Mga Pangutana Gikan sa mga Magbabasa
◼ Si Jehova nga Diyos laktud bang nakigsulti kang Adan, o nakigsulti ba siya pinaagi sa Pulong, ang bugtong Anak sa Diyos?
Ang Bibliya wala maghatag kanato ug tin-awng tubag sa maong pangutana. Bisan tuod siya mahimong nakigsulting laktud ngadto sa iyang hingpit tawhanong anak sa Eden, lagmit nga Siya nakigsulti kang Adan pinaagi sa Pulong.
Ang Bibliya kadaghanan nagahisgot nga gibuhat sa Diyos ang mga butang sa dihang sa aktuwal gibuhat niya kana pinaagi sa usa o daghan pang manulonda. Pananglitan, ang Genesis 1:1 nagasugid kanato: “Sa sinugdanan gilalang sa Diyos ang mga langit ug sa yuta.” Kon kana lang ang giingon sa Bibliya mahitungod sa sinugdanan sa uniberso, kita makahinapos unta nga ang Diyos laktud nga naglalang niini, nga samag pinaagi sa iyang kaugalingong mga kamot mismo. Bisan pa niana, ang Kristohanon Gregong Kasulatan nagapadako sa atong pagsabot. Atong mabasa: “Pinaagi sa [Anak sa Diyos] ang tanan ubang butang gilalang sa mga langit ug sa yuta, ang mga butang makita ug ang mga butang dili makita . . . Ang tanan ubang butang gilalang pinaagi kaniya ug alang kaniya.” (Colosas 1:16, 17) Ang ubang teksto nagapamatuod sa papel sa Anak diha sa paglalang sa uniberso. (Juan 1:3, 10; Hebreohanon 1:1, 2) Bisan pa niana, ang iyang papel maoy ingong usa ka magbubuhat nga ubos kang Jehova, kinsa maoy nagsugod, naghatag gahom, ug nagtultol sa paglalang.—Salmo 19:1.
Ang Diyos miingon ngadto sa unang tawo: “Gikan sa matag kahoy sa tanaman makakaon ka hangtod sa pagkatagbaw.” (Genesis 2:16, 17) Si Jehova wala magkinahanglag mekanikal o elektronik nga kasangkapan, sama sa usa ka megaphone o shortwave nga radyo. Sumala sa giingon sa Ang Bantayanang Torre sa Agosto 1, 1989: “Ang tawo wala makakita sa usang nagsulti. Ang tingog naggikan sa dili-dayag, dili-makitang kalibotan, ug kadto nakigsulti kaniya. Kadto mao ang tingog sa Magbubuhat sa tawo, ang iyang Maglalalang! . . . Ang tawo wala magkinahanglag moderno siyentipikanhong radio receiver aron makadungog sa balaang tingog. Ang Diyos nakigsulting laktud kaniya.”
Ang Diyos nakigsulti ba pinaagi sa usa ka manulonda, tingali ang Logos, kinsa nahimong si Jesus? Kana posible. Bisan pag dili mahimong dogmatiko, si C. T. Russell misulat: “Si Jesus tingali mao ang Hawas sa Diyos didto sa Tanaman sa Eden uban kang Adan.” (The Watch Tower, Pebrero 1, 1915) Ang panganay nga Anak sa Diyos dugay nang nag-alagad diha sa binayaw nga kapasidad sa pagka “Pulong” o Tigpamaba sa iyang Amahan, ngadto sa mga manulonda ug sa mga tawo. (Juan 1:1; 12:49, 50; Pinadayag 1:1, 2) Busa bisan pag ang asoy sa Genesis nagapasa sa impresyon nga ang Diyos nakigsulting laktud ngadto sa nag-inusarang si Adan, kana wala magpahigawas sa Iyang pagpakigsulti pinaagi sa usa ka manulonda, apil ang Pulong, ang langitnong Anak ni Jehova. Matuod kini ilabina sa pagpalandong nga gigamit ni Jehova ang Logos sa paglalang sa tawo sa unang bahin, ug kini siya ‘may kahimuot sa mga butang maylabot sa mga anak sa mga tawo.’—Proverbio 8:22, 31; Juan 1:3.
Tagda, pananglitan, ang okasyon sa dihang si Moises mitungas sa Bukid Sinai. Ang Exodo 19:21-24 miasoy: “Si Jehova karon miingon kang Moises . . . Niana si Moises miingon kang Jehova . . . Bisan pa niana, si Jehova miingon kaniya.” Dayon ang asoy sa paghatag sa Napulo ka Sugo gipailaila niining paagiha: “Ang Diyos misulti niining tanan nga pulong.” (Exodo 20:1) Mopatim-aw ba nga ang Diyos personal nagsulti sa mga pulong sa Kasugoan? Ang maong impresyon mapaluyohan sa pagkaagi nga kita giingnan nga ang Diyos nakigsulti kang Moises “nawong sa nawong.”—Exodo 33:11.
Bisan pa niana, kita may dugang pagpadayag bahin niini. Si apostol Pablo misulat mahitungod sa Kasugoan: “Kana gihatag pinaagi sa mga manulonda pinaagi sa kamot sa usa ka tigpataliwala.” (Galacia 3:19) Sa ulahi, gitandi ni Pablo sa tino ang kalainan sa mga tugon nga gitagana sa Diyos diha sa Kasugoan ug sa nadawat sa mga Kristohanon pinaagi kang Jesus: “Kon ang pulong nga gipamulong pinaagi sa mga manulonda nahimong malig-on, ug ang matag kalapasan ug masukihong buhat nagdawat ug balos . . . , sa unsang paagi kita makaikyas kon gipasagdan nato ang ingon ka dakong kaluwasan sa pagkaagi nga kini gipamulong pinaagi sa atong Ginoong [Jesus] ug gipamatud-an alang kanato niadtong nakadungog kaniya.” (Hebreohanon 2:2, 3) Busa ang Diyos wala magsulti sa mga pulong sa Kasugoan pinaagi sa iyang personal nga tingog, ni gigamit niya ang Logos. Hinunoa, gipalabi niya ang paggamit sa ubang mga manulonda.
Hinuon, unsa ba ang paninugdang punto? Kadaghanan nga sa dihang mabasa nato nga ang Diyos nakigsulti sa mga tawo, atong mamatikdan nga gibuhat niya kana pinaagi sa masinugtanong espiritung mga linalang nga nagsulti ilis kaniya. (Itandi ang Genesis 18:2, 3, 33; 19:1; Exodo 3:2-4; Maghuhukom 6:11, 12, 20-22.) Ang pagtawag kang Jesus ingong Pulong nagapasabot nga siya mao ang kanunayng gigamit sa Diyos aron makigkomunikar sa uban niyang mga linalang. Nag-apil ba kana sa hingpit nga anak sa Diyos nga si Adan? Lagmit kaayo.—Lucas 3:38.
Tinuod nga sa dihang ang Logos sa ulahi dinhi sa yuta, ang Amahan sa katulo misulti nga madungog aron kining “kataposang Adan” makadungog. (1 Corinto 15:45; Mateo 3:16, 17; 17:1-5; Juan 12:28-30) Sa maong mga okasyon, nganong ang Diyos nakigsulti o misulti mahitungod sa iyang minahal nga Anak pinaagi sa usa ka tigpataliwalang anghel? Mas makataronganon, si Jehova makigsulting laktud; ang iyang hingpit nga Anak, ug bisan ang dili-hingpit nga mga tawo sa duol, nakadungog sa kaugalingong tingog sa Diyos. Busa sa dihang nalalang ang hingpit nga tawong si Adan, ang iyang mahigugmaong Amahan nakiglabot nga laktud sa maong hingpit bag-ong linalang. Bisan pa niana, tungod sa nahaunang kasayoran, lagmit nga gigamit niya ang Pulong.