ABIEL

[Ang (Akong) Amahan Maoy Diyos].

1. Anak nga lalaki ni Zeror, ug kaliwat ni Becorat ug Apias, sa tribo ni Benjamin. Ang pagtandi sa 1 Cronicas 8:29-33 ug 9:35-39 sa 1 Samuel 9:​1, 2 ug 14:​50, 51 naghatag ug pasikaranan sa pagtuo nga si Abiel gitawag usab ug “Jeiel” sa asoy sa Cronicas, sanglit gipakita sa maong mga teksto nga si Jeiel maoy amahan ni Ner, kinsa nanganak kang Kis nga amahan ni Saul. Gipakita usab sa 1 Samuel 14:​50, 51 nga si Abiel (o Jeiel) maoy amahan ni Ner. Ang rekord sa Cronicas nagpakita nga si Jeiel (o Abiel) aduna pay laing siyam ka anak nga lalaki, nga usa kanila ginganlan ug Kis, ug kining magulang nga Kis mao ang uyoan sa anak nga lalaki ni Ner nga pareho niyag ngalan.

Kon ibutang ta nga si Abiel ug Jeiel maoy mga ngalan sa mao ra nga tawo, mahimong ingon niini ang talaan sa kagikan sama sa gipakita niini nga tsart.

Busa, sa dihang mabasa nato sa 1 Samuel 9:1 nga si Kis (nga mao, ang ikaduhang Kis nga amahan ni Saul) mao “ang anak nga lalaki ni Abiel,” mopatim-aw nga ang kahulogan mao nga siya ang apo ni Abiel, sama sa kasagarang kaso sa talaan sa kagikan diha sa Bibliya diin ang usa o kapin pang mga kaliwat wala ilakip sa talaan sa kagikan. (Busa, bisan tuod gihisgotan “ang banay sa mga Matrihanon” sa 1 Samuel 10:21 nga naglakip kang Kis ug Saul, ang ngalan ni Matri dili makita diha sa mga asoy nga atong gikonsiderar, ni sa ubang bahin sa Bibliya.)

Ang rekord sa 1 Cronicas (8:33; 9:39) daw tino kaayo sa pagpaila kang Ner ingong pursoso nga amahan sa ikaduhang Kis, ug dayag nga mao kini ang mas tin-aw tali sa duha ka asoy.​—Tan-awa ang KIS Num. 2 ug 3.

2. Usa usab ka Benjaminhon.​—Tan-awa ang ABI-ALBON.