Gituman Nila ang Kabubut-on ni Jehova

Gibayaw ni Elias ang Matuod nga Diyos

SIYA ang labing pinangitang tawo sa Israel. Siya tino gayong patyon kon makit-an siya sa hari. Kinsa kining pinangitang lalaki? Ang manalagna ni Jehova nga si Elias.

Gipahinabo ni Haring Ahab ug sa iyang paganong asawa, si Jezebel, nga molambo ang pagsimba ni Baal sa Israel. Ingong resulta, nagpadalag hulaw si Jehova ibabaw sa yuta, nga niining tungora anaa na sa ikaupat ka tuig niini. Ang nasuko nga si Jezebel misugod sa pagpapatay sa mga manalagna ni Jehova, apan buot ni Ahab nga mamatay ilabina si Elias. Si Elias ang nag-ingon kang Ahab kapin sa tulo ka tuig nga miagi: “Walay yamog ni ulan niining mga tuiga, gawas kon isugo sumala sa akong pulong!” (1 Hari 17:1) Ug ang misangpot nga hulaw nagpadayon gihapon.

Niining makuyawng kahimtang, si Elias gisultihan ni Jehova: “Lakaw, magpakita ka kang Ahab, kay ako magpadala ug ulan sa ibabaw sa yuta.” Sa dakong personal nga kapeligrohan, gisugot ni Elias ang sugo ni Jehova.​—1 Hari 18:​1, 2.

Duha ka Magkaaway Nagkita

“Ikaw ba kini, ang magdadala ug kasamok sa Israel?” nangutana si Ahab, sa pagkakita kang Elias. “Wala ako magdalag kasamok sa Israel,” maisogong mitubag si Elias, “kondili ikaw ug ang balay sa imong amahan, tungod kay inyong gisalikway ang mga sugo ni Jehova, ug ikaw nagasunod sa mga Baal.” Unya gisugo ni Elias nga ang tibuok Israel magtipon sa Bukid Carmelo, lakip “ang upat ka gatos ug kalim-an ka manalagna ni Baal ug ang upat ka gatos ka manalagna sa sagradong poste.” Dayon si Elias nagpahayag sa panon: “Hangtod kanus-a nga magkiangkiang kamo taliwala sa duha ka lahi nga mga hunahuna?a Kon si Jehova mao ang matuod nga Diyos, sunda siya; apan kon si Baal man, sunda siya.”​—1 Hari 18:​17-21.

Ang mga tawo walay timik. Tingali ilang naamgohan ang ilang pagkasad-an sa dili paghatag ug eksklusibong debosyon kang Jehova. (Exodo 20:​4, 5) O lagmit nga ang ilang tanlag nahabol na pag-ayo nga wala na nila isipa nga sala ang pagbahin sa ilang pagkamaunongon tali kang Jehova ug kang Baal. Sa bisan unsang kaso, gisugo ni Elias ang katawhan nga magpatunghag duha ka toreyong baka​—usa alang sa mga manalagna ni Baal ug ang lain alang kaniya. Ang duha ka baka andamon aron ihalad, apan walay kalayo nga pasigaon. “Tawgon ninyo ang ngalan sa inyong diyos,” miingon si Elias, “ug ako, sa akong bahin, magtawag sa ngalan ni Jehova; ug mahitabo nga ang matuod nga Diyos nga magatubag pinaagig kalayo mao ang matuod nga Diyos.”​—1 Hari 18:​23, 24.

Si Jehova Nabayaw

Ang mga manalagna ni Baal nagsugod sa “pagkiangkiang palibot sa halaran nga ilang gihimo.” Sa tibuok buntag sila misinggit: “Oh Baal, tubaga kami!” Apan si Baal wala motubag. (1 Hari 18:26) Unya si Elias misugod sa pagbiaybiay kanila: “Kusga ninyo pagsinggit, kay siya usa ka diyos.” (1 Hari 18:27) Ang mga manalagna ni Baal nagsamad pa sa ilang kaugalingon pinaagi sa mga kutsilyo ug mga salapang​—usa ka batasan nga sagad gibuhat sa mga pagano aron mapukaw ang kaluoy sa ilang mga diyos.b​—1 Hari 18:28.

Niining tungora palis na, ug ang mga magsisimba ni Baal nagpadayon “sa paglihok ingong mga manalagna”​—usa ka prase nga niini nga konteksto may ideya sa pagkatarantar ug pagkawala ug pagpugong sa kaugalingon. Milabay na ang kaudtohon, si Elias sa kataposan miingon sa tanang katawhan: “Dumuol kanako.” Ang tanan mitan-aw ug maayo samtang gitukod pag-usab ni Elias ang halaran ni Jehova, nagkalot ug kanalkanal libot niana, naghiwahiwa sa toreyong baka, ug gibutang kini diha sa halaran nga may sugnod nga kahoy. Human niana, ang baka, ang halaran, ug ang kahoy gihumod pag-ayo sa tubig, ug ang kanalkanal napuno sa tubig (sa walay duhaduha tubig-dagat nga kinuha gikan sa Dagat Mediteranyo). Unya, si Elias miampo kang Jehova: “Ipaila niining adlawa nga ikaw ang Diyos sa Israel ug ako ang imong alagad ug pinaagi sa imong pulong nga gihimo ko kining tanang butanga. Tubaga ako, Oh Jehova, tubaga ako, aron kining katawhan makahibalo nga ikaw, Jehova, mao ang matuod nga Diyos ug nga gipabalik mo pag-usab ang ilang kasingkasing.”​—1 Hari 18:​29-37.

Sa kalit, ang kalayo nahulog gikan sa langit “ug misunog sa halad nga sinunog ug sa mga kahoy ug sa mga bato ug sa abog, ug gitilapan ang tubig diha sa kanalkanal.” Ang mga tawong nanagtan-aw dihadiha miyukbo sa ilang kaugalingon, nga miingon: “Si Jehova mao ang matuod nga Diyos! Si Jehova mao ang matuod nga Diyos!” Sa sugo ni Elias, gidakop ang mga manalagna ni Baal ug gidala sa walog sa Kison, diin sila gipamatay.​—1 Hari 18:​38-40.

Pagtulon-an Alang Kanato

Gipakita ni Elias ang daw sama sa labaw-tawhanong kaisog. Bisan pa niana, ang magsusulat sa Bibliya nga si Santiago nagpasalig kanato nga “si Elias usa ka tawo nga may mga pagbating sama sa atoa.” (Santiago 5:17) Mibati siyag usa ka sukod sa kahadlok ug kabalaka. Pananglitan, sa dihang si Jezebel sa ulahi nanaad ug panimalos sa pagkamatay sa mga manalagna ni Baal, si Elias mikalagiw ug unya mituaw kang Jehova diha sa pag-ampo: “Igo na! Karon, Oh Jehova, kuhaa ang akong kalag.”​—1 Hari 19:4.

Wala kuhaa ni Jehova ang kalag ni Elias pinaagi sa kamatayon. Hinunoa, siya maluluy-ong mitagana ug tabang. (1 Hari 19:​5-8) Ang mga alagad sa Diyos karong adlawa makasalig nga buhaton ni Jehova ang sama sa dihang sila makaatubang sa mga panahon sa hilabihang kabalaka, tingali tungod sa pagsupak. Sa pagkatinuod, kon sila moampo alang sa tabang ni Jehova, siya makahatag kanila sa “gahom nga labaw sa kasarangan,” aron nga bisan kon sila “ginapiit sa tanang paagi,” sila dili mahimong “hagip-ot nga dili na makalihok.” Sa ingon, sila matabangan nga makalahutay, sama kang Elias.​—2 Corinto 4:​7, 8.

[Mga footnote]