Usa ka Kinabuhi sa Dumalayong Kasegurohan
KON ikaw adunay hilanat, ikaw lagmit motomar ug tabletas aron mahupay ang labad sa ulo ug tingali mokuha ug usa ka bag nga may yelo aron ikaw mabugnawan. Apan bisan kon ang tabletas ug ang bag nga may yelo magpahimo sa mga simtoma nga maagwanta, dili niini wagtangon ang hinungdan sa imong hilanat. Ug kon ang problema sa imong panglawas grabe, gikinahanglan nimo ang pagpatambal gikan sa usa ka may-kasinatiang doktor.
Ang katawhan nag-antos sa padayong hilanat sa pagkawalay-kasegurohan. Kita hustong mohimo ug temporaryong mga paagi sa pagpaalibyo sa dili-maayong mga simtoma, apan ang pagtambal mahimo lamang sa usa kinsa makahimog malangkobong pagdayagnos sa atong kahimtang. Ug walay usa nga mas nahibalo sa tawo kay sa atong Maglalalang, si Jehova nga Diyos. Nahibalo siya nga ang kinabuhi walay kasegurohan tungod sa mga problema nga midangat kanato.
Ang May Kasegurohang Pagsugod Nadaot
Ang Pulong sa Diyos nagpatin-aw nga gilalang ni Jehova ang unang tawhanong paris nga hingpit ug gibutang sila sa usa ka may kasegurohang palibot. Wala silay kabalaka. Ang katuyoan sa Diyos alang sa mga tawo maoy aron nga mabuhi sa walay kataposan diha sa usa ka paraiso, nga may bug-os nga kasegurohan. Ang unang palibot sa mga tawo nag-apil sa “tanang kahoy nga makapahimuot sa igtatan-aw ug maayong kalan-on.” Matikdi nga ang ilang pisikal nga mga panginahanglan gitagan-an; ug maingon man usab ang ilang emosyonal nga mga panginahanglan, sanglit ang palibot gihubit ingong “makapahimuot sa igtatan-aw.” Sa walay duhaduha kini nagkahulogan nga ang unang paris gibutang sa palibot nga maghatag kanilag usa ka malig-on, walay-suliran nga kinabuhi.—Genesis 2:9.
Gisalikway ni Adan ug Eva ang mahigugmaong soberanong pagmando sa Diyos, busa nagpasulod diha sa ilang mga kinabuhi ug mga pagbati sa pagduhaduha, pagkahadlok, pagkaulaw, pagkasad-an, ug pagkawalay-kasegurohan. Human isalikway ang Diyos, giangkon ni Adan nga siya “nahadlok.” Ang unang mga tawo nagtabon sa ilang kaugalingon ug mitago gikan sa ilang mahigugmaong Maglalalang, diin sila nagpahimulos hangtod niadtong panahona ug usa ka suod ug mapuslanong relasyon.—Genesis 3:1-5, 8-10.
Ang orihinal nga katuyoan ni Jehova wala mausab. Ang Bibliya nag-ingon nga ang atong Maglalalang maoy usa ka mahigugmaong Diyos, nga sa dili madugay magpaarang sa masinugtanong katawhan sa pagpasig-uli sa yuta ngadto sa usa ka paraisong kahimtang ug sa pagpuyo diha sa kasegurohan sa walay kataposan. Pinaagi kang manalagnang Isaias, gihatag ang saad: “Ako nagahimo ug bag-ong mga langit ug usa ka bag-ong yuta; . . . managlipay, kamo, ug managmaya sa walay kataposan.” (Isaias 65:17, 18) Mahitungod niining bag-ong mga langit ug bag-ong yuta, si apostol Pedro miingon: “Niini nila magapuyo ang pagkamatarong.”—2 Pedro 3:13.
Sa unsang paagi kini matuman? Pinaagi sa usa ka kagamhanan nga gipahimutang ni Jehova. Kini mao ang Gingharian nga gitudlo ni Jesu-Kristo sa iyang mga sumusunod nga iampo: “Amahan namo sa mga langit, balaana ang imong ngalan. Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”—Mateo 6:9, 10.
Ang Gingharian sa Diyos mopuli sa tawhanong mga kagamhanan ug mahigugmaong ipatuman ang katuyoan sa Diyos sa tibuok kalibotan. (Daniel 2:44) Ang pagduhaduha, pagkahadlok, pagkaulaw, pagkasad-an, ug pagkawalay-kasegurohan nga mihampak sa katawhan sukad sa mga adlaw ni Adan mawagtang. Sumala sa Bibliya, kanang Ginghariana duol nang moabot. Bisan karon, diha sa atong walay-katinoang kalibotan, ang igong sukod sa kasegurohan mabatonan niadtong nangandoy sa Gingharian sa Diyos.
Hatagig Pangunang Pagtagad ang Espirituwal nga mga Butang
Si David maoy usa ka alagad sa Diyos nga nakasinati kon unsay bation sa pagkahadlok ug pagkaguol. Ug bisan pa niana si David misulat, ingon sa natala sa Salmo 4:8: “Sa pakigdait mohigda ako ug matulog, kay ikaw lamang, Oh Jehova, ang nagapapuyo kanako diha sa kasegurohan.” Gihatagan ni Jehova si David ug usa ka pagbati sa kasegurohan, bisan pag si David usahay gilibotan sa mga problema. May makat-onan ba kita gikan niini? Unsaon man nato pagkabaton ug igong sukod sa kasegurohan bisan diha sa usa ka walay kasegurohang kalibotan?
Palandonga ang asoy sa Genesis bahin kang Adan ug Eva. Kanus-a man nila giwala ang ilang pagbati sa kasegurohan? Sa gutlo nga ilang giputol ang ilang personal nga relasyon uban sa Maglalalang ug midumili sa pagkinabuhi nga nahiuyon sa iyang katuyoan alang sa katawhan. Busa, kon atong balihon kini nga proseso pinaagi sa paghimog usa ka suod personal nga relasyon uban ni Jehova ug pagpaningkamot nga magkinabuhi nga nahiuyon sa iyang kabubut-on, bisan karon kita makapahimulos ug usa ka kinabuhi nga may mas labaw nga kasegurohan kay sa laing paaging posible.
Ang pagkahibalo kang Jehova pinaagi sa pagtuon sa Bibliya motabang kanato nga masabtan ang kahulogan sa kinabuhi. Niana lamang nga atong masabtan kon kinsa kita ug kon nganong kita ania dinhi. Ang may kasegurohang kinabuhi posible kon kita nahigugma sa Diyos, nahibalo sa iyang katuyoan sa katawhan, ug nakasabot kon asa kita mohaom. Usa ka tawong ginganlag Paul nakadiskobre niana daghang tuig kanhi.
Si Paul natawo ug nagdako sa usa sa mga isla nga dili halayo sa baybayon sa Alemanya. Tungod sa nasinati sa iyang mga ginikanan sa Gubat sa Kalibotan II, ang iyang pamilya nawad-ag interes sa relihiyon. Si Paul miingon bahin sa iyang kaugalingon sa batan-on pa: “Wala akoy gituohan ug wala akoy gitahod. Akong gilumsan ang akong mga kasubo diha sa alkoholikong ilimnon, nga hinobrang nag-inom kaduha o katulo sa usa ka semana. Walay kasegurohan sa akong kinabuhi.”
Dayon si Paul nakapakigsulti uban sa usa sa mga Saksi ni Jehova. Nakiglantugi ug maayo si Paul, apan may usa ka butang nga gisulti sa Saksi nga nagpahunahuna kaniya. “Walay butang nga naggikan sa wala.” Sa laing pagkasulti, ang tanang butang nga atong makita palibot kanato diha sa kinaiyahan aduna gayoy usa ka Maglalalang.
“Akong gihunahuna kana kanunay ug ako miuyon.” Busa nagtuon si Paul sa Bibliya uban sa mga Saksi ni Jehova ug nakadangat sa pagkahibalo kang Jehova. Siya miadmitir: “Gawas sa akong mga ginikanan, si Jehova ang unang persona sa akong kinabuhi nga adunay nahimo alang kanako.” Si Paul gibawtismohan ingong usa ka Saksi sa 1977 ug miingon: “Karon akong nahibaloan kon unsa gayod ang katuyoan sa kinabuhi. Ako nalipay sa pagkinabuhi nga kaharmonya sa kabubut-on ni Jehova. Ako mibating may kasegurohan, sanglit walay mahitabo kanako o sa akong pamilya nga dili mahimong matul-id ni Jehova sa umaabot.”
Unsay atong makat-onan gikan niining kasinatiana? Nabuntog ni Paul ang iyang pagkawalay-kasegurohan—usa ka emosyonal nga palas-anon—pinaagi sa pagsentro sa pagtagad dili sa materyal nga bahandi kondili sa espirituwal nga mga butang. Iyang naugmad ang usa ka malig-ong relasyon uban sa Maglalalang. Milyonmilyon sa mga Saksi ni Jehova ang nagpahimulos sa maong relasyon. Kini naghatag kanilag kusog sa kahiladman nga nagtabang kanila nga magsakripisyo-sa-kaugalingon sa ilang mga pakiglabot sa uban. Nagaduaw sa mga tawo sa ilang mga balay, ang mga Saksi ni Jehova nagagamit sa ilang kaugalingong panahon aron tabangan ang ubang tawo sa paghimo sa ilang kinabuhi nga labawng may kasegurohan pinaagi sa pagsentro sa pagtagad sa espirituwal nga mga butang. Apan labaw pa ang gibuhat sa mga Saksi kay sa pagsangyaw.
‘Sangpita ang Inyong Diyos, si Jehova’
Sa Hulyo 1997 sa dihang gibahaan sa Oder River ang dagkong dapit sa amihanang Uropa, ang mga Saksi ni Jehova sa Alemanya nakadungog sa kahimtang sa mga tawo sa silingang Polandia. Unsa may ilang mahimo? Ang tagsatagsang mga Saksi sa sulod ug palibot sa Berlin nagpakita ug talagsaong pagkamanggihatagon pinaagi sa kinabubut-ong pagdonar ug kapin sa $116,000 sulod sa pipila ka adlaw.
Ang mga Saksi nga hanas sa buluhatong pagpanukod mibiyaheg unom ka oras sa karsada—sa ilang kaugalingong gastos—gikan sa Berlin ngadto sa rehiyon palibot sa Wrocław, Polandia. Diha sa usa ka gamayng lungsod, daghang balay ang grabeng nadaot. Ang balay nga gipanag-iya sa usa ka Saksing pamilya nagbarog sa tubig nga kapin sa unom ka metros. Ang anak nga babaye nagplano nga magminyo sa mosunod nga bulan ug mopuyo sa balay uban sa iyang bana. Unsay mahimo sa pag-ayo sa balay ug sa pagtabang sa pamilya, nga nawad-an halos sa tanang butang?
Sa dihang ang baha mihubas, usa ka silingan nangutana nga mayubiton: “Nganong dili ninyo sangpiton ang inyong Diyos, si Jehova, ug tan-awa kon iya ba kamong tabangan?” Pagkakurat sa silingan sa dihang sa sunod nga adlaw daghang sakyanang de-motor gikan sa Alemanya miabot sa balay sa pamilya nga Saksi! Usa ka grupo sa mga estranghero mikawas sa mga sakyanan ug misugod sa pag-ayo sa balay. “Kinsa man sila? Kinsa man ang nagbayad sa mga materyales?” ang silingan nangutana. Ang pamilyang Saksi nag-ingon nga kini mao ang ilang espirituwal nga mga igsoon ug nga kining mga bisitaha mao ang nagbayad sa mga materyales. Ang mga molupyo sa lungsod nagtan-aw nga nahibulong samtang ang balay giayo. Labot pa, ang kasal gihimo sa petsang giplano.
Nadiskobrehan niining pamilyaha nga ang pagkanasakop sa internasyonal nga panag-igsoonay sa mga Saksi ni Jehova dili lamang magdala ug espirituwal nga mga kaayohan kondili magdala usab ug igong sukod sa kasegurohan diha sa usa ka kalibotan nga walay kasegurohan. Dili lamang sila ang nakasinati niini. Sa tibuok dapit nga gibahaan, ang mga balay ug mga Kingdom Hall sa mga Saksi ni Jehova giayo. Ug ang dili-Saksi nga mga silingan wala hikalimti. Daghang trabaho usab ang gihimo diha sa ilang mga balay, nga giapresyar ug dako.
Pagkamatarong, Pagkamalinawon, ug Kasegurohan
Sa dihang ang taas nga hilanat mawala na ug ang normal nga kahimsog mobalik, pagkamapasalamaton nato sa doktor nga mitabang kanato! Sa dihang ang hilanat sa pagkawalay-kasegurohan nga naglimin sa katawhan mawala na sa walay kataposan—pinaagi sa Gingharian sa Diyos—pagkamapasalamaton nato sa atong Maglalalang! Oo, siya mao ang usa nga nagasaad diha sa “tinuod nga pagkamatarong, pagkamalinawon, ug kasegurohan hangtod sa panahong walay katinoan.” Pagkatalagsaong palaaboton!—Isaias 32:17.
[Blurb sa panid 10]
Atong mahupay ang emosyonal nga palas-anon pinaagi sa pagsentro sa pagtagad dili sa materyal nga bahandi kondili sa espirituwal nga mga butang
[Hulagway sa panid 8, 9]
Ang Diyos nagsaad ug usa ka bag-ong kalibotan diin ang tanan magpuyo sa dumalayong kasegurohan