Ang Hunahuna sa Bibliya

Ang mga Hudiyo Mao ba ang Piniling Katawhan sa Diyos?

ANG pagkatukod sa usa ka yutang-natawhan sa mga Hudiyo niadtong 1948 maoy masakit nga okasyon alang sa mga teologo sa Kakristiyanohan. Sa kasiglohan daghan ang nanudlo nga ang mga Hudiyo destinadong maglibodlibod sa yuta tungod sa ilang sala batok kang Kristo, ug karon ang “tiglibodlibod nga Hudiyo” dili na maglibodlibod.

Samtang ang presenteng mga panghitabo sa Tungang Sidlakan padayong nagasentro sa katawhang Hudiyo, ang mga pangutana bahin sa mga isyu nga dugay nang giisip nga nasulbad gipatungha karon. Ang mga Hudiyo mao ba gihapon ang piniling katawhan sa Diyos? Ang Diyos nagapakita ba karon ug espesyal nga pabor sa mga Hudiyo?

Kasiglohan kanhi, ang Diyos miingon ngadto sa mga Israelinhon: “Kon sugton ninyo ang akong tingog ug bantayan ang akong pakigtugon, nan kamo mahimong akong linaing kabtangan gikan sa tanang ubang mga katawhan, tungod kay ang tibuok nga yuta akoa man. Ug kamo mismo mahimong usa ka gingharian sa mga saserdote ug usa ka balaang nasod alang kanako.” (Exodo 19:5, 6) Ang tanang nasod iya sa Diyos, apan ang mga Israelinhon mahimong iyang linaing kabtangan, nga sa kataposan mag-alagad nga mga saserdote alang sa tanang tawo.

Apan wala bay kondisyon ang maong linaing relasyon uban sa Diyos? Dili! Ang Diyos nag-ingon: “Kon sugton ninyo ang akong tingog . . . nan kamo mahimong akong linaing kabtangan.” Busa ang pagpadayon nila sa piniling relasyon uban sa Diyos may kondisyon, nga nagadepende sa ilang padayong pagkamatinumanon kaniya.

Usa ka Epektibong Ilustrasyon

Kini gipasiugda sa mga panghitabo sa ikawalong siglo W.K.P., sa mga adlaw sa propetang si Oseas. Bisan pag nakadawat ug linaing pabor ingong piniling katawhan sa Diyos, ang kinabag-an sa mga Israelinhon mibulag sa matuod nga pagsimba ni Jehova. Unsay reaksiyon ni Jehova? “Ako dili na maluoy sa balay sa Israel, tungod kay sila akong pagakuhaon. . . . Kamo dili na akong katawhan ug ako dili na inyong Diyos.” (Oseas 1:6, 9) Busa, kadtong apostatang mga Israelinhon dili magpabiling inuyonan sa Diyos. Ang matinumanon lamang nga salin ang may adlaw rang mabulahan nga mapasig-uli ug makasinati na usab sa balaang mga panalangin.​—Oseas 1:10.

Katumanan sa maong tagna, gitugotan sa Diyos ang mga Israelinhon nga mabihag sa ilang mga kaaway ug maguba ang ilang templo, nga kusganong nagpasundayag sa pagkawala sa ilang inuyonang relasyon uban niya. Ang matinumanon lamang nga salin sa mga Israelinhon (nga niadto nailhang mga Hudiyo) ang mibalik gikan sa pagkabinihag sa 537 W.K.P. ug nagtukod pag-usab sa templo ni Jehova, nga makausa pa nagpahimulos sa pabor ni Jehova ingong iyang piniling katawhan.

“Usa ka Salin” Lamang ang Nagpabiling Matinumanon

Bisan pa niana, sa kasiglohan nga misunod, ang mga Hudiyo giatake sa impluwensiya sa Gregong pilosopiya​—sama sa Platonikong doktrina sa kalag nga dili mamatay​—nga may daotang mga epekto diha sa ilang pagsimba. Ang maong pagsimba dili na gayod ipasukad sa mga pagtulon-an ni Moises ug sa Hebreohanong mga manalagna.

Ipadayon ba ni Jehova ang pag-isip sa mga Hudiyo ingong iyang piniling katawhan? Sa pag-ila nga daghan ang makausa pa mibulag sa waysambog nga pagsimba ni Jehova, si Jesus miingon: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magahatag sa iyang mga bunga.” (Mateo 21:43) Kay wala mamati sa maong pasidaan, ang kinabag-an nagpadayon sa ilang apostatang dalan ug nagsalikway kang Jesus ingong dinihogan ni Jehova. Busa, wala magdugay tapos niadto nga gitugotan sa Diyos nga malaglag ang templong natukod pag-usab, sa 70 K.P. (Mateo 23:37, 38) Nagkahulogan ba kadto nga ang Diyos sa maong panahon nagsalikway sa tanang Hudiyo?

Sumala sa gisaysay ni Pablo, usa ka Hudiyong apostol ni Kristo: “Ang Diyos wala magsalikway sa iyang katawhan, si kinsa una niyang giila. . . . Niining panahona karon ang usa usab ka salin mitungha sumala sa pagpili tungod sa dili-takos nga kalulot.” (Roma 11:2, 5) Maingon nga daghan ang tingali dapiton sa usa ka seremonyas sa kasal apan diyutay ra ang tingali motambong, ang Diyos nagdapit sa tibuok Hudiyong nasod alang sa usa ka linaing relasyon uban niya, apan ang usa lang ka salin kanila ang naghupot sa maong linaing panagsuod pinaagi sa ilang pagkamatinumanon. Ang pagkamapailobon sa Diyos tinuod nga usa ka pasundayag sa dili-takos nga kalulot!

“Kadtong Dili Akong Katawhan” Mahimong “Akong Katawhan”

Kining matinumanon Hudiyong salin sa wala madugay gikuyogan sa mga dili-Hudiyo nga nagtinguha usab sa pag-alagad sa Diyos. Bisan pag ang ilang mga katigulangan wala magbaton ug linaing relasyon uban niya, si Jehova sa maong panahon andam modawat sa maong matinumanong mga dili-Hudiyo ingong iyang katawhan. Sa pagmatikod niini, si Pablo misulat: “Kon, karon, ang Diyos . . . nagtawag [kanato] dili lamang gikan sa taliwala sa mga Hudiyo kondili gikan usab sa taliwala sa [dili-Hudiyong] mga nasod, unsa man? Kini maoy sumala sa iyang ginaingon usab sa Oseas: ‘Kadtong dili akong katawhan akong pagatawgon nga “akong katawhan.”’”​—Roma 9:22-25.

Busa, ang mga Hudiyo ug mga dili-Hudiyo mamahimong piniling katawhan sa Diyos, nga may kalaomang magaalagad nga mga saserdote alang sa nahibiling katawhan. Sa paghisgot sa matinumanong mga magsisimba nga may lainlaing nasodnong mga kagikan, ang Kristohanong apostol Pedro, usa ka Hudiyo gikan sa pagkatawo, misulat: “Kamo usa ka ‘piniling banay, usa ka harianong pagkasaserdote, usa ka balaang nasod, usa ka katawhan alang sa linaing kabtangan’ . . . Kay sa nangagi kamo dili usa ka katawhan, apan karon maoy katawhan sa Diyos.” (1 Pedro 2:9, 10) Kadto mao ang “nasod,” ang mga tawong may diyosnong mga hiyas, nga matud ni Jesus magpatungha sa ‘mga bunga sa gingharian sa Diyos’ ug busa makapahimulos ug linaing relasyon uban ni Jehova.​—Mateo 21:43.

Ang Diyos nangita sa pagtuo ug matarong nga kagawian sa iyang pagpili sa maong umaabot nga mga saserdote, dili sa linaing kagikanan. Sumala sa giingon ni Pedro: “Ang Diyos walay pinalabi, apan sa matag nasod ang tawo nga may kahadlok niya ug nagabuhat sa pagkamatarong dalawaton alang kaniya.”​—Buhat 10:34, 35.

Busa, ang Diyos dili na mohatag ug linaing pabor kang bisan kinsang tawo pinasukad sa pagkatawo. Siya nagahatag sa mga tawo sa tanang nasodnong kagikan sa higayon nga mag-ugmad sa usa ka relasyon uban niya. Hinaot atong ipakita nga kita matinguhaon nga mahimong katawhan sa Diyos pinaagi sa atong pagtuo ug kagawian.