DISIPLINA
Ang Hebreohanong nombre nga mu·sarʹ ug ang berbo nga ya·sarʹ nagkahulogang “disiplina,” “pagkastigo,” “pagtul-id,” “pagtambag.” Sa Gregong Septuagint ug sa Kristohanon Gregong Kasulatan, ang katumbas nga nombreng pai·deiʹa ug ang berbong pai·deuʹo sa panguna maoy samag kahulogan. Gikuha gikan sa pais, nga nagkahulogang “bata,” ang pai·deiʹa pangunang nagtumong sa mga gikinahanglan aron sa pagmatuto sa mga bata—disiplina, instruksiyon, edukasyon, pagtul-id, pagkastigo.
Mga Tinubdan ug Katuyoan. Ingong kapahayagan sa iyang gugma, si Jehova nagdisiplina sa iyang katawhan. (Pr 3:11, 12) Siya naghatag kanilag instruksiyon nga magtul-id sa sayop nga mga panglantaw ug mag-umol sa ilang mga panghunahuna ug panggawi. Alang sa mga Israelinhon sa panahon ni Moises, ang disiplina naglakip sa ilang pagkasaksi sa mga pagpadayag bahin sa kabantog sa Diyos. Dihay mga pagpasundayag sa dili-hitupngan nga gahom sa dihang si Jehova nagpahamtang ug paghukom sa tanang diyos sa Ehipto, nagpagawas sa iyang katawhan, ug naglaglag sa Ehiptohanong kasundalohan didto sa Pulang Dagat. Dihay makalilisang nga mga paghukom nga gipahamtang batok sa dili-masinugtanong mga Israelinhon. Ug dihay milagrosong pagtaganag pagkaon ug tubig uban ang mga pagtulon-an bahin sa kahinungdanon sa pagbutang diha sa kasingkasing ug sa pagpadapat sa tanan nga gisulti ni Jehova. Kining tanan nga disiplina nagpaubos kanila ug nagpasiugda nganha kanila sa panginahanglan sa tukmang pagkahadlok kang Jehova, nga ipakita pinaagi sa pagtuo ug pagkamasinugtanon.—Deu 8:3-5; 11:2-7.
Sagad nga ang disiplina ni Jehova ipadangat pinaagi sa iyang mga hawas, sa tinudlong mga awtoridad. Ang usa ka Israelinhon nga binakak nga nagsumbong sa iyang asawa nga kuno dili ulay sa panahon sa pagminyo kinahanglang disiplinahon sa mga ansiyano nga nag-alagad ingong mga maghuhukom. (Deu 22:13-19) Ang mga ginikanan naghawas kang Jehova sa dihang sila tukmang magdisiplina sa ilang mga anak. Ug ang mga anak angay nga mosanong sa maong disiplina ingong pagpakita sa ginikananong gugma, nga gihimo alang sa ilang walay kataposang kaayohan. (Pr 1:8; 4:1, 13; 6:20-23; 13:1, 24; 15:5; 22:15; 23:13, 14; Efe 6:4) Sa Kristohanong kongregasyon, ang Pulong sa Diyos gigamit sa mga ansiyano sa pagtaganag disiplina—pahimangno, pagtul-id, pagbadlong. (2Ti 3:16) Ang katuyoan sa disiplina ni Jehova nga ipahamtang ngadto sa mga Kristohanon nga nakasala mao ang pagluwas kanila gikan sa pagpakasala ug ang pagpugong kanila nga mahilakip sa pagkahinukman nga ipahayag batok sa dili-diyosnong kalibotan. (1Co 11:32) Kay ulo sa Kristohanong kongregasyon, gitino ni Jesu-Kristo nga ikahatag ang gikinahanglang disiplina ingong kapahayagan sa iyang pagmahal.—Pin 3:14, 19.
Ang usa ka bug-at nga matang sa disiplina mao ang pagpalagpot gikan sa kongregasyon. Gihimo kini ni apostol Pablo sa dihang iyang gitugyan si Alejandro ug si Himeneo “kang Satanas.” (1Ti 1:20) Kay giputol gikan sa kongregasyon, sila bahin na usab sa kalibotan nga ilalom sa paggahom ni Satanas.—1Co 5:5, 11-13.
Kon unsay tugotan ni Jehova nga modangat sa iyang mga alagad ingong paglutos, kini magsilbing disiplina, o pagbansay kanila, nga magpatungha sa tilinguhaong bunga nga pagkamatarong nga pahimuslan diha sa pakigdait human sa pagsulay. (Heb 12:4-11) Bisan ang Anak sa Diyos gisangkapan usab aron mahimong maluluy-on ug mabinationg hataas nga saserdote pinaagi sa mga pag-antos nga gitugotan sa iyang Amahan nga iyang maagoman.—Heb 4:15.
Mga Sangpotanan sa Pagsunod ug sa Dili Pagsunod. Ang mga daotan, ang mga buangbuang, o ang mga dunot sa moral nagpakita sa ilang pagdumot sa disiplina ni Jehova pinaagi sa bug-os nga pagsalikway niini. (Sal 50:16, 17; Pr 1:7) Ang daotang mga sangpotanan gikan sa maong kabuangan mao ang dugang pang disiplina, nga sa kasagaran hilabihan nga pagkastigo. Sumala sa giingon sa proverbio: “Ang disiplina sa mga buangbuang maoy kabuangan.” (Pr 16:22) Mahimong ikapadangat nila sa ilang kaugalingon ang kakabos, kaulawan, sakit, ug bisan ang ahat nga kamatayon. Ang kasaysayan sa mga Israelinhon nag-ilustrar kon unsa ka dako ang kapildihan nga maagoman. Wala nila panumbalinga ingong disiplina ang pagsaway ug pagtul-id nga gipahayag pinaagi sa mga manalagna. Wala nila tagda ingong disiplina ang paghikaw ni Jehova sa iyang proteksiyon ug panalangin. Sa kataposan, ilang naagoman ang bug-at nga disiplina nga pasiunang gipahibalo—sila nasakop ug nadestiyero.—Jer 2:30; 5:3; 7:28; 17:23; 32:33; Os 7:12-16; 10:10; Sof 3:2.
Sa kasukwahi, ang pagdawat sa disiplina, inubanan sa tukmang kahadlok kang Jehova, maghimo sa usa nga maalamon, nga makagamit sa kahibalo sa hustong paagi, ug sa ingon matabangan nga makalikay sa daghang kasakit ug pag-antos. Sa dihang tumanon, ang disiplina nga mapabilhong gidawat makaamot sa pagpalugway sa presenteng kinabuhi sa usa ka tawo ug nagsaad ug dumalayong kaugmaon. Busa, husto gayod nga pabilhan pag-ayo ang disiplina.—Pr 8:10, 33-35; 10:17.