Ang Pagkahinlo Nagapasidungog sa Diyos
1 Ang Moisesnong Kasugoan naglakip sa estriktong mga kinahanglanon bahin sa kahinlo. Kana nagpahimulag sa Israel ingong usa ka katawhan kinsa kinahanglang magpabiling hinlo sa pisikal ug espirituwal. (Lev. 11:35, 36; 15:1-11; Isa. 52:11) Kining maong mahinlo nga kahimtang nagpasidungog sa Diyos ug nakaamot sa kahimsog sa nasod.
2 Karong adlawa usab, ang pagkahinlo maoy usa ka nagapailang timaan sa katawhan ni Jehova. Apan samtang kini nagapaila sa katawhan ni Jehova ingong usa ka grupo, tinuod ba kini sa matag usa kanato? Ang atong kabalaka alang sa kalimpiyo ug personal nga kahinlo nagabanaag kon sa unsang paagi kita nagapabili sa mga kinahanglanon ni Jehova.
3 Komusta na man ang hitsura sa atong pinuy-anan? Kana ba nakatibhang sa mensahe sa Gingharian? Posible kaha nga ang pipila magaduhaduha sa atong pagkasinsero sa dihang mosulti kita maylabot sa pagbalhin sa yuta ngadto sa usa ka paraiso samtang ang atong kaugalingong pinuy-anan nagkalamukat ug ang nataran labong na sa mga sagbot? Kon ang atong pinuy-anan may dili hapsay nga hitsura o may dili maayong mga baho tungod sa dili mahinlong mga batasan, ikaingon ba nga kita nagaugmad sa “mga panig-ingnan sa kahinlo nga mahatukma sa Bag-ong Kahikayan ubos sa Gingharian sa Diyos”?—om p. 130-1.
4 Komusta na man ang atong panapot, sudlanag-libro nga bag, ug personal nga pamostura? Kana ba limpiyo ug presentable? Maoy makataronganon nga huptan natong mahinlo ang atong kaugalingon ug ang atong panapot pinaagig regular nga pagkaligo ug pagpanglaba.—bt89 6/1 p. 16-19.
5 Unsa man kon ang personal nga pamostura sa usa ka igsoon o mga palibot nahimong kaulawan sa kongregasyon? Tingali gikinahanglan lamang niya ang pipila ka mahigugmaong pag-abag tungod sa edad o pagkamasakiton. Kon mao, maoy usa ka kalulot ang pagtabang kaniya. Ang laing igsoon mahimong nakabaton sa maong suliran ug wala gani mahibalo niana; ang malulotong tambag makapalihok kaniya sa pagtul-id sa kahimtang. Ang mga indibiduwal kinsa padayong nagapakitag dili maayong panig-ingnan niining bahina dili takos sa talagsaong mga pribilehiyo sa kongregasyon. Siyempre, ang mga ansiyano kinahanglang magabantay batok sa pagpatuman sa ilang kaugalingong personal nga mga sukdanan o mga gipalabi.
6 Sagad mainiton kitang magadapit sa mga interesado sa pagtambong sa mga tigom tungod kay ang atong Kingdom Hall madanihon ug limpiyo. Tan-awa ang palibot sa inyong tigomanan. Hinlo ba ang mga lingkoranan, salog, ug mga bongbong? Ang mga kasilyas ba regular nga ginalimpiyohan? Kon kita maanad sa pagtan-aw ug hugawng salog o bongbong uban ang nangapakpak nga pintura, hayan sa di madugay isipon nato kana nga dalawaton. Bisan pa niana, ang mga bisita mabinlan ug dili paborableng impresiyon. Kinahanglang buhaton nato ang atong kinamaayohan sa pagmentinar ug usa ka madanihong tigomanan, nga magabuhat sa atong bahin sa dihang moabot ang panahon sa pagpanghinlo o pagbag-o.
7 Sa walay pagsultig pulong, kita makahimaya sa Diyos pinaagi sa atong personal nga panagway ug sa kalimpiyo sa atong mga pinuy-anan, mga sakyanan, ug mga Kingdom Hall. Ang atong panig-ingnan dili makahatag ug bisan unsang hinungdan sa pagkapandol apan magapakita nga ang atong pagsimba maoy mahinlo ug matarong.—1 Cor. 10:31, 32; Sant. 1:27.