Pagbag-o sa Tanang Butang
“Ang Usang naglingkod sa trono miingon: ‘Tan-awa! Ginabag-o ko ang tanang butang.’ Usab, siya miingon: ‘Isulat mo, kay kining mga pulonga kasaligan ug matuod.’”—PINADAYAG 21:5.
“WALAY butang bag-o sa ilalom sa adlaw.” Kana ang mga pulong sa makinaadmanong Haring Solomon. Sa pagpadayon, siya nangutana: “Aduna bay usa ka butang nga arang mo ikaingon: ‘Tan-awa kini; kini bag-o man’?” (Ecclesiastes 1:9, 10) Unsaon nato pagtubag kanang pangutanaha karong adlawa?
1, 2. (a) Unsang pangutana ang gisukna ni Solomon tulo ka milenyo kanhi? (b) Karong adlawa, unsa ang maorag nagasupak sa mga pulong ni Solomon?
2 Dili ba ang siyensiya ug teknolohiya nakapatunghag daghang bag-ong butang sulod niining ika-20ng siglo? Tan-awa lamang ang kalibotan sa pagbiyahe, uban ang mga ayroplanong jet, kusog-modagang mga kotse, ug mga bullet tren. Unya anaa ang kahibulongang mga kauswagan sa telekomunikasyon, ang paggamit sa nagabiyo nga mga satelayt, ug ang paglansad sa mga salakwanang nga aktuwal nakapalandig ug mga tawo sa bulan. Ug unsay ikasulti sa modernong mga kasangkapan sa kusina, mga repriherador, ug mga makinang panglaba nga nagaadorno sa daghan kaayong kabalayan? Ang pila ka tawo tingali malagmit moingon, ‘Aw, kanang tanan bag-o sa ilalom sa adlaw!’
3. Unsang makalilisang nga kahimtang ang naugmad dinhi “sa ilalom sa adlaw”? (Lucas 21:25, 26; Salmo 53:1)
3 Apan hulat una! Adunay butang usab nga makalilisang, makapakulba kaayo, nga makita sa ilalom sa adlaw. Unsa ba kana? Aw, ang yuta nahimong usa ka armadong kampo! Kini misugod sa 1914 sa dihang misilaob ang Gubat sa Kalibotan I. Sa unang panahon, ang mga masinggan, mga ayroplano, mga tangke, ug mga submarino gigamit sa panggubatan. Sa walay 30 anyos ang Gubat sa Kalibotan II misunod. Kadto upat ka pilo ka malaglagon sa kinabuhi ug kabtangan kay sa unang gubat sa kalibotan. Kadto sa makalilisang migamit sa labi pang makapatay nga mga galamiton—mga flamethrower, mga bombang napalm, ug sa kataposan ang bomba atomika—mag-uuna sa demonyohanong nukleyar nga mga kasangkapan nga karon nagahulga sa paglungtad mismo sa katawhan dinhi sa yuta.
4. (a) Unsang gambalay ang gitumong ni Solomon sa paghisgot nga “walay butang bag-o”? (b) Sa unsang paagi ang kaalam ug gugma sa Diyos dayag diha sa butang iyang gibuhat ug pagabuhaton pa “sa ilalom sa adlaw”?
4 Nan, tinuod ba kitang makaingon nga “walay butang bag-o sa ilalom sa adlaw”? Oo, makaingon kita, kay kining tanang produksiyon nahimo sulod sa gambalay sa materyal nga kalibotan nga gipuy-an sa mga tawo sa tanang panahon. Bisan pag ang tawo magpabuto sa mga galamitong hydrogen-fusion, kana dili bag-o. Ang hydrogen fusion nagapadayon sulod sa adlaw sa binilyong katuigan. Kini ang tinubdan sa kanunay nga ulbo sa enerhiya nga nagadan-ag, nagapainit, ug nagabuhi sa atong yuta. Ang kahayag gikan sa adlaw mosanong sa chlorophyll diha sa berdeng mga tanom, nga magabuhat sa mga asukar ug starches nga mao ang pangunang tinubdan sa pagkaon alang sa dili-maihap nga panon sa buhing mga butang alirong nato. Pagkamapasalamaton nato nga ang maalamon-sa-tanang Maglalalang sa yuta mihikay niining kontrolado, mapuslanong pagpagawas sa nukleyar nga enerhiya alang sa atong yuta! (Salmo 104:24) Bisan pag ang dili-diyosnong mga tawo magalaraw sa paggamit sa nukleyar nga mga galamiton alang sa masa nga pagpatay, makalipay nga ang Diyos “magalaglag niadtong nagalaglag sa yuta.”—Pinadayag 11:18.
5. (a) Nganong si Solomon husto sa pag-ingon: “Walay butang bag-o sa ilalom sa adlaw”? (b) Sa unsang paagi ang paagi sa kinabuhi sa dili-hingpit nga tawo nagapamatuod sa mga pulong ni Solomon?
5 Si Solomon husto sa pag-ingon: “Walay butang bag-o sa ilalom sa adlaw.” Kay walay butang bag-o mahitungod sa materyales, sa mga tinubdan sa enerhiya, ug sa kinaiyanhong mga balaod nga mao ang pasikaranan sa pisikal nga sistema sa mga butang sa yuta. Kini sila dugay nang bahin sa kalalangan sa Diyos. (Salmo 24:1; Pinadayag 4:11) Walay butang bag-o sa pagsilang ug pagsalop sa adlaw, sa mga sumbanan sa klima, ug sa kinaiyanhong siklo sa pagbisibis ug pagpasig-uli sa yuta. Ug mahitungod sa paagi sa kinabuhi sa dili-hingpit himalatyong tawo, walay butang bag-o, bisan pa sa mabalhinong mga urog. Bisan sa datoong mga katilingban, ang kinabuhi alang sa daghan nahimong balikbalik, ug sa kadugayan “makapuol.” Sa mga 70 o 80 ka tuig, ang tawong namantsahan sa sala ‘moadto sa iyang malungtarong balay’—ang lubnganan. Sumala sa ginaingon ni Solomon: “Ang namao kaniadto, mamao ugma; ug ang nahimo kaniadto, pagahimoon man ugma; ug busa walay butang bag-o sa ilalom sa adlaw.”—Ecclesiastes 1:4-9; 12:5.
“Usa ka Bag-ong Binuhat” sa Ilalom sa Adlaw
6. (a) Nganong ang bag-ong materyal nga kalalangan dili pagadahomon sa haduol nga umaabot? (b) Sa unsang paagi ug kanus-a gipatungha ni Jehova ang butang “bag-o sa ilalom sa adlaw”?
6 Sa pagkamatuod, sa pisikal nga paagi “walay butang bag-o sa ilalom sa adlaw;” ni patunghaon ni Jehova ang bag-ong materyal nga kabuhatan sulod sa presenteng 7,000-tuig nga adlaw sa pagpahulay gikan sa iyang mga buhat sa kalalangan. Apan may butang bag-o ang mitungha sa ilalom sa adlaw. Kanus-a? Maoy sa tuig 2 W.K.P. nga ang manulonda ni Jehova mipakita sa kalit ngadto sa ubos nga mga magbalantay sa karnero sa duol sa Bethlehem aron himoon ang talagsaong bag-ong pahibalo. Siya miingon: “Tan-awa! Ipahayag ko kaninyo ang maayong balita sa dakong kalipay nga mabatonan sa tanang tawo, tungod kay natawo alang kaninyo karong adlawa ang usa ka Manluluwas, kinsa mao si Kristo ang Ginoo, sa siyudad ni David.” Unya ang kapid-ang manulonda miduyog kaniya sa pagdayeg sa Diyos ug pag-ingon: “Himaya sa kahitas-an ngadto sa Diyos, ug ibabaw sa yuta pakigdait taliwala sa mga tawong may maayong kabubut-on.”—Lucas 2:8-14.
7. (a) Unsang bag-ong butang ang nahitabo sa bawtismo ni Jesus? (b) Giunsa ni Jesus pag-abli ang dalan alang sa dugang mga hitabo?
7 Sa 30 anyos sa edad, ang maong Manluluwas nabawtismohan sa katubigan sa Jordan. Dihadiha, ang laing butang bag-o nahitabo sa ilalom sa adlaw. Ang Lucas 3:21, 22 nagabatbat niini niining mga pulonga: “Samtang [si Jesus] nag-ampo, ang langit naabli ug ang balaang espiritu sa dagway sa usa ka salampati mitugdong kaniya, ug ang usa ka tingog migula sa langit: ‘Ikaw mao ang akong Anak, ang hinigugma; ikaw akong giuyonan.’” Niadtong gutloa si Jesus nahimong “usa ka bag-ong linalang,” usa ka inanak-sa-espiritung Anak sa Diyos. (2 Corinto 5:17) Sulod sa sunod tulo ka tuig ug tunga, si Jesus mihatag ug gamhanang pamatuod bahin sa Gingharian sa Diyos, nga nagtigom sa iyang unang mga tinun-an. Dayon, sa 33 K.P., tapos sa iyang haladnong kamatayon ug iyang pagkabanhaw ingong espiritu, si Jesus mipatim-aw “sa atubangan sa persona sa Diyos” aron sa pag-abli sa dalan alang sa dugang kahibulongang mga hitabo dinhi “sa ilalom sa adlaw.”—Hebreohanon 9:24; 1 Pedro 3:18.
8. Sa unsang paagi gipatungha ang “usa ka bag-ong linalang”?
8 Sa adlaw sa Pentekostes niadtong tuiga, si Jesus misugod sa pagbubo sa balaang espiritu ibabaw sa iyang matinumanong mga tinun-an, nga nagpailang sila gihiusa kaniya ingong mga anak sa Diyos. Si apostol Pablo naghisgot sa maong “bag-ong linalang” sa 2 Corinto 5:17, 18, nga nag-ingon: “Kon si bisan kinsa nahiusa kang Kristo, siya usa ka bag-ong binuhat; ang daang mga butang miagi na, tan-awa! milungtad ang bag-ong mga butang. Apan ang tanang butang nagagikan sa Diyos, kinsa nagpasig-uli kanato ngadto kaniya pinaagi kang Kristo ug mihatag kanato sa ministeryo sa pagpasig-uli.”
9. Unsang katuyoan ang ginatuman sa “bag-ong linalang”?
9 Si apostol Pedro nakigsulti niining “bag-ong linalang,” nga nag-ingon: “Kamo usa ka ‘pinili nga banay, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron inyong igapahayag sa halayo ang mga pagkahalangdon’ sa usa nga nagtawag kaninyo gikan sa kangitngitan ngadto sa iyang kahibulongang kahayag.” (1 Pedro 2:9) Samtang dinhi sa yuta, ang harianong pagkasaserdote madasigong nagmantala sa “halangdong mga butang sa Diyos” nga maylabot sa mga katuyoan sa iyang Gingharian. Kadtong sakop sa maong “bag-ong linalang” nga magatapos sa ilang yutan-ong dalan nga matinumanon mabanhaw tapos si Jesus moabot sa templo ni Jehova.—Buhat 2:11; Roma 8:14-17; Malakias 3:1, 2.
“Ang Paglalang Pag-usab”
10. (a) Unsay giingon ni Jesus mahitungod sa usa ka “paglalang pag-usab”? (b) Sa unsa gidapit nga makaambit kadtong sakop sa “bag-ong linalang”?
10 Bisan pa niana, ang maong “bag-ong linalang” nga nagsugod kang Jesu-Kristo mao ba lamang ang “bag-ong” butang nga makita “sa ilalom sa adlaw”? Dili gayod! Samtang dinhi pa sa yuta, giingnan ni Jesus ang iyang mga disipulo: “Sa pagkamatuod ako magaingon kaninyo, Sa paglalang pag-usab, sa dihang ang Anak sa tawo molingkod na sa iyang mahimayaong trono, kamo nga nagsunod kanako magalingkod usab sa napulog-duha ka trono, nga magahukom sa napulog-duha ka tribo sa Israel.” (Mateo 19:28) Ang “gamay nga panon” sa sinulayan ug napamatud-ang mga disipulo—144,000 kanila—sa ingon gidapit sa pag-ambit uban kang Jesus diha sa iyang Gingharian ug “magalingkod sa mga trono sa paghukom sa napulog-duha ka tribo sa Israel.”—Lucas 12:32; 22:28-30; Pinadayag 14:1-5.
11. Unsang duha ka bahin sa halad ni Jesus ang gihulagway sa Adlaw sa Pagtabon sa Sala, ug sa unsang paagi?
11 Nan, kinsa ba kining “napulog-duha ka tribo”? Ang kahikayang gihimo ni Jehova alang sa Adlaw sa Pagtabon sa Sala sa karaang Israel mohatag ug ilhanan. Kada tuig, sa ikanapulong adlaw sa ikapitong bulan, ang hataas nga saserdote gibaoran sa paghalad sa usa ka torong baka ingong halad-sa-sala “alang sa iyang kaugalingon ug sa iyang balay.” Kadto naghulagway sa halad ni Jesus ingong gipadapat ngadto sa “iyang balay” sa ubos nga mga saserdote. Apan komosta ang ubang mga Israelinhon? Dayon ripahan sa hataas nga saserdote ang duha ka kanding. Usa niana iyang ihawon ingong “ang kanding sa halad sa sala, nga maoy alang sa katawhan.” Tapos sa pagsugid sa mga sala sa katawhan ibabaw sa ikaduhang kanding, kana iyang buhian ngadto sa kamingawan. Ang paggamit nianang duha ka kanding sa ingon naghulagway sa pagbubo ni Jesus sa iyang dugo-sa-kinabuhi ingong halad ug sa iyang bug-os nga pagpas-an sa mga sala sa tibuok nga katawhan nga gawas niadtong sakop sa iyang saserdotehanong balay.—Levitico 16:6-10, 15.
12. Sa unsang paagi ang usa ka diksiyonaryo nagabatbat pag-ayo sa kahulogan sa “paglalang pag-usab”?
12 “Ang napulog-duha ka tribo sa Israel” may samang kahulogan diha sa Mateo 19:28. Ang kapadapatan dinha labaw pa kay sa nganha lamang sa dinihogan-sa-espiritu nga mga ubos nga saserdote nga magasakop sa tanang ubang tawo. Ang An Expository Dictionary of New Testament Words, ni W. E. Vine, nagabatbat sa Gregong pulong gigamit dinhi alang sa “paglalang pag-usab,” ang pa·lin·ge·ne·siʹa, ingong “bag-ong pagkagianak . . . espirituwal nga pagbag-o,” ug nagadugang: “Sa Mateo 19:28 ang pulong gigamit, sa diskurso sa Ginoo, sa haluag pang diwa, sa ‘pagpasig-uli sa tanang butang’ (Buhat 3:21, R.V.), dihang, ingong sangpotanan sa Ikaduhang Pag-anhi ni Kristo, si Jehova ‘magabutang sa Iyang Hari sa ibabaw sa Iyang balaang bungtod sa Sion’ (Sal. 2:6) . . . Sa maong paagi matuman ang pagluwas sa kalibotan gikan sa gahom ug panglimbong ni Satanas ug gikan sa diniktador ug batok-Kristohanong mga magmamando sa kanasoran.”
13. (a) Unsay ginapaila sa lainlaing bersiyon sa Bibliya mahitungod sa kahulogan sa pa·lin·ge·ne·siʹa? (b) Busa, unsay mahitabo “sa ilalom sa adlaw”?
13 Nahiuyon niini, ang mga hubad sa Bibliya dinhi nagahubad nga lainlain sa pa·lin·ge·ne·siʹa: pagbag-o, bag-ong kalibotan, bag-ong pagkagianak, bag-ong pagkatawo sa kalibotan, ang kalibotan nga umaabot, Bag-ong Linalang, bag-ong kahikayan sa kinabuhi, bag-ong panahon. Nasabtan mo ba ang diwa niana? “Ang napulog-duha ka tribo sa Israel,” nga nagahawas sa tanang mga katawhan, pagahukman ni Kristo ug sa iyang maunongong mga ubos nga saserdote. Kini may kalabotan unya sa usa ka pagbag-o, usa ka talagsaong pagbag-o sa tanang gituyo ni Jehova alang niining yutaa, dinhi mismo “sa ilalom sa adlaw.”
“Ang mga Panahon sa Pagpasig-uli”
14. (a) Sumala sa Buhat 3:20, 21, unsay kinahanglang hulaton ni Jesus? (b) Sa unsang paagi ug kanus-a si Jesus palingkoron ingong Hari?
14 Kanus-a ba mahitabo ang maong pagbag-o? Sa Buhat 3:20, 21, si Pedro nagahisgot kang “Jesus, kinsa ang langit, sa pagkamatuod, magahupot sa kaugalingon hangtod sa mga panahon sa pagpasig-uli sa tanang butang nga gisulti sa Diyos pinaagi sa baba sa iyang balaang mga manalagna sa karaang panahon.” Kini nagapunting sa pagpaabot ni Jesus sa tuong kamot sa Diyos sa mga langit hangtod “matuman ang tinudlong mga panahon sa kanasoran.” (Lucas 21:24; Salmo 110:1, 2) Dayon, sa 1914, si Jehova ‘nagpalingkod sa trono sa iyang hari ibabaw sa Sion, sa iyang balaang bukid.’ Nan unsang pagpasig-uli ang mahitabo?—Salmo 2:6.
15. (a) Unsay nahitabo “sa ilalom sa adlaw” tapos sa paglingkod ni Jesus sa trono? (b) Sa unsang paagi natuman ang Mateo 25:31-34 ug Isaias 11:6-9?
15 Nahauna, ang usa ka bag-ong butang makita sa ilalom sa adlaw, sa pagkaaging ang nahibiling matinumanong ubos nga mga saserdote ni Kristo—ang mga ulahi sa “bag-ong binuhat”—gitigom ug gipabuhat sa ‘pagwali niining maayong balita sa natukod nga Gingharian.’ Sunod, ang usa ka “dakong panon” gitigom “gikan sa tanang kanasoran” aron luwason sa “dakong kasakitan.” (Mateo 24:14; Pinadayag 7:9, 14) Sa atong panahon karon ang naentronong Hari, si Jesu-Kristo, nagabulag sa katawhan gikan sa usag usa, “sama sa usa ka magbalantay nga magabulagbulag sa mga karnero gikan sa mga kanding.” “Ang mga karnero” mao kadtong nagapadayag nga sila mahilig sa pagkamatarong ngadto sa Hari ug sa iyang inanak-sa-espiritung mga igsoon sa “bag-ong linalang.” Busa ang maong “mga karnero” gidapit sa pagpanunod sa kinabuhing walay kataposan sa yutan-ong dominyo sa Gingharian ni Jehova. Sila nagapahimulos na sa espirituwal nga paraisong gipasig-uli dinhi sa yuta.—Mateo 25:31-34, 46; Isaias 11:6-9.
16. (a) Unsang paghukom ang nagapadayon karon? (b) Unsang dugang paghukom ang mahitabo tapos sa Armageddon?
16 Ang paghukom sa kanasoran ug sa “mga karnero” niining panahona maoy sa pagkatakos sa paglabang-buhi panahon sa “dakong kasakitan.” (Mateo 24:21, 22) Bisan pa niana, kini ba ang paghukom nga gitumong sa Mateo 19:28? Dili, kay ang dugang paghukom pagahimoon man ni Kristo ug sa iyang mga ubos nga saserdote tapos sa maong kasakitan. Kini ang paghukom sa masambingayong “napulog-duha ka tribo sa Israel,” mga tawong gawas sa harianong pagkasaserdote. Ang numerong “napulog-duha” nagapaila sa pagkakompleto niadtong iya sa katawhan nga pagahukman. Kini magaapil sa mga makalabang-buhi sa “dakong kasakitan,” mga anak nga tingali ilang mabatonan, ug ang binilyong katawhan nga patunghaon sa yuta sa pagkabanhaw.
17. Kinsa unya ang pagahukman, ug sumala sa unsang “mga binuhatan”?
17 Mahitungod niini, si Pablo nagaingon sa Buhat 17:31 nga ang Diyos “nagtakda sa usa ka adlaw nga niana iyang katuyoan ang paghukom sa gipuy-ang yuta diha sa pagkamatarong pinaagi sa usa ka tawo [Kristo Jesus] si kinsa iyang gitudlo, ug iyang gihatag ang usa ka pasalig sa tanang tawo sa pagkaagi nga iyang gibanhaw siya gikan sa mga patay.” Ang tapos-Armageddon nga “gipuy-ang yuta,” nga gilangkoban sa tanang tawo nga anaa sa yuta sa maong panahon, dili pagahukman sumala sa nangaging mga sala nga gihimo panahon sa presenteng sistema sa mga butang. Hinunoa, sila “pagahukman sa tinagsatagsa sumala sa ilang mga binuhatan” nga pagabuhaton sa bag-ong yuta samtang ilang pahimuslan ang tagana sa lukat ni Kristo.—Pinadayag 20:13; Mateo 20:28; 1 Juan 2:2.
18. (a) Sumala sa gipaila ni Isaias, unsa unya ang motungha “sa ilalom sa adlaw”? (b) Unsang mga pulong sa saad ang sa ingon matuman, ug unsay atong madahom sa panahong walay kataposan sa unahan? (Roma 8:21)
18 Pagkatahom unyang mga butang ang motungha sa ilalom sa adlaw sa maong panahon! Ang espirituwal nga paraiso mouswag ngadto sa usa ka literal nga paraiso, ingong katumanan sa orihinal nga katuyoan ni Jehova niining yutaa. Ang atong Diyos nagasulti kanato nga ‘ang yuta mao ang tumbanan sa iyang mga tiil,’ usa ka sangtuwaryo diin siya pagasimbahon, ug siya nagapahayag usab: “Akong pagahimayaon ang dapit mismo sa akong mga tiil.” (Isaias 66:1; 60:13) Busa dinhi sa ilalom sa adlaw, ang yuta pagahimoong usa ka mahimayaong paraiso, usa ka tanaman sa kahimuot, nga niana ang hingpit, malinawon, ug nahiusang katawhan magadayeg sa walay kataposan sa ilang Diyos ug Maglalalang. “Matinumanon ug matuod” mao ang makalilipay nga mga pulong sa saad ni Jehova: “Tan-awa! Ginabag-o ko ang tanang butang”! (Pinadayag 21:5) Ug sa panahong walay kataposan sa unahan, unsa ka kahibulongan unyang bag-ong linalang ang tingali patunghaon sa atong mahigugmaong Diyos ang ipatungha dinhi sa ilalom sa adlaw sa paglipay sa iyang tawhanong banay!
Unsay Imong Tubag, Mahitungod sa mga Hitabo “sa Ilalom sa Adlaw”?—
◻ Sa unsang diwa nga “walay butang bag-o”?
◻ Kanus-a ug sa unsang paagi mitungha ang “usa ka bag-ong linalang”?
◻ Unsay nasakop sa “paglalang pag-usab”?
◻ Sa unsang paagi magpadayon “ang mga panahon sa pagpasig-uli,” ug uban ang unsang talagsaong sangpotanan?
[Hulagway sa panid 26]
Makalilisang gayod ang komentaryo bahin sa gitawag nga sibilisasyon nga ang kalibotan karon nagagugol sa dako kaayong kantidad nga 1.9 milyong dolyar sa matag minuto alang sa armas! Kini sobra kaayo sa pagpakaon, pagbiste, ug paghatag puy-anan sa tanang katawhan nga nagapuyo karon sa kakabos. Sa laing bahin, ang pondong bombang megaton makapatay sa tanang tawo sa yuta—lima ka bilyon kanato—sa 12 ka pilo. Gitahong katunga sa milyon sa labing utokang mga tawo sa kalibotan nagatrabaho sa paggamag labi pang malaglagong mga armas.
[Tinubdan]
Letrato sa U.S. Army