“Palamdaga ang Inyong Kahayag”
1. Unsay atong pribilehiyo, ug unsay angay natong himoon?
1 Gikan sa pagbanagbanag hangtod sa pagkilumkilom, ang kaanindot sa kahayag nagdayeg kang Jehova. Apan dunay laing kahayag nga gusto ni Jesus nga mabatonan sa iyang mga tinun-an—ang “kahayag sa kinabuhi.” (Juan 8:12) Ang pagbatog espirituwal nga kalamdagan maoy linaing pribilehiyo nga may bug-at nga responsibilidad. Si Jesus miingon: “Palamdaga ang inyong kahayag atubangan sa mga tawo,” sa ingon makapahimulos ang uban. (Mat. 5:16) Tungod sa grabeng espirituwal nga kangitngit karon, kini nga kahayag angay gayong ipaambit! Sa unsang paagi masundog nato si Kristo sa pagpalamdag sa atong kahayag?
2. Giunsa pagpakita ni Jesus nga hinungdanon ang pagpaambit sa espirituwal nga kahayag?
2 Sa Pagsangyaw: Gigamit ni Jesus ang iyang panahon, kusog, ug kahinguhaan aron ipahibalo sa mga tawo ang kahayag sa kamatuoran diha sa ilang balay, sa mga plasa, sa kabukiran—bisan asa sila makaplagan. Nahibalo siya nga dunay dumalayong bili ang tinuod nga espirituwal nga kalamdagan. (Juan 12:46) Aron mas daghang masangyawan, gibansay ni Jesus ang iyang mga tinun-an aron mahimong “kahayag sa kalibotan.” (Mat. 5:14) Ilang gipalamdag ang kahayag pinaagi sa pagbuhat ug maayo sa ilang mga silingan ug sa pagpaambit sa kamatuoran.
3. Sa unsang paagi nato ipakita ang pagpabili sa kamatuoran?
3 Kita nahibalo nga bug-at nga responsibilidad ang ‘pagpadayon sa paglakaw ingon nga mga anak sa kahayag,’ ug kita nagsangyaw bisan asa nga dunay mga tawo. (Efe. 5:8) Ang pagbasag Bibliya o ubang publikasyon diha sa publiko, sama sa breaktime sa trabaho o sa eskuylahan, magbukas sa kahigayonan nga makasangyaw. Pinaagi niini, usa ka batan-ong sister ang nakasugod ug pagtuon sa Bibliya ug nakapahimutag mga libro sa 12 niya ka klasmet!
4. Nganong hinungdanon ang maayong panggawi sa ‘pagpalamdag sa kahayag’?
4 Sa Maayong Panggawi: Ang pagpalamdag sa kahayag naglakip usab sa atong adlaw-adlawng panggawi. (Efe. 5:9) Ang atong panggawi diha sa trabahoan, eskuylahan, ug sa ubang publikong dapit daling mamatikdan ug magbukas sa kahigayonan nga makasangyaw. (1 Ped. 2:12) Pananglitan, tungod sa maayong panggawi sa singko anyos nga batang lalaki, gitawgan sa maestra ang iyang ginikanan. Siya miingon, “Karon pa ko kakitag bata nga ingon niini ka buotan!” Oo, ang atong pagsangyaw ug maayong panggawi makadani sa mga tawo ngadto sa “kahayag sa kinabuhi” ug madayeg si Jehova.