Dawata ang Bibliya Tungod sa Kon Unsa Gayod Kini

“Kami usab sa walay-hunong nagapasalamat sa Diyos, tungod kay sa nadawat ninyo ang pulong sa Diyos, nga inyong nadungog kanamo, inyong gidawat kini, dili ingong pulong sa mga tawo, kundili, ingon gayod sa kon unsa kini sa pagkamatuod, ingong ang pulong sa Diyos, nga nagalihok usab diha kaninyo nga mga magtutuo.”​—1 TESALONICA 2:13.

 1. Unsang matang sa impormasyon diha sa Bibliya ang naghimo nianang basahona nga talagsaon gayod?

ANG Balaang Bibliya mao ang labing bug-os nga nahubad ug kaylap nga napanagtag nga basahon sa kalibotan. Giila dayon kini nga usa sa labing talagsaong mga buhat sa katitikan. Mas hinungdanon, hinunoa, gitagana sa Bibliya ang giya nga gikinahanglan pag-ayo sa katawhan sa tanang rasa ug tanang nasod, walay sapayan sa ilang trabaho o kahimtang sa kinabuhi. (Pinadayag 14:6, 7) Sa paagi nga magtagbaw sa hunahuna ug kasingkasing, gitubag sa Bibliya ang mga pangutanang sama sa: Unsa ang katuyoan sa tawhanong kinabuhi? (Genesis 1:28; Pinadayag 4:11) Nganong ang mga gobyerno sa tawo wala makapatuman sa malungtarong pakigdait ug kasegurohan? (Jeremias 10:23; Pinadayag 13:1, 2) Nganong ang mga tawo mamatay? (Genesis 2:15-17; 3:1-6; Roma 5:12) Taliwala niining gubot nga kalibotan, sa unsang paagi malamposon kitang makasagubang sa mga suliran sa kinabuhi? (Salmo 119:105; Proverbio 3:5, 6) Unsay gitagana sa ugma alang kanato?​—Daniel 2:44; Pinadayag 21:3-5.

 2. Nganong ang Bibliya nagtaganag bug-os kasaligang mga tubag sa atong mga pangutana?

² Nganong mabulot-anong gitubag sa Bibliya ang maong mga pangutana? Tungod kay kini mao ang Pulong sa Diyos. Gigamit niya ang mga tawo sa pagsulat, apan sumala sa tin-awng gipahayag sa 2 Timoteo 3:16, “ang tibuok Kasulatan inspirado sa Diyos.” Dili kini produkto sa pribadong pagbadbad sa tawhanong mga panghitabo. “Ang propesiya [mga pahayag bahin sa mga butang nga moabot, balaang mga sugo, moral nga sukdanan sa Bibliya] wala sa bisan kanus-a gipadangat pinaagi sa kabubut-on sa tawo, hinunoa namulong ang mga tawo gikan sa Diyos samtang giagak sila sa balaang espiritu.”​—2 Pedro 1:21.

 3. (a) Paghatag ug mga panig-ingnan nga nagpakita kon unsa ka dako ang pagpabili sa mga tawo sa Bibliya sa lainlaing mga nasod. (b) Nganong ang mga indibiduwal andam nga magpameligro sa ilang mga kinabuhi aron makabasa sa Kasulatan?

³ Kay nagaila sa bili sa Bibliya, daghang tawo ang namahala nga bilanggoon, bisan mamatay, aron mabatonan ug mabasa kana. Kana ang nahitabo sa nangaging katuigan sa Katolikong Espanya, diin ang klero nahadlok nga ang ilang impluwensiya magmahuyang kon mobasa ang mga tawo sa Bibliya diha sa ilang kaugalingong pinulongan; kana nahitabo usab sa Albania, diin gihimo ang mapig-otong mga tikang ubos sa ateyistikanhong pagmando aron pagtapos sa tanang relihiyosong impluwensiya. Bisan pa niana, ang mahadlokon-sa-Diyos nga mga tawo nagmahal sa mga kopya sa Kasulatan, nagbasa niana, ug nakig-ambit niana sa usag usa. Panahon sa Gubat sa Kalibotan II, sa Sachsenhausen nga kampong konsentrasyon, usa ka Bibliya ang mainampingong gipasa gikan sa usa ka bloke sa mga selda ngadto sa lain (bisan pag kadto gidili), ug kadtong nakabasa misag-ulo ug mga bahin niana aron ikapaambit sa uban. Sulod sa katuigang 1950, sa kaniadto Komunistang Sidlakang Alemanya, ang mga Saksi ni Jehova nga gibilanggo tungod sa ilang pagtuo nameligro sa inusarang pagkabilanggo sa dihang sila nagpasag gagmayng mga bahin sa Bibliya gikan sa usa ka binilanggo ngadto sa lain aron mabasa sa magabii. Nganong gibuhat man nila kadto? Tungod kay nakaila sila nga ang Bibliya mao ang Pulong sa Diyos, ug sila nasayod nga “dili lamang pinaagi sa tinapay” kondili pinaagi sa “matag pulong sa baba ni Jehova nga ang tawo mabuhi.” (Deuteronomio 8:3) Kining mga pulonga, nga natala sa Bibliya, nakapaarang niadtong mga Saksi sa pagpabiling buhi sa espirituwal bisan pag gipailalom sa di-katuohang kapintasan.

 4. Kinahanglan unsa ang dapit sa Bibliya diha sa atong mga kinabuhi?

⁴ Ang Bibliya dili usa ka basahon nga ibutang lamang sa estante alang sa panagsang reperensiya, ni gituyo kini nga gamiton lamang sa dihang ang masigkamagtutuo magkatigom alang sa pagsimba. Kada adlaw kini angay gamiton sa paglamdag sa mga kahimtang nga atong giatubang ug magpakita kanato sa hustong dalan nga pagalaktan.​—Salmo 25:4, 5.

Gilaraw nga Pagabasahon ug Masabtan

 5. (a) Kon posible man, unsay kinahanglang batonan sa matag usa kanato? (b) Sa karaang Israel, sa unsang paagi nasayran sa mga tawo kon unsay sulod sa Kasulatan? (c) Sa unsang paagi ang Salmo 19:7-11 nag-apektar sa imong tinamdan bahin sa pagbasa sa Bibliya?

⁵ Sa atong adlaw, ang mga kopya sa Bibliya daling mabatonan diha sa kadaghanang kayutaan, ug giawhag namo ang matag magbabasa sa Ang Bantayanang Torre sa pagbaton ug kopya. Sa panahong gisulat ang Bibliya, walay mga makina sa imprenta. Ang katawhan sa kadaghanan walay personal nga mga kopya. Apan gihikay ni Jehova nga ang iyang mga alagad makadungog kon unsay nahisulat. Busa, ang Exodo 24:7 nagtaho, human ikasulat ni Moises ang gisugo ni Jehova, siya “nagkuha sa basahon sa tugon ug nagbasa niana nga nadungog sa katawhan.” Kay nakasaksi sa labaw-kinaiyanhong mga pasundayag sa Bukid Sinai, ilang nailhan nga ang gibasa ni Moises kanila maoy gikan sa Diyos ug kinahanglang mahibaloan nila ang maong impormasyon. (Exodo 19:9, 16-19; 20:22) Kita usab kinahanglang mahibalo kon unsay natala diha sa Pulong sa Diyos.​—Salmo 19:7-11.

 6. (a) Una pa mosulod ang nasod sa Israel sa Yutang Saad, unsay gibuhat ni Moises? (b) Sa unsang paagi atong masundog ang panig-ingnan ni Moises?

⁶ Samtang ang nasod sa Israel nangandam sa pagtabok sa Subang Jordan aron mosulod sa Yutang Saad, sa ingon biyaan ang ilang kinabuhing naglaaglaag sa kamingawan, angay nga ilang sublion ang Kasugoan ni Jehova ug ang iyang mga pakiglabot kanila. Tinukmod sa espiritu sa Diyos, gisubli ni Moises ang Kasugoan uban kanila. Gipahinumdoman niya sila sa mga detalye sa Kasugoan, ug gipasiugda usab niya ang nagpahiping mga prinsipyo ug mga tinamdan nga maoy mag-impluwensiya sa ilang relasyon uban kang Jehova. (Deuteronomio 4:9, 35; 7:7, 8; 8:10-14; 10:12, 13) Samtang kita karong adlawa modawat ug bag-ong mga asaynment o moatubang ug bag-ong mga kahimtang sa kinabuhi, maayong atong tagdon kon sa unsang paagi ang tambag sa Kasulatan angay mag-impluwensiya kon unsay atong ginabuhat.

 7. Human gayod sa pagtabok sa mga Israelinhon sa Jordan, unsay gihimo sa pagsilsil sa Kasugoan ni Jehova diha sa ilang mga hunahuna ug mga kasingkasing?

⁷ Wala madugay human sa pagtabok sa Israel sa Subang Jordan, ang katawhan nagtigom pag-usab sa pagsubli kon unsay gisulti ni Jehova kanila pinaagi kang Moises. Ang nasod nagtigom sa mga 50 kilometros amihanan sa Jerusalem. Katunga sa mga tribo ang didto sa atubangan sa Bukid Ebal, ug katunga didto sa atubangan sa Bukid Gerizim. Didto si Josue “nagbasang kusog sa tanang pulong sa kasugoan, ang panalangin ug ang tunglo.” Sa ingon ang mga lalaki, ang mga babaye, ug ang mga bata, kauban sa langyawng mga molupyo, nakadungog ug tukma-sa-panahong pagpahayag pag-usab sa mga balaod nga nagmando sa panggawi nga mosangpot sa dili pag-uyon ni Jehova ug sa mga panalangin nga ilang madawat kon sila mosunod kang Jehova. (Josue 8:34, 35) Kinahanglang ibutang nilang tin-aw sa hunahuna kon unsa ang maayo ug kon unsa ang daotan gikan sa panglantaw ni Jehova. Dugang pa, kinahanglang ilang isilsil diha sa ilang mga kasingkasing ang gugma sa maayo ug pagdumot sa daotan, sama ra sa matag usa kanato karong adlawa.​—Salmo 97:10; 119:103, 104; Amos 5:15.

 8. Unsa ang kaayohan sa pinanahong pagbasa sa Pulong sa Diyos sa pila ka nasodnong mga asembliya sa Israel?

⁸ Dugang pa sa mga pagbasa sa Kasugoan bahin sa maong makasaysayanhong mga okasyon, ang usa ka tagana sa regular nga pagbasa sa Pulong sa Diyos gilaraw sa Deuteronomio 31:10-12. Matag ikapitong tuig ang tibuok nasod magtigom aron mamati sa pagbasa sa Pulong sa Diyos. Kadto mitaganag espirituwal nga pagkaon alang kanila. Kadto nagpapadayong buhi diha sa ilang mga hunahuna ug mga kasingkasing sa mga saad bahin sa Binhi ug sa ingon nagpunting sa mga matinuohon ngadto sa Mesiyas. Ang mga kahikayan sa espirituwal nga pagpakaon nga gisugdan sa dihang ang Israel didto sa kamingawan wala mohunong sa pagsulod nila sa Yutang Saad. (1 Corinto 10:3, 4) Hinunoa, ang Pulong sa Diyos napatugob tungod sa paglakip sa dugang nga mga pinadayag sa mga propeta.

 9. (a) Sa panahon ba lamang nga ang mga Israelinhon nagkatigom sa dagkong mga pundok nga sila nagbasa sa Kasulatan? Isaysay. (b) Sa unsang paagi ang instruksiyon diha sa Kasulatan gihatag sulod sa tinagsa ka mga pamilya, ug unsay tumong?

⁹ Ang pagsubli sa tambag sa Pulong sa Diyos dili lamang himoon sa mga panahong ang katawhan nagtigom sa usa ka dakong pundok. Ang mga bahin sa Pulong sa Diyos ug ang mga prinsipyong naglangkob niini angay pagahisgotan kada adlaw. (Deuteronomio 6:4-9) Sa kadaghanang mga dapit karong adlawa, posible nga ang mga batan-on magbaton ug personal nga kopya sa Bibliya, ug mapuslanon kaayo nga sila magbaton gayod. Apan sa karaang Israel, kana dili mao ang kahimtang. Niadtong panahona, sa dihang ang mga ginikanan mihatag ug instruksiyon gikan sa Pulong sa Diyos, kinahanglang sila magsalig sa ilang nasag-ulo ug sa mga kamatuoran nga ilang gimahal diha sa ilang mga kasingkasing, uban sa bisan unsang ginagmayng mga kinutlo nga tingali ila mismong nasulat. Pinaagi sa kanunayng pagsubli, sila naningkamot sa pag-ugmad diha sa ilang mga anak sa gugma kang Jehova ug sa iyang mga dalan. Ang tumong dili lamang ang pagkaadunay ulo nga punog kahibalo kondili sa pagtabang sa matag sakop sa pamilya sa pagkinabuhi sa paagi nga magpasundayag ug gugma kang Jehova ug sa iyang Pulong.​—Deuteronomio 11:18, 19, 22, 23.

Pagbasag Kasulatan Diha sa mga Sinagoga

 10, 11. Unsang programa sa pagbasa sa Kasulatan ang gisunod diha sa mga sinagoga, ug unsay pag-isip ni Jesus sa maong mga okasyon?

¹⁰ Wala madugay human madala ang mga Hudiyo nga binihag sa Babilonya, ang mga sinagoga natukod ingong mga dapit sa pagsimba. Aron ang Pulong sa Diyos pagabasahon ug pagahisgotan diha sa maong mga dapit tigomanan, gigama ang mas daghang kopya sa Kasulatan. Kadto usa ka hinungdan sa paglahutay sa mga 6,000 ka karaang sinulat-sa-kamot nga mga kopya nga naundan ug mga bahin sa Hebreohanong Kasulatan.

¹¹ Usa ka hinungdanong bahin sa serbisyo sa sinagoga mao ang pagbasa sa Torah, nga tumbas sa unang lima ka basahon sa modernong-adlawng mga Bibliya. Ang Buhat 15:21 nagtaho nga sa unang siglo K.P., ang maong pagbasa gihimo sa matag Igpapahulay, ug ang Mishnah nagpakitang sa pagka-ikaduhang siglo, dihay mga pagbasa usab sa Torah sa ikaduha ug ikalimang mga adlaw sa semana. Ang ubay-ubayng indibiduwal nakig-ambit sa pagbasag tinudlong mga bahin, nga magsunod. Ang batasan sa mga Hudiyo nga nagpuyo sa Babilonya mao ang pagbasa sa tibuok nga Torah kada tuig; ang batasan sa Palestina mao ang pag-eskedyul sa pagbasa latas sa yugtong tulo ka tuig. Ang usa ka bahin gikan sa mga Propeta gibasa usab ug gipatin-aw. Batasan ni Jesus ang pagtambong alang sa mga programa sa pagbasa sa Bibliya sa Igpapahulay sa dapit nga iyang gipuy-an.​—Lucas 4:16-21.

Personal nga Sanong ug Pagpadapat

 12. (a) Sa dihang gibasa ni Moises ang Kasugoan ngadto sa katawhan, sa unsang paagi ang katawhan nakabatog kaayohan? (b) Unsay sanong sa katawhan?

¹² Ang pagbasa sa dinasig nga Kasulatan wala larawa nga mahimong pormalismo lamang. Kadto wala lamang himoa sa pagtagbaw sa kamausisaon sa katawhan. Sa dihang gibasa ni Moises “ang basahon sa pakigtugon” ngadto sa Israel sa kapatagan nga nag-atubang sa Bukid Sinai, gihimo niya kadto aron sila mahibalo sa ilang mga responsabilidad atubangan sa Diyos ug motuman niana. Motuman kaha sila? Ang pagbasa nagkinahanglan ug pagsanong. Nakaila ang mga tawo niana, ug sila namulong, nga miingon: “Sa tanan nga gipamulong ni Jehova andam kami sa pagbuhat ug magmasinugtanon.”​—Exodo 24:7; itandi ang Exodo 19:8; 24:3.

 13. Sa gibasa ni Josue ang mga tunglo tungod sa pagkadili-masinugtanon, unsay kinahanglang buhaton sa katawhan, uban sa unsang katuyoan?

¹³ Sa ulahi, sa gibasa ni Josue ngadto sa nasod ang gisaad nga mga panalangin ug mga tunglo, o mga maldisyon, gikinahanglan ang pagsanong. Human sa matag usa sa mga maldisyon, gihatag ang instruksiyon: “Ug ang tanang tawo kinahanglang moingon, ‘Amen!’” (Deuteronomio 27:4-26) Busa, punto por punto ilang gipahayag ang ilang pag-uyon sa pagtunglo ni Jehova sa gipahayag nga mga daotang buhat. Pagkatalagsaong hitabo kadto sa dihang ang tibuok nasod mipadahunog sa pag-uyon niini!

 14. Sa mga adlaw ni Nehemias, nganong ang pagbasa sa publiko sa Kasugoan napamatud-ang mapuslanon?

¹⁴ Sa mga adlaw ni Nehemias, sa dihang nagtigom ang tanang tawo sa Jerusalem sa pagpatalinghog sa Kasugoan, ilang nakita nga wala sila bug-os magtuman sa mga instruksiyon nga gisulat dinha. Niadtong okasyona ila dayong gipadapat kon unsay ilang nakat-onan. Unsa ang resulta? “Dako kaayong kasadya.” (Nehemias 8:13-17) Human sa usa ka semana sa matag-adlawng pagbasa sa Bibliya panahon sa pista, naamgohan nila nga daghan pa ang gikinahanglan. Sa mainampoon gisubli nila ang kasaysayan sa mga pakiglabot ni Jehova uban sa iyang katawhan sukad sa mga adlaw ni Abraham padayon. Kining tanan nagtukmod kanila sa pagpanumpa nga mosunod sa mga kinahanglanon sa Kasugoan, sa paglikay sa pagpakigminyo sa mga langyaw, ug sa pagdawat sa mga katungdanan sa pag-atiman sa templo ug sa serbisyo niini.​—Nehemias, mga kapitulo 8-10.

 15. Sa unsang paagi ang mga instruksiyon sa Deuteronomio 6:6-9 nagpakita nga, sulod sa mga pamilya, ang instruksiyon sa Pulong sa Diyos dili lamang pormalismo?

¹⁵ Sa susama, sulod sa pamilya, ang pagtudlo sa Kasulatan wala larawa aron mahimong pormalismo lamang. Sumala sa nakita na, sa masambingayong mga pulong sa Deuteronomio 6:6-9, ang katawhan gisugo nga ‘ibugkot ang mga pulong sa Diyos ingong usa ka timaan diha sa ilang kamot’​—sa ingon nagpasundayag pinaagig panig-ingnan ug buhat sa ilang gugma alang sa mga dalan ni Jehova. Ug kinahanglang ibutang nila ang mga pulong sa Diyos ingong ‘usa ka baat sa agtang taliwala sa ilang mga mata’​—sa ingon kanunayng magpahinumdom sa mga prinsipyong nalakip diha sa Kasulatan ug paggamit niini nga pasikaranan sa ilang mga desisyon. (Itandi ang pinulongan nga gigamit sa Exodo 13:9, 14-16.) Kinahanglang ilang ‘isulat kini sa mga haligi sa pultahan sa ilang mga balay ug sa ilang mga ganghaan’​—sa ingon magpaila sa ilang mga balay ug ilang mga komunidad ingong mga dapit diin ang pulong sa Diyos gitahod ug gipadapat. Sa laing mga pulong, ang ilang mga kinabuhi kinahanglang maghatag ug daghang ebidensiya nga gihigugma nila ug gipadapat ang matarong nga mga lagda ni Jehova. Pagkamapuslanon unya kana! Ang Pulong sa Diyos ba nagbaton nianang matanga sa pagkailado diha sa matag-adlawng kinabuhi sa atong mga panimalay? Ikasubo, ang mga Hudiyo naghimo nianang tanang kahikayan sa pagsimba nga yanong pormalidad, nga nagsul-ob ug mga kahita nga may kasulatan nga daw kini mga anting-anting. Ang ilang pagsimba dili na gikan sa kasingkasing ug gisalikway ni Jehova.​—Isaias 29:13, 14; Mateo 15:7-9.

Responsabilidad sa mga Magtatan-aw

 16. Nganong ang regular nga pagbasa sa Kasulatan hinungdanon alang kang Josue?

¹⁶ Kon bahin sa pagbasa sa Kasulatan, ang espesyal nga pagtagad gitumong niadtong mga magtatan-aw sa nasod. Kang Josue, si Jehova miingon: “Magbantay sa pagbuhat sumala sa tanang balaod.” Uban sa panglantaw nga iyang matuman ang maong responsabilidad, siya gisultihan: “Kinahanglang basahon mo kini sa ubos nga tingog sa adlaw ug sa gabii, . . . kay unya imong himoon ang imong dalan nga malamposon ug unya ikaw maalamong molihok.” (Josue 1:7, 8) Ingon nga tinuod ni bisan kinsang Kristohanong magtatan-aw karong adlawa, ang regular nga pagbasa ni Josue sa Kasulatan makatabang kaniya sa paghinumdom sa tin-aw sa tinong mga sugo nga gihatag ni Jehova ngadto sa Iyang katawhan. Kinahanglan usab nga masabtan ni Josue kon giunsa ni Jehova pagpakiglabot sa Iyang mga alagad ubos sa lainlaing mga kahimtang. Samtang gibasa niya ang mga pahayag sa katuyoan sa Diyos, hinungdanong iyang hunahunaon ang iyang kaugalingong responsabilidad maylabot nianang katuyoana.

 17. (a) Aron ang mga hari makabatog kaayohan gikan sa pagbasa sa Kasulatan sa paaging gipahayag ni Jehova, unsa ang gikinahanglan uban sa ilang pagbasa? (b) Nganong ang regular nga pagbasa ug pagpamalandong sa Bibliya hinungdanon kaayo alang sa Kristohanong mga ansiano?

¹⁷ Si Jehova nagmando nga si bisan kinsang mag-alagad nga hari ibabaw sa Iyang katawhan, sa sinugdanan sa iyang pagkahari, maghimog kopya sa Kasugoan sa Diyos, nga ibase kana sa kopya nga gitipigan sa mga saserdote. Unya kinahanglang iyang “basahon kana sa tanang adlaw sa iyang kinabuhi.” Ang tumong maoy dili lamang pagsag-ulo sa mga unod niana. Hinunoa, maoy aron “siya makakat-on sa pagkahadlok kang Jehova nga iyang Diyos” ug nga “ang iyang kasingkasing dili magpataas sa kaugalingon ibabaw sa iyang mga igsoon.” (Deuteronomio 17:18-20) Kini nagkinahanglan nga mamalandong siya sa dulot sa kon unsay iyang gibasa. Ang pipila sa mga hari lagmit naghunahuna nga puliki kaayo sila sa mga katungdanan sa pagdumala aron buhaton kana, ug ang tibuok nasod nag-antos ingong sangpotanan sa ilang pagpasagad. Ang papel sa mga ansiano diha sa Kristohanong kongregasyon dili gayod iya sa mga hari. Bisan pa, ingon nga tinuod sa mga hari, kinahanglanon nga ang mga ansiano magbasa ug mamalandong sa Pulong sa Diyos. Ang pagbuhat nila niana motabang kanila sa padayong paghupot ug tukmang panglantaw niadtong gisalig kanila aron maatiman. Makapaarang usab kini kanila sa pagtuman sa ilang responsabilidad ingong mga magtutudlo sa paagi nga magapasidungog gayod sa Diyos ug magpalig-on sa espirituwal sa isigka-Kristohanon.​—Tito 1:9; itandi ang Juan 7:16-18; itandi ang 1 Timoteo 1:6, 7.

 18. Ang regular nga pagbasa ug pagtuon sa Bibliya motabang kanato sa pagsundog sa unsang panig-ingnan nga gihatag ni apostol Pablo?

¹⁸ Si apostol Pablo, usa ka Kristohanong magtatan-aw sa unang siglo, dakog kahibalo sa dinasig nga Kasulatan. Sa dihang siya nagpamatuod ngadto sa katawhan sa karaang Tesalonica, siya nakapangatarongan sa epektibong paagi kanila gikan sa Kasulatan ug nakatabang kanila sa pagsabot sa kahulogan. (Buhat 17:1-4) Iyang naabot ang mga kasingkasing sa sinserong mga mamiminaw. Busa, daghan nga nakadungog kaniya nahimong mga magtutuo. (1 Tesalonica 2:13) Ingong resulta sa imong programa sa pagbasa ug pagtuon sa Bibliya, ikaw ba makapangatarongan sa epektibong paagi gikan sa Kasulatan? Ang dapit ba nga giokupar sa imong kinabuhi sa pagbasa sa Bibliya ug ang paagi sa imong pagbuhat niana naghatag ug ebidensiya nga tinuod nimong gipabilhan kon unsay kahulogan nga ikaw nanag-iya sa Pulong sa Diyos? Sa sunod nga artikulo, atong tagdon kon sa unsang paagi ang positibong tubag ikahatag sa maong mga pangutana bisan nila kansang mga eskedyul maoy puno kaayo.

Unsay Imong Tubag?

◻ Nganong ang mga tawo andam nga magpameligro sa kinabuhi ug kagawasan aron makabasa sa Bibliya?

◻ Sa unsang paagi kita makabatog kaayohan pinaagi sa pagsubli sa mga tagana nga gihimo aron ang karaang Israel makadungog sa Pulong sa Diyos?

◻ Unsay kinahanglang atong buhaton sa atong nabasa diha sa Bibliya?

◻ Nganong ang pagbasa ug pagpamalandong sa Bibliya ilabinang hinungdanon alang sa Kristohanong mga ansiano?

[Hulagway sa panid 9]

Giingnan ni Jehova si Josue: “Kinahanglang basahon mo kini sa ubos nga tingog sa adlaw ug sa gabii”