Pagtuman sa Atong Pagpahinungod sa “Adlaw-Adlaw”

“Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka adlaw-adlaw ug mosunod kanako nga mapinadayonon.”​—LUCAS 9:23.

 1. Unsa ang usa ka paagi nga masukod nato ang atong kalamposan ingong mga Kristohanon?

“DEDIKADO ba gayod kitang mga tawo?” Ang tubag niining pangutanaha, sumala ni John F. Kennedy, ang ika-35ng Presidente sa Tinipong Bansa, usa ka elemento sa pagsukod sa kalamposan niadtong anaa sa responsableng mga posisyon sa gobyerno. Ang pangutana makasilbing usa ka pagsusi nga may lalom pang kahulogan sa atong kalamposan ingong Kristohanong mga ministro.

 2. Sa unsang paagi ang usa ka diksiyonaryo naghubit sa pulong “pagpahinungod”?

² Apan, unsa ba ang dedikasyon o pahinungod? Ang Webster’s Ninth New Collegiate Dictionary naghubit niini ingong “usa ka buhat o rituwal sa pagpahinungod ngadto sa usang balaan o alang sa usa ka sagradong paggamit,” “usa ka paghalad o paggahin alang sa usa ka linaing katuyoan,” “nagasakripisyo-sa-kaugalingong debosyon.” Si John F. Kennedy morag naggamit sa pulong sa kahulogan nga “nagasakripisyo-sa-kaugalingon nga debosyon.” Alang sa usa ka Kristohanon, ang pagpahinungod dako pa kaayog kahulogan.

 3. Unsa ang Kristohanong pagpahinungod?

³ Giingnan ni Jesu-Kristo ang iyang mga tinun-an: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka ug sa mapinadayonon mosunod kanako.” (Mateo 16:24) Ang pagkagahin alang sa balaang paggamit wala lamang maglangkit sa paghimog usa ka buhat sa pagsimba sa ma-Dominggo o sa dihang magaduaw sa usa ka dapit sa pagsimba. Naglangkit kini sa tibuok nga estilo-sa-kinabuhi sa usa. Ang pagkahimong Kristohanon nagkahulogan nga pagdumili sa kaugalingon o paghikaw sa kaugalingon samtang nagaalagad sa Diyos nga gialagaran ni Jesu-Kristo, si Jehova. Dugang pa, ang usa ka Kristohanon magaalsa sa iyang “sakitanang estaka” pinaagi sa pag-antos sa bisan unsang alantoson nga tingali hiagoman tungod sa pagkasumusunod ni Kristo.

Ang Hingpit nga Panig-ingnan

 4. Unsay gisimbolohan sa bawtismo ni Jesus?

⁴ Samtang dinhi sa yuta, gipasundayag ni Jesus kon unsay nalangkit sa pagpahinungod sa kaugalingon kang Jehova. Ang iyang mga pagbati mao: “Halad ug pahinungod wala nimo tinguhaa, apan ikaw nag-andam ug lawas alang kanako.” Unya midugang siya: “Tan-awa! Ako mianhi (sa linukot nga basahon kini nahisulat bahin kanako) aron buhaton ang imong kabubut-on, O Diyos.” (Hebreohanon 10:5-7) Ingong membro sa usa ka napahinungod nga nasod, siya napahinungod na kang Jehova panahon sa pagkatawo. Bisan pa niana, sa pagsugod sa iyang yutan-ong ministeryo, gitanyag niya ang iyang kaugalingon alang sa bawtismo ingong simbolo sa pagtanyag sa iyang kaugalingon aron buhaton ang kabubut-on ni Jehova, nga alang kaniya maglakip sa paghalad sa iyang kinabuhi ingong usa ka halad lukat. Sa ingon gihatag niya ang usa ka panig-ingnan alang sa mga Kristohanon sa pagbuhat sa bisan unsa nga maoy pagbuot ni Jehova.

 5. Giunsa pagpasundayag ni Jesus ang usa ka sulundang panglantaw sa materyal nga mga butang?

⁵ Human sa iyang bawtismo gisubay ni Jesus ang usa ka dalan sa kinabuhi nga sa kataposan misangpot sa haladnong kamatayon. Dili siya interesado nga mangitag bahandi o haruhay nga kinabuhi. Hinunoa, ang ministeryo mao ang labing hinungdanong bahin sa iyang kinabuhi. Gitambagan niya ang iyang mga tinun-an nga “padayong pangitaa nga una ang gingharian ug ang iyang pagkamatarong,” ug siya mismo nagtuman niining mga pulonga. (Mateo 6:33) Aw, kas-a siya miingon gani: “Ang mga zora may mga lungib ug ang mga langgam sa langit may mga batoganan, apan ang Anak sa tawo walay dapit nga kapahilunaan sa iyang ulo.” (Mateo 8:20) Iya untang ikapahiuyon ang iyang mga pagtulon-an aron makapangilad ug kuwarta gikan sa iyang mga sumusunod. Tungod kay usa ka panday siya makakuha untag panahon gikan sa iyang ministeryo aron makagamag usa ka nindot nga muwebles nga mabaligya aron siya makasapig pila ka pirasong ekstrang salapi. Apan wala niya gamita ang iyang mga kahanas aron mangitag materyal nga katigayonan. Ingong napahinungod nga mga alagad sa Diyos, ginasundog ba nato si Jesus sa pagbaton ug hustong panglantaw sa materyal nga mga butang?​—Mateo 6:24-34.

 6. Sa unsang paagi masundog nato si Jesus sa pagkahimong nagasakripisyo-sa-kaugalingon, napahinungod nga mga alagad sa Diyos?

⁶ Sa pagbutang pag-una sa iyang pag-alagad sa Diyos, si Jesus wala mangita sa iyang kaugalingong intereses. Ang iyang kinabuhi sulod sa tulo ka tuig ug tunga sa iyang publikong ministeryo maoy kinabuhing nagsakripisyo sa kaugalingon. Sa usa ka higayon human sa usa ka puliking adlaw, nga wala gani mogahin ug panahon aron makakaon, si Jesus andam nga motudlo sa katawhan nga ‘pinanitan ug natibulaag samag mga karnero nga walay magbalantay.’ (Mateo 9:36; Marcos 6:31-34) Bisan pag “gikapoy gikan sa panaw,” siya miuna sa pagpakigsulti sa usa ka babayeng Samarianhon nga mianha sa tuboran ni Jacob sa Sikar. (Juan 4:6, 7, 13-15) Kanunay niyang gibutang ang kaayohan sa uban nga una kay sa iyaha. (Juan 11:5-15) Makasundog kita kang Jesus pinaagi sa mahinatagong pagsakripisyo sa atong kaugalingong intereses aron sa pag-alagad sa Diyos ug sa uban. (Juan 6:38) Pinaagi sa paghunahuna nga nahiuyon sa kon sa unsang paagi kita tinuod makapahimuot sa Diyos inay sa pagbuhat lamang sa kinagamyan nga giobligar, kita magatuman sa atong pahinungod.

 7. Sa unsang paagi masundog nato si Jesus sa paghatag kanunay ug pasidungog kang Jehova?

⁷ Si Jesus wala gayod magtinguha sa pagdani ug pagtagad sa iyang kaugalingon pinaagi sa pagtabang sa mga tawo. Siya napahinungod sa Diyos sa pagbuhat sa Iyang kabubut-on. Busa kanunay niyang gitino nga si Jehova, ang iyang Amahan, ang nagdawat sa tanang himaya alang sa bisan unsa nga nahimo. Sa dihang ang usa ka magmamando nagtawag kaniyang “Maayong Magtutudlo,” nga migamit sa pulong “maayo” ingong usa ka titulo, gitul-id siya ni Jesus pinaagi sa pag-ingon: “Walay usa ang maayo, gawas sa usa, ang Diyos.” (Lucas 18:18, 19; Juan 5:19, 30) Kita ba, sama kang Jesus, daling magtumong sa dungog ngadto sa Diyos nga halayo sa atong kaugalingon?

 8. (a) Ingong usa ka napahinungod nga tawo, sa unsang paagi gibulag ni Jesus ang iyang kaugalingon gikan sa kalibotan? (b) Sa unsang paagi angay nato siyang sundogon?

⁸ Sa tibuok niyang napahinungod nga dalan sa kinabuhi sa yuta, gipasundayag ni Jesus nga iyang gigahin ang iyang kaugalingon alang sa balaang pag-alagad. Gitipigan niya ang iyang kaugalingon nga mahinlo aron siya makatanyag sa iyang kaugalingon ingong “usa ka walay-lama ug walay-buling nga kordero” aron mahimong ang halad lukat. (1 Pedro 1:19; Hebreohanon 7:26) Gisunod niya ang tanang tulomanon sa Moisesnong Kasugoan, sa ingon nagtuman nianang maong Kasugoan. (Mateo 5:17; 2 Corinto 1:20) Iyang gituman ang iyang kaugalingong pagtulon-an bahin sa maayong kagawian. (Mateo 5:27, 28) Walay mausa ang tukmang makaakusar kaniya ug daotang mga motibo. Sa pagkatinuod, iyang “gidumtan ang pagkamalapason.” (Hebreohanon 1:9) Ingong mga ulipon sa Diyos, atong sundogon si Jesus sa paghupot sa atong mga kinabuhi ug bisan sa atong mga motibo nga mahinlo sa mga mata ni Jehova.

Pasidaang mga Panig-ingnan

 9. Unsang pasidaang panig-ingnan ang gitumong ni Pedro, ug nganong angay natong palandongon ang maong panig-ingnan?

⁹ Kasukwahi sa panig-ingnan ni Jesus, anaa kanato ang pasidaang panig-ingnan sa mga Israelinhon. Bisan human nila ipahayag nga ilang buhaton ang tanan nga giingon kanila ni Jehova nga buhaton, napakyas sila sa pagbuhat sa iyang kabubut-on. (Daniel 9:11) Gidasig ni apostol Pablo ang mga Kristohanon nga makakat-on gikan sa nahitabo sa mga Israelinhon. Susihon nato ang pipila ka hitabo nga gihisgotan ni Pablo diha sa iyang unang sulat ngadto sa mga taga-Corinto ug tan-awon kon unsang mga lit-ag ang kinahanglang likayan sa napahinungod nga mga alagad sa Diyos sa atong panahon.​—1 Corinto 10:1-6, 11.

10. (a) Sa unsang paagi ang mga Israelinhon ‘nagtinguha sa makadaot nga mga butang’? (b) Nganong ang mga Israelinhon labaw nga may tulubagon sa ikaduhang higayon nga sila mibagotbot bahin sa pagkaon, ug unsay atong makat-onan gikan niining pasidaang panig-ingnan?

¹⁰ Una, si Pablo nagpasidaan kanato nga dili mahimong “matinguhaon ug makadaot nga mga butang.” (1 Corinto 10:6) Kana tingali magpahinumdom kanimo sa higayon nga ang mga Israelinhon mibagotbot bahin sa pagbaton lamang ug mana aron kan-on. Si Jehova nagpadala kanila ug bontog. Ang susamang butang nahitabo mga usa ka tuig nga miagi sa kamingawan sa Sin, sa dayon nang ipahayag sa mga Israelinhon ang ilang pagpahinungod kang Jehova. (Exodo 16:1-3, 12, 13) Apan ang situwasyon dili kaayo sama. Sa gitagana ni Jehova ang bontog sa unang panahon, siya wala magsudya sa mga Israelinhon tungod sa ilang pagbagotbot. Apan, niadtong tungora ang kahimtang maoy lahi. “Ang karne gikagat pa nila, sa wala pa kini mausap, sa dihang ang kasuko ni Jehova misilaob batok sa katawhan, ug si Jehova misugod sa paghapak sa katawhan pinaagi sa dako kaayong pagpatay.” (Numeros 11:4-6, 31-34) Unsay nabag-o? Ingong usa ka napahinungod nga katawhan, sila niadtong tungora giisip nga may tulobagon tungod sa ilang mga lihok. Ang ilang kakulang ug apresasyon sa mga tagana ni Jehova miagak kanila sa pagbagotbot batok kang Jehova, bisan pag misaad sila sa pagbuhat sa tanan nga giingon ni Jehova! Ang pagbagotbot bahin sa lamesa ni Jehova karong adlawa maoy susama. Ang pipila mapakyas sa pagpabili sa espirituwal nga mga tagana ni Jehova pinaagi sa “matinumanon ug maalamong ulipon.” (Mateo 24:45-47) Hinuon, hinumdomi nga ang atong pagpahinungod nag-obligar nga sa pagkamapabilhon atong hinumdoman kon unsay nahimo ni Jehova alang kanato ug dawaton ang espirituwal nga pagkaon nga ginatagana ni Jehova.

11. (a) Sa unsang paagi gihugawan sa mga Israelinhon ang ilang pagsimba kang Jehova pinaagi sa pagsimbag idolo? (b) Sa unsang paagi maapektahan kita sa usa ka matang sa pagsimbag idolo?

¹¹ Sunod, si Pablo nagpasidaan: “Ni mahimong mga tigsimbag idolo, ingon sa gihimo sa pipila kanila.” (1 Corinto 10:7) Dinhi ang apostol lagmit nagtumong sa pagsimba sa baka nga nahitabo human dayon sa paghimo sa mga Israelinhon sa pakigtugon uban kang Jehova sa Bukid sa Sinai. Tingali moingon ka, ‘Ingong usa ka napahinungod nga alagad ni Jehova, ako dili gayod malangkit sa pagsimbag idolo.’ Apan, matikdi nga gikan sa panglantaw sa mga Israelinhon, sila wala mohunong sa pagsimba kang Jehova; bisan pa, ilang gipasulod ang usa ka tulomanon sa pagsimba sa baka​—butang nga dulumtanan sa Diyos. Unsay nalangkit sa maong matang sa pagsimba? Ang mga tawo mihimog mga halad atubangan sa baka, ug unya sila “milingkod aron mokaon ug moinom. Unya sila mitindog aron maglipaylipay.” (Exodo 32:4-6) Karong adlawa, ang pipila tingali moingon nga sila nagsimba kang Jehova. Apan ang ilang mga kinabuhi tingali nasentro, dili sa pagsimba kang Jehova, kondili sa pagkalipay sa mga butang niining kalibotana, ug ilang ginasulayan nga ipahaom ang ilang pag-alagad kang Jehova niini. Tinuod, dili kini hingapin sama sa pagyukbo ngadto sa usa ka bulawang baka, apan sa prinsipyo kini dili kaayo lahi. Ang paghimo sa kaugalingong tinguha sa usa nga usa ka diyos halayo sa pagtuman sa pagpahinungod sa usa kang Jehova.​—Filipos 3:19.

12. Gikan sa kasinatian sa mga Israelinhon uban kang Baal sa Peor, unsay atong makat-onan bahin sa pagdumili sa atong kaugalingon?

¹² Ang usa ka matang sa kalingawan nalangkit usab sa sunod nga pasidaang panig-ingnan nga gihisgotan ni Pablo. “Ni kita magapakighilawas, ingon sa pipila kanilang nakighilawas, aron lamang mangapukan, kaluhaag-tulo ka libo kanila sa usa ka adlaw.” (1 Corinto 10:8) Ang mga Israelinhon, kay nahaylo sa imoral nga kalipay nga gitanyag sa mga anak babaye sa Moab, naagak ngadto sa pagsimba kang Baal sa Peor sa Shittim. (Numeros 25:1-3, 9) Ang pagdumili sa atong kaugalingon aron buhaton ang kabubut-on ni Jehova naglakip sa pagdawat sa iyang mga sukdanan kon unsay mahinlong kagawian. (Mateo 5:27-30) Niining panahon sa nag-us-os nga mga sukdanan, kita gipahinumdoman sa panginahanglan nga huptan ang atong kaugalingon nga mahinlo gikan sa tanang matang sa imoral nga kagawian, nga magpasakop sa awtoridad ni Jehova sa paghukom kon unsay maayo ug kon unsay daotan.​—1 Corinto 6:9-11.

13. Sa unsang paagi ang panig-ingnan ni Pineas motabang kanato sa pagsabot kon unsay nalakip sa pagpahinungod kang Jehova?

¹³ Bisan pag ang daghan nahulog sa lit-ag sa pakighilawas sa Shittim, ang pipila nagtuman sa nasodnong pagpahinungod kang Jehova. Niana kanila, si Pineas talagsaon sa kadasig. Sa pagkakita niya sa usa ka Israelinhong pangulo nga nagdalag usa ka Midianhong babaye sa iyang tolda, si Pineas mikuha dayon ug balaraw sa iyang kamot ug giduslak sila. Si Jehova miingon kang Moises: “Si Pineas . . . nagpatalikod sa akong kapungot gikan sa mga anak sa Israel pinaagi sa dili niya pagtugot gayod sa pakig-indig kanako sa ilang taliwala, mao nga wala nako laglaga ang mga anak sa Israel sa akong pagpugos sa linaing pagkamahinalaron.” (Numeros 25:11) Ang dili gayod pagtugot sa pakig-indig kang Jehova​—kana ang kahulogan sa pagpahinungod. Dili kita makatugot sa bisan unsa nga maoy mopuli sa dapit nga nahimutangan sa pagpahinungod kang Jehova diha sa atong mga kasingkasing. Ang atong kadasig alang kang Jehova motukmod usab kanato sa paghupot sa kongregasyon nga mahinlo pinaagi sa pagtaho sa grabeng imoralidad ngadto sa mga ansiano, dili pagtugot niana.

14. (a) Sa unsang paagi gibutang sa mga Israelinhon si Jehova sa pagsulay? (b) Sa unsang paagi ang bug-os nga pagpahinungod kang Jehova motabang kanato nga dili “molunga”?

¹⁴ Si Pablo naghisgot ug laing pasidaang panig-ingnan: “Ni ibutang nato si Jehova sa pagsulay, ingon sa pipila kanilang mibutang kaniya sa pagsulay, aron lamang malaglag pinaagi sa mga halas.” (1 Corinto 10:9) Si Pablo naghisgot dinhi bahin sa panahong ang mga Israelinhon mibagotbot batok sa Diyos ngadto kang Moises sa dihang sila “misugod sa pagkaluya tungod sa dalan.” (Numeros 21:4) Ikaw ba sukad nakahimo sa maong sayop? Sa dihang imong gipahinungod ang imong kaugalingon kang Jehova, naghunahuna ka bang duol na kaayo ang Armageddon? Ang pailob ni Jehova mas taas ba kay sa imong gidahom? Hinumdomi, kita wala magpahinungod sa atong kaugalingon kang Jehova sulod lamang sa usa ka tinong yugto sa panahon o hangtod lamang sa Armageddon. Ang atong pagpahinungod magpadayon sa walay kataposan. Busa, “dili kita moundang sa pagbuhat kon unsay maayo, kay sa takdang panahon kita moani kon dili kita molunga.”​—Galacia 6:9.

15. (a) Batok kang kinsa mibagotbot ang mga Israelinhon? (b) Sa unsang paagi ang atong pagpahinungod kang Jehova motukmod kanato sa pagtahod sa teokratikanhong awtoridad?

¹⁵ Sa kataposan, si Pablo nagpasidaan bahin sa pagkahimong “mga bagolbolan” batok sa tinudlong mga alagad ni Jehova. (1 Corinto 10:10) Ang mga Israelinhon mibagotbot nga magahion batok kang Moises ug Aaron sa dihang 10 sa 12 ka espiya nga gipadala sa pagsusi sa yuta sa Canaan nagdalag daotang mga taho. Naghisgot pa gani sila bahin sa pagpuli kang Moises ingong ilang pangulo ug pagbalik ngadto sa Ehipto. (Numeros 14:1-4) Karong adlawa, ginadawat ba nato ang pagpangulo nga gihatag kanato pinaagi sa paglihok sa balaang espiritu ni Jehova? Gikan sa pagkakita sa dagayang espirituwal nga lamesa nga gitagana sa matinumanon ug maalamong ulipon nga matang, tin-aw kon kinsa ang gigamit ni Jesus sa paghatag ug “pagkaon sa hustong panahon.” (Mateo 24:45) Ang tibuok-kalag nga pagpahinungod kang Jehova nagkinahanglan kanato nga magpakitag pagtahod alang sa iyang tinudlong mga alagad. Hinaot nga dili gayod kita mahimong sama sa pila ka modernong-adlaw nga mga bagolbolan nga nagtumong sa ilang pagtagad ngadto sa usa ka bag-ong pangulo, ingnon ta, aron giyahan sila balik sa kalibotan.

Kini ba ang Akong Labing Maarangan?

16. Unsang mga pangutana ang mahimong isukna sa ilang kaugalingon sa napahinungod nga mga alagad sa Diyos?

¹⁶ Ang mga Israelinhon dili unta mahulog nianang mabug-at nga mga kasaypanan kon sila nahinumdom pa nga ang ilang pagpahinungod kang Jehova maoy walay kondisyon. Lahi niadtong walay-pagtuo nga mga Israelinhon, si Jesu-Kristo nagtuman sa iyang pahinungod hangtod sa kataposan. Ingong mga sumusunod ni Kristo, ginasundog nato ang iyang panig-ingnan sa bug-os-kalag nga pagkamahinalaron, nga nagakinabuhi kita “dili na alang sa mga tinguha sa mga tawo, kondili alang sa kabubut-on sa Diyos.” (1 Pedro 4:2; itandi ang 2 Corinto 5:15.) Ang kabubut-on ni Jehova karong adlawa mao nga “ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:4) Sa maong katuyoan, kinahanglang atong iwali “kining maayong balita sa gingharian” sa dili pa moabot ang kataposan. (Mateo 24:14) Unsa ka dako ang paningkamot nga atong ginabutang sa maong pag-alagad? Tingali buot natong suknaon ang atong kaugalingon, ‘Kini ba ang akong labing maarangan?’ (2 Timoteo 2:15) Magkalain ang mga kahimtang. Si Jehova mahimuot nga alagaron “sumala sa kon unsay nabatonan sa usa, dili sumala sa kon unsay wala kaniya.” (2 Corinto 8:12; Lucas 21:1-4) Walay mausa ang angay maghukom sa giladmon ug katim-os sa pagpahinungod sa lain. Ang matag usa angay nga magtulotimbang sa kaugalingon sa gidak-on sa iyang kaugalingong pagkamahinalaron kang Jehova. (Galacia 6:4) Ang atong gugma kang Jehova angay magtukmod kanato sa pagsukna, ‘Sa unsang paagi makalipay ako kang Jehova?’

17. Unsa ang relasyon tali sa pagkamahinalaron ug pagpabili? Iilustrar.

¹⁷ Ang giladmon sa atong pagkamahinalaron kang Jehova molalom samtang motubo ang atong pagpabili kaniya. Usa ka 14-anyos nga batang lalaki sa Hapon ang nagpahinungod sa iyang kaugalingon kang Jehova ug nagpasimbolo sa maong pahinungod pinaagi sa bawtismo sa tubig. Sa ulahi, buot niyang mopadayon sa pagtungha sa kolehiyo ug mahimong siyentipiko. Wala gayod siya maghunahuna sa bug-os-panahong ministeryo, apan ingong usa ka napahinungod nga alagad, dili niya buot mobiya kang Jehova ug sa iyang makitang organisasyon. Aron makab-ot ang iyang tumong sa karera, siya mitungha sa usa ka unibersidad. Didto iyang nakita ang mga graduwado sa unibersidad nga gipugos sa paghalad sa tibuok nilang kinabuhi ngadto sa ilang mga kompaniya o sa ilang mga pagtuon. Siya naghunahuna, ‘Unsa bay akong ginabuhat dinhi? Makapadayon ba gayod ako sa ilang dalan sa kinabuhi ug ihalad ang akong kaugalingon ngadto sa sekular nga trabaho? Dili ba ako nahalad na ngadto kang Jehova?’ Uban ang nabag-o nga pagpabili, siya nahimong regular payunir. Ang iyang pagsabot sa iyang pagpahinungod milalom ug mitukmod kaniya sa paghukom diha sa iyang kasingkasing nga moadto sa bisan asa nga siya gikinahanglan. Siya miatender sa Tunghaan sa Ministeryal nga Pagbansay ug nakadawat ug asaynment sa pag-alagad ingong misyonaryo sa laing nasod.

18. (a) Unsa ka dako ang nalangkit sa atong pagpahinungod kang Jehova? (b) Unsang ganti ang atong maani gikan sa atong pagpahinungod kang Jehova?

¹⁸ Ang atong tibuok kinabuhi nalangkit sa pagpahinungod. Kinahanglang dumilian nato ang atong kaugalingon ug sa “adlaw-adlaw” sundon ang maayong panig-ingnan ni Jesus. (Lucas 9:23) Kay nakadumili na sa atong kaugalingon, dili kita mangayo ni Jehova ug bakasyon. Ang atong mga kinabuhi nahiuyon sa mga prinsipyong gitino ni Jehova alang sa iyang mga alagad. Bisan sa mga kalihokan diin kita makahimog kaugalingong pagpili, mapuslanon nga atong susihon kon kita nagabuhat ba sa atong labing maarangan sa pagkinabuhi sa kinabuhing napahinungod kang Jehova. Samtang nag-alagad kita kaniya sa adlaw-adlaw, nga nagabuhat sa atong labing maarangan sa pagpahimuot kaniya, molampos kita ingong mga Kristohanon ug mabulahan sa pahiyom sa pag-uyon gikan ni Jehova, ang Usa nga takos sa atong tibuok-kalag nga pagkamahinalaron.

Makapatin-aw Ka Ba?

◻ Alang kang Jesu-Kristo unsay nalangkit sa pagpahinungod?

◻ Nganong angay nga molikay kita sa pagbagotbot batok kang Jehova?

◻ Sa unsang paagi makalikay kita sa pagtugot nga ang pagsimbag idolo sa malalangon moyuhot sa atong mga kinabuhi?

◻ Ang paghinumdom sa unsa ang motabang kanato nga dili “molunga” sa pagbuhat sa kabubut-on sa Diyos?

[Hulagway sa panid 17]

Ang napahinungod nga mga Kristohanon “dili mohunong sa pagbuhat kon unsay maayo”