“Sila Giagak sa Balaang Espiritu”

“Walay panagna bisan kanus-a nga midangat pinaagi sa kabubut-on sa tawo, hinunoa ang mga tawo nagsulti gikan sa Diyos samtang sila giagak sa balaang espiritu.”—2 PED. 1:21.

MGA PUNTO NGA PALANDONGON

Sa unsang paagi ang mensahe sa Diyos gipasa sa balaang espiritu ngadto sa mga magsusulat sa Bibliya?

Unsay mga pamatuod nga ang Bibliya gikan sa Diyos?

Unsay imong mahimo matag adlaw aron padayong mapabilhan ang Pulong sa Diyos?

 1. Nganong gikinahanglan nato ang Pulong sa Diyos?

DIIN kita gikan? Nganong ania kita dinhi? Asa kita padulong? Nganong ingon niini ang kalibotan? Unsay mahitabo kanato dihang kita mamatay? Daghan ang nangutana niini. Mahibalo kaha kita sa mga tubag niini ug sa ubang hinungdanong mga pangutana kon wala ang inspiradong Pulong sa Diyos? Kon wala ang Bibliya, makakat-on lang kita pinaagi sa atong personal nga kasinatian. Ug kon kana ray magtudlo nato, masulti kaha nato ang sama sa gipahayag sa salmista bahin sa “balaod ni Jehova?”—Basaha ang Salmo 19:7.

 2. Unsay makatabang nato nga padayong pabilhan ang Bibliya ingong gasa sa Diyos?

² Ikasubo nga gipasagdan sa uban nga mobugnaw ang ilang gugma sa kamatuoran sa Bibliya. (Itandi ang Pinadayag 2:4.) Sila wala na maglakaw sa dalan nga gikahimut-an ni Jehova. (Isa. 30:21) Dili kana angayng mahitabo kanato. Kita makapadayon sa pagpakitag pagpabili sa Bibliya ug sa mga pagtulon-an niini ug angayng maningkamot sa pagbuhat niana. Ang Bibliya maoy hinungdanong gasa gikan sa atong mahigugmaong Maglalalang. (Sant. 1:17) Unsay makatabang nato nga mas pabilhan “ang pulong sa Diyos”? Kinahanglan natong pamalandongon kon sa unsang paagi ang mga magsusulat sa Bibliya gigiyahan sa pagsulat niini, ug susihon ang daghang pamatuod nga ang Bibliya gikan sa Diyos. Kini magdasig kanato nga basahon ang Pulong sa Diyos matag adlaw ug ipadapat ang tambag niini.—Heb. 4:12.

“GIAGAK SA BALAANG ESPIRITU”—SA UNSANG PAAGI?

 3. Sa unsang paagi ang mga propeta ug mga magsusulat sa Bibliya “giagak sa balaang espiritu”?

³ Gidangtag 1,610 ka tuig ang pagsulat sa Bibliya, gikan sa 1513 W.K.P. hangtod sa 98 K.P. Mga 40 ka lalaki ang “giagak sa balaang espiritu” sa pagsulat niini, ug pipila kanila maoy mga propeta. (Basaha ang 2 Pedro 1:20, 21.) Ang Gregong pulong nga gihubad ug “giagak” nagkahulogang “dad-on ngadto sa laing dapit,” ug “mahimong hubaron nga ibalhin, iduso, ug palihokon.”a Gigamit kini sa Buhat 27:15 sa paghubit sa usa ka sakayan nga gipadpad, o giduso sa hangin ngadto sa usa ka direksiyon. Ang mga propeta ug mga magsusulat sa Bibliya “giagak sa balaang espiritu” sa pagkaagi nga ang Diyos nakigkomunikar, nagpalihok, ug naggiya kanila pinaagi sa iyang aktibong puwersa. Busa dili nila ideya ang ilang gisulat, kondili ang hunahuna sa Diyos. Usahay ang mga propeta ug mga magsusulat wala gani mahibalo sa kahulogan sa ilang gitagna o gisulat. (Dan. 12:8, 9) Oo, “ang tibuok Kasulatan inspirado sa Diyos” ug wala masagolig opinyon sa tawo.—2 Tim. 3:16.

4-6. Sa unsang mga paagi gipasa ni Jehova ang iyang mensahe ngadto sa mga magsusulat sa Bibliya? Iilustrar.

⁴ Apan sa unsang paagi gipasa sa balaang espiritu ang mensahe sa Diyos ngadto sa mga magsusulat sa Bibliya? Nakadawat ba silag eksaktong mga pulong o gihatagan lang silag mga ideya nga ilang ikasulat sa kaugalingon nilang mga pulong? Tagda kon sa unsang paagi mohimog sulat ang usa ka negosyante. Kon importante ang eksaktong mga pulong, siya na mismo ang mosulat niini o pulong por pulong niya kining idiktar sa iyang sekretarya. Itayp kini sa sekretarya, ug pirmahan kini sa negosyante. Usahay ihatag lang niya ang pangunang mga ideya ug ang sekretarya nay mohimo sa sulat sa kaugalingon niyang estilo o mga pulong. Dayon basahon kini sa negosyante ug ipasulod sa sekretarya ang gikinahanglang mga kausaban. Sa kataposan, pirmahan kini sa negosyante ug isipon kini nga gikan kaniya.

⁵ Sa susama, ang ubang bahin sa Bibliya gisulat pinaagi sa “tudlo sa Diyos.” (Ex. 31:18) Usahay idiktar ni Jehova sa magsusulat ang eksaktong mga pulong, kon importante kaayo kini. Pananglitan, sa Exodo 34:27 atong mabasa: “Si Jehova miingon kang Moises: ‘Isulat kining mga pulonga, tungod kay sumala niining mga pulonga nga ako maghimo ug usa ka pakigsaad uban kanimo ug sa Israel.’” Si Jehova usab misulti kang propeta Jeremias: “Isulat mo sa usa ka basahon ang tanang pulong nga akong isulti kanimo.”—Jer. 30:2.

⁶ Apan sagad mga ideya ra, dili espesipikong mga pulong, ang milagrosong gibutang sa Diyos diha sa kasingkasing ug hunahuna sa mga magsusulat sa Bibliya, ug gitugotan ra sila sa pagsulat niini sa kaugalingon nilang mga pulong. Ang Ecclesiastes 12:10 nag-ingon: “Gitinguha sa magtitigom nga makaplagan ang makapahimuot nga mga pulong ug ang pagsulat sa hustong mga pulong sa kamatuoran.” Ang magsusulat sa Ebanghelyo nga si Lucas ‘tukmang nagsubay sa tanang butang gikan sa sinugdan, aron ikasulat kini sa makataronganong kahan-ayan.’ (Luc. 1:3) Gigamit sa Diyos ang iyang balaang espiritu sa pagseguro nga ang iyang mensahe dili mausab tungod sa pagkadili-hingpit sa tawo.

 7. Sa unsang paagi nadayag ang kaalam sa Diyos sa iyang paggamit sa mga tawo sa pagsulat sa Bibliya?

⁷ Dayag kaayo ang dakong kaalam sa Diyos sa iyang paggamit sa mga tawo sa pagsulat sa Bibliya. Ang mga pulong dili lang makapasag impormasyon kondili mga emosyon ug pagbati usab. Komosta kon mga manulonda ang gigamit ni Jehova sa pagsulat? Mahubit kaha nila ang pagbati sa tawo sama sa kahadlok, kaguol, ug kahigawad? Kay gitugotan sa Diyos ang dili hingpit nga mga lalaki sa pagsulat sa iyang mensahe sa kaugalingon nilang mga pulong, ang mensahe sa Diyos nakatandog sa atong kasingkasing.

MGA PAMATUOD NGA ANG BIBLIYA GIKAN SA DIYOS

 8. Nganong makaingon kita nga ang Bibliya lahi kaayo sa ubang relihiyosong basahon?

⁸ Daghag pamatuod nga ang Bibliya mao ang Pulong sa Diyos. Dili sama sa ubang relihiyosong basahon, kini nagtudlo kon kinsa ang matuod nga Diyos. Pananglitan, ang mga basahon sa Hinduismo naglakip sa mga alawitong Veda, mga komentaryo bahin sa relihiyosong mga seremonyas, mga sinulat bahin sa pilosopiya nga gitawag ug mga Upanishad, ug mga leyenda nga nailhang Ramayana ug Mahabharata. Ang librong Bhagavad Gita (bahin sa Mahabharata) naghisgot ug mga lagda sa moralidad. Sa libro sa Budhismo nga Tipitaka (Tulo ka Koleksiyon), ang unang tomo niini maoy bahin sa mga lagda nga angayng sundon sa mga monghe ug mongha. Ang ikaduhang tomo maoy bahin sa mga pagtulon-an nga gitudlo mismo ni Budha. Ug ang ikatulong tomo naghisgot bahin sa mga doktrina sa Budhismo. Si Budha wala mag-ingon nga siya maoy diyos, ug wala kaayo maghisgot bahin sa Diyos. Ang mga basahon sa Confucianismo maoy rekord sa mga hitabo, mga lagda sa moralidad, mga pormula sa madyik, ug mga awit. Tinuod, ang balaang basahon sa Islam nagtudlo nga dunay usa ka Diyos nga maalamon sa tanan ug may katakos nga masayod sa umaabot, apan wala kini magbutyag sa ngalan sa Diyos, si Jehova, nga mabasa libolibo ka beses sa Bibliya.

9, 10. Unsay gitudlo sa Bibliya bahin sa Diyos?

⁹ Kasagaran sa relihiyosong mga basahon wala kaayo magtudlo bahin sa Diyos. Apan ang Bibliya nagtabang kanato nga mailhan si Jehova nga Diyos, mahibaloan ang iyang mga buhat ug ang iyang personalidad. Gibutyag niini nga siya ang Diyos sa hustisya, kaalam, ug gahom. Kini nagtudlo usab nga ang Diyos nahigugma kanato. (Basaha ang Juan 3:16; 1 Juan 4:19.) Dugang pa, ang Bibliya nag-ingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buh. 10:34, 35) Gipamatud-an kini sa kaylap nga pagkahubad sa Bibliya. Ang mga eksperto sa pinulongan nag-ingon nga sa kapig 6,700 ka pinulongan sa kalibotan karon, mga 100 niana ang gigamit sa halos 90 porsiyento sa populasyon sa kalibotan. Apan ang tibuok Bibliya o mga bahin niini gihubad ngadto sa kapig 2,400 ka pinulongan. Busa halos tanang tawo makabasa sa Bibliya, bisan sa bahin lang niini, diha sa ilang pinulongan.

¹⁰ Si Jesus miingon: “Ang akong Amahan nagpadayon sa pagbuhat hangtod karon, ug ako nagpadayon sa pagbuhat.” (Juan 5:17) ‘Bisan gikan sa panahong walay tino hangtod sa panahong walay tino si Jehova mao ang Diyos.’ Busa hunahunaa ang tanang butang nga iyang nahimo! (Sal. 90:2) Bibliya lang ang nagtug-an kanato sa gihimo sa Diyos kaniadto, sa ginahimo niya karon, ug sa himoon pa niya sa umaabot. Masayran sab nato kon unsay makapalipay ug dili makapalipay kaniya, ug kon sa unsang paagi kita masuod kaniya. (Sant. 4:8) Dili nato tugotang mahilayo kita sa Diyos tungod sa personal nga mga pangagpas o kabalaka.

11. Unsang maalamong tambag ang atong makita diha sa Bibliya?

¹¹ Ang dakong kaalam nga anaa sa Bibliya nagpamatuod nga kini gikan sa Diyos. Si propeta Isaias nangutana sa mga tawo sa iyang adlaw kon kinsay nakasukod sa espiritu ni Jehova, ug kon kinsay makatudlo kaniya ingon nga iyang magtatambag. (Isa. 40:13) Si apostol Pablo nangutana usab: “Kinsa bay nakasabot sa hunahuna ni Jehova, aron iyang matudloan siya?” (1 Cor. 2:16) Siyempre ang tubag maoy wala. Kanay rason nga makabenepisyo gayod kita kon atong ipadapat ang tambag sa Bibliya bahin sa kaminyoon, mga anak, kalingawan, pagpilig mga higala, kakugi, kamatinud-anon, ug moralidad. Ang tambag sa Bibliya kanunayng husto. Apan ang tawo kulag kaalam sa paghatag ug tambag nga kanunayng mosaler. (Jer. 10:23) Ilang ginausab ang ilang mga tambag dihang makaamgo sila nga sayop kini. Ang Bibliya nag-ingon nga ang ‘hunahuna sa mga tawo ingon sa hinungaw lamang.’—Sal. 94:11.

12. Latas sa daghang katuigan, sa unsa nakalahutay ang Bibliya?

¹² Ang kasaysayan nagpamatuod usab nga ang Diyos mao ang Awtor sa Bibliya. Daghang tawo kaniadto ang naningkamot sa pagwagtang sa Pulong sa Diyos. Sa 168 W.K.P., ang hari sa Sirya nga si Antiochus IV nagsugo sa mga tawo nga pangitaon ang inspiradong mga basahon sa Balaod ug sunogon kini. Sa 303 K.P. mimando usab ang emperador sa Roma nga si Diocletian nga bungkagon ang tanang tigomanan sa mga Kristohanon ug sunogon ang ilang mga Kasulatan. Kini nagpadayon sulod sa mga napulo ka tuig. Human sa ika-11 nga siglo, gipaningkamotan sa mga papa sa Roma nga dili mahubad ang Bibliya ngadto sa ubang pinulongan kay dili nila gustong makakat-on ang ordinaryong mga tawo bahin sa Bibliya. Bisan pa niining mga paningkamot ni Satanas ug sa iyang mga tigpaluyo, nabatonan gihapon nato karon ang Bibliya. Wala gayod tugoti ni Jehova si bisan kinsa nga magwagtang sa iyang gasa ngadto sa katawhan.

PAMATUOD NGA NAKAKOMBINSIR SA DAGHAN

13. Unsa pay laing mga pamatuod nga ang Bibliya gikan sa Diyos?

¹³ Duna pay laing mga pamatuod nga ang Bibliya gikan sa Diyos. Kini wala magkasumpaki sa kaugalingon ug tukma kon bahin sa siyensiya. Nangatuman ang mga tagna niini ug ang mga magsusulat niini kanunayng matinud-anon. Dugang pa, ang Bibliya makapausab sa kinabuhi, tukma kon bahin sa kasaysayan, ug naghatag ug makapatagbawng mga tubag sa mga pangutana sa parapo 1. Atong tagdon kon unsay nakakombinsir sa uban nga ang Bibliya gikan sa Diyos.

14-16. (a) Unsay nakakombinsir sa usa ka Muslim, Hindu, ug sa usa ka agnostiko nga ang Bibliya gikan sa Diyos? (b) Unsang mga pamatuod ang gusto nimong gamiton sa pagsangyaw aron makombinsir ang mga tawo nga ang Bibliya gikan sa Diyos?

¹⁴ Si Anwarb nagdako nga Muslim sa usa ka nasod sa Middle East. Sa nagpuyo siya sa North America, nasangyawan siyag mga Saksi ni Jehova. Siya miingon: “Negatibo kaayo ko sa Kristohanong mga relihiyon tungod sa mga Krusada ug Inkwisisyon. Pero kay maukiton man ko, misugot kong mag-Bible study.” Wala madugay, si Anwar mibalik sa iyang nasod ug wala na makakontak sa mga Saksi. Pipila ka tuig human niadto, mibalhin siya sa Europe ug nagtuon pag-usab sa Bibliya. Sa ulahi siya miingon: “Nakombinsir ko nga ang Bibliya gikan sa Diyos kay ang mga tagna niini natuman, wala kini magkasumpaki, ug akong nakita ang gugma taliwala sa mga magsisimba ni Jehova.” Si Anwar nabawtismohan sa 1998.

¹⁵ Si Asha maoy 16 anyos ug debotadong Hindu ang iyang pamilya. Siya miingon: ‘Moampo lang ko kon tua ko sa templo o kon duna koy problema. Apan dili gyod ko makahunahunag Diyos kon maayo ra ang akong kahimtang. Dayon usa ka adlaw niana, nanuktok sa among pultahan ang mga Saksi ni Jehova, ug bug-os nausab ang akong kinabuhi.’ Si Asha nagtuon sa Bibliya ug nailhan niya ang Diyos ingong iyang Higala. Unsay nakakombinsir niya nga ang Bibliya gikan sa Diyos? Siya miingon: ‘Gitubag sa Bibliya ang tanan nakong pangutana. Kini nakatabang nako nga makabatog pagtuo bisag dili na moadto sa templo ug moyukbo sa idolo.’

¹⁶ Si Paula nagdako nga Katoliko. Apan sa natin-edyer na siya, nahimo siyang agnostiko, nga nagduhaduha kon naglungtad ba ang Diyos. Dayon may nahitabo. “Nahibalag nako ang akong amigo nga wala nako igkita sa daghang bulan,” siya miingon. “Panahon kadto sa mga hippie, diin daghan ang tag-as ug buhok ug nagdroga. Apan nausab siya—wala nay bungot, nindot nag tupi, ug malipayon. Busa ako siyang gipangutana, ‘Unsa may nahitabo nimo, diin man ka miadto?’ Siya mitubag nga nag-Bible study siya uban sa mga Saksi ni Jehova, ug dayon iya kong gisangyawan.” Kay nakita ni Paula nga ang kamatuoran nakapausab sa iyang amigo, nainteres siya sa mensahe sa Bibliya ug nagtuo nga kini gikan sa Diyos.

“ANG IMONG PULONG MAOY LAMPARA SA AKONG TIIL”

17. Unsay kaayohan kon imong basahon ug pamalandongon ang Bibliya matag adlaw?

¹⁷ Ang Bibliya maoy bililhong gasa nga gihatag ni Jehova pinaagi sa iyang balaang espiritu. Basaha kini matag adlaw aron mouswag ang imong gugma sa Bibliya ug sa Awtor niini. (Sal. 1:1, 2) Sa matag higayon nga magbasa kag Bibliya, pag-ampo una sa Diyos nga giyahan ka sa iyang espiritu nga masabtan ang imong ginabasa. (Luc. 11:13) Ang Bibliya naundan sa hunahuna sa Diyos. Busa kon imong pamalandongon kini, makakat-on ka sa paghunahuna uyon sa panghunahuna sa Diyos.

18. Nganong gusto nimong ipadayon ang pagtuon sa Bibliya?

¹⁸ Samtang mouswag ang imong kahibalo sa kamatuoran sa Bibliya, ipadapat ang imong nakat-onan. (Basaha ang Salmo 119:105.) Ang pagbasag Bibliya susama sa pagtan-aw ug samin. Kon may makita kang angayng bag-ohon, himoa kana. (Sant. 1:23-25) Ang Pulong sa Diyos sama ug espada. Gamita kini sa pagdepensa sa imong pagtuo ug sa paglangkat sa bakak nga mga doktrina diha sa kasingkasing sa maaghop nga mga tawo. (Efe. 6:17) Sa imong paggamit sa Bibliya, magmapasalamaton nga ang mga propeta ug ang ubang lalaki nga gigamit sa pagsulat niini “giagak sa balaang espiritu.”

[Mga footnote]

[Blurb sa panid 29]

Basaha ang Bibliya matag adlaw aron mouswag ang imong gugma sa Awtor niini

[Hulagway sa panid 26]

Ang usa ka sulat isipon nga gikan sa tawo nga nagpirma niini