Si Jehova Nagdala ug Daghang Anak Ngadto sa Himaya
“Nahiangay [sa Diyos], sa pagdala ug daghang anak ngadto sa himaya, nga himoong hingpit ang Pangulong Ahente sa ilang kaluwasan pinaagi sa mga pag-antos.”—HEBREOHANON 2:10.
1. Nganong makatino kita nga ang katuyoan ni Jehova alang sa katawhan matuman?
GILALANG ni Jehova ang yuta aron mahimong puloy-anang dayon sa hingpit nga tawhanong pamilya nga magtagamtam ug kinabuhing walay kataposan. (Ecclesiastes 1:4; Isaias 45:12, 18) Tinuod, nakasala ang atong katigulangang si Adan ug busa gipasa ang sala ug kamatayon ngadto sa iyang mga kaliwat. Apan ang katuyoan sa Diyos alang sa katawhan tumanon pinaagi sa iyang Sinaad nga Binhi, si Jesu-Kristo. (Genesis 3:15; 22:18; Roma 5:12-21; Galacia 3:16) Ang gugma alang sa kalibotan sa katawhan maoy nagdasig kang Jehova sa paghatag sa “iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.” (Juan 3:16) Ug ang gugma maoy nagdasig kang Jesus “sa paghatag sa iyang kalag nga usa ka lukat baylo sa daghan.” (Mateo 20:28) Kining “katugbang nga lukat” balik nga magpalit sa mga katungod ug mga kalaomang giwagtang ni Adan ug magpaposible sa kinabuhing walay kataposan.—1 Timoteo 2:5, 6; Juan 17:3.
2. Sa unsang paagi ang kapadapatan sa halad lukat ni Jesus gilandongan sa tinuig nga Adlaw sa Pagtabon sa Sala sa Israel?
2 Ang kapadapatan sa halad lukat ni Jesus gilandongan sa tinuig nga Adlaw sa Pagtabon sa Sala. Nianang adlawa, ang hataas nga saserdote sa Israel naghalad pag-una ug usa ka laking baka isip halad-sa-sala ug nagpresentar sa dugo niana diha sa sagradong Arka sa Labing Balaan sa tabernakulo, ug sa ulahi sa templo. Gihimo kini alang sa iyang kaugalingon, sa iyang panimalay, ug sa tribo ni Levi. Sa susama, si Jesu-Kristo nagpresentar ngadto sa Diyos sa bili sa iyang dugo nga sa panguna aron pagtabon sa mga sala sa iyang espirituwal nga “mga igsoon.” (Hebreohanon 2:12; 10:19-22; Levitico 16:6, 11-14) Sa Adlaw sa Pagtabon sa Sala, ang hataas nga saserdote naghalad usab ug usa ka kanding isip halad-sa-sala ug nagpresentar sa dugo niini diha sa Labing Balaan, niana nagtabon sa mga sala sa 12 ka dili-saserdoteng mga tribo sa Israel. Sa susama, ang Hataas nga Saserdoteng si Jesu-Kristo magpadapat sa iyang dugo-sa-kinabuhi alang sa mga tawong magpasundayag ug pagtuo, nga magpapas sa ilang mga sala.—Levitico 16:15.
Gidala Ngadto sa Himaya
3. Sumala sa Hebreohanon 2:9, 10, unsay ginabuhat sa Diyos sulod sa 1,900 ka tuig?
3 Sulod sa 1,900 ka tuig, ang Diyos nagbuhat ug butang nga talagsaon may kalabotan sa “mga igsoon” ni Jesus. Mahitungod niini, si apostol Pablo misulat: “Atong nakita si Jesus, kinsa gihimong ubos ug diyutay kay sa mga anghel, nga gipurongpurongan sa himaya ug dungog tungod kay nakaantos sa kamatayon, aron pinaagi sa dili-takos nga kalulot sa Diyos siya makatilaw ug kamatayon alang sa matag tawo. Kay nahiangay sa usa [Jehova nga Diyos] nga tungod ug alang kaniya naanaa ang tanang butang ug pinaagi kaniya naanaa ang tanang butang, sa pagdala ug daghang anak ngadto sa himaya, nga himoong hingpit ang Pangulong Ahente sa ilang kaluwasan pinaagi sa mga pag-antos.” (Hebreohanon 2:9, 10) Ang Pangulong Ahente sa kaluwasan mao si Jesu-Kristo, kinsa nakakat-on ug hingpit nga pagkamasinugtanon pinaagi sa mga butang nga iyang giantos samtang nagkinabuhi ingong usa ka tawo sa yuta. (Hebreohanon 5:7-10) Si Jesus mao ang unang gianak isip espirituwal nga anak sa Diyos.
4. Kanus-a ug sa unsang paagi si Jesus gianak isip espirituwal nga Anak sa Diyos?
4 Gigamit ni Jehova ang iyang balaang espiritu, o aktibong puwersa, aron igaanak si Jesus ingong iyang espirituwal nga Anak, aron madala siya ngadto sa langitnong himaya. Samtang nag-inusara uban ni Juan nga Bawtista, si Jesus miagig bug-os nga pagtuslob sa tubig aron pagpasimbolo sa pagpresentar sa iyang kaugalingon ngadto sa Diyos. Nag-ingon ang asoy sa Ebanghelyo ni Lucas: “Sa dihang ang tanang tawo nabawtismohan na, si Jesus usab gibawtismohan ug, samtang siya nag-ampo, ang langit nabuksan ug ang balaang espiritu sa lawasnong porma sama sa usa ka salampati mikunsad nganha kaniya, ug usa ka tingog migula gikan sa langit: ‘Ikaw mao ang akong Anak, ang hinigugma; giuyonan ko ikaw.’” (Lucas 3:21, 22) Nakita ni Juan nga ang balaang espiritu mikunsad kang Jesus ug nadunggan si Jehova nga mipahayag ug dayag nga pag-uyon kaniya isip Iyang hinigugmang Anak. Niadtong panahona ug pinaagi sa balaang espiritu, gianak ni Jehova si Jesus ingong una sa ‘daghang anak nga dad-on ngadto sa himaya.’
5. Kinsay unang nakabenepisyo sa halad ni Jesus, ug unsay ilang gidaghanon?
5 Ang “mga igsoon” ni Jesus mao ang unang nakabenepisyo sa iyang halad. (Hebreohanon 2:12-18) Sa panan-awon, sila nakita ni apostol Juan nga diha na sa himaya sa langitnong Bukid sa Zion kauban sa Kordero, ang nabanhawng Ginoong Jesu-Kristo. Gibutyag usab ni Juan ang ilang gidaghanon, nga nag-ingon: “Nakita ko, ug, tan-awa! ang Kordero nga nagabarog diha sa Bukid sa Zion, ug may uban kaniya nga usa ka gatos ug kap-atag-upat ka libo nga nagabaton sa iyang ngalan ug sa ngalan sa iyang Amahan nga nahisulat diha sa ilang mga agtang. . . . Kini sila gipalit gikan sa katawhan ingong mga unang-bunga ngadto sa Diyos ug ngadto sa Kordero, ug walay kabakakan nga nakaplagan sa ilang mga baba; sila walay lama.” (Pinadayag 14:1-5) Busa ang ‘daghang anak nga gidala ngadto sa himaya’ sa langit mokabat lamang ug 144,001—si Jesus ug ang iyang espirituwal nga mga igsoon.
“Gipakatawo Gikan sa Diyos”
6, 7. Kinsay “gipakatawo gikan sa Diyos,” ug unsay kahulogan niini alang kanila?
6 Kadtong gianak ni Jehova maoy “gipakatawo gikan sa Diyos.” Sa pagpakigsulti nianang mga tawhana, si apostol Juan misulat: “Ang matag usa nga gipakatawo gikan sa Diyos wala magapadayon sa pagbuhat sa sala, tungod kay ang Iyang [kang Jehova] binhi sa pagsanay nagapabilin man nianang maong usa, ug dili niya mahimo ang pagpakasala, tungod kay gikapakatawo man siya gikan sa Diyos.” (1 Juan 3:9) Ang maong “binhi sa pagsanay” mao ang balaang espiritu sa Diyos. Sa pagbuhat sumala sa iyang pulong, naghatag kini sa matag usa sa 144,000 ug “usa ka bag-ong pagkahimugso” alang sa usa ka langitnong paglaom.—1 Pedro 1:3-5, 23.
7 Si Jesus maoy Anak sa Diyos gumikan sa iyang tawhanong pagkatawo, sama nga ang hingpit nga tawong si Adan maoy “anak sa Diyos.” (Lucas 1:35; 3:38) Hinuon, human sa bawtismo ni Jesus makahuloganon nga si Jehova mipahayag: “Ikaw mao ang akong Anak, ang hinigugma; giuyonan ko ikaw.” (Marcos 1:11) Pinaagi sa maong pagpahayag nga nag-uban sa pagbubo sa balaang espiritu, tin-aw nga gianak sa Diyos niadtong higayona si Jesus isip Iyang espirituwal nga Anak. Ingnon ta, si Jesus niadto gihatagan ug “usa ka bag-ong pagkahimugso” uban sa katungod nga modawat na usab ug kinabuhi isip espiritung Anak sa Diyos sa langit. Sama kaniya, ang iyang 144,000 espirituwal nga mga igsoon ‘gipakatawo pag-usab.’ (Juan 3:1-8; tan-awa Ang Bantayanang Torre, Nobyembre 15, 1992, mga panid 3-6.) Sama usab kang Jesus, sila gidihogan sa Diyos ug gisugo nga imantala ang maayong balita.—Isaias 61:1, 2; Lucas 4:16-21; 1 Juan 2:20.
Pamatuod sa Pagkagianak
8. Unsa ang pamatuod sa pagkagianak-sa-espiritu sa kahimtang ni (a) Jesus (b) iyang unang mga tinun-an?
8 May pamatuod nga si Jesus gianak-sa-espiritu. Si Juan Bawtista nakakita sa espiritu nga mikunsad diha kang Jesus ug nakadungog sa pagpahayag sa Diyos bahin sa bag-ong nadihogang espirituwal nga pagkaanak sa Mesiyas. Apan giunsa pagkahibalo sa mga tinun-an ni Jesus nga sila gianak-sa-espiritu? Aw, sa adlaw sa iyang pagsaka ngadto sa langit, si Jesus miingon: “Si Juan, sa pagkatinuod, nagbawtismo pinaagig tubig, apan kamo pagabawtismohan sa balaang espiritu dili daghang adlaw human niini.” (Buhat 1:5) Ang mga tinun-an ni Jesus ‘nabawtismohan sa balaang espiritu’ sa adlaw sa Pentekostes 33 K.P. Kadtong pagbubo sa espiritu giduyogan ug “kabanha gikan sa langit sama gayod nianang nagahuros makusog nga hangin” ug “mga dila nga maorag kalayo” diha sa matag usa sa mga tinun-an. Labing talagsaon mao ang katakos sa mga tinun-an “sa pagsulti uban sa lainlaing mga dila, ingon sa gitugot sa espiritu nga ilang ipamulong.” Busa dihay makita ug madungog nga ebidensiya nga ang dalan ngadto sa langitnong himaya isip mga anak sa Diyos nabuksan na alang sa mga sumusunod ni Kristo.—Buhat 2:1-4, 14-21; Joel 2:28, 29.
9. Unsa ang pamatuod nga ang mga Samarianhon, si Cornelio, ug ang uban pa sa unang siglo maoy gianak-sa-espiritu?
9 Usa ka panahon human niadto, si Felipe nga ebanghelista nagwali sa Samaria. Bisan pag ang mga Samarianhon midawat sa iyang mensahe ug nabawtismohan, wala silay ebidensiya nga gianak sila sa Diyos isip iyang mga anak. Sa dihang ang mga apostoles nga si Pedro ug Juan nag-ampo ug nagpatong sa ilang mga kamot niadtong mga magtutuo, “sila sugod nga nakadawat ug balaang espiritu” sa usa ka paagi nga dayag sa mga tumatan-aw. (Buhat 8:4-25) Kadto maoy pamatuod nga ang nanagpanuo nga mga Samarianhon gianak-sa-espiritu isip mga anak sa Diyos. Sa susama, sa 36 K.P., si Cornelio ug ubang mga Hentil midawat sa kamatuoran sa Diyos. Si Pedro ug ang Hudiyong mga magtutuo nga mikuyog kaniya “nahibulong, tungod kay ang libreng gasa sa balaang espiritu gibubo man usab nganha sa katawhan sa kanasoran. Kay ilang nadunggan sila nga nagasulti uban sa mga dila ug nagapadako sa Diyos.” (Buhat 10:44-48) Daghang unang-siglong mga Kristohanon nakadawat ug “mga gasa sa espiritu,” sama sa pagsulti sa mga dila. (1 Corinto 14:12, 32) Sa ingon kining mga tawhana may tin-awng ebidensiya nga sila gianak-sa-espiritu. Apan unsaon pagkahibalo sa ulahing mga Kristohanon kon sila gianak ba sa espiritu o wala?
Ang Pagsaksi sa Espiritu
10, 11. Pinasikad sa Roma 8:15-17, unsaon nimo pag-ingon nga ang espiritu nagsaksi uban niadtong kaubang mga manununod ni Kristo?
10 Ang tanang 144,000 dinihogang mga Kristohanon nakabaton ug absolutong ebidensiya nga nagbaton sila sa espiritu sa Diyos. Niining bahina, si Pablo misulat: “Kamo nakadawat ug espiritu sa pagsagop ingong mga anak, nga pinaagi niining espirituha kita nagatuaw: ‘Abba, Amahan!’ Ang espiritu mismo nagapanaksi uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo, basta duyog kita nga magaantos aron kita usab duyog nga pagahimayaon.” (Roma 8:15-17) Ang dinihogang mga Kristohanon nakabaton ug espiritu nga banaynon alang sa ilang langitnong Amahan, nga usa ka nagpatigbabawng pagbati sa pagkaanak. (Galacia 4:6, 7) Sila nakatino sa bug-os nga sila gianak sa Diyos alang sa espirituwal nga pagkaanak isip kaubang mga manununod ni Kristo sa langitnong Gingharian. Niini, ang balaang espiritu ni Jehova adunay usa ka tinong papel.
11 Ubos sa impluwensiya sa balaang espiritu sa Diyos, ang espiritu, o nagpatigbabawng tinamdan, sa mga dinihogan magdasig nila sa pagsanong nga positibo sa ginaingon sa Pulong sa Diyos bahin sa langitnong paglaom. Pananglitan, sa dihang ilang basahon ang ginaingon sa Kasulatan mahitungod sa espirituwal nga mga anak ni Jehova, sa kinaiyanhon ilang ginaila nga kanang mga pulonga mapadapat kanila. (1 Juan 3:2) Sila nahibalong sila “gibawtismohan ngadto kang Kristo Jesus” ug ngadto sa iyang kamatayon. (Roma 6:3) Ang hugot nilang pagtuo mao nga sila maoy espirituwal nga mga anak sa Diyos, kinsa mamatay ug banhawon ngadto sa langitnong himaya, sama kang Jesus.
12. Unsay gipatungha sa espiritu sa Diyos diha sa dinihogang mga Kristohanon?
12 Ang pagkagianak sa espirituwal nga pagkaanak dili kay tinguhang naugmad. Ang mga gianak-sa-espiritu dili gustong moadto sa langit tungod sa pagkaguol sa mga kalisdanan karon sa yuta. (Job 14:1) Sa kapulihay, ang espiritu ni Jehova nagpatungha diha sa tinuod nga mga dinihogan sa paglaom ug tinguhang dili kasagaran sa katawhan sa katibuk-an. Ang maong mga gianak nahibalong ang walay-kataposang kinabuhi diha sa tawhanong kahingpitan sa usa ka paraisong yuta nga gilibotan sa pamilyang malipayon ug sa mga higala maoy talagsaon. Ugaling lang, ang maong kinabuhi dili ang pangunang tinguha sa ilang mga kasingkasing. Ang mga dinihogan nakabaton nianang kusog nga langitnong paglaom nga sila andam nga mosakripisyo sa tanang yutan-ong mga palaaboton ug mga pagbinatiay.—2 Pedro 1:13, 14.
13. Sumala sa 2 Corinto 5:1-5, unsay ‘matinuorong tinguha’ ni Pablo, ug unsay gipaila niini mahitungod sa mga gianak-sa-espiritu?
13 Ang hinatag-sa-Diyos nga paglaom sa langitnong kinabuhi maoy kusganon kaayo sa maong mga tawo nga ang ilang mga pagbati nahisama sa kang Pablo, kinsa misulat: “Kita nahibalo nga kon ang atong yutan-ong balay, kini nga tolda, matun-as na, kita makabaton ug tinukod gikan sa Diyos, usa ka balay nga dili hinimog mga kamot, walay-kataposan didto sa mga langit. Kay niini nga puluy-anan kita sa pagkatinuod nagaagulo, nga sa matinuoron nagatinguhang isul-ob kanang alang kanato gikan sa langit, aron nga, sa masul-ob na gayod kini, dili kita makaplagang hubo. Sa pagkatinuod, kita nga ania niini nga tolda nagaagulo, nga nabug-atan; tungod kay buot man nato, dili sa paghukas niini, kundili sa pagsul-ob sa lain, aron nga ang may-kamatayon pagalamyon sa kinabuhi. Karon siya nga nagpatungha kanato alang niini mismo nga butang mao ang Diyos, kinsa mihatag kanato sa timaan sa kon unsay moabot, nga mao, ang espiritu.” (2 Corinto 5:1-5) Ang ‘matinuorong tinguha’ ni Pablo mao nga banhawon ngadto sa langit isip dili-mamatay nga espiritung linalang. Nga naghisgot sa tawhanong lawas, gigamit niya ang sambingay bahin sa matikyop nga tolda, nga usa ka huyang ug temporaryong puloy-anan kon itandi sa usa ka balay. Bisan pag nagkinabuhi sa yuta sa may-kamatayon, unodnong lawas, ang mga Kristohanon nga nakabaton sa espiritu isip timaan sa umaabot nga langitnong kinabuhi nagpanan-aw ngadto sa usa ka “tinukod gikan sa Diyos,” usa ka dili-mamatay, dili-madunotong espiritung lawas. (1 Corinto 15:50-53) Sama kang Pablo, sila makasulti sa tim-os: “Kita maisogon ug nahimuot pag-ayo hinuon nga mawala sa [tawhanong] lawas ug himoon ang atong puluy-anan [sa langit] uban sa Ginoo.”—2 Corinto 5:8.
Gipasalmot sa Espesyal nga mga Pakigsaad
14. Sa dihang gisugdan ang pagsaulog sa Memoryal, unsang pakigsaad ang gihisgotan una ni Jesus, ug unsang papel ang gidula niini may kalabotan sa espirituwal nga mga Israelinhon?
14 Ang gianak-sa-espiritung mga Kristohanon nakatino nga sila gipasalmot ngadto sa duha ka espesyal nga mga pakigsaad. Gihisgotan ni Jesus ang usa niini sa dihang gigamit niya ang walay-lebadurang tinapay ug bino aron sugdan ang Memoryal sa iyang umaabot nga kamatayon ug miingon bahin sa kopa sa bino: “Kini nga kopa nagakahulogan sa bag-ong pakigsaad tungod sa akong dugo, nga igabubo alang kaninyo.” (Lucas 22:20; 1 Corinto 11:25) Kinsa ang mga sumasalmot sa bag-ong pakigsaad? Si Jehova nga Diyos ug ang mga membro sa espirituwal nga Israel—silang dad-on ngadto sa langitnong himaya sumala sa katuyoan ni Jehova. (Jeremias 31:31-34; Galacia 6:15, 16; Hebreohanon 12:22-24) Kay gipalihok pinaagi sa giulang dugo ni Jesus, ang bag-ong pakigsaad magakuha gikan sa kanasoran ug usa ka katawhan alang sa ngalan ni Jehova ug maghimo niining gianak-sa-espiritung mga Kristohanon nga bahin sa “binhi” ni Abraham. (Galacia 3:26-29; Buhat 15:14) Ang bag-ong pakigsaad magatagana alang sa tanang espirituwal nga mga Israelinhon nga pagadad-on ngadto sa himaya pinaagi sa pagkagibanhaw ngadto sa dili-mamatay nga kinabuhi sa langit. Tungod kay “usa ka walay-kataposang pakigsaad,” ang mga benepisyo niini molungtad hangtod sa kahangtoran. Tan-awonon pa kon kini ba nga pakigsaad modula usab ug usa ka papel sa ubang mga paagi sulod sa Milenyo ug human niana.—Hebreohanon 13:20.
15. Nahiuyon sa Lucas 22:28-30, ang dinihogang mga sumusunod ni Jesus nagsugod sa pagsalmot sa unsang laing pakigsaad, ug kanus-a?
15 Ang “daghang anak” nga sumala sa katuyoan ni Jehova dad-on ngadto sa himaya gipasalmot usab nga tinagsatagsa sa pakigsaad alang sa usa ka langitnong Gingharian. Mahitungod sa maong pakigsaad tali sa iyang kaugalingon ug sa mga sumusunod sa iyang lakang, si Jesus miingon: “Kamo mao ang mga mitapot kanako diha sa akong mga pagsulay; ug ako nagahimo ug pakigsaad uban kaninyo, maingon nga ang akong Amahan naghimo ug pakigsaad uban kanako, alang sa usa ka gingharian, aron nga kamo mangaon ug manginom sa akong lamesa diha sa akong gingharian, ug molingkod sa mga trono aron sa paghukom sa napulog-duha ka tribo sa Israel.” (Lucas 22:28-30) Ang pakigsaad sa Gingharian giinagurahan sa dihang ang mga tinun-an ni Jesus gidihogan sa balaang espiritu sa Pentekostes 33 K.P. Ang maong pakigsaad nagpabiling naglihok tali kang Kristo ug sa iyang kaubang mga hari sa walay kataposan. (Pinadayag 22:5) Busa, ang gianak-sa-espiritung mga Kristohanon maoy positibo nga sila anaa sa bag-ong pakigsaad ug sa pakigsaad alang sa Gingharian. Sa ingon, sa mga pagsaulog sa Panihapon sa Ginoo diyutay na lang nga nahibiling mga dinihogang ania pa sa yuta ang moambit sa tinapay, nga naghawas sa walay-salang tawhanong lawas ni Jesus, ug sa bino, nga nagkahulogan sa iyang hingpit nga dugo nga gibubo diha sa kamatayon ug nagpabalido sa bag-ong pakigsaad.—1 Corinto 11:23-26; tan-awa Ang Bantayanang Torre, Pebrero 1, 1989, mga panid 17-20.
Tinawag, Pinili, ug Matinumanon
16, 17. (a) Aron dad-on ngadto sa himaya, kinahanglang unsay mahitabo sa tanang 144,000? (b) Kinsa ang “napulo ka hari,” ug giunsa nila pagtratar ang yutan-ong nahibilin sa “mga igsoon” ni Kristo?
16 Ang unang pagpadapat sa halad lukat ni Jesus nagpaposible nga ang 144,000 tawgon alang sa langitnong kinabuhi ug pilion tungod sa pagkagianak-sa-espiritu pinaagi sa Diyos. Siyempre, aron ‘dad-on ngadto sa himaya’ kinahanglang ilang ‘buhaton kutob sa ilang maarangan nga himoong tino ang ilang pagtawag ug pagpili,’ ug kinahanglang magpamatuod silang matinumanon hangtod sa kamatayon. (2 Pedro 1:10; Efeso 1:3-7; Pinadayag 2:10) Ang diyutayng nahibilin sa mga dinihogan nga ania pa sa yuta padayong naghupot sa ilang integridad bisan pag gisupak sa “napulo ka hari” nga naghulagway sa tanang politikanhong mga gahom. “Kini sila makiggubat sa Kordero,” matod sa usa ka manulonda, “apan, tungod kay siya Ginoo man sa mga ginoo ug Hari sa mga hari, ang Kordero magadaog kanila. Usab, kadtong mga tinawag ug pinili ug matinumanon uban kaniya mobuhat usab sa ingon.”—Pinadayag 17:12-14.
17 Ang tawhanong mga magmamando walay mahimo batok kang Jesus, ang “Hari sa mga hari,” kay siya atua sa langit. Apan gipasundayag nila ang pagkamabatokon nganha sa nahibilin sa iyang “mga igsoon” nga ania pa sa yuta. (Pinadayag 12:17) Kana matapos sa gubat sa Diyos sa Armagedon, sa dihang ang kadaogan matino na alang sa “Hari sa mga hari” ug sa iyang “mga igsoon”—“kadtong tinawag ug pinili ug matinumanon.” (Pinadayag 16:14, 16) Kasamtangan, ang gianak-sa-espiritung mga Kristohanon maoy puliki kaayo. Unsay ilang ginabuhat karon, sa dili pa sila dad-on ni Jehova ngadto sa himaya?
Unsay Imong Tubag?
◻ Kinsay ‘dad-on [sa Diyos] ngadto sa langitnong himaya’?
◻ Unsay kahulogan nga “gipakatawo gikan sa Diyos”?
◻ Sa unsang paagi ‘ang espiritu nagsaksi’ uban sa pipila ka Kristohanon?
◻ Ang mga gianak-sa-espiritu gipasalmot sa unsang mga pakigsaad?
[Hulagway sa panid 15]
Sa Pentekostes 33 K.P., ang ebidensiya gihatag nga ang dalan ngadto sa langitnong himaya nabuksan na