Mga Pangutana Gikan sa mga Magbabasa

Unsay posisyon sa mga yayongan sa arka sa pakigsaad, sanglit ang 1 Hari 8:8 nagpaila nga kini makita gikan sa Balaan?

Sa dihang gihatag ni Jehova kang Moises ang disenyo sa tabernakulo didto sa kamingawan, ang pangunang bahin mao ang arka sa pakigsaad. Kining rektanggulo, hinaklapan-ug-bulawan nga kaban maoy butanganan sa mga papan sa Balaod ug sa ubang mga butang. Gibutang kini diha sa kinasulorang lawak, ang Labing Balaan. Sa ibabaw sa tabon sa Arka dihay duha ka bulawang larawan sa mga kerubin nga binukhad ang mga pako. Sa matag kilid sa Arka, dihay mga argolya aron kini mahimong dalhon pinaagi sa duha ka yayonganan, nga hinimo sa kahoyng akasya nga gihaklapan ug bulawan. Makataronganon nga ang mga yayongan gisul-ot diha sa mga argolya ug ubay sa gitas-on sa Arka. Busa, tungod kay ang Arka nahimutang diha sa Labing Balaan sa tabernakulo, nga nag-atubang sa silangan, ang mga yayongan maoy diha sa amihanan-habagatan nga posisyon. Sa ulahi mao usab kana ang posisyon sa dihang ang Arka gipahimutang diha sa templo nga gitukod ni Solomon.—Exodo 25:10-22; 37:4-9; 40:17-21.a

Usa ka kortina ang nagbahin sa Labing Balaan ug sa Balaan (ang gawas nga lawak). Ang mga saserdote sa Balaan dili makasusi sa Labing Balaan ug motan-aw sa Arka, nga niana gipresentar sa Diyos ang iyang kaugalingon. (Hebreohanon 9:1-7) Busa, ang 1 Hari 8:8 morag makapalibog: “Ang mga yayongan tag-as, mao nga ang mga tumoy sa yayongan makita gikan sa Balaan sa atubangan sa kinasulorang lawak, apan sila dili-makita sa gawas.” Ang samang punto gipahayag sa 2 Cronicas 5:9. Sa unsang paagi ang mga yayongan makita ni bisan kinsa diha sa lawak nga Balaan sa templo?

Gihanduraw sa pipila nga ang mga yayongan midapat sa kortina, nga tungod niana adunay makitang mga bugdo. Apan dili mahimong ingon niana kon ang mga yayongan maoy diha sa amihanan-habagatan nga posisyon, nga ang kortina ubay sa mga yayongan. (Numeros 3:38) Adunay mas makataronganong katin-awan. Ang mga yayongan lagmit makita kon dihay diyutayng kal-ang tali sa kortina ug sa bungbong sa templo o sa dihang ang hataas nga saserdote kinahanglang mosulod sa Labing Balaan. Ang kortina nagsalipod sa Arka mismo, apan ang mga yayongan nga naglabaw sa matag kilid lagmit makita lahos sa kal-ang. Bisan pag katuohan kini nga katin-awan, dili gayod kita mahimong dogmatiko bahin niana.

Tataw, adunay daghang detalye nga wala pa nato mahibaloi. Gihisgotan ni apostol Pablo ang pipila ka bahin diha sa iyang sulat ngadto sa mga Hebreohanon. Dayon siya mikomento: “Dili karon ang panahon sa paghisgot nga detalyado mahitungod niining mga butanga.” (Hebreohanon 9:5) Ang umaabot nga pagbanhaw sa matinumanong mga tawo magbukas gayod ug makapadasig nga mga kahigayonan sa pagkahibalo gikan sa mga tawo sama kang Moises, Aaron, Bezalel, ug sa uban pa kinsa personal nga nasinati sa disenyo ug obra sa tabernakulo.—Exodo 36:1.

[Footnote]