“Ang Maghuhukom sa Tibuok Yuta” Kanunayng Mobuhat ug Matarong

 1. Sa unsang paagi gipahayag ni Abraham ang iyang pagsalig sa hustisya ni Jehova? (Tan-awa ang hulagway sa sinugdan sa artikulo.)

“DILI ba mobuhat ang Maghuhukom sa tibuok yuta sa kon unsay matarong?” (Gen. 18:25) Pinaagi nianang pangutanaha, gipahayag ni Abraham ang iyang pagsalig nga ipakita ni Jehova ang Iyang hingpit nga hustisya labot sa Sodoma ug Gomora. Kombinsido si Abraham nga si Jehova dili gyod mohimog inhustisya pinaagi “sa pagpatay sa tawong matarong uban sa usa nga daotan.” Para kang Abraham, “halayo ra” kanang mahitabo. Mga 400 ka tuig sa ulahi, si Jehova miingon bahin sa iyang kaugalingon: “Ang Bato, hingpit ang iyang kalihokan, kay ang tanan niyang dalan hustisya. Usa ka Diyos sa pagkamatinumanon, nga kaniya walay inhustisya; matarong ug matul-id siya.”​—Deut. 31:19; 32:4.

 2. Nganong ikaingon nga si Jehova dili gyod mobuhat ug inhustisya?

² Nganong kombinsido si Abraham nga kanunayng matarong ang paghukom ni Jehova? Tungod kay si Jehova ang kinalabwang ehemplo sa hustisya ug pagkamatarong. Gani, ang Hebreohanong pulong nga gihubad ug “hustisya” ug “pagkamatarong” sagad magkauban diha sa Hebreohanong Kasulatan. Sa pagkatinuod, parehas rag kahulogan kining duha ka pulong. Busa, kay si Jehova man ang nagtakdag sukdanan sa pagkamatarong, ang iyang panglantaw kanunayng husto. Dugang pa, sumala sa iyang Pulong, “siya nahigugma sa pagkamatarong ug sa hustisya.”​—Sal. 33:5.

 3. Paghatag ug pananglitan sa inhustisya sa kalibotan karon.

³ Ang sinserong mga tawo nahupayan sa pagkahibalo nga si Jehova kanunayng mogawi nga makiangayon. Apan ang kalibotan karon punog inhustisya. Pananglitan, ang pipila gihukman ug gipriso sa sala nga wala nila buhata. Human mapriso sa daghang katuigan, ang pipila gipagawas dihang napamatud-an sa DNA test nga inosente sila. Bisan pag ang maong sayop nga pagkapriso makapahigawad ug makapasuko, duna pay laing inhustisya nga tingali mas lisod para sa mga Kristohanon.

 4. Sa unsang paagi tingali masulayan ang pagtuo sa usa ka Kristohanon?

⁴ Gidahom sa mga Kristohanon nga maeksperyensiyahan nila ang pipila ka inhustisya sa gawas sa kongregasyon. Apan, ang atong pagtuo tingali masulayan kon mamatikdan o maeksperyensiyahan nato ang daw inhustisya sulod sa kongregasyon. Unsay imong reaksiyon kon makaeksperyensiya kag daw inhustisya diha sa kongregasyon o sa imong pagpakiglabot sa isigka-Kristohanon? Mapandol ka ba?

 5. Nganong dili ikatingala kon ang usa ka Kristohanon makamatikod o makaeksperyensiyag inhustisya sa kongregasyon?

⁵ Kay dili hingpit ug makasala, nahibalo ta nga posible tang makaeksperyensiyag inhustisya o mahimong hinungdan niini. (1 Juan 1:8) Bisag talagsa ra nang mahitabo, dili matingala o mapandol ang matinumanong mga Kristohanon kon mahitabo kana. Diha sa iyang Pulong, gitagana ni Jehova ang praktikal nga tambag aron tabangan tang magmatinumanon, bisag buhatan tag dili maayo sa atong mga igsoon sa pagtuo.​—Sal. 55:12-14.

6, 7. Unsang inhustisya sa kongregasyon ang naeksperyensiyahan sa usa ka brader, ug unsang mga hiyas ang nakatabang niya sa pagsagubang niana?

⁶ Konsideraha ang eksperyensiya ni Willi Diehl. Sugod sa 1931, si Brader Diehl nag-alagad nga matinumanon sa Bethel sa Bern, Switzerland. Pagka-1946, nakaeskuyla siya sa ikawalong klase sa Gilead School sa New York, U.S.A. Human sa graduwasyon, naasayn siya ingong tigdumala sa sirkito sa Switzerland. Sa iyang sugilanon sa kinabuhi, si Brader Diehl miingon: “Sa Mayo 1949, gipahibalo nako ang sangang buhatan sa Bern nga nagplano ko sa pagminyo.” Unsay tubag sa opisina sa Bern? “Walay pribilehiyo gawas sa regular nga payuniring.” Si Brader Diehl dugang miingon: “Ako wala tugoti nga mohatag ug mga pakigpulong . . . Daghan dili na motimbaya namo, nga nagtratar namo ingong pinalagpot.”

⁷ Giunsa pag-atubang ni Brader Diehl ang maong situwasyon? Siya miingon: “Pero nahibalo mi nga dili supak sa Bibliya ang pagminyo, busa nag-ampo mi ug misalig kang Jehova.” Ngadtongadto, ang sayop nga panglantaw bahin sa pagminyo nga nahimong hinungdan sa inhustisya nasulbad ra, ug gibalik ang mga pribilehiyo ni Brader Diehl. Gigantihan ang iyang pagkamaunongon kang Jehova.a Maayong pangutan-on ang kaugalingon: ‘Mao ba sab nay akong espirituwal nga panglantaw kon makasinati kog inhustisya nga sama niana? Mapailobon ba kong maghulat kang Jehova, o may tendensiya kong mangunay sa pagsulbad sa problema?’​—Prov. 11:2; basaha ang Miqueas 7:7.

 8. Nganong posibleng masayop ka sa paghinapos nga ikaw o ang uban sa kongregasyon nabiktima sa inhustisya?

⁸ Sa laing bahin, posibleng masayop ka sa paghinapos nga ikaw o ang uban diha sa kongregasyon nabiktima sa inhustisya. Puwede ning mahitabo kay dili hingpit ang atong panglantaw sa mga butang o kay wala ta mahibalo sa tanang detalye. Pero, husto man o sayop ang atong pagsabot sa situwasyon, ang pag-ampo ug pagkamaunongon kang Jehova mopugong nato nga dili ta “maaligutgot batok kang Jehova.”​—Basaha ang Proverbio 19:3.

 9. Unsang mga pananglitan ang atong hisgotan niining artikuloha ug sa sunod?

⁹ Atong hisgotan ang tulo ka pananglitan sa inhustisya nga nahitabo sa katawhan ni Jehova kaniadto. Niining artikuloha, atong konsiderahon ang apo sa tuhod ni Abraham nga si Jose ug ang gibuhat kaniya sa iyang mga igsoon. Ang sunod nga artikulo maghisgot sa pakiglabot ni Jehova kang Haring Ahab sa Israel ug sa eksperyensiya ni apostol Pedro sa Antioquia sa Sirya. Samtang atong hisgotan kini nga mga pananglitan, sayra ang mga leksiyon nga makatabang nimo sa paghupot sa imong espirituwalidad ug sa pagpabiling suod kang Jehova, ilabina dihang mobati kang nabiktima sa inhustisya.

10, 11. (a) Unsang mga inhustisya ang naeksperyensiyahan ni Jose? (b) Unsang kahigayonan ang nabatonan ni Jose samtang napriso siya?

¹⁰ Si Jose, usa ka matinumanong alagad ni Jehova, nakaeksperyensiyag inhustisya gikan sa ubang tawo. Pero mas nasakitan siya dihang naeksperyensiyahan niya kini sa kamot sa iyang mga igsoon. Sa 17 anyos pa si Jose, siya gikidnap ug gibaligya sa iyang mga igsoon ingong ulipon. Dayon, gipugos siyag dala sa Ehipto. (Gen. 37:23-28; 42:21) Dihang tua na siya sa laing nasod, gipasanginlan siya nga nanglugos ug gipriso bisag wala husaya. (Gen. 39:17-20) Iyang giantos ang pagkaulipon ug pagkapriso sulod sa mga 13 ka tuig. Unsay atong makat-onan sa eksperyensiya ni Jose nga makatabang nato kon makaeksperyensiya tag inhustisya sa kamot sa atong igsoon sa pagtuo?

¹¹ Si Jose may kahigayonan nga ipahibalo ang iyang kahimtang sa kaubang piniriso. Kana nga piniriso kanhing tig-ipis ug ilimnon sa hari. Dihang silang duha tua sa prisohan, ang tig-ipis ug ilimnon nagdamgo ug gihatagan kinig kahulogan ni Jose. Sumala ni Jose, ang tig-ipis ug ilimnon mahibalik sa iyang kanhing posisyon sa palasyo ni Paraon. Dihang gisaysay ni Jose kining inspiradong interpretasyon, gigamit sab niya ang maong kahigayonan sa pagsaysay sa iyang kaugalingong situwasyon. Makakat-on tag bililhong leksiyon dili lang sa kon unsay gisulti ni Jose kondili sa wala usab niya isulti.​—Gen. 40:5-13.

12, 13. (a) Sa unsang paagi gipakita sa mga pulong ni Jose nga wala niya basta gidawat na lang ang inhustisya nga nahitabo niya? (b) Unsang mga detalye ang dayag nga wala isulti ni Jose sa tig-ipis ug ilimnon?

¹² Basaha ang Genesis 40:14, 15. Matikdi nga miingon si Jose nga siya “gidagit” o gikidnap. Ang orihinal nga termino niini literal nga nagkahulogang “gikawat.” Dayag, biktima siya sa inhustisya. Miingon sab si Jose nga inosente siya sa krimen nga gipasangil kaniya. Base niini, iyang gihangyo ang tig-ipis ug ilimnon nga hisgotan ang iyang kaso kang Paraon. Ngano? Siya miingon: Aron “pagawason mo gayod ako niining [dapita].”

¹³ Gipakita ba sa mga pulong ni Jose nga basta gidawat na lang niya ang iyang kahimtang? Wala gayod. Nahibalo gyod siya nga biktima siya sa daghang inhustisya. Gisaysay niya ang tinuod nga mga panghitabo ngadto sa tig-ipis ug ilimnon, nga lagmit naa sa posisyon nga motabang niya. Apan, matikdi nga walay makita sa Kasulatan nga gipahibalo ni Jose ang uban​—bisag si Paraon—​nga ang nagkidnap niya mao ang iyang mga igsoon. Gani, dihang ang iyang mga igsoon nangabot sa Ehipto ug nakig-uli kang Jose, gidawat sila ni Paraon ug gidapit sila sa pagpuyo sa Ehipto ug sa pagpahimulos sa “maayo sa tibuok yuta.”​—Gen. 45:16-20.

14. Unsay makatabang nato nga malikayan ang pagsultig sakit kon makaeksperyensiya tag inhustisya sa kongregasyon?

¹⁴ Kon ang usa ka Kristohanon maghunahuna nga biktima siya sa inhustisya, kinahanglang dili niya kini ipanabi sa uban. Siyempre, maayong mangayo siyag tabang sa mga ansiyano ug pahibal-on sila kon may usa sa kongregasyon nga nakahimog seryosong sala. (Lev. 5:1) Apan, sa daghang kahimtang nga wala maglangkit ug seryosong sala, lagmit mas maayong sulbaron ang dili pagsinabtanay nga dili apilon ang uban, bisan gani ang mga ansiyano. (Basaha ang Mateo 5:23, 24; 18:15.) Hinaot magmaunongon ta ug ipadapat ang mga prinsipyo sa Bibliya niini nga mga situwasyon. Sa pipila ka kahimtang, tingali maamgohan nato nga dili gyod diay ta biktima sa inhustisya. Mapasalamaton gyod ta nga wala nato padak-a ang problema pinaagig pagbutangbutang sa atong igsoon sa pagtuo! Hinumdomi, kita man husto o sayop, ang pagsultig sakit dili makasulbad sa problema. Ang pagkamaunongon kang Jehova ug sa atong mga igsoon motabang nato nga malikayan kana. Sa paghisgot sa usa “nga nagalakaw nga walay-ikasaway,” ang salmista miingon nga “wala siya magbutangbutang pinaagi sa iyang dila. Wala siyay gihimong daotan sa iyang kauban, ug wala siyay gihimong pakaulaw batok sa iyang suod nga kaila.”​—Sal. 15:2, 3; Sant. 3:5.

15. Sa unsang paagi nahimong panalangin kang Jose ang iyang relasyon kang Jehova?

¹⁵ Duna pa tay makat-onan sa relasyon ni Jose kang Jehova. Sulod sa 13 ka tuig nga pag-antos ug inhustisya, gipakita ni Jose nga gilantaw niya ang situwasyon sumala sa panglantaw ni Jehova. (Gen. 45:5-8) Wala niya basola si Jehova sa iyang kahimtang. Bisag wala niya makalimti ang iyang pag-antos, wala siya magdumot. Labaw sa tanan, wala niya tugoti nga madaot ang iyang relasyon kang Jehova tungod sa pagkadili-hingpit ug sayop sa uban. Ang pagkamaunongon ni Jose nakatabang niya nga makita kon giunsa pagsulbad ni Jehova ang mga inhustisya. Nakita sab niya ang pagpanalangin ni Jehova kaniya ug sa iyang pamilya.

16. Nganong kinahanglang mas makigsuod ta kang Jehova kon makaeksperyensiya tag inhustisya sa kongregasyon?

¹⁶ Sa susama, kinahanglan natong pabilhan ug proteksiyonan ang atong relasyon kang Jehova. Dili gyod nato tugotan ang pagkadili-hingpit sa mga igsoon nga magdaot sa atong relasyon sa Diyos, kinsa atong gihigugma ug gisimba. (Roma 8:38, 39) Hinunoa, kon makaeksperyensiya tag inhustisya sa kamot sa atong igsoon sa pagtuo, sundogon nato si Jose ug mas makigsuod ta kang Jehova, nga maningkamot sa paglantaw sa situwasyon sumala sa Iyang panglantaw. Kon nahimo na nato ang tanan sa pagsulbad sa situwasyon gamit ang Bibliya, kinahanglan nato kining itugyan kang Jehova, nga malaomong sulbaron niya kini sa iyang gitakdang panahon ug pamaagi.

17. Sa unsang paagi ikapakita nato ang atong pagsalig sa “Maghuhukom sa tibuok yuta”?

¹⁷ Samtang nagkinabuhi ta niining sistemaha sa mga butang, madahom nato nga makaeksperyensiya tag inhustisya. Usahay, ikaw o ang imong kaila makaeksperyensiya o makakita tingalig situwasyon sa kongregasyon nga daw inhustisya. Ayawg kapandol. (Sal. 119:165) Hinuon, ingong matinumanong mga alagad sa Diyos, maunongon ug mainampoon tang mosalig kaniya. Sa samang panahon, mapainubsanon natong ilhon nga wala ta mahibalo sa tanang detalye. Angay natong hinumdoman nga mahimong masayop ang atong panglantaw sa mga butang tungod sa atong pagkadili-hingpit. Sama sa atong nakat-onan sa ehemplo ni Jose, likayan nato ang pagsultig sakit kay nahibalo ta nga makapadako lang kini sa problema. Sa kataposan, imbes mangunay sa pagsulbad sa problema, magmadeterminado nga magpabiling maunongon ug mapailobong maghulat kang Jehova sa pagsulbad niini. Kon buhaton nato kana, uyonan ug panalanginan ta ni Jehova sama sa iyang gihimo kang Jose. Oo, segurado tang si Jehova, “ang Maghuhukom sa tibuok yuta,” kanunayng mobuhat kon unsay matarong, “kay ang tanan niyang dalan hustisya.”​—Gen. 18:25; Deut. 32:4.

18. Unsay atong konsiderahon sa sunod nga artikulo?

¹⁸ Sa sunod nga artikulo, konsiderahon nato ang duha pa ka pananglitan sa inhustisya nga nahitabo sa katawhan ni Jehova kaniadto. Ang paghisgot niini magpakita kon sa unsang paagi ang pagkamapainubsanon ug pagkaandam mopasaylo konektado sa panglantaw ni Jehova sa hustisya.