Paghukom Gipakanaog sa Ubos nga Patag sa Desisyon
“Ang mga nasod . . . paadtoa sa ubos nga patag ni Jehosafat; kay didto ako molingkod aron sa paghukom sa tanang nasod.”—JOEL 3:12.
1. Nganong nakita ni Joel ang mga panon nga nagkatigom diha sa “ubos nga patag sa desisyon”?
“MGA panon, mga panon atua sa ubos nga patag sa desisyon”! Atong mabasa kanang makapapugwat nga mga pulong sa Joel 3:14. Nganong gitigom man kini nga mga panon? Si Joel mitubag: “Ang adlaw ni Jehova haduol na.” Mao kini ang dakong adlaw sa pagbindikar kang Jehova—ang adlaw sa pagpakanaog sa paghukom sa panonpanon nga misalikway sa natukod nga Gingharian sa Diyos ubos kang Kristo Jesus. Sa kataposan, pagabuhian sa “upat ka manulonda” sa Pinadayag kapitulo 7 ang “upat ka hangin sa yuta,” nga moresulta sa “dakong kasakitan ingon nianang wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab.”—Pinadayag 7:1; Mateo 24:21.
2. (a) Nganong ang dapit sa pagpakanaog sa paghukom ni Jehova haom nga gitawag nga “ubos nga patag ni Jehosafat”? (b) Sa unsang paagi hustong milihok si Jehosafat sa dihang giatake?
2 Sa Joel 3:12, ang dapit diin ipakanaog ang paghukom gitawag ug “ubos nga patag ni Jehosafat.” Sa katukma, panahon sa magubot nga yugto sa kasaysayan sa Juda, si Jehova nagpakanaog ug paghukom didto alang sa maayong Haring Jehosafat, kansang ngalan nagkahulogang “Maghuhukom si Jehova.” Ang pagkonsiderar sa nahitabo sa maong panahon motabang kanatog maayo sa pagsabot kon unsay duol nang mahitabo sa atong panahon. Ang talaan makita sa 2 Cronicas kapitulo 20. Sa bersikulo 1 sa maong kapitulo, atong mabasa nga “ang mga anak nga lalaki ni Moab ug ang mga anak nga lalaki ni Ammon ug uban kanila ang pipila sa mga Ammonim nangabot aron sa pagpakiggubat kang Jehosafat.” Unsay gibuhat ni Jehosafat? Iyang gihimo ang kanunayng gihimo sa matinumanong mga alagad ni Jehova panahon sa kalisod. Midangop siya kang Jehova alang sa giya, nga kinasingkasing nga miampo: “Oh among Diyos, dili ba nimo ipakanaog ang paghukom ibabaw kanila? Kay kanamo walay gahom atubangan niining dakong panon nga nangabot batok kanamo; ug kami mismo wala masayod kon unsay angay namong buhaton, apan ang among mga mata gitutok kanimo.”—2 Cronicas 20:12.
Si Jehova Mitubag ug Pag-ampo
3. Unsang mga instruksiyon ang gihatag ni Jehova sa Juda sa dihang giatake sila sa kasikbit nga mga nasod?
3 Samtang “kadtong tanan sa Juda nanagbarog atubangan ni Jehova, bisan ang ilang gagmayng kabataan, ilang mga asawa ug ilang mga anak,” si Jehova mitubag. (2 Cronicas 20:13) Sama nga iyang gigamit ang iyang “kasaligan ug mabuot nga ulipon” karong adlawa, busa ang dakong Tigpatalinghog sa pag-ampo nagpalig-on sa manalagnang Levihanon nga si Jahaziel sa paghatag sa Iyang tubag ngadto sa nanagkatigom. (Mateo 24:45) Atong mabasa: “Mao kini ang gipamulong ni Jehova kaninyo, ‘Ayaw kamo kahadlok ni magmaluya tungod niining dakong panon; kay ang gubat dili inyo, kondili iya sa Diyos. . . . Kamo dili kinahanglang makig-away niining higayona. Magpahimutang kamo, bumarog kamong walay lihok ug tan-awa ang kaluwasan ni Jehova alang kaninyo. . . . Ayaw kahadlok ni malisang. Ugma panggula kamo batok kanila, ug si Jehova magauban kaninyo.’”—2 Cronicas 20:15-17.
4. Sa unsang paagi nagbaod si Jehova nga ang iyang katawhan magmaaktibo, dili kay walay buhaton, sa dihang atubangon nila ang hagit sa kaaway?
4 Labaw pa ang gipangayo ni Jehova kang Haring Jehosafat ug sa iyang katawhan kay sa wala lamang silay buhaton, nga maghulat lamag milagrosong kaluwasan. Kinahanglang may inisyatibo sila sa pag-atubang sa hagit sa kaaway. Ang hari ug ‘kadtong tanan diha sa Juda, bisan ang ilang kabataan, ilang mga asawa ug ilang mga anak,’ nagpahayag ug lig-ong pagtuo samtang sila masinundanong mibangon ug buntag sayo ug nagmartsa aron pagsugat sa panon sa mga manunulong. Diha sa dalan, ang hari nagpadayon sa paghatag ug teokratikanhong instruksiyon ug pagdasig, nga nag-awhag kanila: “Tuohi si Jehova nga inyong Diyos aron kamo magkinabuhig dugay. Tuohi ang iyang mga propeta ug magmalamposon.” (2 Cronicas 20:20) Pagtuo kang Jehova! Pagtuo sa iyang mga propeta! Diha nahasandig ang yawi sa kalamposan. Maingon usab karong adlawa, samtang kita padayong magmaaktibo diha sa pag-alagad kang Jehova, hinaot nga dili kita magduhaduha nga iyang himoong madaogon ang atong pagtuo!
5. Sa unsang paagi aktibo ang mga Saksi ni Jehova karong adlawa samtang sila nagadayeg kang Jehova?
5 Sama sa mga taga-Judea sa adlaw ni Jehosafat, kita kinahanglang “maghatag ug pagdayeg kang Jehova, kay sa panahong walay tino ang iyang mahigugmaong-kalulot.” Unsaon man nato pagtanyag kini nga pagdayeg? Pinaagi sa atong masibotong pagsangyaw sa Gingharian! Samtang kadtong mga taga-Judea “misugod sa pag-awit ug pagdayeg,” sa ingon usab atong idugang sa atong pagtuo ang mga buhat. (2 Cronicas 20:21, 22) Oo, ipakita nato ang samang tinuod nga pagtuo samtang nangandam si Jehova sa paglihok batok sa iyang mga kaaway! Bisan tuod maorag dugay pa ang panahon, magmadeterminado kita sa paglahutay, aktibo sa pagtuo, sama sa ginabuhat sa iyang madaogong katawhan sa gubot nga mga dapit sa kalibotan karong adlawa. Sa pipila ka kayutaan nga grabeng nakaagom sa mga paglutos, kapintasan, gutom, ug tumang kalisod sa ekonomiya, ang matinumanong mga alagad sa Diyos nakasinati ug talagsaong mga resulta, ingon sa gitaho sa 1998 Yearbook of Jehovah’s Witnesses.
Si Jehova Nagaluwas sa Iyang Katawhan
6. Sa unsang paagi ang lig-ong pagtuo motabang kanato nga magmaunongon karon?
6 Ang di-diyosnong mga nasod nga naglibot sa Juda misulay sa paglikos sa katawhan sa Diyos, apan uban ang sulondang pagtuo ang mga alagad ni Jehova milihok pinaagi sa pag-awit ug mga pagdayeg kaniya. Ikapasundayag usab nato ang samang pagtuo karong adlawa. Pinaagi sa pagpuno sa atong mga kinabuhi sa mga buhat sa pagdayeg kang Jehova, atong mapalig-on ang atong espirituwal nga hinagiban, nga dili tugotang makadulot ang malipatlipatong mga laraw ni Satanas. (Efeso 6:11) Ang lig-ong pagtuo makapukgo sa tentasyon nga malinga sa imoral nga kalingawan, materyalismo, ug kawalay-interes nga nagpaila sa himalatyong kalibotan libot kanato. Kining di-matarog nga pagtuo magpapadayon kanato sa pag-alagad nga maunongon uban sa “kasaligan ug mabuot nga ulipon” samtang kita padayong gipakaon ug espirituwal nga pagkaon nga gitagana sa “tukmang panahon.”—Mateo 24:45.
7. Sa unsang paagi milihok ang mga Saksi ni Jehova sa lainlaing mga pag-atake kanila?
7 Ang atong pinasukad-sa-Bibliya nga pagtuo magpalig-on kanato sa pagbarog nga malig-on batok sa mga kampanya sa pagdumot nga giawhag niadtong nagpasundayag sa espiritu sa “daotang ulipon” sa Mateo 24:48-51. Sa pagtuman niining tagnaa sa talagsaong paagi, ang mga apostata aktibong nagapugas ug kabakakan ug propaganda sa daghang yuta karong adlawa, nakigkunsabo pa gani sa pipila nga adunay awtoridad taliwala sa mga nasod. Diin tukma, ang mga Saksi ni Jehova milihok, sumala sa gihubit sa Filipos 1:7, pinaagi sa ‘pagdepensa ug legal nga pagpundar sa maayong balita.’ Pananglitan, sa Septiyembre 26, 1996, sa usa ka kaso gikan sa Gresya, ang siyam ka maghuhukom sa Uropanhong Korte sa Tawhanong mga Katungod, sa Strasbourg, nagkahiusa sa pagpamatuod nga ang “mga Saksi ni Jehova nakakab-ot sa kahulogan sa ‘nailhang relihiyon,’” takos sa pagtagamtam sa kagawasan sa panghunahuna, tanlag, ug pagtuo, ug sa katungod sa pagsangyaw sa ilang tinuohan. Bahin sa mga apostata, ang paghukom sa Diyos nagaingon: “Ang mga pulong sa matuod nga panultihon nahitabo kanila: ‘Mibalik ang iro sa kaugalingong suka niini, ug ang naligoan nga anay ngadto sa pagligid sa lapok.’”—2 Pedro 2:22.
8. Sa adlaw ni Jehosafat, sa unsang paagi gipakanaog ni Jehova ang paghukom batok sa mga kaaway sa Iyang katawhan?
8 Balik sa adlaw ni Jehosafat, si Jehova nagpakanaog ug paghukom batok niadtong buot modaot sa Iyang katawhan. Atong mabasa: “Si Jehova nagpahimutang ug mga tawo aron sa pagbanhig batok sa mga anak sa Ammon, Moab ug sa bukirong rehiyon sa Seir nga nagsingabot sa Juda, ug ilang gipanghampak ang usag usa. Ug ang mga anak sa Ammon ug Moab mitindog batok sa mga pumoluyo sa bukirong rehiyon sa Seir aron sa pagpatay kanila ug paglaglag kanila; ug sa diha nga nalaglag na nila ang mga pumoluyo sa Seir, ang tagsatagsa nagtinabangay sa paglaglag sa iyang isigkatawo.” (2 Cronicas 20:22, 23) Ang mga taga-Judea nagngalan sa maong dapit nga Ubos nga Patag sa Beraca, ang Beraca nagkahulogang “Panalangin.” Sa modernong panahon usab, ang pagpakanaog ni Jehova ug paghukom sa iyang mga kaaway moresulta sa dagkong mga panalangin alang sa iyang katawhan.
9, 10. Kinsay nagpakita sa ilang kaugalingon nga takos sa grabeng paghukom ni Jehova?
9 Kita tingali makapangutana, Kinsa sa modernong panahon ang makadawat ug grabeng paghukom gikan kang Jehova? Aron matubag kanang pangutanaha, kinahanglang balikan nato ang tagna ni Joel. Ang Joel 3:3 naghisgot bahin sa mga kaaway sa iyang katawhan nga “gipabayloan ang anak nga lalaki sa usa ka bigaon, ug ang batang babaye ilang gibaligya tungod sa bino.” Oo, ilang gilantaw ang mga alagad sa Diyos nga ubos kaayo kanila, ang ilang mga anak sama rag bili sa suhol sa usa ka bigaon o sa bili sa usa ka tibod nga bino. Manubag sila niana.
10 Takos usab sa paghukom kadtong naghimog espirituwal nga pagpamampam. (Pinadayag 17:3-6) Ug ilabinang may tulubagon kadtong naghulhog sa politikal nga mga gahom sa paglutos sa mga Saksi ni Jehova ug pagbabag sa ilang kalihokan, ingon sa ginahimo sa tigpasiugda sa kasamok nga relihiyosong mga lider sa Sidlakang Uropa ning bag-o pa. Si Jehova nagpahayag sa iyang determinasyon sa paglihok batok nianang mga mamumuhat sa pagkadaotan.—Joel 3:4-8.
“Balaana ang Gubat!”
11. Sa unsang paagi gihagit ni Jehova ang iyang mga kaaway sa pagpakiggubat?
11 Sunod, si Jehova nag-awhag sa iyang katawhan sa pagmantala sa usa ka hagit taliwala sa mga nasod: “Balaana ang gubat! Pukawa ang kusganong mga tawo! Paduola sila! Patungasa sila, ang tanang tawo sa gubat!” (Joel 3:9) Kini maoy pagdeklarar sa talagsaong matang sa pakiggubat—matarong nga pakiggubat. Ang maunongong mga Saksi ni Jehova nagasalig sa espirituwal nga mga hinagiban sa dihang motubag sila sa bakak nga mga propaganda, nga nagsumpo sa kabakakan pinaagi sa kamatuoran. (2 Corinto 10:4; Efeso 6:17) Sa dili madugay, pagabalaanon sa Diyos “ang gubat sa dakong adlaw sa Diyos nga Makagagahom sa Tanan.” (Pinadayag 16:14) Hinloan niini ang yuta sa tanang magsusupak sa pagkasoberano sa Diyos. Ang iyang katawhan sa yuta dili makig-ambit niana sa pisikal nga paagi. Sa literal ug sa mahulagwayong paagi, ilang ‘gisalsal ang ilang mga espada nga mga punta sa daro ug ang ilang mga bangkaw nga mga galab.’ (Isaias 2:4) Sa kaatbang, gihagit ni Jehova ang kontrang mga nasod sa pagbuhat sa kasukwahi: “Salsala nga espada ang inyong mga punta sa daro ug ang inyong mga galab salsala nga mga bangkaw.” (Joel 3:10) Gidapit niya sila nga gamiton ang ilang tanang tinipigang mga makinarya sa gubat ug modernong mga armamento sa pagpakiggubat. Apan dili sila molampos, kay ang pakig-away ug ang kadaogan iya ni Jehova!
12, 13. (a) Bisan pa sa pagkatapos sa Bugnawng Gubat, sa unsang paagi ang daghang nasod nagpakita nga sila makiggubaton gihapon? (b) Sa unsa nga dili pa andam ang mga nasod?
12 Sayo sa katuigang 1990, ang mga nasod mideklarar nga ang Bugnawng Gubat natapos na. Tungod niana, nakab-ot ba ang pangunang tumong sa Hiniusang Kanasoran nga pakigdait ug kasegurohan? Wala gayod! Unsay gitug-an kanato sa mga panghitabo sa Burundi, sa Demokratikong Republika sa Congo, Iraq, Liberia, Rwanda, Somalia, ug sa kanhing Yugoslavia? Sa mga pulong sa Jeremias 6:14, sila nagaingon: “‘Adunay kalinaw! Adunay kalinaw!’ dihang walay kalinaw.”
13 Bisan tuod ang bug-os nga gubat nahunong na sa pipila ka dapit, ang mga nasod nga membro sa HK nag-indigay gihapon sa paggamag modernong mga hinagiban sa gubat. Ang pipila nagpadayon sa pagtigom ug nukleyar nga mga hinagiban. Ang uban naghimo ug kemikal o bakteriolohikal nga mga hinagiban alang sa tiningob nga paglaglag. Samtang kanang mga nasora magtigom ngadto sa simbolikong dapit nga gitawag ug Armagedon, iyang gihagit sila: “Mahitungod sa maluya, pasultiha siya: ‘Ako kusganong tawo.’ Tabang kamo ug umari, kamong tanang nasod nga nanaglibot, ug magpundok kamo.” Dayon misalga si Joel pinaagi sa iyang kaugalingong hangyo: “Nianang dapita, Oh Jehova, paadtoa ang imong mga gamhanan.”—Joel 3:10, 11.
Si Jehova Nagapanalipod Niadtong Iyaha
14. Kinsa ang mga gamhanan ni Jehova?
14 Kinsa ang mga gamhanan ni Jehova? Mga 280 ka higayon diha sa Bibliya, ang matuod nga Diyos gitawag nga “si Jehova sa mga panon.” (2 Hari 3:14) Kini nga mga panon mao ang panon sa mga manulonda sa langit nga nanaghulat sa pagbuhat kon unsay ipabuhat ni Jehova. Sa dihang ang mga Siryanhon nagtinguha sa pagdakop kang Eliseo, sa kataposan gibuka ni Jehova ang mga mata sa sulugoon ni Eliseo aron makita niya kon nganong dili sila molampos: “Tan-awa! ang bukirong rehiyon napuno sa mga kabayo ug nagkalayong mga karong iggugubat nga nanaglibot kang Eliseo.” (2 Hari 6:17) Si Jesus miingon nga siya makahangyo unta sa iyang Amahan ug “labaw sa napulog-duha ka lehiyon nga mga anghel.” (Mateo 26:53) Naghubit sa pag-asdang ni Jesus sa pagpakanaog ug paghukom sa Armagedon, ang Pinadayag nag-ingon: “Ang kasundalohan nga didto sa langit nagsunod kaniya diha sa puting mga kabayo, ug sila sinul-oban sa puti, hinlo, pino nga lino. Ug gikan sa iyang baba dihay nagagula nga usa ka mahait taas nga espada, aron iyang hampakon ang kanasoran pinaagi niini, ug siya magapastol kanila pinaagi sa olisi nga puthaw. Iyang tamaktamakan usab ang pug-anan sa bino sa kasuko sa kapungot sa Diyos nga Labing-Gamhanan.” (Pinadayag 19:14, 15) Kanang simbolikong pug-anan sa bino gihubit sa tin-awng mga pulong ingon nga “dakong pug-anan sa bino sa kasuko sa Diyos.”—Pinadayag 14:17-20.
15. Sa unsang paagi gihubit ni Joel ang pakiggubat ni Jehova batok sa kanasoran?
15 Nan, giunsa pagtubag ni Jehova ang hangyo ni Joel sa pagpadala sa mga gamhanan nga iya sa Diyos? Ania kana niining tin-awng mga pulong: “Ipapukaw ang mga nasod ug paadtoa sa ubos nga patag ni Jehosafat; kay didto ako molingkod aron sa paghukom sa tanang nasod nga nanaglibot. Isukob ang galab, kay ang alanihon hinog na. Umari, dulhog, kay puno na ang pug-anan. Nagaawas na gayod ang mga kawa; kay dagaya kaayo ang ilang pagkadaotan. Mga panon, mga panon atua sa ubos nga patag sa desisyon, kay ang adlaw ni Jehova haduol na sa ubos nga patag sa desisyon. Ang adlaw ug ang bulan mongitngit, ug ang mga bituon mapagngan sa ilang kahayag. Ug gikan sa Sion si Jehova mongulob, ug gikan sa Jerusalem siya mosinggit. Ug ang langit ug yuta managpangurog gayod.”—Joel 3:12-16.
16. Kinsa ang malakip niadtong pakanaogan ni Jehova sa paghukom?
16 Sama ka tino sa kahulogan sa ngalang Jehosafat nga “Maghuhukom si Jehova,” tino usab nga ang Diyos, si Jehova, bug-os nga magbindikar sa iyang pagkasoberano sa dihang ipakanaog niya ang paghukom. Ang tagna naghubit niadtong makadawat ug grabeng paghukom ingong ‘mga panon, mga panon sa ubos nga patag sa desisyon.’ Si bisan kinsang mahibilin nga tigpaluyo sa bakak nga relihiyon mahiapil niadtong mga panon. Malakip usab kadtong gihubit sa ikaduhang Salmo—ang mga nasod, nasodnong mga grupo, mga hari sa yuta, ug tag-as nga mga opisyal—kinsa mipalabi sa dunot nga sistema niining kalibotana kay sa ‘pag-alagad kang Jehova uban ang kahadlok.’ Midumili sila sa “paghalok sa anak.” (Salmo 2:1, 2, 11, 12) Wala nila ilha si Jesus ingong kaubang Hari ni Jehova. Dugang pa, ang mga panon nga namarkahan alang sa kalaglagan maglakip sa tanang tawo nga hukman nianang mahimayaong Hari ingon nga “mga kanding.” (Mateo 25:33, 41) Sa dihang tukmang panahon na ni Jehova sa pagngulob gikan sa langitnong Jerusalem, ang iyang tinudlong Hari sa mga hari moasdang aron ipakanaog kanang maong paghukom. Ang langit ug yuta managpangurog gayod! Bisan pa niana, kita gipasaligan: “Si Jehova mahimong dangpanan sa iyang katawhan, ug usa ka kuta alang sa mga anak sa Israel.”—Joel 3:16.
17, 18. Kinsa ang gipaila ingong mga nakalabang-buhi sa dakong kasakitan, ug unsang mga kahimtang ang ilang matagamtam?
17 Ang Pinadayag 7:9-17 nagpaila niadtong nakalabang-buhi sa dakong kasakitan ingong “usa ka dakong panon” nga nalangkoban niadtong nagpasundayag ug pagtuo sa nagalukat nga gahom sa dugo ni Jesus. Sila panalipdan sa adlaw ni Jehova, samtang ang nagkatigom nga mga panon sa tagna ni Joel makadawat sa grabeng paghukom. Giingnan ni Joel ang mga nakalabang buhi: “Kamong katawhan mahibalo nga ako mao si Jehova nga inyong Diyos, nga nagapuyo sa Sion nga akong bukid nga balaan,”—ang langitnong pinuy-anan ni Jehova.—Joel 3:17a.
18 Dayon ang tagna nagpahibalo kanato nga ang gimandoan sa langitnong Gingharian sa Diyos “kinahanglang mahimong balaang dapit; ug mahitungod sa mga dumuloong, sila dili na molatas kaniya pag-usab.” (Joel 3:17b) Sa langit ug sa yutan-ong dominyo nianang langitnong Gingharian, wala na unyay mga dumuloong, kay ang tanan mahiusa sa putli nga pagsimba.
19. Sa unsang paagi gihubit ni Joel ang paraisonhong kalipay sa katawhan sa Diyos karon?
19 Bisan karon, ang dagayang pakigdait nagalungtad taliwala sa katawhan ni Jehova dinhi sa yuta. Sa tingob, sila nagapahayag sa iyang mga paghukom diha sa kapin sa 230 ka kayutaan ug sa kapin sa 300 ka lainlaing mga pinulongan. Ang ilang kausbawan nindot nga pagkatagna ni Joel: “Mahitabo niadtong adlawa nga ang kabukiran magapatulo sa matam-is nga bino, ug ang kabungtoran magapaagay sa gatas, ug ang tanang sapa sa Juda magapaagay sa tubig.” (Joel 3:18) Oo, si Jehova magpadayon sa pagbubo diha sa iyang mga magdadayeg sa yuta ug nagasugwak nga makalilipayng mga panalangin ug kausbawan ug nagauswag nga agos sa bililhong kamatuoran. Ang pagkasoberano ni Jehova bug-os nang mabindikar sa ubos nga patag sa desisyon, ug ang kalipay modagaya samtang siya magapuyo sa walay kataposan taliwala sa iyang linukat nga katawhan.—Pinadayag 21:3, 4.
Nahinumdom Ka Ba?
◻ Sa unsang paagi giluwas ni Jehova ang iyang katawhan sa mga adlaw ni Jehosafat?
◻ Kinsay gihukman ni Jehova nga takos sa kalaglagan diha sa “ubos nga patag sa desisyon”?
◻ Kinsa ang mga gamhanan sa Diyos ug unsang papel ang ilang dulaon diha sa kataposang panag-away?
◻ Unsang kalipay ang matagamtam sa matinumanong mga magsisimba?
[Kapsiyon sa panid 21]
Giingnan ang Juda: ‘Ayaw kahadlok kay ang gubat dili inyo kondili iya sa Diyos’
[Kapsiyon sa panid 23]
Gihagit ni Jehova ang iyang mga kaaway nga ‘salsalon nga espada ang ilang mga punta sa daro’
[Kapsiyon sa panid 24]
Ang Bibliya nagpaila sa usa ka dakong panon sa mga nakalabang buhi sa dakong kasakitan