Poka sa Mainit nga Tubig?

ANG mga seal o poka kasagarang gihulagway diha sa daghag yelo, puti nga kahawanan sa kadagatang Artiko o Antartiko. Apan nahibalo ka ba nga ang ubang mga poka mahimong mabuhi sa kasarangang klima, nga nagpabulad sa balas diha sa walay tawong mga baybayon?

Himamata ang monk seal sa Mediteranyo. May gitas-ong 3.5 metros, kini nga poka sa mainit nga tubig adunay mubo, baga nga balhibo nga puno sa itom nga mga pat-akpat-ak, nga putig tiyan ug dughan. Kining lahi nga mga kolor, nga sama sa abito sa pipila ka relihiyosong orden, maoy gikuhaan sa ngalan niini.

Daghang bersikulo sa Bibliya ang naghisgot sa panit nga gitawag taʹchash (sa Hebreohanon), nga gitabon sa tabernakulo ug mga gamit sa sangtuwaryo. (Exodo 25:5; 26:14; Numeros 4:8) Gisugyot sa pila ka eksperto nga ang taʹchash nagpasabot sa panit sa poka. Posible ba kaha nga panit kini sa monk seal sa Mediteranyo? Ang pagkaanaa didto niining hayopa sa katubigan sa karaang Mediteranyo nagpamatuod niining pangagpasa.

Sumala pa sa karaang sugilanon ang monk seal adunay linain nga mga gahom. Gituohan sa uban nga ang panit niini magpatipas sa mga kilat ug makasanta sa mga pag-ulan ug dagkong yelo diha sa natikad nga umahan. Nagtindog man o nagkupkop, ang mga balhibo sa panit sa poka ginaingon nga nagatimaan sa pagsugod o sa nagkaduol nga kataposan sa usa ka bagyo nga inubanag dalugdog ug kilat.

Tungod sa gituohang mga gahom niini, ang monk seal halos napuo tungod sa walay kaluoy nga mga mangangayam. Hinuon, niining bag-o pa, nakita kini diha sa dagat duol sa sidlakang-sentral sa Sardinia. Sa dihang mapasig-uli na ang pakigdait sa tawo ug sa hayop diha sa bag-ong kalibotan sa Diyos, ang monk seal sa Mediteranyo sa walay duhaduha makabaton pag-usab ug hilom ug malinawong mga baybayon, diin makapabulad kini sa adlaw nga dili mameligro sa hakog nga mga tawo.​—Isaias 11:6-9.

[Picture Credit Line sa panid 31]

Panos Dendrinos/​HSSPMS