“Nagalakaw Pinaagi sa Pagtuo, Dili Pinaagi sa Panan-aw”
“Nagalakaw kita pinaagi sa pagtuo, dili pinaagi sa panan-aw.”—2 CORINTO 5:7.
1. Unsay gipasabot sa ‘nagalakaw pinaagi sa pagtuo’?
MATAG higayong kita mag-ampo nga nahiuyon sa mga lagda nga gipadayag diha sa Pulong sa Diyos, kita nagpaila nga sa labing menos aduna kitay usa ka sukod sa pagtuo. Sa dihang mosugod kita pagsangyaw ngadto sa uban mahitungod sa Gingharian sa Diyos, kini nagpakita usab ug pagtuo. Ug dihang atong ipahinungod ang atong mga kinabuhi kang Jehova, kita nagahatag ug ebidensiya nga maoy atong tinguha nga ‘magalakaw pinaagi sa pagtuo,’ nga mao, mosubay sa usa ka dalan sa kinabuhi nga gimandoan sa pagtuo.—2 Corinto 5:7; Colosas 1:9, 10.
2. Nganong ang pag-apil sa mga kalihokan sa kongregasyon dili gayod kay pamatuod na nga ang usa dunay pagtuo?
2 Aron kita tinuod nga magkinabuhi nianang paagiha, kita nanginahanglan ug pagtuo nga maayog patukoranan. (Hebreohanon 11:1, 6) Daghang tawo madani sa mga Saksi ni Jehova tungod sa hataas nga mga sukdanan sa moral ug sa gugmang ilang makita taliwala sa mga Saksi. Kana usa ka maayong pagsugod, apan wala kana magpasabot nga kanang mga tawhana dunay pagtuo. Ang uban tingali dunay kapikas o ginikanan nga lig-on sa pagtuo, ug tingali sila nakig-ambit sa pipila sa mga kalihokang gibuhat nianang usa nga ilang gihigugma. Ang pagkabaton sa maong impluwensiya diha sa panimalay tinuod nga usa ka panalangin, apan kini usab dili kapuli sa personal nga gugma sa Diyos ug personal nga pagtuo.—Lucas 10:27, 28.
3.(a) Aron makabaton kitag may-pasikaranan nga pagtuo, unsang hugot nga pagtuo ang kinahanglang mabatonan nato bahin sa Bibliya? (b) Nganong ang pipila ka tawo mas daling makombinsir sa pagkainspirado sa Bibliya kay sa uban?
3 Kadtong tinuod nga nagalakaw pinaagi sa pagtuo bug-os nga kombinsidong ang Bibliya mao ang Pulong sa Diyos. Adunay nagtipun-og nga ebidensiya nga ang Balaang Kasulatan, sa tinuoray, maoy “inspirado sa Diyos.”a (2 Timoteo 3:16) Pila sa maong ebidensiya ang pagatukion una pa makombinsir ang usa ka tawo? Mahimong depende kana sa iyang nangaging kasinatian. Ang butang bug-os makapakombinsir sa usa ka tawo tingali dili makapatuo sa lain. Sa pipila ka kaso, bisan pag ang usa ka tawo pakitaan ug nagtipun-og nga di-malalis nga ebidensiya, mahimong tutolan pa niya ang konklusyong gitumong niana. Ngano? Tungod sa mga tinguhang lalom nga nahilubong sa iyang kasingkasing. (Jeremias 17:9) Busa, bisan pag ang usa ka tawo tingali magpakitag interes sa katuyoan sa Diyos, ang iyang kasingkasing basin mangandoy nga mauyonan sa kalibotan. Basin dili niya buot biyaan ang paagi sa kinabuhing sukwahi sa mga sukdanan sa Bibliya. Bisan pa niana, kon ang usa tinuod nga gigutom alang sa kamatuoran, kon siya matinud-anon sa iyang kaugalingon, ug kon siya mapaubsanon, sa nahaigong panahon makaamgo siya nga ang Bibliya maoy Pulong sa Diyos.
4. Unsay gikinahanglan sa bahin sa usa ka tawo aron makabaton ug pagtuo?
4 Kasagaran nga sa pipila ra ka bulan, ang mga tawong ginatabangan sa pagtuon sa Bibliya makapabili nga daghan na ang ilang nakat-onang pamatuod nga kini mao ang Pulong sa Diyos. Kon kini magpalihok kanila sa pag-abli sa ilang kasingkasing aron matudloan ni Jehova, nan ang ilang kinasulorang mga panghunahuna, ilang mga tinguha, ug ilang mga panukmod sa inanay pagaumolon sa ilang makat-onan. (Salmo 143:10) Ang Roma 10:10 nag-ingong maoy “pinaagi sa kasingkasing” nga ang usa ka tawo magabutang ug pagtuo. Ang maong pagtuo magpahayag kon unsay tinuod nga gibati sa indibiduwal, ug mapaila kana sa iyang dalan sa kinabuhi.
Si Noe Milihok Pinasukad sa May-Pasikaranan nga Pagtuo
5, 6. Ang pagtuo ni Noe gipasukad sa unsa?
5 Si Noe nakabaton ug may-pasikaranan nga pagtuo. (Hebreohanon 11:7) Unsay pasikaranan niya alang niana? Si Noe nakabaton sa Pulong sa Diyos, dili sa sinulat nga dagway, kondili sumala sa gisulti ngadto kaniya. Ang Genesis 6:13 nag-ingon: “Ang Diyos miingon kang Noe: ‘Ang kataposan sa tanang unod nahidangat sa akong atubangan, tungod kay ang yuta napuno sa kabangisan tungod kanila.’” Si Jehova nagsugo kang Noe sa pagtukod ug usa ka arka ug naghatag ug mga detalye mahitungod sa katukoran niini. Unya ang Diyos midugang: “Bahin kanako, ania ako magadala sa lunop sa mga tubig diha sa yuta aron pagalaglagon ang tanang unod nga niana ang puwersa sa kinabuhi aktibo gikan sa ilalom sa mga langit. Ang tanan nga anaa sa yuta mabugtoan sa gininhawa.”—Genesis 6:14-17.
6 May ulan na ba una niini? Ang Bibliya walay gisulti. Ang Genesis 2:5 nag-ingon: “Si Jehova nga Diyos wala magpaulan.” Apan kini ang paagi ni Moises, kinsa nagkinabuhi kasiglohan sa ulahi, sa pagpahayag sa mga butang sa paghisgot dili mahitungod sa adlaw ni Noe kondili mahitungod sa usa ka panahong una pa niana. Sumala sa gipakita sa Genesis 7:4, si Jehova naghisgot sa ulan sa nakigsulti kang Noe, ug dayag nga si Noe nakasabot kon unsay iyang gipasabot. Bisan pa niana, ang pagtuo ni Noe wala diha sa butang nga iyang makita. Si apostol Pablo misulat nga si Noe ‘gihatagan ug balaanong pasidaan mahitungod sa mga butang wala pa makita.’ Giingnan sa Diyos si Noe nga Iyang ipahinabo ibabaw sa yuta ang “lunop sa mga tubig,” o ang “dagat sa kalangitan,” sumala sa pagpahayag niini sa usa ka potnot diha sa New World Translation sa Genesis 6:17. Hangtod niadtong panahona, ang maong butang wala pa gayod mahitabo. Apan ang tanang kalalangan nga nakita ni Noe nagbarog ingong dayag nga pasundayag nga ang Diyos makapahinabo gayod nianang malaglagong lunop. Kay gipalihok sa pagtuo, gitukod ni Noe ang arka.
7.(a) Unsay wala kinahanglana ni Noe aron tumanon kon unsay gisugo kaniya sa Diyos? (b) Sa unsang paagi kita makabatog kaayohan sa pagpalandong sa pagtuo ni Noe, ug sa unsang paagi ang atong pagtuo mahimong panalangin alang sa uban?
7 Ang Diyos wala maghatag kang Noe ug petsa kon kanus-a magsugod ang Lunop. Apan wala kana gamita ni Noe nga usa ka pasumangil sa pagbatog hulat-ug-tan-awon nga tinamdan, nga ibutang ang pagtukod sa arka ug pagwali sa ikaduhang dapit sa iyang kinabuhi. Sa igong panahon, ang Diyos nagsulti kang Noe kon kanus-a mosulod sa arka. Kasamtangan, “si Noe nagbuhat sumala sa tanan nga gisugo sa Diyos kaniya. Siya nagbuhat gayod niana.” (Genesis 6:22) Si Noe naglakaw pinaagi sa pagtuo, dili pinaagi sa panan-aw. Pagkamapasalamaton nato nga gibuhat niya kadto! Tungod sa iyang pagtuo, kita buhi karong adlawa. Sa atong kahimtang usab, ang pagtuo nga atong gipadayag mahimong dunay dakong epekto diha sa kon unsay kaugmaon dili lamang alang kanato kondili alang usab sa atong mga anak ug alang sa ubang mga tawo alirong kanato.
Ang Pagtuo ni Abraham
8, 9. (a) Sa unsa gipasukad ni Abraham ang iyang pagtuo? (b) Sa unsang paagi si Jehova “mipakita” kang Abraham?
8 Tagda ang laing panig-ingnan—ang iya ni Abraham. (Hebreohanon 11:8-10) Sa unsa ba gipasukad ni Abraham ang iyang pagtuo? Ang palibot nga iyang gidak-an sa Ur sa mga Caldeanhon maoy idolatroso ug materyalistiko. Apan ang panglantaw ni Abraham giumol sa ubang mga impluwensiya. Pihong siya nakapakig-uban sa anak ni Noe nga si Sem, kansang pagkinabuhi misapaw sa iyaha sulod sa 150 ka tuig. Si Abraham nakombinsir nga si Jehova mao “ang Labing Hataas nga Diyos, ang Maghihimo sa langit ug sa yuta.”—Genesis 14:22.
9 May lain pa nga dakog impluwensiya kang Abraham. Si Jehova “mipakita . . . [kang] Abraham samtang siya didto sa Mesopotamia, sa wala pa siya magpuyo sa Haran, ug siya miingon kaniya, ‘Gumula ka gikan sa imong yuta ug gikan sa imong mga paryente ug umadto sa yuta nga akong ipakita kanimo.’” (Buhat 7:2, 3) Sa unsang paagi si Jehova “mipakita” kang Abraham? Si Abraham wala makakitang direkta sa Diyos. (Exodo 33:20) Bisan pa niana, posibleng si Jehova mipakita kang Abraham diha sa usa ka damgo, uban ang labaw-kinaiyanhong pasundayag sa himaya, o pinaagi sa usa ka manulonda ingong mensahero, o hawas. (Itandi ang Genesis 18:1-3; 28:10-15; Levitico 9:4, 6, 23, 24.) Bisan unsa man ang paagi nga si Jehova mipakita kang Abraham, ang maong matinuohong tawo may pagsalig nga ang Diyos nagbutang ug usa ka bililhong pribilehiyo sa iyang atubangan. Si Abraham misanong diha sa pagtuo.
10. Giunsa paglig-on ni Jehova ang pagtuo ni Abraham?
10 Ang pagtuo ni Abraham wala magdepende sa iyang pagbaton ug mga detalye mahitungod sa yuta nga paadtoan sa Diyos kaniya. Kana wala mag-agad sa iyang pagkahibalo kon kanus-a ihatag kaniya ang maong yuta. Siya may pagtuo tungod kay siya nahibalo nga si Jehova Diyos nga Labing Gamhanan. (Exodo 6:3) Si Jehova nagsulti kang Abraham nga siya makabaton ug liwat, apan may mga panahong si Abraham nahibulong kon unsaon kana pagkahimo. Siya nagkatigulang na. (Genesis 15:3, 4) Gilig-on ni Jehova ang pagtuo ni Abraham pinaagi sa pagsulti kaniya nga motan-aw sa kabituonan ug iphon sila kon makaarang siya. “Maingon niana ang imong binhi,” matod sa Diyos. Si Abraham dulot nga natandog. Dayag nga ang Maglalalang nianang makapahinganghang langitnong mga butang makatuman kon unsay iyang gisaad. Si Abraham “nagbutang ug pagtuo kang Jehova.” (Genesis 15:5, 6) Si Abraham wala lamang magtuo tungod kay nagustohan niya ang iyang nadungog; siya nakabaton ug may-pasikaranan nga pagtuo.
11. (a) Samtang nagsingabot siya sa 100 anyos, unsay sanong ni Abraham sa saad sa Diyos nga ang tigulang nga Sara manganak ug usa ka anak lalaki? (b) Uban sa unsang matang sa pagtuo nga giatubang ni Abraham ang pagsulay nga naglangkit sa pagdala sa iyang anak ngadto sa Bukid sa Moria aron ihalad?
11 Sa dihang si Abraham hapit nang mag-100 anyos ug ang iyang asawa, si Sara, hapit na sa edad nga 90, si Jehova nagpahayag pag-usab sa iyang saad nga si Abraham makabaton ug usa ka anak lalaki ug nga si Sara mao unya ang inahan. Si Abraham matinud-anong nagpalandong sa ilang kahimtang. “Apan tungod sa saad sa Diyos siya wala magpalingpaling diha sa kawalay pagtuo, apan nahimong kusganon pinaagi sa iyang pagtuo, nga nagahatag ug himaya sa Diyos ug bug-os kombinsido nga kon unsa ang iyang gikasaad siya usab makahimo sa pagbuhat.” (Roma 4:19-21) Si Abraham nahibalo nga ang saad sa Diyos dili mapakyas. Sa ulahi, tungod sa iyang pagtuo, si Abraham nagmasinugtanon sa dihang gisugo siya sa Diyos nga dad-on ang iyang anak nga si Isaac ngadto sa yuta sa Moria ug ihalad siya. (Genesis 22:1-12) Si Abraham may bug-os nga pagsalig nga ang Diyos nga milagrosong nakapakatawo sa maong anak makapabuhi usab kaniya aron tumanon ang dugang nga mga saad nga Iyang gipahayag may kalabotan kaniya.—Hebreohanon 11:17-19.
12. Unsa ka dugay nga si Abraham nagpadayon sa paglakaw pinaagi sa pagtuo, ug unsang ganti ang nagpaabot kaniya ug sa iyang mga sakop sa pamilya nga nagpasundayag ug lig-ong pagtuo?
12 Si Abraham nagpakitang siya gimandoan sa pagtuo dili lamang sa tinong mga higayon kondili sa tibuok niyang kinabuhi. Panahon sa iyang pagkinabuhi, si Abraham wala makadawat gikan sa Diyos sa bisan unsang bahin sa Yutang Saad isip usa ka panulondon. (Buhat 7:5) Bisan pa niana, si Abraham wala maluya ug mobalik sa Ur sa mga Caldeanhon. Sulod sa 100 ka tuig, hangtod gayod sa iyang kamatayon, siya nagpuyo sa mga tolda diha sa yuta nga gipaadtoan kaniya sa Diyos. (Genesis 25:7) Mahitungod kaniya ug sa iyang asawa nga si Sara, ilang anak lalaki si Isaac, ug sa ilang apo nga si Jacob, ang Hebreohanon 11:16 nag-ingon: “Wala sila ikaulaw sa Diyos, nga tawgon ingon nga ilang Diyos, kay may giandam man siya nga usa ka siyudad alang kanila.” Oo, si Jehova adunay usa ka dapit alang kanila diha sa yutan-ong dominyo sa iyang Mesiyanikong Gingharian.
13. Taliwala sa mga alagad ni Jehova kinsa karong adlawa ang naghatag ug ebidensiya nga nakabaton ug pagtuo nga sama sa iya ni Abraham?
13 Karong adlawa adunay mga alagad ni Jehova nga sama kang Abraham. Sila naglakaw pinaagi sa pagtuo sulod sa daghang tuig. Tungod sa kusog nga gihatag sa Diyos, ilang nabuntog ang samag-bukid nga kababagan. (Mateo 17:20) Sila wala magpalingpaling sa pagtuo tungod kay sila wala mahibalo kon kanus-a gayod ihatag sa Diyos ang panulondon nga iyang gisaad. Sila nahibalo nga ang pulong ni Jehova dili mapakyas, ug giisip nilang usa ka bililhon kaayong pribilehiyo nga mahiapil sa iyang mga Saksi. Kana ba ang imong pagbati?
Ang Pagtuo nga Nagpalihok Kang Moises
14. Sa unsang paagi ang patukoranan napahiluna alang sa pagtuo ni Moises?
14 Ang laing panig-ingnan sa pagtuo mao si Moises. Unsa ang pasikaranan sa iyang pagtuo? Kadto napahiluna na sa pagkabata pa. Bisan pag ang anak babaye ni Paraon nakakaplag kang Moises diha sa usa ka papirong sudlanan sa Subang Nilo ug nagdala kaniya ingong iyang anak, ang kaugalingong Hebreohanong inahan ni Moises, si Jochebed, maoy naggalam sa bata ug nag-atiman kaniya panahon sa iyang linghod nga panuigon. Dayag nga siya maayong pagkatudlo ni Jochebed, nga nagsilsil sa gugma alang kang Jehova ug pagpabili alang sa Iyang mga saad kang Abraham. Sa ulahi, ingong sakop sa panimalay ni Paraon, si Moises “natudloan sa tanang kaalam sa mga Ehiptohanon.” (Buhat 7:20-22; Exodo 2:1-10; 6:20; Hebreohanon 11:23) Hinuon, bisan pa sa tinamod nga kahimtang ni Moises ang iyang kasingkasing maoy uban sa naulipong katawhan sa Diyos.
15. Alang kang Moises unsay kahulogan sa pagpaila nga siya nahiapil sa katawhan ni Jehova?
15 Sa ika-40 anyos niya, gipatay ni Moises ang usa ka Ehiptohanon aron luwason ang usa ka Israelinhon nga gidagmalan. Kadtong hitaboa nagpakita kon giunsa pag-isip ni Moises ang katawhan sa Diyos. Sa pagkatinuod, “tungod sa pagtuo si Moises, sa pagkadako na, midumili nga tawgong anak sa anak nga babaye ni Faraon.” Inay manghawid sa “temporaryong kalipayan sa sala” ingong sakop sa Ehiptohanong palasyo, siya gipalihok sa pagtuo nga magpaila sa iyang kaugalingon nga uban sa dinaogdaog nga katawhan sa Diyos.—Hebreohanon 11:24, 25; Buhat 7:23-25.
16. (a) Unsang tinudlong buluhaton ang gihatag ni Jehova kang Moises, ug giunsa pagtabang sa Diyos kaniya? (b) Sa pagtuman sa iyang tinudlong buluhaton, giunsa ni Moises pagpakita ug pagtuo?
16 Si Moises maikagon sa paglihok aron paghatag ug kahupayan sa iyang katawhan, apan wala pa moabot ang panahon sa Diyos sa pagpalingkawas kanila. Si Moises kinahanglang mokalagiw gikan sa Ehipto. Sa mga 40 anyos na lang sa ulahi nga pinaagi sa usa ka manulonda si Jehova nagsugo kang Moises sa pagbalik sa Ehipto aron manguna sa mga Israelinhon sa paggawas nianang yutaa. (Exodo 3:2-10) Unsay sanong ni Moises? Wala siya magpahayag ug pagduhaduha bahin sa katakos ni Jehova sa pagpagawas sa Israel, apan gibati niyang dili siya angay alang sa papel nga gibutang sa Diyos sa iyang atubangan. Sa kamahigugmaon, si Jehova mitagana sa pagpalig-on nga gikinahanglan ni Moises. (Exodo 3:11–4:17) Ang pagtuo ni Moises nahimong lig-on. Mibalik siya sa Ehipto ug balikbalik nga nagpasidaan kang Paraon sa nawong-ug-nawong bahin sa mga hampak nga modangat sa Ehipto tungod sa kapakyasan sa maong magmamando sa pagpagawas sa Israel aron pagsimba kang Jehova. Walay personal nga gahom si Moises sa pagpahinabo niadtong mga hampaka. Siya naglakaw pinaagi sa pagtuo, dili pinaagi sa panan-aw. Ang iyang pagtuo maoy diha kang Jehova ug sa iyang pulong. Gibaharan ni Paraon si Moises. Apan si Moises milahutay. “Tungod sa pagtuo siya mibiya sa Ehipto, apan dili nga nahadlok sa kasuko sa hari, kay siya nagpabilin mang lig-on nga daw sa nakita ang Usa kinsa dili makita.” (Hebreohanon 11:27) Dili hingpit si Moises. Nakahimo siyag mga sayop. (Numeros 20:7-12) Bisan pa niana, human siya itudlo sa Diyos sa usa ka buluhaton ang iyang katibuk-ang dalan sa kinabuhi gimandoan na sa pagtuo.
17. Unsay misangpot tungod sa paglakaw pinaagi sa pagtuo alang kang Noe, Abraham, ug Moises, bisan pag sila wala makakita samtang buhi pa sa bag-ong kalibotan sa Diyos?
17 Hinaot ang imong pagtuo mahisama sa iya ni Noe, Abraham, ug Moises. Tinuod nga wala nila makita ang bag-ong kalibotan sa Diyos sa ilang adlaw. (Hebreohanon 11:39) Dili pa kadto ang tinudlong panahon sa Diyos; may ubang mga bahin sa iyang katuyoan nga kinahanglan pang matuman. Bisan pa niana, ang ilang pagtuo sa pulong sa Diyos wala matarog, ug ang ilang mga ngalan anaa sa basahon sa kinabuhi sa Diyos.
18. Alang niadtong gitawag alang sa langitnong kinabuhi, nganong gikinahanglan ang paglakaw pinaagi sa pagtuo?
18 “May gilantaw man daan ang Diyos nga mas maayo alang kanato,” misulat si apostol Pablo. Nga mao, napanan-aw na sa Diyos ang butang nga mas maayo alang kanila si kinsa, sama kang Pablo, gitawag alang sa langitnong kinabuhi uban ni Kristo. (Hebreohanon 11:40) Sila mao ang diha sa hunahuna ni Pablo sa iyang gisulat ang mga pulong sa 2 Corinto 5:7: “Nagalakaw kita pinaagi sa pagtuo, dili pinaagi sa panan-aw.” Sa dihang kana gisulat, walay usa kanila ang nakaangkon sa ilang langitnong ganti. Dili nila kana makita pinaagi sa ilang pisikal nga mga mata, apan ang ilang pagtuo niana may pasikaranan. Si Kristo nabanhaw na gikan sa mga patay, ang unang mga bunga niadtong panalanginan ug langitnong kinabuhi. Ug kapin sa 500 ka saksi ang nakakita kaniya sa dayon na niyang pagkayab ngadto sa langit. (1 Corinto 15:3-8) Sila may igong katarongan nga ang tibuok nilang dalan sa kinabuhi pagamhan sa maong pagtuo. Kita usab dunay maayong mga katarongan sa paglakaw pinaagi sa pagtuo.
19. Sumala sa gipakita sa Hebreohanon 1:1, 2, pinaagi ni kinsa nga ang Diyos nakigsulti kanato?
19 Karong adlawa, si Jehova dili makigsulti sa iyang katawhan pinaagi sa usa ka manulonda, sama sa iyang gibuhat kang Moises sa nagdilaab nga kupongkupong. Ang Diyos nakigsulti pinaagi sa iyang Anak. (Hebreohanon 1:1, 2) Kon unsay gisulti sa Diyos pinaagi kaniya, Iyang gipatala diha sa Bibliya, nga nahubad ngadto sa mga pinulongan sa katawhan sa tibuok kalibotan.
20. Sa unsang paagi ang atong kahimtang labi pang maayo kay sa iya ni Noe, Abraham, ug Moises?
20 Labaw kaayo ang atong nabatonan kay sa ila ni Noe, Abraham, ug Moises. Atong nabatonan ang kompletong Pulong sa Diyos—daghan niini ang natuman na. Tungod sa tanan nga gisulti sa Bibliya mahitungod sa mga lalaki ug mga babaye nga nagpamatuod sa ilang kaugalingon nga matinumanong mga saksi ni Jehova atubangan sa tanang matang sa mga pagsulay, ang Hebreohanon 12:1 nag-awhag: “Tangtangon usab nato ang tanang kabug-at ug ang sala nga daling makalambod kanato, ug atong daganon nga may pag-agwanta ang lumba nga gibutang atubangan kanato.” Ang atong pagtuo dili butang nga pakasayonon lamang. “Ang sala nga daling makalambod kanato” mao ang kakulang sa pagtuo. Gikinahanglan ang lisod nga pakigbisog aron kita magpadayon sa ‘paglakaw pinaagi sa pagtuo.’
[Mga footnote]
a Tan-awa Ang Bibliya—Pulong sa Diyos o sa Tawo?, nga gipatik sa Watchtower Bible and Tract Society of New York, Inc.
Unsay Imong Komento?
◻ Unsay nalangkit sa ‘paglakaw pinaagi sa pagtuo’?
◻ Sa unsang paagi kita makabatog kaayohan sa paagi sa pagpasundayag ni Noe ug pagtuo?
◻ Sa unsang paagi ang paagi sa pagpasundayag ni Abraham ug pagtuo makatabang kanato?
◻ Nganong ang Bibliya nagpunting kang Moises ingong usa ka panig-ingnan sa pagtuo?
[Hulagway sa panid 10]
Si Abraham naglakaw pinaagi sa pagtuo
[Hulagway sa panid 10]
Si Moises ug Aaron nagpasundayag ug pagtuo sa atubangan ni Paraon