Ang mga Pahinumdom ba ni Jehova Nagapukaw Kanato sa Espirituwal?
1 Ang salmista nagdayeg kang Jehova, nga nagaingon: “Ang imong mga pahinumdom akong gipamalandong.” (Sal. 119:99) Ang Hebreong pulong sa “mga pahinumdom” nagabutyag sa panghunahuna nga si Jehova nagapahinumdom sa atong mga hunahuna kon unsa ang gipahayag sa iyang mga sugo. Kon kita mosanong, kana magpukaw kanato sa espirituwal ug magpalipay kanato.—Sal.119:2.
2 Ingong katawhan ni Jehova, kita makanunayong nagadawat ug tambag. Daghan niana nadungog na nato kaniadto. Bisan pag atong gipabilhan kining tambaga, kita may hilig sa paghikalimot. (Sant. 1:25) Si Jehova sa pagkamapailobon nagataganag mahigugmaong mga pahinumdom. Si apostol Pedro nagrekord sa pipila ka pahinumdom aron sa ‘pagpukaw sa atong tin-awng kagahom sa panghunahuna.’—2 Ped. 3:1.
3 Sa sublisubli kita gipahinumdoman bahin sa kahinungdanon sa personal nga pagtuon ug pagtambong sa tigom. Kini gihimo tungod kay kining mga kalihokana hinungdanon kaayo sa atong espirituwal nga kaayohan.—1 Tim. 4:15; Heb. 10:24, 25.
4 Ang labing dakong hagit alang sa pipila mao ang pagtuman sa Kristohanong katungdanan sa pagwali. Kini nagakinahanglag panikaysikay ug determinasyon. Bisan pa niana, kita gitabangan sa “pagbarog nga malig-on” nga ang atong “mga tiil sinul-oban sa kasangkapan sa maayong balita.”—Efe. 6:14, 15.
5 Si apostol Pablo nagapahinumdom kanato nga ang kasingkasing nagataganag panukmod nga atong gikinahanglan sa paghimog “pagpahayag diha sa dayag alang sa kaluwasan.” (Roma 10:10) Kon atong ikiling ang atong kasingkasing ngadto sa mga pahinumdom ni Jehova, kita mapugos sa pagsulti diha sa pagdayeg sa iyang ngalan.—Sal. 119:36; Mat. 12:34.
6 Sa dihang kita nagahago sa pagbuhat ug maayo, kita tukmang makadahom nga kini makapalipay kanato. (Eccl. 2:10) Si Pablo nagapaila sa kalipay ingong usa ka bunga sa espiritu ni Jehova. (Gal. 5:22) Si Pedro midugang nga ang usa ka “matinuorong paningkamot” pagagantihan uban sa mabungahong ministeryo, nga magapatunghag kalipay.—2 Ped. 1:5-8.
7 Sa dihang kita makasugamak sa usa ka hagit, angay natong hinumdoman ang malig-ong pagbarog sa mga apostol samtang sila mipahayag, “dili kami makahunong sa pagsulti sa mga butang nga among nakita ug nadungog.” (Buh. 4:20) Kita napalig-on sa pagpadayon kon atong hinumdoman nga “pinaagi sa pagbuhat niini atong maluwas ang atong kaugalingon ug kadtong kinsa mamati kanato.”—1 Tim. 4:16.
8 Kita dili mobatig kasilag tungod kay kanunayng makadawat ug mga pahinumdom. Hinunoa, ato gayong ginapabilhan ang labaw nga bili niini. (Sal. 119:129) Niining makuyaw nga mga panahon, kita mapasalamaton nga si Jehova padayong nagahatag kanatog mga pahinumdom aron pagpukaw kanato sa espirituwal ug pagpalihok kanato nga magmasiboton sa maayong mga buluhaton!—2 Ped. 1:12, 13.