Unsa ang Imong Naandan?
1 Ang Kristohanong mga tigom hinungdanong bahin sa atong pagsimba kang Jehova. Haom nga si Pablo miagda kanato sa dili pagsalikway sa atong panagkatigom, “ingon nga naandan sa pipila.”—Heb. 10:25.
2 Susama ba niana ang imong pagbati bahin sa pagtambong sa Kristohanong mga miting? Unsa man ang gibutyag sa imong batasan o naandan niining bahina? Regular ka bang nagatambong sa tanang tigom, apil na ang Pagtuon sa Basahon sa Kongregasyon? O nakaplagan mo ba nga ikaw sa naandan nagapalta sa mga tigom? Ikaw ba nagapalig-on sa uban sa regular nga pagtambong sa mga tigom?
3 Unsa man ang atong inadlaw naandang kalihokan, ang tambag ni Pablo dili sayonsayonon lang. Bisan tuod masabtan man nga usahay ang Kristohanon makapalta sa usa ka tigom tungod sa di-maayong panglawas o ubang di-kalikayang mga hitabo, tino nga dili kana ang iyang naandan. (Roma 2:21) Tungod sa daghan kaayong obligasyon nga pagaatimanon, tinoon gayod sa Kristohanon ang labawng importanteng mga butang. (Filip. 1:10) Ang mga miting gilakip taliwala sa mas importanteng mga butang ug hinungdanon sa atong espirituwal nga kaayohan.
PAGLINIG-ONAY SA USAG USA
4 Sa misulat si Pablo sa Taga-Roma, siya miingon nga siya nangandoy sa pagpakigkita kanila. Ngano? Aron makahatag ug pipila espirituwal nga gasa sa tuyo nga sila “mapalig-on.” (Roma 1:11) Siya dili kontento lang sa pagpadala kanilag sulat aron basahon kana, kondili siya mibati nga ang panag-ubanay gikinahanglan, kay siya nagkanayon: “Aron adunay pagbayloanay ug pagpalig-on.” (Roma 1:12) Bisan si Pablo, nga usa ka apostol, miila sa iyang panginahanglan alang sa kalig-on pinaagig Kristohanong panag-ubanay.
5 Sa samang paagi, diha sa atong mga tigom kita gayod maglinig-onay sa usag usa sa gugma ug maayo kaayong mga buhat. Ang usa ka mahigalaong pahiyom ug mainit nga pagtimbaya makahimog positibong epekto sa uban. Ang makapalig-ong mga komento, maayong-pagkaandam nga mga bahin sa programa, ang pagkakita sa uban nga nagauswag sa espirituwal nga paagi, ug ang pagkanahiuban lamang taliwala sa kaigsoonan nga anaa sa mga tigom mahimong makapalig-on na kaayo. Bisan kon kita gikapoy sa pagkatapos sa adlaw, sagad kita maayo kaayo ang pagbati human sa pagtambong sa tigom. Ang Kristohanong panaghigalaay ug gugma sa atong mga igsoon nga gibutyag alang kanato magapalig-on kanato sa “pagdagan uban ang paglahutay sa lumba nga gipahimutang sa atong atubangan.” (Heb. 12:1) Pinaagig pagpatalinghog pag-ayo sa Pulong sa Diyos, kita mahimong maandam sa pagpabiling malig-on sa katilingbanong kapahayagan sa atong paglaom nga dili matarog. Sa pagkamatuod, aduna ing daghang panalangin nga maangkon tungod sa pagtambong sa mga tigom.
6 Karon kay sa sukad-masukad, kita gayod magmakugihon sa pagtambong sa tanang miting sa kongregasyon. Dili ta buot nga mahulog sa batasan o naandan sa pagsalikway sa atong panagkatigom. Kita gayod magadasig ug magabulig sa uban sa pagtambong, nga sa ingon nagapakita sa atong gugma ug sa atong pagpabili sa Kristohanong mga tigom.