Ilang “Gibuhat ang Ingon Gayod”

“Ang paghigugma sa Diyos nagakahulogan niini, nga atong sundon ang iyang mga sugo.”​—1 JUAN 5:3.

 1. Unsay ikaingon bahin sa sukod sa gugma sa Diyos?

“ANG DIYOS GUGMA.” Ang tanan nga nakaila sa Diyos ug nagatuman sa iyang mga sugo makabaton ug lalom nga pagpabili sa giladmon niana nga gugma. “Ang gugma maoy niining bahina, dili nga kita nahigugma sa Diyos, kondili nga siya nahigugma kanato ug gipadala ang iyang Anak ingong usa ka pangpasig-uli nga halad alang sa atong mga sala.” Samtang ginapasundayag nato ang pagtuo sa bililhong halad lukat ni Jesus, kita ‘nagapabilin diha sa gugma sa Diyos.’ (1 Juan 4:8-10, 16) Busa mahimong matagamtam nato ang bahandi sa espirituwal nga mga panalangin karon ug sa sistema sa mga butang sa umaabot, kinabuhing dayon.​—Juan 17:3; 1 Juan 2:15, 17.

 2. Sa unsang paagi ang pagbantay sa mga sugo sa Diyos nakahatag kaayohan sa iyang mga alagad?

² Daghan kaayo ang mga panig-ingnan sa rekord sa Bibliya bahin niadtong nagbantay sa mga sugo sa Diyos ug sa ingon tugob nga gipanalanginan. Lakip niini ang mga saksi sa wala pa ang Kristohanong panahon, nga mahitungod sa pipila kanila si apostol Pablo misulat: “Diha sa pagtuo ang tanan kanila namatay, bisan tuod sila wala makabaton sa katumanan sa mga saad, apan ilang nakita kini sa halayo ug nanaghangop niini ug mipahayag sa dayag nga sila mga estranyo ug temporaryong mga pumoluyo sa yuta.” (Hebreohanon 11:13) Sa ulahi, ang debotadong Kristohanong mga alagad sa Diyos nakabaton ug kaayohan gikan sa ‘dili-takos nga kalulot ug sa kamatuoran [nga] miabot pinaagi kang Jesu-Kristo.’ (Juan 1:17) Sa tibuok nga 6,000 ka tuig sa kasaysayan sa tawo, gigantihan ni Jehova ang matinumanong mga saksi nga nagtuman sa iyang mga sugo, nga sa pagkatinuod “dili mabug-at.”​—1 Juan 5:2, 3.

Sa mga Adlaw ni Noe

 3. Sa unsang paagi si Noe mihimo “sa ingon gayod”?

³ Ang rekord sa Bibliya nag-ingon: “Tungod sa pagtuo si Noe, human hatagi ug pasidaang iya-sa-Diyos labot sa mga butang nga wala pa makita, mipakitag diyosnong kahadlok ug nagtukod ug arka alang sa pagluwas sa iyang panimalay; ug pinaagi niini nga pagtuo iyang gihusgahan ang kalibotan, ug siya nahimong manununod sa pagkamatarong nga maoy sumala sa pagtuo.” Ingong “usa ka magwawali sa pagkamatarong,” bug-os nga gisunod ni Noe ang Diyos, nga nagpasidaan sa mapintas wala-pay-Lunop nga kalibotan bahin sa umaabot nga paghukom sa Diyos. (Hebreohanon 11:7; 2 Pedro 2:5) Sa pagtukod sa arka, mainampingong gisunod niya ang gitagana sa Diyos nga plano. Dayon iyang gipasulod ang giingong mga mananap ug mga abiyo sa pagkaon. “Si Noe mipadayon sa pagbuhat sa tanan nga gisugo sa Diyos kaniya. Iyang gibuhat ang ingon gayod.”​—Genesis 6:22.

4, 5. (a) Sa unsang paagi ang daotang impluwensiya nakaapektar sa katawhan hangtod niining adlawa? (b) Nganong kita angay magbuhat “sa ingon gayod” agig pagsunod sa mga instruksiyon sa Diyos?

⁴ Gipakigbisogan ni Noe ug sa iyang pamilya ang daotang impluwensiya sa masinupakong mga manulonda. Kining mga anak sa Diyos nagsul-ob ug tawhanong lawas ug nakigsekso sa mga babaye, nga nakapatunghag labaw-tawhanon nga mestisong mga anak nga nagharihari sa katawhan. “Ang yuta nadunot sa panan-aw sa matuod nga Diyos ug ang yuta napuno sa kabangisan.” Gipadala ni Jehova ang Lunop aron sa pagpapha niadtong daotan nga kaliwatan. (Genesis 6:4, 11-17; 7:1) Sukad sa mga adlaw ni Noe ang demonyohanong mga manulonda wala na tugoting magsul-ob pa ug tawhanong lawas. Bisan pa niana, ‘ang tibuok kalibotan nahimutang diha sa gahom sa tuman-kadaotang usa,’ si Satanas nga Yawa. (1 Juan 5:19; Pinadayag 12:9) Sa matagnaon, gitandi ni Jesus kadtong rebelyosong kaliwatan sa mga adlaw ni Noe sa kaliwatan sa katawhan nga misalikway kaniya sukad nga ang ilhanan sa iyang “presensiya” misugod pagtungha sa 1914.​—Mateo 24:3, 34, 37-39; Lucas 17:26, 27.

⁵ Karon, sama sa mga adlaw ni Noe, si Satanas naningkamot sa pagdala sa katawhan ug sa atong planeta ngadto sa kalaglagan. (Pinadayag 11:15-18) Busa dinalian nga atong patalinghogan ang dinasig nga tambag: “Isul-ob ang kompletong armadora gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.” (Efeso 6:11, potnot) Niini, kita mapalig-on pinaagi sa pagtuon sa Pulong sa Diyos ug sa pagpadapat niini diha sa atong mga kinabuhi. Dugang pa, kita adunay matinagdanong organisasyon ni Jehova, uban sa dinihogan niini nga “kasaligan ug mabuot nga ulipon” ug sa mahigugmaong mga ansiano niini, sa pagbantay kanato nga mapailobon sa dalan nga angay natong pagalaktan. Kita adunay tibuok-kalibotan nga buluhatong pagsangyaw nga pagahimoon. (Mateo 24:14, 45-47) Sama kang Noe, kinsa mainampingon gayod nga mituman sa mga sugo sa Diyos, hinaot nga kita kanunayng mobuhat “sa ingon gayod.”

Si Moises​—Ang Labing Mapainubsanon sa mga Tawo

6, 7. (a) Unsang magantihong pagpili ang gihimo ni Moises? (b) Unsang maisogong sumbanan ang gibilin ni Moises alang kanato?

⁶ Palandonga ang laing tawo sa pagtuo​—si Moises. Mahimo niyang matagamtam ang mapatuyangong kinabuhi taliwala sa mga kaluho sa Ehipto. Apan siya mipili nga “maltrataron uban sa katawhan sa Diyos inay nga mabatonan ang temporaryong kalipayan sa sala.” Ingong sinugo nga alagad ni Jehova, “siya nagtutok man ngadto sa bayad sa ganti [ug] nagpabilin mang lig-on nga daw sa nakita ang Usa kinsa dili-makita.”​—Hebreohanon 11:23-28.

⁷ Diha sa Numeros 12:3, atong mabasa: “Ang tawo nga si Moises mao ang labing mapainubsanon sa tanang tawo nga anaa sa ibabaw sa yuta.” Sa kasukwahi, ang Paraon sa Ehipto milihok nga samag labing mapahitas-on sa tanang tawo. Sa dihang gisugo ni Jehova si Moises ug Aaron aron ipahayag ang iyang paghukom kang Paraon, unsay ilang pagsanong? Kita gisultihan: “Gibuhat ni Moises ug Aaron ang gisugo ni Jehova kanila. Ilang gibuhat ang ingon gayod.” (Exodo 7:4-7) Pagkamaisogon nga sumbanan alang kanato nga nagamantala sa mga paghukom sa Diyos karon!

 8. Sa unsang paagi ang mga Israelinhon obligado sa pagbuhat “sa ingon gayod,” ug sa unsang paagi ang kalipay nga misangpot ikatandi sa haduol nga umaabot?

⁸ Maunongon bang nagpaluyo ang mga Israelinhon kang Moises? Human nga gipahamtangan ni Jehova ang Ehipto ug siyam sa napulo ka hampak, iyang gihatagan ang Israel ug detalyadong mga instruksiyon kon unsaon sa pagsaulog sa Paskuwa. “Unya ang katawhan nangduko ug nanghapa. Unya ang mga anak sa Israel nanglakaw ug nanagbuhat sa ingon sumala sa gisugo ni Jehova kang Moises ug Aaron. Ilang gibuhat ang ingon gayod.” (Exodo 12:27, 28) Sa tungang gabii niadtong halandomong adlaw, sa Nisan 14, 1513 W.K.P., gipamatay sa manulonda sa Diyos ang tanang kinamagulangang anak sa Ehipto apan gisayloan ang Israelinhong mga panimalay. Nganong wala man patya ang kinamagulangan sa Israel? Tungod kay nakakita silag panalipod ilalom sa dugo sa kordero sa Paskuwa, nga giwisik diha sa ilang mga pultahan. Ilang gibuhat ang gisugo ni Jehova kang Moises ug Aaron. Oo, “ilang gibuhat ang ingon gayod.” (Exodo 12:50, 51) Diha sa Pulang Dagat, si Jehova mihimo ug dugang milagro sa pagluwas sa iyang masinundanong katawhan samtang naglaglag kang Paraon ug sa iyang gamhanang mga makina sa militar. Pagkadako sa kalipay sa mga Israelinhon! Maingon man usab karon, daghan niadtong kinsa nagtuman sa mga sugo ni Jehova malipay nga mahimong mga saksing magpakakita sa iyang bindikasyon diha sa Armageddon.​—Exodo 15:1, 2; Pinadayag 15:3, 4.

 9. Unsang modernong-adlawng mga pribilehiyo ang gilandongan sa pagbuhat sa mga Israelinhon “sa ingon gayod” may kalabotan sa tabernakulo?

⁹ Sa dihang gisugo ni Jehova ang Israel sa paghimog kontribusyon ug sa pagtukod ug tabernakulo diha sa kamingawan, ang mga tawo dagayang mihatag sa ilang bug-os nga pagpaluyo. Unya, bisan sa kinagamyang detalye, gisunod ni Moises ug sa iyang andam nga kaubang mga magbubuhat ang arkitektural nga mga plano nga gihatag ni Jehova. “Sa ingon niana nahuman ang buluhaton sa tabernakulo sa balongbalong nga pagatigoman, sa pagkaagi nga ang mga anak sa Israel nanagbuhat ingon sa tanan nga gisugo ni Jehova kang Moises. Ilang gibuhat ang ingon gayod.” Sa susama, diha sa inagurasyon sa pagkasaserdote, “gibuhat ni Moises ang tanan nga gisugo ni Jehova kaniya. Iyang gibuhat ang ingon gayod.” (Exodo 39:32; 40:16) Sa modernong mga panahon, kita adunay higayon sa paghatag ug bug-os kasingkasing nga pagpaluyo sa buluhatong pagsangyaw ug sa mga programa sa pagpadako sa Gingharian. Busa pribilehiyo nato nga mahiusa sa pagbuhat “sa ingon gayod.”

Si Josue​—Maisogon ug Malig-on Kaayo

10, 11. (a) Unsay nagsangkap kang Josue alang sa kadaogan? (b) Sa unsang paagi kita mapalig-on sa pagbuntog sa modernong-adlawng mga pagsulay?

¹⁰ Sa dihang gisugo ni Moises si Josue sa pagpanguna sa Israel ngadto sa yutang saad, lagmit ang dinasig nga Pulong ni Jehova nga mabatonan mao lamang ang lima ka basahon ni Moises, usa o duha ka salmo, ug ang basahon ni Job. Gisugo ni Moises si Josue sa pagtipon sa katawhan sa dihang makaabot na sila sa Yutang Saad ug sa “pagbasa niini nga kasugoan atubangan sa tibuok Israel sa ilang igdulongog.” (Deuteronomio 31:10-12) Dugang pa, gisugo mismo ni Jehova si Josue: “Kining basahon sa kasugoan ayaw pag-ibulag sa imong baba, ug basahon mo kana sa hinay nga tingog sa adlaw ug sa gabii, aron magmatngon ka sa pagbuhat sa tanan nga gisulat diha niini; kay sa ingon niana magmauswagon ka sa imong panaw ug unya molihok ka nga maalamon.”​—Josue 1:8.

¹¹ Ang adlaw-adlaw nga pagbasa sa “basahon” ni Jehova nagsangkap kang Josue sa pagdumala sa mga pagsulay sa unahan, sama nga ang pagbasa adlaw-adlaw sa Pulong ni Jehova, ang Bibliya, nagapalig-on sa Iyang modernong-adlawng mga Saksi sa pagsagubang sa mga pagsulay niining malisod nga “kataposang mga adlaw.” (2 Timoteo 3:1) Sanglit nalibotan kita sa usa ka mapintas nga kalibotan, kinasingkasing usab natong patalinghogan ang tambag sa Diyos kang Josue: “Magmaisogon ug magmalig-on. Ayaw kakurat o kalisang, kay si Jehova nga imong Diyos magauban kanimo bisan asa ikaw moadto.” (Josue 1:9) Human gibuntog ang Canaan, ang mga tribo sa Israel tugob nga gigantihan sa dihang nanimuyo diha sa ilang panulondon. “Ingon sa gisugo ni Jehova kang Moises, mao usay gibuhat sa mga anak sa Israel.” (Josue 14:5) Ang susamang ganti naghulat sa tanan kanato karon kinsa nagabasa sa Pulong sa Diyos ug nagapadapat niini diha sa atong mga kinabuhi, nga masinundanong nagabuhat “sa ingon gayod.”

Mga Hari​—Matinumanon ug Masinupakon

12. (a) Unsang sugo ang gihatag ngadto sa mga hari sa Israel? (b) Unsay misangpot sa kapakyasan sa mga hari sa pagtuman?

¹² Komosta ang mga hari sa Israel? Gihatagan ni Jehova ang hari niini nga kinahanglanon nga pagatumanon: “Sa dihang molingkod siya sa trono sa iyang gingharian, siya kinahanglang magsulat ug basahon alang kaniya sa usa ka hulad niini nga kasugoan nga gikaptan sa mga saserdote, ang mga Levihanon. Ug kini magauban kaniya, ug kinahanglang basahon niya kini sa tanan nga adlaw sa iyang kinabuhi, aron mahibalo siya sa pagkahadlok kang Jehova nga iyang Diyos aron magbantay sa tanang mga pulong niini nga kasugoan ug niini nga kabalaoran pinaagi sa pagtuman niini.” (Deuteronomio 17:18, 19) Gituman ba sa mga hari sa Israel kanang sugoa? Sa dakong bahin, sila napakyas uyamot, mao nga ilang giantos ang mga tunglo nga gitagna diha sa Deuteronomio 28:15-68. Sa kataposan, ang Israel nagkatibulaag “gikan sa usa ka tumoy sa yuta ngadto sa pikas tumoy sa yuta.”

13. Sa unsang paagi kita makabaton ug kaayohan, sama kang David, pinaagi sa pagpakitag gugma alang sa Pulong ni Jehova?

¹³ Apan, si David​—ang unang matinumanong tawhanong hari sa Israel​—nagpakitag talagsaong debosyon kang Jehova. Siya napamatud-ang ang ‘itoy nga liyon sa Juda,’ nga naglandong kang Kristo Jesus, ang magdadaog nga ‘liyon sa tribo ni Juda, ang gamot ni David.’ (Genesis 49:8, 9; Pinadayag 5:5) Diin gikan ang kusog ni David? Siya may lalom kaayong apresasyon sa sinulat nga Pulong ni Jehova ug nagkinabuhi sumala niana. Diha sa Salmo 19, “usa ka alawiton ni David,” atong mabasa: “Ang kasugoan ni Jehova hingpit.” Human sa paghisgot sa pahinumdom, mga mando, kasugoan, ug hudisyal nga mga paghukom ni Jehova, si David mipadayon sa pag-ingon: “Kini labi pang tilinguhaon kay sa bulawan, oo, labi pa kay sa daghang lunsayng bulawan; ug mas tam-is pa kay sa dugos ug sa tinulo sa dugos sa udlan. Lain pa, ang imong kaugalingong alagad napasidan-an pinaagi niini; sa pagbantay niini adunay dakong ganti.” (Salmo 19:7-11) Kon ang adlaw-adlawng pagbasa sa Pulong ni Jehova ug ang pagpalandong niana magantihon sa 3,000 ka tuig kanhi, mas labi na karon!​—Salmo 1:1-3; 13:6; 119:72, 97, 111.

14. Sa unsang paagi ang dalan ni Solomon nagpakita sa panginahanglag labaw pa kay sa kahibalo lamang?

¹⁴ Sa gihapon, dili igo ang pagkabaton lamang ug kahibalo. Hinungdanon usab alang sa mga alagad sa Diyos nga molihok niana nga kahibalo, ipadapat kini sumala sa diyosnong kabubut-on​—oo, mobuhat “sa ingon gayod.” Kini mahimong ikailustrar sa kaso sa anak ni David nga si Solomon, kinsa maoy gipili ni Jehova “sa paglingkod sa trono sa pagkahari ni Jehova ibabaw sa Israel.” Nadawat ni Solomon ang buluhaton sa pagtukod sa templo, nga gigamit ang arkitektural nga mga plano nga nadawat ni David “pinaagi sa pagdasig.” (1 Cronicas 28:5, 11-13) Sa unsang paagi mahuman ni Solomon kining dako kaayo nga buluhaton? Agig tubag sa usa ka pag-ampo, gihatagan siya ni Jehova ug kaalam ug kahibalo. Pinaagi niini, ug pinaagi sa pagsunod sa diyosnong pagkataganang mga plano, nakahimo si Solomon sa pagtukod niadtong maanindot kaayong balay, nga napuno sa himaya ni Jehova. (2 Cronicas 7:2, 3) Sa ulahi, hinunoa, si Solomon napakyas. Sa unsang bahina? Ang kasugoan ni Jehova nag-ingon bahin sa hari sa Israel: “Kinahanglang dili siya usab magpadaghan sa iyang mga asawa, aron ang iyang kasingkasing dili mahisalaag.” (Deuteronomio 17:17) Bisan pa niana si Solomon “nakabaton ug pito ka gatos ka asawa, mga prinsesa, ug tulo ka gatos ka puyopuyo; ug ang iyang mga asawa anam-anam . . . nagpaliso sa iyang kasingkasing sa pagnunot sa laing mga diyos.” Sa iyang ulahi nga mga tuig, si Solomon miliso gikan sa pagbuhat “sa ingon gayod.”​—1 Hari 11:3, 4; Nehemias 13:26.

15. Sa unsang paagi si Josue mibuhat “sa ingon gayod”?

¹⁵ Dihay pipila ka masinugtanong mga hari sa Juda, ang kataposan kanila mao si Josias. Sa tuig 648 W.K.P., siya misugod sa paghinlo sa idolatriya gikan sa yuta ug sa pag-ayo sa templo ni Jehova. Didto nakita sa hataas nga saserdote “ang libro sa kasugoan ni Jehova nga gihatag pinaagi sa kamot ni Moises.” Unsay gihimo ni Josias niini? “Ang hari karon miadto sa balay ni Jehova uban sa tanang kalalakin-an sa Juda ug sa mga pumoluyo sa Jerusalem ug mga saserdote ug mga Levihanon ug tanang katawhan, ang dagko ug gagmay; ug iyang gisugdan pagbasa sa ilang mga igdulongog ang tanang pulong sa basahon sa pakigtugon, nga nakaplagan sa balay ni Jehova. Ug ang hari nagpabiling nagtindog sa iyang dapit ug naghimog pakigtugon atubangan ni Jehova sa paglakat sunod kang Jehova ug sa pagbantay sa iyang mga sugo ug sa iyang mga pagpamatuod ug sa iyang kabalaoran uban sa iyang bug-os nga kasingkasing ug uban sa bug-os niyang kalag, sa pagbuhat sa mga pulong sa pakigtugon nga gisulat niining basahona.” (2 Cronicas 34:14, 30, 31) Oo, si Josias ‘mibuhat sa ingon gayod.’ Ingong resulta sa iyang matinumanong dalan, ang pagpahamtang sa paghukom ni Jehova diha sa walay pagtuo nga Juda gipalangan hangtod sa mga adlaw sa iyang badlongong mga anak.

Nagkinabuhi Sumala sa Pulong sa Diyos

16, 17. (a) Sa unsang mga bahin nga kinahanglang sundon nato ang mga tunob ni Jesus? (b) Kinsa pang ubang matinumanong mga alagad sa Diyos ang nagtaganag mga panig-ingnan alang kanato?

¹⁶ Sa tanang tawo nga nabuhi sukad, ang labing maayong panig-ingnan sa pagpalandong sa Pulong sa Diyos ug pagkinabuhi uyon niana mao ang Ginoong Jesu-Kristo. Ang Pulong sa Diyos maoy pagkaon alang kaniya. (Juan 4:34) Iyang gisultihan ang iyang mga mamiminaw: “Ang Anak dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginahimo sa Amahan. Kay unsa mang mga butanga nga ginahimo nianang maong Usa, kining mga butanga ginabuhat usab sa Anak sa samang paagi.” (Juan 5:19, 30; 7:28; 8:28, 42) Si Jesus ‘mibuhat sa ingon gayod,’ nga nag-ingon: “Ako nanaog gikan sa langit aron buhaton, dili ang akong kabubut-on, kundili ang kabubut-on niya nga nagpadala kanako.” (Juan 6:38) Kita nga dedikadong mga Saksi ni Jehova giawhag sa pagbuhat “sa ingon gayod” pinaagi sa pagsunod sa mga tunob ni Jesus.​—Lucas 9:23; 14:27; 1 Pedro 2:21.

¹⁷ Ang pagtuman sa kabubut-on sa Diyos mao kanunay ang panguna nga anaa sa hunahuna ni Jesus. Siya bug-os nahibalo sa Pulong sa Diyos ug busa nasangkapan sa paghatag ug Kasulatanhong mga tubag. (Mateo 4:1-11; 12:24-31) Pinaagi sa paghatag ug padayong pagtagad sa Pulong sa Diyos, kita usab mahimong “bug-os makasarang, kompleto nga masinangkapan alang sa tanang maayong buhat.” (2 Timoteo 3:16, 17) Sundon nato ang panig-ingnan sa matinumanong mga alagad ni Jehova sa karaang panahon ug sa nagsunod nga panahon ug labaw sa tanan nianang sa atong Agalon, si Jesu-Kristo, kinsa miingon: “Aron nga ang kalibotan mahibalo nga akong gihigugma ang Amahan, ingon gayod sa gikahatag nga sugo kanako sa Amahan nga buhaton, ingon ang akong ginabuhat.” (Juan 14:31) Hinaot nga kita usab magpakita sa atong gugma sa Diyos pinaagi sa pagpadayon sa pagbuhat “sa ingon gayod.”​—Marcos 12:29-31.

18. Unsay magpadasig kanato nga ‘mahimong mga magbubuhat sa pulong,’ ug unsa ang sunod nga pagahisgotan?

¹⁸ Samtang magpalandong kita sa masinundanong dalan sa mga alagad sa Diyos sa panahon sa Bibliya, dili ba kita madasig nga himoon ang matinumanong pag-alagad sa panahon sa kataposang mga adlaw sa daotang sistema ni Satanas? (Roma 15:4-6) Kita angay gayod nga madasig nga ‘mahimong mga magbubuhat sa pulong’ sa bug-os nga diwa, nga maoy pagahisgotan sa sunod nga artikulo.​—Santiago 1:22.

Nahinumdom Ka Ba?

◻ Unsay kahulogan alang kanato “ang paghigugma sa Diyos”?

◻ Unsay atong nakat-onan gikan sa mga panig-ingnan ni Noe, Moises, ug Josue?

◻ Sa unsang sukod nga ang mga hari sa Israel nagsunod sa “pulong” sa Diyos?

◻ Sa unsang paagi si Jesus maoy atong Panig-ingnan sa pagbuhat “sa ingon gayod”?

[Hulagway sa panid 15]

Si Noe, Moises, ug Josue ‘mibuhat sa ingon gayod’