Genesis 1:26—“Buhaton Nato ang Tawo Sumala sa Atong Dagway”

“Dayon ang Diyos miingon: ‘Magbuhat tag tawo sumala sa atong larawan, nga kaamgid nato, ug gamhan nila ang tibuok yuta apil ang mga isda sa dagat, ang nagalupad nga mga mananap sa kalangitan, ang anad nga mga hayop, ug ang matag nagakamang nga mananap.’”—Genesis 1:26, Bag-ong Kalibotang Hubad.

“Unya ang Dios miingon, ‘Buhaton nato ang tawo sumala sa atong dagway, ingon nga sama kanato. Sila ang maggahom ibabaw sa mga isda sa dagat ug sa mga langgam sa kahanginan, ug sa tanang kahayopan ug sa tanang ihalas nga mananap sa kalibotan ug sa tanan nga nagkamang sa yuta.’”—Genesis 1:26, Ang Biblia, 2011.

Ang mga tawo gibuhat sumala sa larawan sa Diyos, buot pasabot, naa silay katakos sa pag-ugmad ug pagpakitag mga hiyas sa Diyos sama sa gugma, empatiya, ug hustisya. Kanay rason nga masundog sa mga tawo ang mga hiyas sa Diyos.

“Ang Diyos miingon: ‘Magbuhat tag tawo sumala sa atong larawan.’” Sa wala pa lalanga ni Jehova nga Diyosa si bisan kinsa o ang bisan unsang butang, gilalang niya ang usa ka gamhanang anghel nga sa ulahi nailhang si Jesus. Pinaagi kang Jesus, “gihimo ang tanang ubang butang sa langit ug sa yuta.” (Colosas 1:16) Makita gyod kang Jesus ang mga hiyas ni Jehova, maong “siya ang larawan sa dili makita nga Diyos.” (Colosas 1:15) Kanay hinungdan nga ang Diyos miingon kang Jesus: “Magbuhat tag tawo sumala sa atong larawan.”

“Gamhan nila ang tibuok yuta apil . . . ang anad nga mga hayop.” Ang mga hayop wala buhata sumala sa larawan sa Diyos. Wala sila gidisenyo nga magpakitag mga hiyas nga naa sa tawo sama sa gugma, ug wala pod silay konsensiya. Bisan pa niana, gusto sa Diyos nga maatiman ang mga hayop. Busa gisugo niya ang mga tawo nga “gamhan” ang mga hayop. Kini nga sugo puwede sab hubaron nga “magbuot” (Maayong Balita Biblia) o “magdumala” (Biblia sa Kristohanong Katilingban). Mao nga gihatagan ni Jehova ang mga tawo ug responsibilidad sa pag-atiman sa mga hayop. (Salmo 8:6-8; Proverbio 12:10) Gidahom ni Jehova nga atimanon pag-ayo sa mga tawo ang yuta ug ang tanang buhing butang niini.

Ang unang duha ka kapitulo sa Genesis nagsumaryo sa paglalang sa uniberso, sa atong planeta, ug sa kinabuhi dinhi sa yuta. Ang tanang gilalang ni Jehova nindot kaayo. Pero sa tanan niyang gilalang sa yuta, ang tawo mao ang pinakaespesyal. Dihang nahuman ang iyang paglalang, “nakita sa Diyos nga maayo kaayo ang tanan niyang gibuhat.”—Genesis 1:31.

Tan-awa kining mubo nga video bahin sa asoy sa Genesis sa paglalang.

Sayop nga pagsabot: Ang Genesis 1:26 nagpamatuod nga si Jesus mao ang Diyos.

Ang tinuod: Ang Diyos ug si Jesus naay suod kaayong relasyon sama sa usa ka amahan ug anak, pero dili sila usa lang ka persona. Si Jesus nagtudlo nga ang Diyos labaw kay kaniya. (Juan 14:28) Para sa dugang impormasyon, tan-awa ang video nga Si Jesu-Kristo ba ang Diyos? o basaha ang artikulong “Nganong Gitawag si Jesus ug Anak sa Diyos?”

Tan-awa kining mubo nga video nga nagsumaryo sa basahon sa Genesis.