Palamdaga ang Atong Kahayag nga Mapadayonon

¹ Unsa ang kahayag? Bisan pa sa iyang abanteng teknolohiya, ang tawo sa gihapon wala sa bug-os masayod sa tubag sa pangutanang gisukna ni Jehova sa Job 38:24. Kita ba magmaayo ra kon walay kahayag? Kon wala ang kahayag dili kita molungtad. Ang kahayag hinungdanon sa pisikal nga igtatan-aw, ug ang Bibliya nagatug-an kanato nga sa espirituwal nga diwa, “ang Diyos maoy kahayag.” (1 Juan 1:5) Kita bug-os nga nagasalig ngadto sa Usa kinsa “naghatag kanato ug kahayag.”—Sal. 118:27.

² Kini tinuod sa pisikal nga diwa apan labaw pa sa espirituwal nga paagi. Ang bakak nga relihiyon nagpahisalaag sa kadaghanan sa katawhan, nagtugyan kanila sa espirituwal nga kangitngit, “nagkarapkarap sa bungbong sama sa buta nga mga tawo.” (Isa. 59:9, 10) Tinukmod sa iyang dili hitupngang gugma ug kaluoy, si Jehova ‘nagapadala sa iyang kahayag ug kamatuoran.’ (Sal. 43:3) Sa literal mga minilyon sa nagapabili nga mga tawo ang misanong, migawas “gikan sa kangitngit ngadto sa iyang katingalahang kahayag.”—1 Ped. 2:9.

³ Si Jesu-Kristo nagadulag hinungdanong papel sa pagdala niining maong kahayag sa kalibotan. Siya miingon: “Ako mianhi ingon nga kahayag nganhi sa kalibotan, aron nga ang matag usa nga magabutang ug pagtuo kanako dili magpabilin diha sa kangitngit.” (Juan 12:46) Ang tanan niyang panahon, kusog, ug kahinguhaan gigamit sa paghimo sa kahayag sa kamatuoran nga mahibaloan. Gipanaw niya ang tibuok dapit sa iyang yutang natawhan, nagwali ug nanudlo sa halos matag siyudad ug balangay.

⁴ Sa Mateo 5:14-16 si Jesus misugo sa iyang mga disipulo: “Kamo mao ang kahayag sa kalibotan. . . . Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” Sama gayod kang Jesus, sila mahimong “mga magbabanwag sa kalibotan.” (Filip. 2:15) Malipayon nilang gidawat ang maong kaakohan, nag-isip niadto ingong pangunang katuyoan sa ilang kinabuhi. Ang entirong Kristohanong kongregasyon nagkahiusa sa pagtuman nianang dakong buluhaton.

⁵ Kita karong adlawa angay nga magmapasalamaton nga nahimo kitang bahin kanila kinsa “nagtangtang na sa mga buhat nga iya sa kangitngit.” (Roma 13:12, 13) Atong ikapakita ang atong pagpabili pinaagi sa pagsundog sa panig-ingnan nga gitagana ni Jesus ug sa maunongong mga Kristohanon kanhi. Ang panginahanglan alang sa uban nga makapatalinghog sa kamatuoran maoy mas dinalian ug hinungdanon karon kay sa bisan unsang takna sa tawhanong kasaysayan.

⁶ Unsaon Nato sa Pagsidlak Ingong Magbabanwag? Ang pangunang paagi aron mapabanaag ang atong kahayag mao ang pakig-ambit sa buluhatong pagsangyaw sa Gingharian. Ang matag kongregasyon adunay regular, organisadong mga kahikayan alang sa pagsangyaw sa ilang natudlong teritoryo. Dakong gidaghanon sa mga basahon ang mabatonan sa nagakadaiyang matang ug sa daghang pinulongan. Gitagana ang malangkobong edukasyon pinaagig mga tigom, ug ang pagbulig sa uban sa personal ginatanyag pinaagi kanilang may kasinatian na. Ang kahigayonan nga makig-ambit maoy bukas sa mga lalaki, mga babaye, mga tigulang, ug bisan kabataan. Ang tanang kalihokan sa kongregasyon nagpunting sa pagsangyaw, uban ang mga tagana sa pagtabang sa matag membro nga makig-ambit sa pipila ka paagi. Ang makanunayon, suod nga pakigduyog uban sa kongregasyon maoy labing maayong paagi sa pagseguro nga ang atong kahayag magpabiling nagasidlak.

⁷ Kita mahimong magasidlak sa mga paagi nga tingali wala maglambigit sa binaba nga pagpanaksi. Atong madani ang pagtagad sa uban pinaagi sa atong panggawi lamang. Kana mao ang anaa sa hunahuna ni Pedro sa dihang siya midasig: “Padayong-hupti ang inyong panggawi nga maayo taliwala sa mga nasod, aron nga . . . sila ingong resulta sa inyong maayong mga buhat nga niini sila mga saksing-nakakita magahimaya sa Diyos sa adlaw sa iyang pagsusi.” (1 Ped. 2:12) Daghan ang maghukom sa usa ka buhat o usa ka organisasyon pinaagi sa panggawi kanilang nakig-anib niana. Sa dihang ang mga nagapaniid makamatikod sa mga tawo kinsa hinlo sa moral, matinud-anon, makigdaiton, ug masinundanon sa balaod, ilang isipon ang maong mga tawo nga lahi ug magkanayon nga sila nagakinabuhi sa mga sukdanan nga mas taas ang kahimtang kay niadtong ginasunod sa kadaghanan. Busa ang usa ka bana nagapasidlak sa iyang kahayag sa dihang iyang pasidunggan ug ginapangga ang iyang asawa sa mahigugmaong paagi; ang asawa nagabuhat sa ingon pinaagi sa pagtahod sa pagkaulo sa iyang bana. Ang kabataan mopatugbaw nga lahi sa dihang ilang sundon ang ilang mga ginikanan ug maglikay sa seksuwal nga imoralidad ug ang paggamit sa mga droga. Ang usa ka empleyado kinsa matanlagon sa iyang trabaho, matinud-anon, ug matinagdanon sa uban ginapabilhan kaayog dako. Sa pagpasundayag niining Kristohanong mga hiyas, atong ginapadan-ag ang atong kahayag.

⁸ Ang pagsangyaw mao ang pagsulti ngadto sa uban bahin sa kon unsa ang atong natun-an sa Pulong sa Diyos. Kana ginahimo pinaagi sa paghatag ug mga pakigpulong diha sa mga tigom o pagsulti diha sa mga pultahan, apan kini dili gayod limitado sa sama niining mga higayona. Sa atong adlaw-adlaw nga mga kalihokan atong mahinagbo ang daghang tawo. Pila ka higayon sa usa ka adlaw nga ikaw makapakigsulti sa imong sunod-pultahang mga silingan? Unsa ka subsob nga adunay manuktok sa imong pultahan? Unsa ka daghang lainlaing tawo ang imong mahibalag sa dihang ikaw mamalit, magsakay ug bus, o magtrabaho sa imong sekular nga trabahoanan? Kon ikaw usa ka batan-on sa eskuylahan, imo bang maihap ang gidaghanon sa mga tawong imong ikasulti matag adlaw? Ang mga kahigayonan nga makapakigsulti ngadto sa uban halos dili limitado. Ang imo lang himoon mao ang pagbaton ug Kasulatanhong mga hunahuna, may andam nga Bibliya ug pipila ka tracts, ug maninguha nga makasulti sa dihang may higayon.

⁹ Bisan tuod ang di-pormal nga pagsangyaw maoy yano gayod, ang pipila nagapanuko sa pagsulay niana. Mahimong bation nila nga sila maulawon kaayo o nerbiyoso kaayo sa pagduol sa mga estranghero. Sila mobating mapanagan-on maylabot sa haras nga tubag nga madawat. Kadtong batid na sa di-pormal nga pagsangyaw makatug-an kanimo nga panagsa kaayo ang bisan unsang hinungdan sa pagkabalaka. Ang uban sa pasukaranan maoy sama ra kanato; aduna sila ing samang mga panginahanglan, nagabati sa samang mga kabalaka, ug gusto sa samang mga butang alang sa ilang mga kaugalingon ug sa ilang mga pamilya. Ang kadaghanan mosanong diha sa malulot nga paagi ngadto sa malipayong pahiyom o sa usa ka mahigalaong pagtimbaya. Aron makasugod, hayan buot nimong ‘magbaton ug kaisog.’ (1 Tes. 2:2) Sa dihang ikaw makapadayon na, hinunoa, mahimong matingala ka ug malipay sa mga resulta.

¹⁰ Kita Mapanalanginan sa Dihang Atong Ipadan-ag ang Atong Kahayag: Ania ang pipila ka ehemplo sa mga kasinatian nga misangpot gikan sa di-pormal nga pagsangyaw: Usa ka 55-anyos-edad nga babaye misulay sa pagtabok sa karsada. Sa hapit na gayod siya mabanggai sa usa ka kotse, usa ka sister mihawid sa iyang bukton ug mibutad kaniya sa kaluwasan, nga nag-ingon: “Palihog pagbantay. Kita nagapuyo sa makuyaw nga mga panahon!” Unya iyang gipatin-aw kon nganong ang mga panahon makuyaw kaayo. Misukna ang babaye, “Ikaw ba usa sa mga Saksi ni Jehova?” Tungod kay nakakuhag usa sa atong mga libro gikan sa iyang igsoong magulang babaye, ang maong babaye gustong makahibalag sa usa sa mga Saksi ni Jehova, ug kining maong panagtagbo naghimo nianang posible.

¹¹ Gisugdan sa usa ka sister ang usa ka panaghisgot uban sa usa ka babaye diha sa lawak hulatanan sa opisina sa doktor. Naminaw pag-ayo ang babaye ug unya miingon: “Sa miagi akong nahibalag ang mga Saksi ni Jehova; apan kon sa umaabot ako mismo mahimong usa sa mga Saksi ni Jehova, kana maoy tungod sa imong gisulti pa lamang kanako. Ang pagpaminaw kanimo maoy sama sa sugod nga pagkakita sa kahayag diha sa mangitngit nga lugar.”

¹² Ang usa ka buhat sa kalulot mahimong usa ka tikanganan ngadto sa pagtabang sa uban nga makakat-on sa kamatuoran. Samtang naglakaw pauli gikan sa pag-alagad sa kanataran, duha ka sister nakamatikod sa tigulang babaye nga daw masakiton samtang siya mikawas sa bus. Mihunong sila ug nangutana sa babaye kon siya ba nagkinahanglag tabang. Siya natingala kaayo nga ang duha ka estranghera magpakitag interes kaniya nga siya miinsister sa pagkasayod kon unsa kanang nagpatungha sa maong malulotong buhat. Kini mibukas sa pultahan sa pagpamatuod. Andam nga gihatag sa babaye ang iyang adres ug mainitong midapit kanila sa pagduaw kaniya. Nasugdan ang usa ka pagtuon. Sa wala madugay ang babaye misugod sa pagtambong sa mga tigom ug karon nagapaambit na sa kamatuoran sa uban.

¹³ Usa ka tigulang nga sister nagapahimulos sa sayo-buntag nga pagpamatuod diha sa lokal nga baybayon. Nahibalag niya ang mga sulugoon sa balay, mga tigbantayg bata, mga kawani sa bangko, ug datong mga babaye kinsa naghimo sa ilang mabuntag nga paseyo diha sa kahoyng lakawanan. Nagadumala siyag mga pagtuon sa Bibliya, nagalingkod diha sa lingkoranan duol sa baybayon. Ubay-ubayng mga tawo ang nakakat-on sa kamatuoran gikan kaniya ug karon mga Saksi ni Jehova na.

¹⁴ Diha sa iyang sekular nga trabaho, usa ka sister nakadungog sa kaubang trabahante nga nagahisgot bahin sa politikal nga partido nga iyang gituohan nga makasulbad sa mga suliran sa kalibotan. Ang maong sister mipatugbaw, nga nagahisgot maylabot sa mga saad kon unsa ang himoon sa Gingharian sa Diyos. Kining maong panaghisgot diha sa trabahoanan mihatod ngadto sa usa ka regular nga pagtuon sa Bibliya sa balay, ug sa kataposan ang maong babaye ug iyang bana nahimong mga Saksi.

¹⁵ Ayawg Kalimti nga Ikaw Usa ka Saksi! Sa dihang gihubit ni Jesus ang iyang mga tinun-an ingong “ang kahayag sa kalibotan,” siya nangatarongan nga sila kinahanglang moabag sa uban sa pagbenepisyo gikan sa espirituwal nga kadan-ag sa Pulong sa Diyos. Kon atong ipadapat ang tambag ni Jesus, unsaon ta man pag-isip ang atong ministeryo?

¹⁶ Sa dihang mangitag trabaho, ang ubang tawo mopili sa di-bug-os-panahong trabaho. Ilang limitehan ang gidak-on sa panahon ug panlimbasog nga ilang ibutang niana tungod kay gipalabi nila ang paggamit sa kadaghanan sa ilang panahon diha sa kalihokan nga ilang makaplagang mas makaayo sa personal nga paagi. Kita ba aduna ing susamang panghunahuna sa atong ministeryo? Bisan tuod nga mahimong bation ta nga obligado ug mahinangop gani nga isalindot ang pipila ka panahon tungod sa ministeryo, ang ato ba gayong unang mga interes atua sa lain?

¹⁷ Sa pagkaamgo nga wala ing butang ingong di-bug-os-panahong Kristohanon, gihimo ta ang atong pahinungod, ‘nagdumili sa atong kaugalingon’ ug miuyon sa pagsunod kang Jesus nga “mapinadayonon.” (Mat. 16:24) Ang atong tinguha mao ang pagpadayong “tibuok-kalag,” nga nagapahimulos sa matag higayon sa pagpalamdag sa atong kahayag aron aboton ang mga tawo bisan diin sila. (Col. 3:23, 24) Kinahanglang suklan ta ang kalibotanong mga tinamdan, nga nagamentinar sa atong kasibot sama sa sinugdanan, ug paneguroon nga padayong nagadan-ag gayod ang atong kahayag. Ang pipila nagtugot sa ilang kasibot sa pagkabugnaw ug ang ilang kahayag sa pagkaawop, nga lisod nang makita bisan sa haduol. Ang maong tawo mahimong nanginahanglag tabang aron mabalik ang nawalang kasibot alang sa ministeryo.

¹⁸ Ang pipila daw manuko tungod kay ang atong mensahe di-popular ngadto sa daghan. Si Pablo nag-ingon nga ang mensahe bahin sa Kristo maoy “kabuangan ngadto sa mga nagakalaglag.” (1 Cor. 1:18) Bisan unsa ang isulti sa uban, hinunoa, siya sa makusganon mipatugbaw: “Wala ko ikaulaw ang maayong balita.” (Roma 1:16) Ang usa nga maulaw mobating ubos o di-takos. Unsaon ta man nga arang maulaw nga kita nagahisgot man maylabot sa Supremong Magmamando sa uniberso ug sa kahibulongang mga tagana nga iyang gihimo alang sa atong dumalayong kalipay? Dili angay maisip nga kita mobating ubos o di-takos sa dihang kita nagahisgot niining mga kamatuorana ngadto sa uban. Hinunoa, kita gayod mobating matukmod sa pagbuhat sa atong mas pang maarangan, nga nagapasundayag sa atong hugot nga pagtuo nga kita “walay angay ikaulaw.”—2 Tim. 2:15.

¹⁹ Ang kahayag sa kamatuoran nga karon nagadan-ag diha sa kayutaan libot sa tibuok yuta nagatanyag gayod sa paglaom sa kinabuhing walay kataposan diha sa usa ka paraiso sa bag-ong kalibotan. Ipakita ta nga atong gibutang sa kasingkasing ang tambag nga ipalamdag ang atong kahayag nga mapadayonon! Kon buhaton ta kini, aduna kita ing hinungdan sa pagmaya sama gayod sa mga tinun-an nga sa kada adlaw “nagpadayong walay hunong sa pagpanudlo ug sa pagpahayag sa maayong balita bahin sa Kristo, si Jesus.”—Buh. 5:42.