Pagkamaabiabihon​—Importante Kaayo!

 1. Unsay naeksperyensiyahan sa unang siglong mga Kristohanon?

MGA tungatunga sa tuig 62 ug 64 C.E., gisulatan ni apostol Pedro ang “temporaryong mga pumoluyo nga nagkatibulaag sa Ponto, Galacia, Capadocia, Asia, ug Bitinia.” (1 Ped. 1:1) Ang mga membro nianang mga kongregasyona sa Asia Minor lainlaig kultura ug nagkinahanglag pagdasig ug giya. Sila gilutos, gisultihag sakit, ug nag-atubag ‘nagdilaab nga mga pagsulay.’ Nagkinabuhi pod sila sa malisod nga mga panahon. “Ang kataposan sa tanang butang haduol na,” misulat si Pedro. Oo, dili ra abtag 10 ka tuig malaglag na ang Hudiyong sistema. Unsay makatabang sa tanang Kristohanon sa paglahutay nianang malisod nga panahon?​—1 Ped. 4:4, 7, 12.

2, 3. Nganong gidasig ni Pedro ang iyang mga igsoon nga magmaabiabihon? (Tan-awa ang hulagway sa sinugdan sa artikulo.)

² Si Pedro nagdasig sab sa iyang mga igsoon: “Magmaabiabihon sa usag usa.” (1 Ped. 4:9) Ang Gregong pulong sa “pagkamaabiabihon” sa literal nagkahulogang “kahinangop alang sa, o pagpakitag kaayo alang sa mga estranyo.” Pero matikdi nga si Pedro nagdasig sa iyang mga igsoon nga magmaabiabihon “sa usag usa,” niadtong ila nang nailhan ug nakauban. Sa unsang paagi makatabang nila ang pagkamaabiabihon?

³ Kana makapasuod nila. Hunahunaa ang imong eksperyensiya. Naimbitar na ba ka sa usa ka igsoon sa iyang balay? Di ba malipay kang handomon ang maong okasyon? Dihang nangimbitar ka sa pipila ka igsoon sa inyong kongregasyon, dili ba nagkasuod mo? Pinaagi sa pagpangimbitar, mas mailhan nato ang atong mga igsoon kay sa ubang situwasyon nga kauban nato sila. Ang mga Kristohanon sa adlaw ni Pedro kinahanglang mas magkasuod samtang nagkagrabe ang kahimtang. Mao man usab ang mga Kristohanon niining “kataposang mga adlaw.”​—2 Tim. 3:1.

 4. Unsang mga pangutana ang atong hisgotan niining artikuloha?

⁴ Unsang mga kahigayonan nga maabiabi nato ang “usag usa”? Unsay atong buhaton aron dili ta mapugngan sa mga babag sa pag-abiabi? Sa unsang paagi mahimo tang maayong mga bisita?

 5. Sa unsang paagi magmaabiabihon ta diha sa tigom?

⁵ Diha sa mga tigom: Abiabihon nato ang tanan diha sa atong mga tigom ingong kaubang mga bisita sa usa ka espirituwal nga pagpangaon. Si Jehova ug ang iyang organisasyon ang tagbalay. (Roma 15:7) Dihang may bag-ong motambong, nahimo tang kauban sa tagbalay, ingnon ta. Tungod niana, kita ang unang moduol nila, bisag unsa pay ilang sininaan o pamostura. (Sant. 2:1-4) Kon may bisitang wala pa maatiman, puwede ba nimo siyang pataparon? Malipay gyod siya kon may motabang niya nga masundan ang programa ug mapangita ang mga tekstong gihisgotan. Maayo kining paagi sa ‘pagsunod sa dalan sa pagkamaabiabihon.’​—Roma 12:13.

 6. Kinsa ang ilabinang imbitahon nato sa atong balay?

⁶ Pag-esnak o Pagpangaon: Sa kapanahonan sa Bibliya, apil sa pag-abiabi ang pagpangimbitar nga mangaon sa balay. (Gen. 18:1-8; Maghu. 13:15; Luc. 24:28-30) Ang pagpangimbitar sa pagpangaon maoy imbitasyon sa pagpakighigala ug kalinaw. Kinsa ang ilabinang imbitahon? Kadtong bahin sa atong kinabuhi, ang mga igsoon sa kongregasyon. Panahon sa kalisod, dili ba gikinahanglan nato ang usag usa? Kinahanglang duna tay suod ug malinawong relasyon nilang tanan. Makapainteres nga niadtong 2011, giusab sa Nagamandong Lawas ang oras sa Pagtuon sa Bantayanang Torre sa pamilyang Bethel sa United States​—gikan sa alas 6:45 sa gabii ngadto sa alas 6:15. Ngano? Ang pahibalo nag-ingon nga ang mga Bethelite mas daling makaimbitar ug modawat ug imbitasyon kon sayong mahuman ang tigom. Gisunod kana sa ubang sangang buhatan. Kana nakapasuod sa pamilyang Bethel.

7, 8. Unsaon nato pag-abiabi ang mga representante sa organisasyon ni Jehova?

⁷ May kahigayonan ta sa pag-abiabi kon naay mamumulong nga gikan sa laing kongregasyon, kon bisita sa tigdumala sa sirkito, ug usahay kon naay representante sa lokal nga sangang buhatan. (Basaha ang 3 Juan 5-8.) Ang usa ka paagi mao ang pag-andam ug esnak o pagkaon. Mahimo ba nimo kana?

⁸ Usa ka sister sa United States nahinumdom: “Sulod sa katuigan, kami sa akong bana nakaabiabig daghang mamumulong ug ilang asawa sa among balay. Ang matag okasyon makapalipay, ug labaw sa tanan makapalig-on sa espirituwal. Wala gyod mi magmahay.”

9, 10. (a) Kinsa tingali ang mahimo natong tagdugay nga mga bisita? (b) Makatabang ba bisag kadtong simple rag balay? Paghatag ug pananglitan.

⁹ Tagdugay nga mga bisita: Sa karaang panahon, apil sa pag-abiabi ang pagpapuyo sa kasaligang mga bisita. (Job 31:32; Filem. 22) Sa atong panahon, kinahanglan pod nang himoon. Kasagaran, ang mga tigdumala sa sirkito nagkinahanglag puy-anan dihang moduaw sa mga kongregasyon. Ang mga estudyante sa mga theocratic school ug ang mga boluntaryo sa konstruksiyon nagkinahanglan sab tingalig puy-anan. Ang mga pamilyang nagub-ag balay tungod sa katalagman nagkinahanglan tingalig kapuy-an hangtod matukoran silag balay. Dili nato angayng hunahunaon nga kadto lang nindot ug balay ang makatabang; kadaghan na tingali nila kanang nahimo. Puwede ba kang makapapuyo bisag simple lang ang imong balay?

¹⁰ Usa ka brader sa South Korea ang malipayng mahinumdom dihang nagpapuyo siyag mga estudyante sa lainlaing theocratic school. Siya misulat: “Sa sinugdan nagduhaduha ko kay bag-o pa ming minyo ug gamay among balay. Pero nalipay kaayo mi nga nagpapuyo mig mga estudyante. Ingong bag-ong minyo, among nakita nga magmalipayon ang magtiayon kon sila mag-alagad kang Jehova ug parehong mangab-ot ug espirituwal nga mga tumong.”

11. Nganong kinahanglan tingaling abiabihon ang bag-ong namalhin sa inyong kongregasyon?

¹¹ Bag-ong namalhin sa kongregasyon: Tingali may mga igsoon ug pamilya nga mamalhin sa inyong lugar. Ang pipila mamalhin ingong need-greater. Tingali may ipadalang mga payunir aron motabang sa inyong kongregasyon. Sa sinugdan, sila mabag-ohan​—sa bag-ong komunidad, kongregasyon, ug lagmit pinulongan o kultura. Ang pagpangimbitar nila nga mag-esnak, mangaon, o manuroy makatabang nila nga makakitag bag-ong mga higala ug makaadyas sa ilang bag-ong kahimtang.

12. Unsang eksperyensiya ang nagpakita nga dili kinahanglang daghag andamon para makaabiabi?

¹² Dili kinahanglang daghag andamon para makaabiabi. (Basaha ang Lucas 10:41, 42.) Sa paghinumdom sa unang mga tuig ingong misyonaryo, usa ka brader miingon: “Batabata pa mi niadto, wala pay eksperyensiya, ug gimingaw sa amoa. Usa ka gabii niana, gimingaw pag-ayo ang akong asawa ug wala mosaler ang akong paningkamot nga hupayon siya. Dayon, mga alas 7:30 sa gabii, may nanuktok. Gidad-an mi sa usa ka Bible study ug tulo ka orange. Mibisita siya para i-welcome mi. Amo siyang gipasulod ug gihatagag tubig. Dayon, nagtimpla mig tsa ug tsokolate. Dili pa mi makasultig Swahili, ug dili pod siya maka-Iningles. Pero kadto ang sinugdanan sa among malipayong pakighigalaay sa lokal nga mga igsoon.”

13. Unsay kaayohan sa pagkamaabiabihon?

¹³ Nagduhaduha ba ka sa pag-abiabi? Kon mao, gipalabay nimo ang kahigayonan sa malipayong panag-ubanay ug walay kataposang panaghigalaay. Pangontra sa kamingaw ang pag-abiabi. Pero makapangutana tingali ka, ‘Nganong naay magduhaduha sa pag-abiabi?’ Dunay pipila ka rason.

14. Unsa tingaliy atong buhaton kon dili ta makapangimbitar o dili ta makadawat ug imbitasyon tungod sa atong limitadong panahon ug kusog?

¹⁴ Panahon ug kusog: Ang mga alagad ni Jehova daghan kaayog buluhaton ug responsibilidad. Para sa pipila, wala na silay panahon ug kusog sa pag-abiabi. Kon kanay imong situwasyon, basig kinahanglan nimong susihon ang imong eskedyul. Puwede ba kang mohimog kausaban para naa kay panahon ug kusog sa pagpangimbitar o sa pagdawat ug imbitasyon? Ang Bibliya nagdasig sa mga Kristohanon sa pag-abiabi. (Heb. 13:2) Dili sayop nga mogahin ug panahon para niana; kana gani ang angayng buhaton. Siyempre, kinahanglan tingali nimong limitahan ang dili kaayo importanteng buluhaton.

15. Unsa tingali ang gikabalak-an sa pipila bahin sa pag-abiabi?

¹⁵ Imong panglantaw sa kaugalingon: Mibati ba ka sukad nga gusto nimong moabiabi pero morag dili nimo mahimo? Ang pipila maulawon, ug sila mabalaka nga basig mahutdan silag estorya o laayon ang mga bisita. Ang uban apeke sa kuwarta ug naghunahuna nga dili mahatag ang kayang ihatag sa uban diha sa kongregasyon. Hinumdomi, dili kinahanglang nindot kaayo ang balay aron makaabiabi. Ang importante mao nga kini hapsay, hinlo, ug presentable.

16, 17. Unsa tingaliy makatabang aron dili ka mabalakang mangimbitar?

¹⁶ Kon nabalaka ka sa pagpangimbitar, wala ka mag-inusara. Usa ka ansiyano sa Britain ang miangkon: “Medyo kulba gyod ang pagpangandam para sa mga bisita. Pero sama sa ubang bahin sa pag-alagad kang Jehova, wala ra ang kabalaka kon ikomparar sa resultang kaayohan ug kalipay. Malipay kong makaestorya ug makauban sa pagpangape ang mga bisita.” Hinumdomi nga makaayo gyod ang pagpakitag personal nga interes sa mga bisita. (Filip. 2:4) Halos kitang tanan gustong mosulti sa atong eksperyensiya. Panahon lang tingali sa tapoktapok nga makapangutana ang uban sa atong eksperyensiya. Ang laing ansiyano misulat: “Ang pagpangimbitar sa mga igsoon sa kongregasyon sa among balay nakatabang nako nga mas masabtan ug mailhan sila, ilabina kon sa unsang paagi sila na-Saksi.” Kon may personal nga interes ta sa atong mga bisita, mahimong malipayon nang okasyona.

¹⁷ Usa ka payunir nga sister, nga nagpapuyog mga estudyante sa lainlaing theocratic school, miingon: “Sa primero, nabalaka ko kay simple ra kaayo ang akong puy-anan, ug secondhand ra ang akong mga muwebles. Nakapahupay kaayo nako ang asawa sa usa sa mga instruktor. Siya miingon nga dihang mobisita sila sa iyang bana, ang pinakamaayong semana nila mao tong makaestar sila sa balay niadtong espirituwal nga mga tawo nga bisag dili abunda sa materyal pero parehas nilag tumong​—ang pag-alagad kang Jehova ug pagkinabuhing simple. Nagpahinumdom ni nako sa giingon ni Mama sa bata pa mi: ‘Mas maayo pa ang pagkaong utanon diin anaay gugma.’” (Prov. 15:17) Kon mag-abiabi ka tungod sa gugma, dili ka angayng mabalaka.

18, 19. Sa unsang paagi ang pag-abiabi makapawala sa atong negatibong pagbati sa uban?

¹⁸ Imong panglantaw sa uban: May igsoon ba sa kongregasyon nga nakapalagot nimo? Negatibo tingali ang imong unang impresyon niya ug magdugay nâ kon wala kay himoon. Tungod sa magkalahing personalidad, dili na tingali nimo siya imbitahon. O may nakapasakit tingali nimo sa una, ug dili nimo ni malimtan.

¹⁹ Ang Bibliya nag-ingon nga mahimong maayo ang imong relasyon sa uban, bisan sa mga kaaway, kon magmaabiabihon ka. (Basaha ang Proverbio 25:21, 22.) Kon mangimbitar ka, mamenosan ang dili pagsinabtanay ug kalagot. Ipagawas niana ang makapadaning mga hiyas sa atong bisita, mga hiyas nga nakita ni Jehova dihang Iya siyang gikabig sa kamatuoran. (Juan 6:44) Kon tungod sa gugma imong imbitahon ang tawong wala magdahom sa imong imbitasyon, mahimong sinugdanan kana nga magkasuod mo. Unsaon nimo pagseguro nga gugma ang nagpalihok nimo? Ang usa ka paagi mao ang pagsunod sa tambag sa Filipos 2:3: “Uban sa pagpaubos sa hunahuna nga magaisip nga ang uban labaw kay kaninyo.” Ang paglantaw nga ang atong mga igsoon labaw kay kanato​—sa pagtuo man, paglahutay, kaisog, o ubang Kristohanong hiyas—​makapalalom sa atong gugma kanila ug mas dali tang makaabiabi.

20. Ngano ug sa unsang paagi kinahanglang kasaligan ta dihang modawat ug imbitasyon?

²⁰ Si salmistang David miingon: “Oh Jehova, kinsa man ang mahimong dinapit sa imong tolda?” (Sal. 15:1) Gisundan niya nang pangutanaha sa mga hiyas niadtong gusto sa Diyos nga mahimong iyang bisita. Ang usa niana mao ang pagkakasaligan sa atong gisulti: “Tumanon niya kanunay ang iyang saad, bisag lisod niya ang pagtuman niini.” (Salmo 15:4, Maayong Balita Biblia) Kon midawat tag imbitasyon, dili nato ni bastabastang kanselahon. Ang nangimbitar nangandam pag-ayo, ug masayang ang tanan niyang paningkamot kon buhaton nato nâ. (Mat. 5:37) Gikanselar sa pipila ang imbitasyon para modawat ug mas maayong imbitasyon. Mahigugmaon ug matinahoron ba nâ? Hinunoa, kinasingkasing natong dawaton ang bisan unsang gidalit sa nangimbitar nato. (Luc. 10:7) Ug kon kinahanglan gyong kanselahon ang imbitasyon, mahigugmaon ug mahunahunaon ta kon pahibaloon dayon nato ang nangimbitar.

21. Sa unsang paagi ang pagtahod sa lokal nga kostumbre makatabang nato nga mahimong maayong bisita?

²¹ Importante pong tahoron ang lokal nga kostumbre. Sa pipila ka kultura, abiabihon ang wala damhang mga bisita; sa uban, kinahanglang magpahibalo daan. Sa pipila ka lugar, paunhog kaon ang bisita sa espesyal nga pagkaon, ug ipaulahi ang pamilya sa tagbalay; sa uban, ang tanan magdungan. Sa pipila ka lugar, ang bisita sagad magdalag pagkaon; sa uban, mas malipay ang tagbalay kon dili magdala ang bisita. Ug sa ubang kultura, gidahom nga ang imbitahon mobalibad ug kausa o kaduha; sa uban, pagpakitag walay pagtahod ang pagbalibad sa imbitasyon. Buhaton nato ang tanan aron malipay ang nangimbitar nato.

22. Nganong importante kaayong “magmaabiabihon sa usag usa”?

²² Sa mas dakong katumanan, “ang kataposan sa tanang butang haduol na.” (1 Ped. 4:7) Atong maeksperyensiyahan ang kinadak-ang kasakitan nga mahitabo sa kalibotan. Samtang nagkalisod ang panahon, kinahanglang mas higugmaon nato ang atong mga igsoon. Mas mapadapat karon ang tambag ni Pedro sa mga Kristohanon: “Magmaabiabihon sa usag usa,” usa ka buhat nga importante kaayo ug moresultag walay kataposang kalipay.​—1 Ped. 4:9.