Pakigsuod sa Diyos
Si Jehova Naghatag Kanatog Kagawasan sa Pagpili
“NABALAKA ko nga basin dili ko makapabiling matinumanon kang Jehova.” Kana ang giingon sa usa ka Kristohanong dalaga nga mibating siya dili gayod molampos sa pag-alagad tungod sa iyang daotang kasinatian sa pagkabata. Tinuod ba kana? Dili gayod. Wala usab kana magpasabot nga dili na nato mausab ang atong kahimtang. Gihatagan kita ni Jehova nga Diyos ug kagawasan sa pagpili, mao nga kita makapili kon unsaon nato sa paggamit ang atong kinabuhi. Buot ni Jehova nga atong himoon ang hustong mga pagpili, ug ang iyang Pulong, ang Bibliya, nagtug-an kanato kon unsaon nato kana paghimo. Tagda ang mga pulong ni Moises sa Deuteronomio kapitulo 30.
Lisod bang masayran kon unsay gikinahanglan sa Diyos kanato ug dayon buhaton kini?a Si Moises nag-ingon: “Kining sugo nga akong gisugo kanimo niining adlawa dili hilabihan ka lisod alang kanimo, ni halayo kini.” (Bersikulo 11) Si Jehova dili mangayo ug labaw sa atong maarangan. Ang iyang mga sugo dili mabug-at ug kita makahimo sa pagtuman niana. Mahimo usab natong mahibaloan kon unsay iyang mga gikinahanglan kanato. Dili kinahanglang mosaka kita “sa mga langit” o “motabok sa dagat” aron masayran kon unsay gidahom sa Diyos kanato. (Bersikulo 12, 13) Ang Bibliya tin-awng nagpadayag kon unsaon nato paggamit ang atong kinabuhi.—Miqueas 6:8.
Apan si Jehova dili mopugos kanato sa pagsunod kaniya. Si Moises nag-ingon: “Gibutang ko sa imong atubangan niining adlawa ang kinabuhi ug ang kaayohan, ug ang kamatayon ug ang kadaotan.” (Bersikulo 15) Kita may kagawasan sa pagpili tali sa kinabuhi o sa kamatayon, sa maayo o sa daotan. Mahimong pilion nato ang pagsimba ug pagsugot sa Diyos nga moresultag mga panalangin, o ang pagsupak kaniya nga mosangpot sa atong kaalaotan. Kita ang modesisyon kon hain niana ang atong pilion.—Bersikulo 16-18; Galacia 6:7, 8.
Hinungdanon ba alang kang Jehova kon unsay atong pilion? Siyempre hinungdanon! Ang Diyos nag-inspirar kang Moises sa pag-ingon: “Pilion mo ang kinabuhi.” (Bersikulo 19) Apan sa unsang paagi mapili nato ang kinabuhi? “Pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya.” (Bersikulo 20) Kon atong gihigugma si Jehova, buot natong mamati ug magmasinugtanon kaniya ug mounong kaniya, bisag unsa pay mahitabo. Sa paghimo niana, atong gipili ang kinabuhi—ang labing maayong paagi sa pagkinabuhi nga moresulta sa kinabuhing walay kataposan sa bag-ong kalibotan sa Diyos.—2 Pedro 3:11-13; 1 Juan 5:3.
Ang mga pulong ni Moises nagtudlo kanatog makapahupay nga kamatuoran. Bisag unsay imong kasinatian niining daotang kalibotan, kana wala magpasabot nga ikaw wala nay mahimo ug segurado nang mapakyas. Gipabilhan ka ni Jehova pinaagi sa paghatag kanimog kagawasan sa pagpili. Oo, makapili ka sa paghigugma kang Jehova, pagpamati kaniya, ug pag-unong kaniya. Kon kanay imong pilion, panalanginan ni Jehova ang imong mga paningkamot.
Ang kamatuoran nga kita may kagawasan sa pagpili sa paghigugma ug pag-alagad kang Jehova nakapahupay sa babayeng gihisgotan sa sinugdan. Siya miingon: “Gihigugma ko gayod si Jehova. Usahay malimtan nako nga ang labing hinungdanon mao nga gihigugma ko si Jehova. Busa makahimo ako sa pagpabiling maunongon kaniya.” Makahimo ka usab niana sa tabang ni Jehova.
[Footnote]
a Tan-awa ang artikulong “Pakigsuod sa Diyos—Unsay Gipangayo ni Jehova Kanato?” diha sa Oktubre 1, 2009 nga gula sa Ang Bantayanang Torre.