Sa Dihang si Jesus Moabot sa Himaya sa Gingharian

“Pipila kanilang nagabarog dinhi . . . dili gayod makatilaw ug kamatayon hangtod nga makita nila una ang Anak sa tawo nga moanhi diha sa iyang gingharian.”​—MATEO 16:28.

1, 2. Unsay nahitabo wala magdugay human sa Pentecostes 32 K.P., ug unsay katuyoan sa hitabo?

WALA magdugay human sa Pentekostes 32 K.P., tulo sa mga apostol ni Jesu-Kristo nakakita sa usa ka halandomong panan-awon. Sumala sa dinasig nga rekord, “gikuyog ni Jesus si Pedro ug si Santiago ug si Juan nga iyang igsoon ug gidala sila ngadto sa usa ka habog nga bukid nga sila ra. Ug nausab ang iyang hitsura atubangan kanila.”​—Mateo 17:​1, 2.

² Ang panan-awon sa pagkausab sa dagway miabot sa kritikal nga panahon. Si Jesus nagsugod sa pagsugilon sa iyang mga sumusunod nga siya kinahanglang mag-antos ug mamatay sa Jerusalem, apan nalisdan sila sa pagsabot sa iyang mga pulong. (Mateo 16:​21-​23) Ang panan-awon nagpalig-on sa pagtuo sa tulo ka apostol ni Jesus sa pagpangandam sa iyang umaabot nga kamatayon ug usab sa mga tuig sa hagong buluhaton ug pagsulay nga masinati sa Kristohanong kongregasyon. Aduna ba kitay makat-onan gikan sa panan-awon karong adlawa? Oo, tungod kay ang gilandongan niini aktuwal nga mahitabo sa atong panahon.

3, 4. (a) Unsay giingon ni Jesus unom ka adlaw sa wala pa ang pagkausab sa dagway? (b) Hubita ang nahitabo sa panahon sa pagkausab sa dagway.

³ Unom ka adlaw sa wala pa ang pagkausab sa dagway, gisultihan ni Jesus ang iyang mga sumusunod: “Ang Anak sa tawo gikatinong moabot diha sa himaya sa iyang Amahan uban sa iyang mga anghel, ug unya bayaran niya ang matag usa sumala sa iyang panggawi.” Kining mga pulonga matuman “sa katiklopan sa sistema sa mga butang.” Si Jesus dugang miingon: “Sa pagkamatuod ako magaingon kaninyo nga adunay pipila kanilang nagabarog dinhi nga dili gayod makatilaw ug kamatayon hangtod nga makita nila una ang Anak sa tawo nga moanhi diha sa iyang gingharian.” (Mateo 16:​27, 28; 24:​3; 25:​31-​34, 41; Daniel 12:4) Ang pagkausab sa dagway nahitabo sa katumanan niining ulahing mga pulong.

⁴ Sa pagkatinuod unsa ang nakita sa tulo ka apostol? Ang mosunod maoy paghubit ni Lucas sa hitabo: “Samtang [si Jesus] nag-ampo ang panagway sa iyang nawong nausab ug ang iyang sapot migilakgilak sa kaputi. Usab, tan-awa! duha ka lalaki ang nakigkabildo kaniya, nga mao si Moises ug Elias. Kini sila mipakita uban ang himaya ug misugod sa pagpakigsulti bahin sa iyang pagbiya nga gikatinong iyang tumanon sa Jerusalem.” Dayon, “usa ka panganod naporma ug misugod sa paglandong [sa mga apostol]. Sa pagkasulod nila ngadto sa panganod, sila nangahadlok. Ug usa ka tingog migula gikan sa panganod, nga nag-ingon: ‘Kini mao ang akong Anak, ang usa nga gipili. Pamati kamo kaniya.’”​—Lucas 9:​29-31, 34, 35.

Pagtuo Gipalig-on

 5. Unsay epekto diha kang apostol Pedro ang pagkausab sa dagway?

⁵ Gipaila na ni apostol Pedro si Jesus ingong “ang Kristo, ang Anak sa buhi nga Diyos.” (Mateo 16:16) Ang mga pulong ni Jehova gikan sa langit nagpamatuod niana nga kailhanan, ug ang panan-awon sa pagkausab sa dagway ni Jesus maoy pasiuna sa pag-abot ni Kristo diha sa gahom ug himaya sa Gingharian, sa kataposan sa paghukom sa katawhan. Kapin sa 30 ka tuig human sa pagkausab sa dagway, si Pedro misulat: “Dili pinaagig pagsunod sa inantigong pagkamugna nga mga sugilanong bakak nga kami nagsinati kaninyo sa gahom ug pagkaanaa sa atong Ginoong Jesu-Kristo, hinunoa maoy pinaagi sa pagkahimong mga saksing-nakakita sa iyang kahalangdon. Kay nakadawat siya gikan sa Diyos nga Amahan ug dungog ug himaya, sa diha nga ang mga pulong sama niini gipadangat kaniya pinaagi sa halangdong himaya: ‘Kini mao ang akong anak, ang akong hinigugma, kinsa ako mismong giuyonan.’ Oo, kining mga pulonga among nadungog nga gipadangat gikan sa langit samtang didto kami uban kaniya sa balaang bukid.”​—2 Pedro 1:​16-18; 1 Pedro 4:17.

 6. Unsay gibutyag sa mga hitabo human sa pagkausab sa dagway?

⁶ Karong adlawa, ang atong pagtuo gipalig-on usab pinaagi sa nakita sa tulo ka apostol. Siyempre, nagpadayon ang mga hitabo sukad sa 32 K.P. Sa nagsunod nga tuig, si Jesus namatay ug gibanhaw, nga misaka ngadto sa tuong kamot sa iyang Amahan. (Buhat 2:​29-​36) Sa Pentecostes nianang tuiga, ang bag-ong “Israel sa Diyos” gipanganak, ug nagsugod ang kampanya sa pagsangyaw, sugod sa Jerusalem ug sa ulahi mikaylap ngadto sa mga kinatumyan sa yuta. (Galacia 6:​16; Buhat 1:8) Halos dihadiha ang pagtuo sa mga sumusunod ni Jesus gisulayan. Ang mga apostol gidakop ug grabeng gibukbok tungod kay sila dili mohunong sa pagsangyaw. Wala magdugay si Esteban gipatay. Dayon si Santiago, ang usa ka saksing-nakakita sa pagkausab sa dagway, gipatay. (Buhat 5:​17-​40; 6:​8–​7:​60; 12:​1, 2) Apan, si Pedro ug Juan nagpabiling buhi sa pag-alagad kang Jehova nga matinumanon sulod sa daghang katuigan. Sa pagkatinuod, sa hinapos ang unang siglo K.P., si Juan nagrekord ug dugang mga panan-awon bahin kang Jesus diha sa langitnong himaya.​—Pinadayag 1:​12-​20; 14:​14; 19:​11-​16.

 7. (a) Kanus-a nagsugod pagkatuman ang panan-awon sa pagkausab sa dagway? (b) Kanus-a si Jesus nagbayad sa pipila sumala sa ilang panggawi?

⁷ Sukad sa pagsugod “sa adlaw sa Ginoo” niadtong 1914, daghan sa mga panan-awon nga nakita ni Juan nangatuman. (Pinadayag 1:10) Komosta ang bahin sa ‘pag-abot [ni Jesus] sa himaya sa iyang Amahan,’ ingon sa gilandongan sa pagkausab sa dagway? Kini nga panan-awon nagsugod sa pagkatuman sa pagkatawo sa langitnong Gingharian sa Diyos niadtong 1914. Sa dihang si Jesus, sama sa bituon nga pang-adlaw, mosubang sa unibersal nga talan-awon ingong usa ka bag-ong naentronong Hari, kana, sa mahulagwayong pagkasulti, ang banagbanag sa usa ka bag-ong adlaw. (2 Pedro 1:​19; Pinadayag 11:​15; 22:16) Si Jesus ba niadtong panahona nagbayad sa pipila sumala sa ilang panggawi? Oo. Adunay kusganong pamatuod nga wala magdugay human niadto, ang langitnong pagkabanhaw sa dinihogang mga Kristohanon nagsugod.​—2 Timoteo 4:​8; Pinadayag 14:13.

 8. Unsang mga hitabo ang magtimaan sa kataposan sa katumanan sa panan-awon sa pagkausab sa dagway?

⁸ Apan, sa dili madugay si Jesus moabot “diha sa iyang himaya, ug ang tanang anghel uban kaniya” aron sa paghukom sa tanang katawhan. (Mateo 25:31) Nianang panahona, siya mopadayag sa iyang kaugalingon sa tanan niyang halangdong himaya ug bayaran ang “matag usa” sumala sa iyang panggawi. Ang mga samag-karnero magapanunod sa walay kataposang kinabuhi diha sa Gingharian nga giandam alang kanila, ug ang mga samag-kanding mopahawa ngadto sa “walay kataposang pagkaputol.” Pagkahalangdong konklusyon unya kana sa katumanan sa panan-awon sa pagkausab sa dagway!​—Mateo 25:​34, 41, 46; Marcos 8:​38; 2 Tesalonica 1:​6-​10.

Gihimayang mga Kauban ni Jesus

 9. Angay ba kitang magdahom nga si Moises ug Elias mahiuban kang Jesus sa katumanan sa panan-awon sa pagkausab sa dagway? Ipatin-aw.

⁹ Si Jesus wala mag-inusara sa pagkausab sa dagway. Si Moises ug Elias nakit-an uban kaniya. (Mateo 17:​2, 3) Literal ba silang presente? Dili, kay silang duha dugay nang namatay ug natulog diha sa abog nga nagpaabot ug pagkabanhaw. (Ecclesiastes 9:​5, 10; Hebreohanon 11:35) Sila ba magpakita uban kang Jesus sa dihang siya moabot sa langitnong himaya? Dili, tungod kay si Moises ug Elias nabuhi sa wala pa buksi alang sa mga tawo ang langitnong paglaom. Sila mahimong bahin sa yutan-ong “pagkabanhaw sa . . . matarong.” (Buhat 24:15) Busa ang ilang pagpakita sa panan-awon sa pagkausab sa dagway maoy simboliko. Mahitungod sa unsa?

10, 11. Kinsay gilandongan ni Elias ug Moises sa nagkalainlaing mga kahimtang?

¹⁰ Sa ubang mga kahimtang, si Moises ug Elias maoy matagnaong mga larawan. Ingong tigpataliwala sa pakigtugon sa Kasugoan, si Moises naglandong kang Jesus, ang Tigpataliwala sa bag-ong pakigtugon. (Deuteronomio 18:​18; Galacia 3:​19; Hebreohanon 8:6) Si Elias naglandong kang Juan Bawtista, ang mag-uuna sa Mesiyas. (Mateo 17:​11-​13) Dugang pa, sa konteksto sa Pinadayag kapitulo 11, si Moises ug Elias naglandong sa dinihogang nanghibilin sa panahon sa kataposan. Giunsa nato pagkahibalo niana?

¹¹ Aw, paklia ang Pinadayag 11:​1-6. Sa bersikulo 3 atong mabasa: “Ipahinabo ko nga magapropesiya ang akong duha ka saksi sa usa ka libo ug duha ka gatos ug kan-uman ka adlaw nga magsininag sakong-panapton.” Kining tagnaa natuman diha sa nanghibilin sa dinihogang mga Kristohanon sa panahon sa Gubat sa Kalibotan I.a Nganong duha ka saksi? Tungod kay ang dinihogang nanghibilin nagabuhat ug mga buhat nga, sa espirituwal nga paagi, sama niadtong gibuhat ni Moises ug Elias. Ang mga bersikulo 5 ug 6 nagpadayon sa pag-ingon: “Kon si bisan kinsa buot nga modaot [sa duha ka saksi], manggula ang kalayo gikan sa ilang mga baba ug tukbon ang ilang mga kaaway; ug kon si bisan kinsa buot man gayod nga modaot kanila, niining paagiha siya pagapatyon. Kini sila adunay awtoridad sa pagtak-op sa langit aron nga walay pag-ulan sulod sa mga adlaw sa ilang pagpropesiya, ug sila adunay awtoridad ibabaw sa mga tubig nga himoon kini silang dugo ug sa pagbunal sa yuta pinaagi sa tanang matang sa hampak segun sa kasubsob nga buot nila.” Busa, kita gipahinumdoman sa mga milagro nga gibuhat ni Elias ug Moises.​—Numeros 16:​31-​34; 1 Hari 17:​1; 2 Hari 1:​9-​12.

12. Sa kahimtang sa pagkausab sa dagway, kinsay gilarawanan ni Moises ug Elias?

¹² Nan, kinsa ang gilandongan ni Moises ug Elias diha sa kahimtang sa pagkausab sa dagway? Si Lucas nag-ingon nga sila nakit-an duyog kang Jesus “uban ang himaya.” (Lucas 9:31) Tin-aw, sila naglandong sa mga Kristohanon nga gidihogan sa balaang espiritu ingong “kaubang mga manununod” ni Jesus ug kinsa sa ingon nakadawat ug kahibulongang paglaom nga mahimong “duyog nga pagahimayaon” uban kaniya. (Roma 8:17) Ang nabanhawng mga dinihogan mahiuban kang Jesus sa dihang siya moabot diha sa himaya sa iyang Amahan aron “bayaran ang matag usa sumala sa iyang panggawi.”​—Mateo 16:27.

Mga Saksi Sama Kang Moises ug Elias

13. Unsang mga bahin ang magpaila kang Moises ug Elias ingong haom matagnaong mga larawan sa dinihogang kaubang mga manununod ni Jesus nga gihimaya uban kaniya?

¹³ Adunay talagsaong mga bahin nga magpaila kang Moises ug Elias ingong haom matagnaong mga larawan sa dinihogang kaubang mga manununod ni Jesus. Si Moises ug Elias pulos nag-alagad kang Jehova ingong mga tigpamaba sa daghang katuigan. Ang duha miatubang sa kasuko sa usa ka magmamando. Sa panahon sa panginahanglan, ang matag usa gipaluyohan sa langyawng banay. Ang duha maisogong nanagna atubangan sa mga hari ug mibarog nga malig-on batok sa bakak nga mga manalagna. Si Moises ug Elias nakakita sa mga pagpasundayag sa gahom ni Jehova sa Bukid sa Sinai (gitawag usab ug Horeb). Ang duha nagtudlog mga sumusunod sa silangang bahin sa Jordan. Ug sa mga panahon ni Moises (uban kang Josue) ug Elias (uban kang Eliseo) gihimo ang kinadaghanang milagro, gawas niadtong nahitabo sa panahon sa tibuok-kinabuhi ni Jesus.b

14. Sa unsang paagi ang mga dinihogan nag-alagad ingong tigpamaba ni Jehova, sama kang Moises ug Elias?

¹⁴ Dili ba kanang tanan nagpahinumdom kanato sa Israel sa Diyos? Oo, tino gayod. Gisultihan ni Jesus ang iyang matinumanong mga sumusunod: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo. Ug, tan-awa! ako uban kaninyo sa tanang mga adlaw hangtod sa katiklopan sa sistema sa mga butang.” (Mateo 28:​19, 20) Sa pagsunod niining mga pulonga, ang dinihogang mga Kristohanon nag-alagad ingong mga tigpamaba ni Jehova sukad sa Pentecostes 33 K.P. hangtod karon. Sama kang Moises ug Elias, giatubang nila ang kasuko sa mga magmamando ug nagpamatuod kanila. Gisultihan ni Jesus ang iyang 12 ka apostol: “Taralon kamo atubangan sa mga gobernador ug mga hari tungod ug alang kanako, ingong usa ka pagsaksi ngadto kanila ug sa kanasoran.” (Mateo 10:18) Ang iyang mga pulong natuman nga sublisubli sa panahon sa kasaysayan sa Kristohanong kongregasyon.​—Buhat 25:​6, 11, 12, 24-​27; 26:3.

15, 16. Anaa ang unsang kaamgid tali sa mga dinihogan sa usa ka bahin ug kang Moises ug Elias sa laing bahin mahitungod sa (a) maisogong pagbarog alang sa kamatuoran? (b) pagdawat ug tabang gikan sa mga dili-Israelinhon?

¹⁵ Dugang pa, ang dinihogang mga Kristohanon walay kokahadlok sama kang Moises ug Elias sa pagbarog dapig sa kamatuoran batok sa relihiyosong kabakakan. Hinumdomi kon giunsa pagsaway ni Pablo ang Hudiyohanong bakak nga propeta nga si Bar-Jesus ug mataktikanhon apan hugot nga giladlad ang kabakakan sa mga diyos sa mga taga-Atenas. (Buhat 13:​6-​12; 17:​16, 22-​31) Hinumdomi, usab, nga sa modernong panahon ang mga dinihogang nanghibilin maisogong nagyagyag sa Kakristiyanohan ug ang ilang pagpanaksi naghampak kaniya.​—Pinadayag 8:​7-​12.c

¹⁶ Sa dihang si Moises mikalagiw sa kasuko ni Paraon, midangop siya sa balay sa dili-Israelinhon, si Reuel, nga gitawag usab ug Jetro. Sa ulahi, si Moises nakadawat ug bililhong organisasyonal nga tambag gikan kang Reuel, kansang anak nga lalaki nga si Hobab naggiya sa Israel latas sa kamingawan.d (Exodo 2:​15-​22; 18:​5-​27; Numeros 10:29) Ang mga membro ba sa Israel sa Diyos susamang gitabangan sa mga indibiduwal nga dili mga dinihogang membro sa Israel sa Diyos? Oo, sila gipaluyohan sa “dakong panon” sa “ubang karnero,” nga nagpakita sa talan-awon sa panahon niining kataposang mga adlaw. (Pinadayag 7:​9; Juan 10:​16; Isaias 61:5) Nagtagna sa mainit, mahigugmaong pagpaluyo nga itanyag niining “mga karnero” sa iyang dinihogang mga igsoon, si Jesus miingon ngadto kanila nga matagnaon: “Gigutom ako ug kamo mihatag kanakog makaon; giuhaw ako ug kamo mihatag kanakog mainom. Naestranyo ako ug kamo matinagdanong midawat kanako; hubo, ug kamo nagbisti kanako. Nasakit ako ug kamo miatiman kanako. Didto ako sa prisohan ug miadto kamo kanako. . . . Sa pagkamatuod ako magaingon kaninyo, Sa sukod nga gibuhat ninyo kini sa usa sa labing ubos niining akong mga igsoon, inyo kining gibuhat kanako.”​—Mateo 25:​35-40.

17. Sa unsang paagi ang mga dinihogan may kasinatiang susama nianang kang Elias diha sa Bukid sa Horeb?

¹⁷ Dugang pa, ang Israel sa Diyos may kasinatian nga susama nianang kang Elias sa Bukid sa Horeb.e Sama kang Elias sa panahong siya mikalagiw gikan kang Rayna Jezebel, ang nangahadlok nga dinihogang nanghibilin naghunahuna nga ang ilang buluhaton natapos na sa kataposan sa Gubat sa Kalibotan I. Unya, sama usab kang Elias, naatubang nila si Jehova, nga miabot sa paghukom niadtong mga organisasyon nga nag-angkong mao ang “balay sa Diyos.” (1 Pedro 4:​17; Malaquias 3:​1-3) Samtang nakaplagang nakulangan ang Kakristiyanohan, ang dinihogang nanghibilin giila ingong “ang kasaligan ug mabuot nga ulipon” ug gitudlo ibabaw sa tanang yutan-ong mga gipanag-iya ni Jesus. (Mateo 24:​45-​47) Sa Horeb, si Elias nakadungog sa “usa ka malinawon, mahinayng tingog” nga nagpamatuod nga iya kang Jehova, nga naghatag kaniyag dugang buluhaton nga pagabuhaton. Sa malinawng yugto sa mga tuig human sa gubat, ang matinumanong dinihogang mga alagad ni Jehova nakadungog sa iyang tingog gikan sa mga panid sa Bibliya. Sila usab nakasabot nga sila may komisyon nga pagatumanon.​—1 Hari 19:​4, 9-​18; Pinadayag 11:​7-​13.

18. Sa unsang paagi ang talagsaong mga pagpadayag sa gahom ni Jehova gipaagi sa Israel sa Diyos?

¹⁸ Sa kataposan, ang talagsaong mga pagpadayag ba sa gahom ni Jehova gipaagi sa Israel sa Diyos? Human sa kamatayon ni Jesus, gibuhat sa mga apostol ang daghang milagro, apan kini hinayhinay nga nawala. (1 Corinto 13:​8-​13) Karong adlawa, wala na kita makakitag mga milagro sa pisikal nga diwa. Sa laing bahin, si Jesus miingon sa iyang mga sumusunod: “Sa pagkamatuod gayod ako magaingon kaninyo, Siya nga nagapasundayag ug pagtuo kanako, kana siya usab mohimo sa mga buhat nga akong ginahimo; ug siya mohimog mga buhat nga labaw pa niini nila.” (Juan 14:12) Kini may unang katumanan samtang ang mga tinun-an ni Jesus nagsangyaw sa maayong balita sa tibuok nga Imperyo sa Roma sa unang siglo. (Roma 10:18) Mas dako pa nga buluhaton ang ginabuhat karong adlawa samtang gipangunahan sa dinihogang nanghibilin ang pagsangyaw sa maayong balita “sa tibuok gipuy-ang yuta ingong usa ka pagsaksi ngadto sa tanang kanasoran.” (Mateo 24:14) Ang resulta? Ang ika-20ng siglo nakasaksi sa pagpanigom sa labing daghan sa nagpahinungod, matinumanong mga alagad ni Jehova sa kasaysayan. (Pinadayag 5:​9, 10; 7:​9, 10) Pagkahalangdong pamatuod sa gahom ni Jehova!​—Isaias 60:22.

Mga Igsoon ni Jesus Moabot sa Himaya

19. Kanus-a nakit-an ang dinihogang mga igsoon ni Jesus nga uban kaniya sa himaya?

¹⁹ Samtang matapos sa nanghibilin sa dinihogang mga igsoon ni Jesus ang ilang yutan-ong kurso, sila pagahimayaon uban kaniya. (Roma 2:​6, 7; 1 Corinto 15:​53; 1 Tesalonica 4:​14, 17) Busa sila mahimong imortal nga mga hari ug mga saserdote sa langitnong Gingharian. Uban kang Jesus, sila unya “magapastol sa katawhan uban ang olisi nga puthaw nga sa ingon sila mangadugmok sama sa kulonon nga mga sudlanan.” (Pinadayag 2:​27; 20:​4-6; Salmo 110:​2, 5, 6) Uban kang Jesus, sila molingkod sa mga trono nga managhukom sa “napulog-duha ka tribo sa Israel.” (Mateo 19:28) Ang nag-agulong kalalangan maikagong nagpaabot niining mga hitaboa, nga maoy bahin sa “pagpadayag sa mga anak sa Diyos.”​—Roma 8:​19-​21; 2 Tesalonica 1:​6-8.

20. (a) Mahitungod sa unsang palaaboton nga ang pagkausab sa dagway nagpalig-on sa pagtuo ni Pedro? (b) Sa unsang paagi ang pagkausab sa dagway nagpalig-on sa mga Kristohanon karong adlawa?

²⁰ Si Pablo naghisgot sa pagpadayag ni Jesus sa panahon sa “dakong kasakitan” sa dihang siya misulat: “Siya moabot aron pagahimayaon may kalabotan sa iyang mga balaan ug pagatamdon nianang adlawa uban ang katingala may kalabotan sa tanan niadtong kinsa nagpasundayag ug pagtuo.” (Mateo 24:​21; 2 Tesalonica 1:10) Pagkahalangdong palaaboton kana alang kang Pedro, Santiago, Juan, ug sa tanang dinihogan-sa-espiritung mga Kristohanon! Ang pagkausab sa dagway nagpalig-on sa pagtuo ni Pedro. Sa pagkatinuod, ang pagbasa bahin niini nagpalig-on usab sa atong pagtuo ug nagpalig-on sa atong pagsalig nga si Jesus sa dili madugay ‘magabayad sa matag usa sumala sa iyang panggawi.’ Ang matinumanong dinihogang mga Kristohanon nga nakalahutay hangtod niining adlawa makakita sa ilang pagsalig nga gipamatud-an nga sila pagahimayaon uban kang Jesus. Gipalig-on sa ubang mga karnero ang ilang pagtuo sa kahibalo nga siya magaluwas kanila latas sa kataposan niining daotang sistema sa mga butang ngadto sa mahimayaong bag-ong kalibotan. (Pinadayag 7:14) Pagkamakapadasig nga mobarog nga malig-on hangtod sa kataposan! Ug kini nga panan-awon labaw pang magtudlo kanato, ingon sa atong makita sa mosunod nga artikulo.

[Mga footnote]

Nahinumdom Ka Ba?

◻ Kinsay nakit-an uban kang Jesus diha sa pagkausab sa dagway?

◻ Sa unsang paagi gipalig-on ang pagtuo sa mga apostol sa pagkausab sa dagway?

◻ Sa dihang si Moises ug Elias nagpakita “uban ang himaya” duyog kang Jesus diha sa pagkausab sa dagway, kinsa ang gihawasan nila?

◻ Anaa ang unsang kaamgid tali kang Moises ug Elias sa usa ka bahin ug sa Israel sa Diyos sa laing bahin?

[Hulagway sa panid 10]

Ang pagkausab sa dagway nagpalig-on sa pagtuo sa mga Kristohanon niadto ug karon