingon nga “ang espiritu ni Jesus,” sa ato pa, si Jesus pinaagi sa balaang espiritu, naggiya kang Pablo ug sa iyang mga kauban kon asa sila moadto, ug pinaagi sa usa ka panan-awon gisugo sila sa pag-adto sa Uropa.—Basaha ang Buhat 16:6-10.

Ang Pagpanguna ni Jesus sa Iyang Kongregasyon

12, 13. Unsay giingon sa basahon sa Pinadayag nga nagpakita nga si Kristo interesado gayod kon unsay nagakahitabo sa matag kongregasyon?

¹² Si Jesus interesado gayod kon unsay nagakahitabo sa mga kongregasyon sa iyang dinihogang mga sumusunod sa unang siglo K.P. Nahibalo siya sa espirituwal nga kahimtang sa matag kongregasyon. Mabasa nato kini sa Pinadayag kapitulo 2 ug 3. Iyang gihisgotan ang pito ka kongregasyon, nga nahimutang sa Asia Minor. (Pin. 1:11) Tino nga siya nahibalo usab sa espirituwal nga kahimtang sa ubang mga kongregasyon niadtong panahona.—Basaha ang Pinadayag 2:23.

¹³ Gihatagag komendasyon ni Jesus ang pipila ka kongregasyon tungod sa ilang pagkamalahutayon, pagkamatinumanon ilalom sa pagsulay, pagkamaunongon sa iyang pulong, ug sa ilang pagsalikway sa mga apostata. (Pin. 2:2, 9, 13, 19; 3:8) Sa laing bahin, siya naghatag ug bug-at nga tambag sa daghang kongregasyon tungod kay mibugnaw ang ilang gugma kaniya, mikonsentir sila sa idolatriya ug pakighilawas, ug mitugot sa pagkabahinbahin ngadto sa mga sekta. (Pin. 2:4, 14, 15, 20; 3:15, 16) Ingong mahigugmaong magtatan-aw—bisan niadtong gihatagan niyag mabug-at nga tambag—si Jesus miingon: “Ang tanan nga akong gimahal akong ginabadlong ug ginadisiplina. Busa magmasiboton ug maghinulsol.” (Pin. 3:19) Bisag atua si Jesus sa langit, siya naggiya sa mga kongregasyon sa iyang mga tinun-an pinaagi sa balaang espiritu. Sa konklusyon sa iyang mensahe sa maong mga kongregasyon, siya miingon: “Ang adunay igdulungog magpatalinghog sa ginaingon sa espiritu ngadto sa mga kongregasyon.”—Pin. 3:22.

14-16. (a) Unsay nagpamatuod nga si Jesus maoy maisogong Pangulo sa katawhan ni Jehova? (b) Unsay resulta sa ‘pag-uban’ ni Jesus sa iyang mga tinun-an “sa tanang adlaw hangtod sa kataposan sa sistema sa mga butang”? (c) Unsay atong hisgotan sa sunod nga artikulo?

¹⁴ Atong nakita nga ang arkanghel nga si Miguel (Jesus) maoy maisogong Pangulo sa Israel. Sa ulahi, si Jesus maoy maisogong Pangulo ug mahigugmaong Magbalantay sa iyang mga tinun-an. Panahon sa iyang ministeryo sa yuta, siya ang nanguna sa buluhatong pagsangyaw, ug human sa iyang pagkabanhaw, siya ang nagdumala sa pagpakaylap sa maayong balita sa Gingharian.

¹⁵ Pinaagi sa balaang espiritu, ipakaylap ni Jesus ang buluhatong pagsangyaw sa tibuok yuta. Una pa sa iyang pagkayab sa langit, si Jesus miingon sa iyang mga tinun-an: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buh. 1:8; basaha ang 1 Pedro 1:12.) Ilalom sa pagtultol ni Kristo, bug-os nawali ang maayong balita sa unang siglo.—Col. 1:23.

¹⁶ Apan gipaila ni Jesus nga ang maong buluhaton magpadayon hangtod sa panahon sa kataposan. Human niya sugoa ang iyang mga sumusunod sa pagsangyaw ug paghimog mga tinun-an sa tanang kanasoran, si Jesus misaad kanila: “Ako magauban kaninyo sa tanang adlaw hangtod sa kataposan sa sistema sa mga butang.” (Mat. 28:19, 20) Sukad sa iyang paghari niadtong 1914, si Kristo labaw pang “nagauban” sa iyang mga tinun-an ug nagalihok ingong ilang Pangulo. Ang daghan niyang buluhaton sukad niadtong 1914 pagahisgotan sa sunod nga artikulo.

[Footnote]

Agig Pagsubli

• Sa unsang paagi napamatud-an nga ang Anak sa Diyos maoy aktibong Pangulo sa Israel?

• Kinsay gigamit ni Kristo sa pagpanguna sa iyang kongregasyon dinhi sa yuta?

• Sa unsang paagi si Kristo nanguna sa pagpakaylap sa maayong balita?

• Unsay nagpakita nga si Kristo interesado gayod sa espirituwal nga kahimtang sa matag kongregasyon?

[Hulagway sa panid 21]

“Ako nagpadalag usa ka manulonda nga mag-una kanimo”

[Hulagway sa panid 23]

Sama kaniadto, si Kristo naggamit sa “mga gasa nga mga lalaki” aron sa pagbantay sa iyang panon