Pabiling Buhi Aron Makakita sa Kalipay sa mga Lasang!
“I think that I shall never see
A poem lovely as a tree. . . .
Poems are made by fools like me,
But only God can make a tree.”
MAHITUNGOD sa kamatuoran nga “only God can make a tree” (ang Diyos lamang ang makahimog kahoy), tukmang masumpay unta sa Amerikanong magbabalak nga si Joyce Kilmer, kansang utokang kinabuhi napamubo sa Gubat sa Kalibotan I, ang hunahuna, ‘ug ang Diyos lamang ang makapabuhig kahoy.’
Bisan pa sa singgit “Luwasa ang Atong mga Lasang,” ang mga paningkamot sa tawo sa pagluwas sa kalasangan diyutay lamag kalamposan. Bisan ang “maayong balita” nga gihatag sa taho sa Septiyembre 1986 wala kaayo mohatag kalipay. Kini naghisgot ug “taas nga sukod sa pag-urong,” nga sa yano ang mga pulong nagkahulogan nga ang Waldsterben nagpadayon gihapon sa pagkaylap apan sa ubos nga gikusgon kay sa nangaging mga tuig.
Sumala sa pangunang pamantalaan sa Aleman, ang nagtubong pagbati sa pagkawalay kahimoan makita taliwala sa mga siyentipiko. Kini mikutlo kang Propesor Peter Schütt sa Institute of Forestry sa Munich, kinsa mipahayag sa nabalakang mga tumatambong: “Dili nato limbongan ang atong kaugalingon. Dugay na natong nakab-ot ang mga kinutoban sa atong mga posibilidad.” Siya mipasidaan nga kon dili molampos ang mga pagsulay karon sa pagsumpo sa paghugaw sa hangin, “wala nay mabilin pa kanato nga mahimong sulayan.”
Ug sa unsang paagi ang mga palaabuton sa pagsulbad sa problema sa polusyon sa hangin mabatbat? Mangiob, makapasubo, o makalilisang—magpili ka lang. “Ang kalidad sa hangin wala mouswag,” miingon ang pamantalaan sa Switzerland nga Die Weltwoche. Samtang ang “mga pisiologo sa tanom nagkamulo pa sa makahurot sa panahon, detalyadong pagtuki, aron sa pagtino kon unsang tighugaw ang mihampak sa unsa nga kahoy ug sa unsang sukod, . . . ang nabalaka niadtong mga tigmaneho nakabaton pag-usab sa ilang pagsalig sa kaugalingon ug kusog nga nagapadagan kay sa angay nila. Ang halin sa mga awto nga may catalytic converters miurong . . . Wala kaayoy nausab, gawas sa kagubot [mahitungod sa Waldsterben] nga dugay nang miagi.”
Haduol na ang Realistikong Solusyon
Ang pagtuo nga malamposong masulbad ang Waldsterben sa mga tawo dili realistikanhon. Ngano? Tungod kay sila kulang sa tukmang kahibalo sa mga hinungdan ug sa epektibong mga paagi sa pagsumpo niana. Dugang pa, ang mga tawo kulang sa gahom sa pagkontrolar sa kinaiyanhong mga puwersa sama sa sumbanan sa klima ug sa mga ecosystem. Gawas pa, ang napanunod nga pagkadalo nakapugong kanila sa pagsalikway sa personal nga mga intereses alang sa kaayohan sa tanan.
Apan, adunay katarongan sa pagbaton ug masanagong panglantaw. Ang kronolohiya sa Bibliya ug ang pisikal nga mga kamatuoran nagpakita nga ang dugay nang giampong Gingharian sa Diyos haduol na. Ang pagtukod niining kagamhanana gitagna hapit 1,900 ka tuig kanhi niining mga pulonga: “Nagapasalamat kami kanimo, Jehova nga Diyos, ang Makagagahom sa Tanan, ang Usa nga mao ang sa karon ug sa kagahapon, kay nahuptan mo ang imong dakong gahom ug gisugdan mo ang imong paghari. Apan ang kanasoran nangapungot, apan miabot ang imong kapungot, ug ang tinudlong panahon . . . sa paglaglag sa mga manglalaglag sa yuta.” (Pinadayag 11:17, 18) Sa dili madugay, sumala sa gisaad, “ang tinudlong panahon” moabot alang sa Diyos “sa paglaglag sa mga manglalaglag sa yuta,” lakip sa mga maghuhugaw nga nagadaot sa iyang kalasangan.
Ilalom sa pagmando sa Diyos, ang masinundanong katawhan tudloan sa hustong paagi kon unsaon sa pagpugong sa polusyon sa hangin ug sa resulta niining Waldsterben. Handurawa ang kalipay unya sa yuta, sa mahulagwayong pagkasulti, sa dihang ang katimbang sa kinaiyahan mapasig-uli uban sa positibong mga epekto sa klima, agrikultura, ug panglawas. “Pasagding magkalipay ang yuta, ug pasultiha sila taliwala sa mga nasod, nga ‘si Jehova nagahari na!’ . . . Ug pasagding manag-awit ang mga kahoy sa lasang.” (1 Cronicas 16:31-33) Mapasig-uli sa usa ka kahimtang nga labi pang matahom ug labi pang maayo sukad masukad, “ang mga kahoy sa lasang” sa tinuod may katarongan sa “pag-awit.”
Apan sa dili pa moabot kining panahona, malagmit nga mosamot ang Waldsterben. Pananglitan, sa Septiyembre 1986 ang gihisgotan sa ibabaw nga pamantalaan misulat: “Ang gikultibar nga mga tanom sa kapatagan nagsugod na sa pagkamatay; ang mga kahoyng cherry sa amihanan-kasadpan sa Switzerland nangloyloy, ug ang mga mag-uuma nanagpangayog tambag sa mga opisyales sa agrikultura.” Sama usab ang kahimtang sa Alemanya nga mitultol sa estado sa Baden-Württemberg sa pagsugod sa pagsusi sa koneksiyon sa polusyon sa hangin ug sa nangadaot nga mga kahoyng nagapamunga. Bisan wala pay nakuhang kaihapan, gitaho nga gituohan sa mga siyentipiko nga ilabinang nameligro ang stone fruits.
Ang mga taho nga sama niini makapahinumdom sa mga estudyante sa Bibliya sa Habacuc 3:17. Naghisgot bahin sa atong adlaw, kini nag-ingon: “Bisan pag dili na mamulak ang kahoyng higuera, ug walay bunga ang mga paras; ug ang kahoyng olibo, ug bisan pag wala nay maaning abot sa kaumahan.”
Apan, kon mosalig ka sa Diyos ug mopaluyo sa iyang pagmando sa Gingharian, ikaw, sama kang Habacuc, walay katarongang mahadlok. (Habacuc 3:18) Sa kasukwahi, may katarongan ka sa pagtan-aw sa umaabot nga masanagon ug malipayon. Hapit nang masulbad ang problema sa Waldsterben—sa dumalayon ug sa bug-os. Ikaw, usab, mahimong mabuhi sa pagkakita nga malipay ang lasang—ug ang tanang katawhan uban kanila!