MIZRAIM

Ang ikaduhang gitala taliwala sa mga anak nga lalaki ni Ham. (Gen 10:6) Si Mizraim mao ang katigulangan sa Ehiptohanong mga tribo (maingon man sa pipila ka dili-Ehiptohanong mga tribo), ug kini nga ngalan giisip usab nga nagtumong sa Ehipto. (Gen 10:​13, 14; 50:11) Busa, ang pulong nga “Ehipto” sa mga hubad nga Cebuano sa aktuwal maoy hubad sa Hebreohanong Mits·raʹyim (o Ma·tsohrʹ diha sa pipila ka teksto, 2Ha 19:24; Isa 19:6; 37:25; Miq 7:12). Ang mga Papan sa Amarna, nga gisulat sa unang katunga sa ikaduhang milenyo W.K.P., naghisgot sa Ehipto ingong Misri, susama sa modernong ngalang Arabiko alang sa maong yuta (Misr).

Daghang eskolar ang nagtuo nga ang Mizraim maoy usa ka dual form nga naghawas sa pagkaduha sa Ehipto (nga mao, ang Ibabaw ug Ubos nga Ehipto), apan kini maoy pangagpas lamang. (Tan-awa ang EHIPTO, EHIPTOHANON.) Ang mga ngalan sa mga kaliwat ni Mizraim lagmit anaa sa plural nga porma: Ludim, Anamim, Lehabim, Naptuhim, Patrusim, Casluhim, ug Captorim. (Gen 10:​13, 14; 1Cr 1:​11, 12) Tungod niini sila sagad gituohan nga naghawas sa mga ngalan sa mga tribo inay sa indibiduwal nga mga anak. Bisan tuod nga kini posible, angayng matikdan nga adunay ubang mga ngalan nga morag duha o plural ang ilang porma, sama sa Epraim, Apaim, ug Diblaim (Gen 41:52; 1Cr 2:​30, 31; Os 1:3), nga ang matag usa dayag nga nagtumong lamang sa usa ka indibiduwal.