Wala ba Nato Kana Madunggi sa Miagi?
1 Siyempre atong nadunggan! Gisubli ni Jehova ang daghang butang diha sa iyang Pulong alang sa kaayohan sa iyang katawhan. Subsob nga gisubli ni Jesus ang iyang mga pagtulon-an mahitungod sa lainlaing bahin sa Gingharian. Ang iyang mga apostol padayong nagsubli sa espirituwal nga mga butang uban kanilang lig-ong natukod diha sa kamatuoran.— Roma 15:15; 2 Ped. 1:12, 13; 3:1, 2.
2 Sa atong panahon ang organisasyon ni Jehova naghikay ug hinungdanong mga ulohan nga repasohon nga sublisubli diha sa mga tigom sa kongregasyon. Ang pipila ka publikasyon ginatun-an nga sublisubli. Oo, hinungdanon ang pagpaminaw sa mga butang nga atong nadunggan sa miagi!
3 Ang Pagsubli Nagtagbaw sa Hinungdanong Panginahanglan: Ang mga pahinumdom ni Jehova mopalalom sa atong pagsabot, mopauswag sa atong panghunahuna, ug mopalig-on sa atong determinasyon sa pagpabiling nagasunod sa espirituwal nga paagi. (Sal. 119:129) Ang pagrepaso sa mga sukdanan ug mga prinsipyo sa Diyos maoy sama sa pagtan-aw sa salamin. Kini moabag kanato sa pagsusi sa atong kaugalingon ug pagsumpo sa hilig nga mahimong “malimtanon nga tigpatalinghog.”—Sant. 1:22-25.
4 Kon dili nato padayong pahinumdoman ang atong kaugalingon bahin sa kamatuoran, ang ubang mga butang moimpluwensiya sa atong mga kasingkasing. Ang mga pahinumdom sa Diyos maglig-on kanato sa pagsukol sa makapadaot nga mga impluwensiya sa kalibotan ni Satanas. (Sal. 119:2, 3, 99, 133; Filip. 3:1) Ang regular nga mga pahinumdom nga atong madawat mahitungod sa katumanan sa mga katuyoan sa Diyos magdasig kanato nga “padayong magbantay.” (Mar. 13:32-37) Ang pagsubli sa Kasulatanhong mga kamatuoran motabang kanato nga magpabilin sa dalan ngadto sa kinabuhing walay kataposan.—Sal. 119:144.
5 Kon sa Unsang Paagi Makabatog Kaayohan sa Personal: Kinahanglang atong ‘ikiling ang atong mga kasingkasing sa mga pahinumdom sa Diyos.’ (Sal. 119:36) Sa dihang ang sinating ulohan konsiderahon sa tigom sa kongregasyon, kita kinahanglang mangandam nga abante, tan-awon ang gisitar nga mga kasulatan, ug mamalandong kon sa unsang paagi atong ikapadapat ang impormasyon. Dili nato sayloan ang pagpangandam sa sinulat nga repaso sa Tunghaan sa Teokratikanhong Ministeryo, nga naghunahuna nga dili kana kinahanglanon. (Luc. 8:18) Dili gayod nato buot nga mahimong di-mapatalinghogon tungod kay ang paninugdang mga kamatuoran sagad nga ginasubli diha sa atong mga tigom.—Heb. 5:11.
6 Hinaot nga atong sundogon ang tinamdan sa salmista: “Nagsadya ako sa dalan sa imong mga pahinumdom, sama gayod sa tanang ubang bililhong mga butang.” (Sal. 119:14) Oo, atong nadungog kining bililhong mga butang sa miagi, ug lagmit atong madungog kini pag-usab. Ngano? Tungod kay nahibalo si Jehova nga atong gikinahanglang madungog kini!