Nganong Magpagiya sa Espiritu sa Diyos?
“Ikaw mao ang akong Diyos. Ang imong espiritu maayo; tultolan unta ako niini.”—SAL. 143:10.
1. Iilustrar kon sa unsang paagi ang dili makitang puwersa makagiya sa usa ka tawo.
NAKAGAMIT ka na ba sukad ug kompas? Makatabang kini sa pagtultol sa hustong direksiyon. Duna kiniy magnetikong dagom nga nagpunting sa amihanan. Tungod sa dili makitang puwersa nga gitawag ug magnetismo, ang dagom molihok. Sa kasiglohan, ang mga eksplorador ug tigbiyahe naggamit ug kompas sa ilang pagpanaw sa yuta ug dagat.
2, 3. (a) Unsang gamhanang puwersa ang gigamit ni Jehova sa kanhiayng panahon? (b) Nganong dahomon nato nga ang aktibong puwersa sa Diyos maggiya kanato karon?
2 May laing dili makitang puwersa nga mas hinungdanon sa paggiya kanato. Unsa kini? Gihubit kini sa unang mga bersikulo sa Bibliya. Ang Genesis naghisgot kon unsay nalampos ni Jehova sa kanhiayng panahon: “Sa sinugdan gilalang sa Diyos ang mga langit ug ang yuta.” Nasayod kita nga siya migamit ug gamhanang puwersa sa paglalang kay ang asoy nagpadayon: “Ang aktibong puwersa sa Diyos naglihok ngadto-nganhi.” (Gen. 1:1, 2) Unsa kini nga puwersa? Ang iyang balaang espiritu. Kita mapasalamaton nga gigamit kini ni Jehova sa paglalang kanato ug sa ubang butang.—Job 33:4; Sal. 104:30.
3 Apan makadahom ba kita nga ang aktibong puwersa sa Diyos makaapektar sa atong kinabuhi sa laing paagi? Oo, kay si Jesus miingon sa iyang mga tinun-an: “Ang espiritu . . . magatultol kaninyo ngadto sa tibuok nga kamatuoran.” (Juan 16:13) Unsa ang espiritu, ug nganong angay kitang magpagiya niini?
Kon Unsa ang Balaang Espiritu
4, 5. (a) Unsang sayop nga ideya bahin sa balaang espiritu ang gihuptan niadtong nagtuo sa Trinidad? (b) Ipatin-aw kon unsa ang balaang espiritu.
4 Ang pipila ka Iningles nga hubad sa Bibliya sama sa King James Version nagtawag sa balaang espiritu ingong Holy Ghost. Kadtong nagtuo sa Trinidad nasayop, kay sila naghunahuna nga kini usa ka espiritung persona nga tupong sa Diyos nga Amahan. (1 Cor. 8:6) Apan makapainteres nga sa The Webster Bible, nga unang gipatik niadtong 1833 ug gibase sa King James Version, gigamit sa Amerikanong leksikograpo nga si Noah Webster ang “Holy Spirit [balaang espiritu]” puli sa “Holy Ghost.” Iya kadtong gihimo kay nahibalo siya nga sa Kasulatan ang maong ekspresyon wala magtumong sa usa ka espiritung persona.a
5 Nan, unsa ang balaang espiritu? Ang Hebreohanong pulong nga ruʹach, nga gigamit sa Genesis 1:2, sagad gihubad nga ‘espiritu,’ apan kini gihubad usab nga ‘hangin’ ug sa ubang pulong nga nagtumong sa dili makitang aktibong puwersa. (Itandi ang Genesis 3:8; 8:1.) Sama nga ang hangin dili makita apan dunay puwersa, mao man usab ang balaang espiritu; kini dili makita apan dayag ang mga epekto niini. Ang espiritu maoy enerhiya gikan sa Diyos nga iyang gigamit nganha sa mga tawo o ubang butang aron molampos ang iyang katuyoan. Lisod bang tuohan nga ang maong kahibulongang puwersa naggikan sa Labing Gamhanang Diyos? Dili gayod!—Basaha ang Isaias 40:12, 13.
6. Unsay gihangyo ni David kang Jehova?
6 Padayon bang gamiton ni Jehova ang iyang espiritu sa paggiya kanato? Siya misaad kang David: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan.” (Sal. 32:8) Gusto ba ni David nga magpagiya? Oo, kay siya mihangyo kang Jehova: “Tudloi ako sa pagbuhat sa imong kabubut-on, kay ikaw mao ang akong Diyos. Ang imong espiritu maayo; tultolan unta ako niini.” (Sal. 143:10) Angay usab natong tinguhaon nga magpagiya sa espiritu sa Diyos. Ngano? Tagda ang upat ka rason.
Kita Walay Katakos sa Paggiya sa Kaugalingon
7, 8. (a) Nganong dili kita makagiya sa atong kaugalingon? (b) Iilustrar kon nganong dili kita magkinaugalingon sa paglabang niining daotang sistema.
7 Una, buot natong magpagiya sa espiritu sa Diyos kay wala kitay katakos sa paggiya sa kaugalingon. Ang “paggiya” nagpasabot sa “pagtultol sa dalan o pagpakita sa agianan nga angay sundon.” Apan wala kita lalanga ni Jehova uban ang katakos sa paggiya sa kaugalingon, ilabina nga dili na kita hingpit. Si propeta Jeremias misulat: “O Ginoo, ako nahibalo nga dili iya sa tawo ang iyang dalan: ang tawo walay gahom sa paggiya sa iyang mga lakang.” (Jer. 10:23, The Bible in Basic English) Nganong dili makahimo ang tawo? Si Jehova naghatag sa rason pinaagi kang Jeremias: “Ang kasingkasing labaw nga malimbongon kay sa bisan unsa pa ug desperado. Kinsa ang makahibalo niini?”—Jer. 17:9; Mat. 15:19.
8 Maalamon kaha nga ang walay kasinatiang tawo moadto sa lasang nga dili niya kabisado, nga walay suhetong kauban o kompas man lang sa paggiya kaniya? Kay walay kahibalo kon unsaon paglingkawas sa delikadong kahimtang sa lasang ug walay kahanas sa pagsubay sa dalan aron makaabot sa iyang destinasyon, gipameligro niya ang iyang kinabuhi. Sa susama, gipameligro sa usa ang iyang kinabuhi kon siya maghunahunang magiyahan niya ang kaugalingon latas niining daotang kalibotan bisan walay pagtultol sa Diyos. Ang bugtong paagi nga makalabang kita niining sistemaha mao ang pag-ampo kang Jehova sama sa gihangyo ni David: “Magsubay unta ang akong mga lakang sa imong mga alagianan, diin ang akong mga tiil dili matipas.” (Sal. 17:5; 23:3) Sa unsang paagi nato madawat ang maong giya?
9. Ingon sa gipakita sa panid 17, sa unsang paagi ang espiritu sa Diyos mogiya kanato?
9 Kon kita mapainubsanon ug mosalig kang Jehova, ihatag niya ang balaang espiritu sa paggiya kanato. Sa unsang paagi kini motabang kanato? Si Jesus miingon sa iyang mga tinun-an: “Ang magtatabang, ang balaang espiritu, nga ipadala sa Amahan sa akong ngalan, siya magtudlo kaninyo sa tanang butang ug magpahinumdom kaninyo sa tanang butang nga akong gisulti kaninyo.” (Juan 14:26) Samtang kita regular ug seryosong magtuon sa Bibliya, lakip ang mga pagtulon-an ni Kristo, ang balaang espiritu motabang sa pagsabot sa lawom nga kaalam ni Jehova aron masunod nato ang iyang kabubut-on. (1 Cor. 2:10) Dihang motungha ang wala damhang panghitabo sa kinabuhi, ang espiritu motabang nato kon unsay buhaton. Kini magpahinumdom nato sa mga prinsipyo sa Bibliya ug motabang kon unsaon kana paggamit aron makahimog maayong desisyon.
Si Jesus Gigiyahan sa Espiritu sa Diyos
10, 11. Unsay gidahom ni Jesus maylabot sa balaang espiritu, ug unsay iyang nasinati?
10 Ang ikaduhang rason nga magpagiya kita sa balaang espiritu kay kini ang gigamit sa Diyos sa paggiya sa iyang Anak. Sa wala pa moanhi sa yuta, ang Anak sa Diyos nahibalo niini nga tagna: “Ang espiritu ni Jehova mopahiluna kaniya, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova.” (Isa. 11:2) Handurawa ang dakong tinguha ni Jesus nga madawat ang tabang sa espiritu sa Diyos dihang magkinabuhi sa yuta!
11 Natuman ang giingon ni Jehova. Ang Ebanghelyo nag-asoy sa nahitabo human sa bawtismo ni Jesus: “Karon si Jesus, nga puno sa balaang espiritu, mipalayo gikan sa Jordan, ug gidala siya sa espiritu didto sa kamingawan.” (Luc. 4:1) Didto, samtang si Jesus nagpuasa, nag-ampo, ug namalandong, lagmit si Jehova naghatag kaniyag mga instruksiyon ug nag-andam kaniya sa kon unsay mahitabo. Ang aktibong puwersa sa Diyos naglihok sa hunahuna ug kasingkasing ni Jesus, nga naggiya sa iyang panghunahuna ug mga desisyon. Ingong resulta, nahibalo siya kon unsay buhaton sa matag kahimtang ug gituman gayod ang kabubut-on sa iyang Amahan.
12. Nganong angayng pangayoon ang espiritu sa Diyos sa paggiya kanato?
12 Kay nahibalo sa kahinungdanon sa espiritu sa Diyos sa iyang kinabuhi, gidasig ni Jesus ang iyang mga tinun-an nga mangayog balaang espiritu ug magpagiya niini. (Basaha ang Lucas 11:9-13.) Nganong angay usab nato kining pangayoon? Kay bag-ohon niini ang atong panghunahuna aron mahisama sa panghunahuna ni Kristo. (Roma 12:2; 1 Cor. 2:16) Kon magpagiya kita sa espiritu sa Diyos, atong masundog ang panig-ingnan ni Kristo.—1 Ped. 2:21.
Ang Espiritu sa Kalibotan Makapahisalaag Kanato
13. Unsa ang espiritu sa kalibotan, ug unsay epekto niini sa mga tawo?
13 Ang ikatulong rason nga magpagiya sa espiritu sa Diyos maoy aron dili kita mapahisalaag sa espiritu sa kalibotan nga nag-impluwensiya sa kadaghanan karon. Ang kalibotan may gamhanang puwersa nga magtukmod sa usa sa paglihok nga sukwahi sa paggiya sa balaang espiritu. Inay tabangan ang mga tawo sa pagbaton sa panghunahuna ni Kristo, ang espiritu sa kalibotan nagtukmod kanila sa paghunahuna ug pagbuhat sama sa magmamando niining kalibotana, si Satanas. (Basaha ang Efeso 2:1-3; Tito 3:3.) Kon ang usa magpadaog sa espiritu sa kalibotan ug mohimog mga buhat sa unod, dili maayo ang sangpotan niini. Siya dili makapanunod sa Gingharian sa Diyos.—Gal. 5:19-21.
14, 15. Sa unsang paagi nato masuklan ang espiritu sa kalibotan?
14 Gisangkapan kita ni Jehova aron masuklan ang espiritu sa kalibotan. Si apostol Pablo miingon nga “magpadayon sa pagbaton ug gahom diha sa Ginoo ug diha sa pagkagamhanan sa iyang kusog . . . aron kamo makaarang sa pagsukol sa daotang adlaw.” (Efe. 6:10, 13) Pinaagi sa iyang espiritu, si Jehova maglig-on kanato aron dili kita mapahisalaag ni Satanas. (Pin. 12:9) Ang espiritu sa kalibotan gamhanan ug dili nato bug-os malikayan. Apan kita makasukol niini kay ang balaang espiritu mas gamhanan ug kini motabang kanato!
15 Bahin niadtong mibiya sa Kristiyanidad sa unang siglo, si apostol Pedro miingon: ‘Kay sila mibiya sa matul-id nga dalan, sila nahisalaag.’ (2 Ped. 2:15) Mapasalamaton gayod kita nga atong nadawat, “dili ang espiritu sa kalibotan, kondili ang espiritu nga gikan sa Diyos”! (1 Cor. 2:12) Pinaagi sa impluwensiya niini ug sa pagpahimulos sa tanang tagana ni Jehova aron kita magpabiling lig-on sa espirituwal, masuklan nato ang espiritu niining daotang kalibotan.—Gal. 5:16.
Ang Balaang Espiritu Magpatunghag Maayong Bunga
16. Unsang bunga ang ikapatungha sa balaang espiritu kanato?
16 Ang ikaupat nga rason nga magpagiya sa espiritu sa Diyos mao nga kini magpatunghag maayong bunga sa atong kinabuhi. (Basaha ang Galacia 5:22, 23.) Kinsa kanato ang dili buot mahimong mas mahigugmaon, malipayon, ug makigdaiton? Kinsa kanato ang dili gustong modagaya sa hataas-nga-pailob, kalulot, ug pagkamaayo? Kinsa kanato ang dili makabenepisyo sa pag-ugmad ug mas dakong pagtuo, kalumo, ug pagpugong-sa-kaugalingon? Kining mga hiyasa makabenepisyo kanato, sa atong pamilya, ug sa kongregasyon. Padayon natong ugmaron ang bunga sa espiritu, sanglit wala kita limitahe sa pag-ugmad ug sa pagpasundayag niini.
17. Sa unsang paagi mas maugmad nato ang usa ka bahin sa bunga sa espiritu?
17 Maalamong susihon ang kaugalingon: Ang ako bang sinultihan ug binuhatan nagpamatuod nga ako gigiyahan sa balaang espiritu ug nagpasundayag sa bunga niini? (2 Cor. 13:5a; Gal. 5:25) Kon may pipila ka bahin sa bunga sa espiritu nga angay natong ugmaron, maningkamot gayod kita nga magpagiya sa balaang espiritu aron mapatungha ang maong mga hiyas. Mahimo nato kini pinaagi sa pagtuon niining mga hiyasa gamit ang Bibliya ug atong mga publikasyon. Palandongon nato kon unsaon kini pagpakita sa matag adlaw ug dayon pauswagon pa kini.b Samtang makita nato ang epekto sa espiritu sa Diyos sa atong kinabuhi ug sa ubang Kristohanon, mas masabtan nato kon nganong angay kitang magpagiya niini.
Nagpagiya Ka ba sa Balaang Espiritu?
18. Sa unsang paagi si Jesus usa ka panig-ingnan sa pagpagiya sa espiritu sa Diyos?
18 Dihang gilalang sa Diyos ang uniberso, si Jesus mao ang iyang “batid nga magbubuhat.” Busa si Jesus sinati sa magnetismo sa yuta, ang puwersa nga nagtabang sa mga tawo dihang sila mogamit ug kompas. (Prov. 8:30; Juan 1:3) Apan walay mabasa sa Bibliya nga si Jesus migamit niini nga puwersa sa paggiya sa iyang mga panaw sa yuta. Hinuon kini nag-asoy nga ingong tawo, nasinati niya ang gamhanang puwersa sa balaang espiritu sa Diyos. Siya gustong magpagiya niini, ug milihok uyon sa pag-agda niini. (Mar. 1:12, 13; Luc. 4:14) Ingon ka ba niana?
19. Unsay atong himoon aron magiyahan sa balaang espiritu?
19 Ang aktibong puwersa sa Diyos nagalihok gihapon niadtong andam magpagiya niini. Unsay imong himoon aron magiyahan ka niini sa hustong direksiyon? Pag-ampo kanunay kang Jehova nga hatagan ka sa iyang espiritu ug tabangan kang magpagiya niini. (Basaha ang Efeso 3:14-16.) Lihok uyon sa imong pag-ampo pinaagi sa pagtuon sa Bibliya, nga nasulat sa tabang sa balaang espiritu. (2 Tim. 3:16, 17) Sunda ang maalamong instruksiyon niini ug dayon magpagiya sa balaang espiritu. Pinaagi niini, imong gipakita nga ikaw misalig sa katakos ni Jehova sa paggiya kanimo niining daotang kalibotan.
[Mga footnote]
a Sa pasiuna sa iyang Bibliya, si Webster misulat: “Dihang ang mga pulong gisabot sa lahi na nga diwa kon itandi sa unang paggamit niini, ug lahi na gikan sa orihinal nga mga pinulongan, kana wala magpresentar sa Pulong sa Diyos ngadto sa magbabasa.”
b Sa paghisgot sa matag bahin sa bunga sa espiritu, tan-awa ang ulohang “Fruitage of God’s Spirit” ug ang “List by Aspect” sa Watch Tower Publications Index.
Nasabtan Mo ba ang Pangunang mga Punto?
• Sa unsang paagi ang balaang espiritu makaapektar anato?
• Unsa ang upat ka rason nga kita magpagiya sa espiritu sa Diyos?
• Unsay atong himoon aron bug-os makabenepisyo a paggiya sa balaang espiritu?
[Hulagway sa panid 15]
Ang espiritu sa Diyos maoy naggiya kang Jesus
[Hulagway sa panid 17]
Ang espiritu sa Diyos magpalihok ug maggiya sa hunahuna ug kasingkasing