KIS

1. Usa ka Merarihanong Levihanon nga anak nga lalaki ni Mali ug igsoon ni Eleasar. Tungod kay si Eleasar namatay nga walay mga anak nga lalaki, nga may mga anak nga babaye lamang, ang mga anak nga lalaki ni Kis nagkuha niini nga mga manununod ingong mga asawa. Usa sa “mga anak nga lalaki ni Kis” mao si Jerameel.​—1Cr 23:​21, 22; 24:29.

2. Usa ka Benjaminhon; ang anak nga lalaki ni Jeiel ug sa iyang asawa nga si Maaca. (1Cr 8:​29, 30) Ang iyang igsoong lalaki nga si Ner mao ang apohan ni Saul, ang unang hari sa Israel. (1Cr 9:35-39) Dayag nga ang amahan ni Kis nga si Jeiel gitawag usab ug Abiel.​—Tan-awa ang ABIEL Num. 1.

3. Usa ka Benjaminhon nga mao ang amahan ni Haring Saul. (1Sa 14:51; Buh 13:21) Usa siya ka adunahang membro sa banay sa mga Matrihanon. (1Sa 9:1; 10:21) Kini nga Kis mao ang anak nga lalaki ni Ner ug apo ni Jeiel (Abiel), busa mao ang pag-umangkon ni Kis nga gihisgotan sa itaas ug igsoon ni Abner. (1Cr 8:29-33; 9:35-39) Hinunoa, gitawag siya sa 1 Samuel 9:1 nga anak nga lalaki ni Abiel, dayag nga gigamit ang terminong “anak nga lalaki” sa pagpaila kaniya, dili ingong direktang anak nga lalaki ni Abiel (Jeiel), kondili ingong iyang apo nga lalaki.

Ang balay ni Kis dayag nga didto sa Gibea sa Benjamin (1Sa 10:26), bisan tuod nga didto sa Zela ang iyang lubnganan. (2Sa 21:14) Ang bugtong panghitabo nga gihisgotan sa Bibliya bahin kang Kis mao ang pagsugo niya sa iyang anak nga si Saul ug sa usa ka tig-alagad aron sa pagpangita sa pipila ka nawalang asna.​—1Sa 9:​3, 4.

4. Usa ka Levihanon sa panahon ni Haring Ezequias; anak nga lalaki ni Abdi sa mga anak nga lalaki ni Merari. Si Kis maoy usa sa mga Levihanon nga mitabang sa paghinlo sa templo sa unang tuig sa paghari ni Ezequias.​—2Cr 29:1-5, 12-17.

5. Usa ka Benjaminhong katigulangan ni Mardokeo nga ig-agaw ni Ester.​—Est 2:5-7.