“Ang Diyos sa Kalinaw” Nagatagad sa mga Nag-antos

ANG Bibliya nagpatin-aw nga si David sa karaan nakasinatig kasakit. Sa daghang tuig siya nagkinabuhi ingong layas, walay-hunong nga gigukod sa usa ka daotan ug gahig-ulong hari, nga padayong nagtinguha sa pagpatay kaniya. Sulod niining yugto sa kasakit, si David nagtago sa iyang kaugalingon sa hilit nga mga dapit. Apan labaw pa ang iyang gihimo. Siya tim-os nga nag-ampo kang Jehova bahin sa iyang kalisdanan. “Uban sa akong tingog, ngadto kang Jehova ako nangayo ug panabang,” siya sa ulahi misulat bahin sa iyang kasakit. “Atubangan kaniya padayon nakong gibubo ang akong kabalaka; atubangan kaniya padayon nakong gisugilon ang akong kaugalingong kaguol.”​—Salmo 142:​1, 2.

Karong adlawa, ang pipila nagbiaybiay sa pagsalig ni David sa Diyos. Sila nag-ingon nga ang pag-ampo maoy usa ka paagi lamang sa hunahuna aron mahuptan sa usa ang malinawong pangisip ug nga sa praktikal nga pagkasulti kini maoy pag-usik-usik lamang ug panahon. Bisan pa niana, ang pagsalig ni David sa Diyos wala masayop, kay napildi ang iyang mga kaaway sa kadugayan. Sa pagpalandong sa iyang kasinatian, si David misulat: “Kining nag-antos nga usa misangpit, ug nadungog mismo ni Jehova. Ug gikan sa tanan niyang kagul-anan Siya nagluwas kaniya.” (Salmo 34:6) Ang matuod nga Diyos kang kinsa midangop si David sa laing bahin gitawag “ang Diyos sa kalinaw.” (Filipos 4:​9; Hebreohanon 13:20) Makahatag ba siyag kahupayan gikan sa kasakit, nga moresultag kalinaw alang kanato?

Si Jehova Nagatagad Kanimo

Si Jehova nagpakabana mahitungod sa mga kalisdanan sa iyang katawhan. (Salmo 34:15) Siya alisto sa mga panginahanglan dili lamang sa iyang mga alagad ingong usa ka grupo kondili usab sa matag indibiduwal nga nahadlok kaniya. Sa dihang nagpahinungod sa templo sa karaang Jerusalem, si Solomon nangamuyo kang Jehova sa pagpamati sa “bisan unsang pag-ampo, sa bisan unsang hangyo sa pabor nga himoon ni bisan kinsang tawo o sa tanan nimong katawhang Israel, tungod kay sila nahibalo sa matag usa sa iyang kaugalingong kagul-anan ug sa iyang kaugalingong kasakit.” (2 Cronicas 6:29) Ingon sa giadmitir ni Solomon, ang matag indibiduwal may iyang kaugalingong talagsaong kasakit nga sagubangon. Alang sa usa ka tawo kini tingali maoy pisikal nga balatian. Alang sa lain, emosyonal nga kagul-anan. Ang pipila tingali nag-antos sa pagkamatay sa usa ka minahal. Ang kawalay-trabaho, kalisod sa ekonomiya, ug mga problema sa pamilya maoy kasagarang mga kasakit usab niining malisod nga mga panahon.

Hunahunaa makadiyot ang bahin sa ‘imong kaugalingong kagul-anan ug imong kaugalingong kasakit.’ Usahay tingali bation nimo ang sama sa gibati sa salmistang David, kinsa misulat: “Ako padayong naglaom sa usa nga magpakitag simpatiya, apan walay usa; ug sa mga maghuhupay, apan ako walay nakaplagan.” Bisan pa niana, ikaw makatino nga ang Diyos nagatagad bahin sa imong kahimtang, kay sa ulahi sa samang salmo, si David misulat: “Si Jehova nagapamati sa mga kabos, ug siya gayod dili magatamay sa iya mismong mga binilanggo.”​—Salmo 69:​20, 33.

Sa pagpadapat sa mga pulong ni David diha sa malukpanong diwa, kita makatino nga ang Maglalalang sa katawhan mamati sa mga pag-ampo niadtong kinsa nabilanggo, pagaingnon pa, sa ilang mga kasakit. Labaw pa niana, siya mosanong sa ilang kahimtang. Palandonga ang mosunod nga mga pahayag nga nagpakita sa kahingawa ni Jehova sa mga nag-antos.

“Dili ninyo pagasakiton ang bisan kinsang balo nga babaye o ilo nga batang lalaki. Kon ikaw magasakit kaniya, unya kon siya motuaw gayod kanako, ako magpatalinghog gayod sa iyang pagtuaw; ug ang akong kasuko sa pagkatinuod mosilaob.”​—Exodo 22:​22-​24.

“Dili ba ipahinabo sa Diyos ang hustisya alang sa iyang mga pinili kinsa nagatuaw kaniya adlaw ug gabii, bisan tuod siya taas-ug-pailob ngadto kanila?”​—Lucas 18:7.

“Siya magaluwas sa kabos nga nagapangayo sa tabang, usab sa usa nga nag-antos ug kang bisan kinsa nga walay magtatabang. Siya maluoy sa timawa ug sa kabos, ug sa mga kalag sa mga kabos siya magaluwas. Gikan sa panglupig ug gikan sa kapintasan siya magatubos sa ilang kalag, ug ang ilang dugo bililhon sa iyang mga mata.”​—Salmo 72:​12-​14.

“Siya nga nagahilabot kaninyo [katawhan sa Diyos sa yuta] nagahilabot sa kalimutaw sa akong mata.”​—Zacarias 2:8.

Kining pipila ka pananglitan nag-ilustrar sa dulot nga kaikag sa atong Maglalalang sa kaayohan sa iyang katawhan. Busa, kita adunay maayong katarongan sa pagsunod sa tambag ni apostol Pedro: ‘Itugyan kaniya ang tanan ninyong mga kabalaka, kay siya aduna may kahangawa kaninyo.’ (1 Pedro 5:7) Apan sa unsang paagi ang Diyos motabang kanato sa mga panahon sa kasakit?

Kon sa Unsang Paagi ang Diyos Nagatabang sa mga Nag-antos

Ingon sa atong nakita, sa dihang nag-antos sa kasakit si David, siya tim-os nga nag-ampo sa Diyos alang sa paggiya. Sa samang panahon, siya mihimog unang lakang sa pagpaarang-arang sa kahimtang, nga nagagamit ug mga paagi sa pag-ikyas sa mga nagagukod kaniya. Busa, ang pagsalig kang Jehova inubanan sa personal nga paningkamot nagpaarang kang David sa paglahutay sa iyang kalisdanan. Unsay atong makat-onan gikan niini?

Sa dihang giatubang nato ang kasakit, dili gayod sayop alang kanato ang paghimog makataronganong lakang sa pagsulbad sa problema. Pananglitan, kon ang usa ka Kristohanon nakakaplag sa iyang kaugalingon nga walay-trabaho, dili ba siya maningkamot sa pagpangitag trabaho? O kon siya nag-antos sa pisikal nga sakit, dili ba siya mangitag medikal nga pag-atiman? Sa pagkatinuod, bisan si Jesus, nga may gahom sa pag-ayo sa tanang matang sa balatian, miadmitir nga ‘ang nagkasakit nagkinahanglan ug mananambal.’ (Mateo 9:​12; itandi ang 1 Timoteo 5:23.) Siyempre, ang ubang mga kalisod dili mawagtang; kini sa yano kinahanglang pagaantoson. Bisan pa niana, ang matuod nga Kristohanon dili maglantaw sa pag-antos ingong usa ka hiyas mismo, sama sa gibuhat sa uban. (Itandi ang 1 Hari 18:28.) Hinunoa, siya makahimog bisan unsang mga lakang kutob sa iyang maarangan sa pagsagubang sa iyang kasakit.

Sa samang panahon, hinunoa, makataronganon ang pagtugyan sa butang ngadto kang Jehova diha sa pag-ampo. Ngano? Una, pinaagi sa pagsandig sa atong Maglalalang, kita matabangan nga “matino ang mas hinungdanong mga butang.” (Filipos 1:10) Pananglitan, sa dihang nagpangita ug trabaho, ang mainampoong pagsalig sa Diyos motabang kanato sa dili pagdawat ug trabaho nga supak sa mga prinsipyo sa Bibliya. Kita usab makalikay nga ‘mahisalaag gikan sa pagtuo’ tungod sa gugma sa salapi. (1 Timoteo 6:10) Sa pagkatinuod, sa dihang mohimog mabug-at nga mga desisyon​—mahitungod sa pagpanarbaho o sa bisan unsang bahin sa kinabuhi​—kita kinahanglang mosunod sa tambag ni David: “Itugyan mo kang Jehova ang imong palas-anon, ug siya mismo magasapnay kanimo. Dili gayod niya pasagdan nga matarog ang matarong.”​—Salmo 55:22.

Ang pag-ampo motabang usab kanato nga huptan ang atong pagkatimbang sa hunahuna, aron nga ang atong kasakit dili makapiog kanato. Si apostol Pablo misulat: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos.” Uban ang unsang resulta? “Ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:​6, 7) Oo, kalinaw, ang kalinaw sa Diyos. Kana nga kalinaw “nagalabaw sa tanang panghunahuna,” busa kini magpalig-on kanato kon kita nabug-atan sa makapaguol nga mga emosyon. Kini ‘magabantay sa atong mga kasingkasing ug mga gahom sa pangisip,’ sa ingon motabang kanato nga malikayan ang pagsanong nga madalidalion ug dili-maalamon, nga mahimong magpadugang sa atong kasakit.​—Ecclesiastes 7:7.

Ang pag-ampo makahimog labaw pa. Kini makahimog kalainan kon sa unsang paagi maugmad ang kahimtang. Tagda ang pananglitan sa Bibliya. Sa dihang nabilanggo si apostol Pablo sa Roma, gidasig niya ang mga isigka-Kristohanon sa pag-ampo alang kaniya. Ngano? “Ako ilabinang nagaawhag kaninyo nga buhaton kini,” siya misulat kanila, “aron ako mapasig-uli nganha kaninyo sa mas madali.” (Hebreohanon 13:19) Si Pablo nahibalo nga ang mapinadayonong mga pag-ampo sa iyang mga isigkamagtutuo makaapektar kon kanus-a siya pagabuhian.​—Filemon 22.

Ang pag-ampo ba makapausab sa sangpotanan sa imong kasakit? Tingali. Apan, kita angayng masayod nga si Jehova dili kanunay motubag sa atong mga pag-ampo diha sa paagi nga atong gidahom. Si Pablo, pananglitan, nag-ampo nga sublisubli mahitungod sa iyang “tunok sa unod”​—tingali usa ka pisikal nga suliran labot sa iyang panan-aw. Imbes kuhaon ang kasakit, ang Diyos miingon kang Pablo: “Ang akong dili-takos nga kalulot igo na alang kanimo; kay ang akong gahom ginahimong hingpit diha sa kaluyahon.”​—2 Corinto 12:​7-9.

Busa may mga panahon nga ang atong mga kalisdanan dili mawala. Hinunoa, kita makabatog kahigayonan sa pagpamatuod sa atong pagsalig diha sa atong Maglalalang. (Buhat 14:22) Dugang pa, kita makaseguro nga bisan kon si Jehova dili magpapas sa kasakit, siya “maghimog kalingkawasan aron [kita] makahimo sa pag-agwanta niini.” (1 Corinto 10:13) Oo, may maayong katarongan nga si Jehova gitawag “ang Diyos sa tanang paghupay, kinsa nagahupay kanamo sa tanan namong kasakitan.” (2 Corinto 1:​3, 4) Siya magahatag kanato sa atong gikinahanglan sa paglahutay nga may igoigong kalinaw.

Sa Dili Madugay​—Usa ka Kalibotan nga Walay Kasakit!

Ang Maglalalang nagsaad nga pinaagi sa iyang Gingharian, iyang pagawad-on ang mga kasakit sa katawhan. Sa unsang paagi iyang pagahimoon kini? Pinaagi sa pagwagtang kang Satanas nga Yawa, ang pangunang tighulhog sa kasakit ug ang pangunang kaaway sa kalinaw, kinsa gipaila sa Bibliya ingong “ang diyos niini nga sistema sa mga butang.” (2 Corinto 4:4) Apan sa dili madugay matapos ang iyang pagkontrolar sa katawhan. Ang paghanaw kaniya magbukas sa dalan sa di-maihap nga mga panalangin nga modangat kanilang nahadlok sa Diyos. Ang Bibliya nagasaad nga si Jehova ‘magapahid sa matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang nangagi na.’​—Pinadayag 21:​1-4.

Ang kalibotan ba nga walay kasakit daw dili katuohan? Kita naanad na kaayo sa pagkinabuhi nga may kalisdanan nga kita malisdan sa paghanduraw sa pagkawala niini. Apan ang kagawasan gikan sa kahadlok, kabalaka, ug katalagman mao gayod ang katuyoan sa Diyos sa katawhan sukad pa sa paglalang, ug ang iyang katuyoan matuman.​—Isaias 55:​10, 11.

Mao kini ang paglaom nga nakaplagan nila Sonia, Fabiana, ug Ana, nga gihisgotan sa unang artikulo. Si Sonia, kansang duha ka anak nga lalaki namatay gumikan sa AIDS, nakabaton ug dakong kalinaw gumikan sa paglaom nga gitanyag sa Bibliya​—ang pagkabanhaw sa matarong ug dili matarong. (Buhat 24:15) “Usa ka butang ang tino,” matod niya, “ang atong paglaom nagalabaw sa tanang kasakit bisan unsa pa man.”

Samtang nagpuyo pa diha sa balay-amomahan, si Ana giduaw sa usa sa mga Saksi ni Jehova. “Gipakita niya kanako ang ngalan ni Jehova diha sa Bibliya,” matod ni Ana, “ug ako nakahilak sa kalipay. Ako nagkinahanglan gayod ug tabang, ug ako nakakat-on nga adunay usa ka Diyos nga nagatagad kanato.” Human mobiya sa balay-amomahan, gidawat ni Ana ang pagtuon sa Bibliya ug dugang nakakat-on bahin sa mga saad ni Jehova. Dayon iyang gipahinungod ang iyang kinabuhi kang Jehova ug nagpasimbolo niini pinaagig bawtismo. “Sukad niadto ako nagpadayon sa pagsandig kang Jehova pinaagi sa pag-ampo, ug ako ginahupay sa pasalig nga siya motabang kanako.”

Si Fabiana usab nakakaplag ug dakong paghupay ug kalinaw sa hunahuna sa iyang kasakit pinaagi sa pagkakat-on bahin sa mga saad sa Diyos sa umaabot. “Ang pagkakat-on sa kamatuoran gikan sa Bibliya nahisama sa pagbiya sa mangitngit ug mangiob kaayong dapit ug nagasulod sa usa ka matin-aw, mahayag, ug maayong lawak.”​—Itandi ang Salmo 118:5.

Apan sa unsang paagi ug kanus-a moabot ang literal nga pakigdait sa tibuok yuta? Atong tan-awon sa mosunod nga mga artikulo.

[Kahon sa panid 6]

Ang Daghang Dagway sa Kasakit

▪ Gibanabanang ikaupat ka bahin sa populasyon sa kalibotan ang nagkinabuhi sa tuman nga kakabos, ug milyonmilyon ang dugang nagkinabuhi sa dili-tawhanong mga kahimtang nga nagpameligro sa ilang paglahutay.

▪ Kapin sa 200 ka milyong kabataan ang menos nga pagkapakaon.

▪ Matag tuig ang kalibanga nagapatay sa mga tulo ka milyong kabataan ubos sa singko anyos ang edad.

▪ Ang mananakod nga mga sakit nagpatay sa mga 16.5 ka milyong tawo sa 1993 lamang. Sanglit magkalahi ang pagkategoriya sa pipila ka mga nasod sa mga sakit, ang aktuwal nga gidaghanon tingalig mas taas pa.

▪ Ang gibanabanang 500 ka milyong tawo naapektohan sa pipila ka matang sa suliran sa hunahuna.

▪ Ang gidaghanon sa mga naghikog kusog nga nag-uswag taliwala sa mga batan-on kay sa bisan haing ubang hut-ong sa pangedaron.

▪ “Ang kagutmanan ug kawalay-trabaho nahimong mga lama sa kalibotan,” nag-ingon ang The Unesco Courier. “Adunay 35 ka milyong walay trabaho diha sa pito ka labing adunahang mga nasod sa kalibotan, ug sa Brazil lamang adunay 20 ka milyong mga trabahante nga alang kanila ang pagbatog trabaho wala gani magpasabot nga sila igong makakaon.”

[Hulagway sa panid 7]

Ang pag-ampo motabang kanato sa pagpunting sa saad sa Diyos bahin sa usa ka kalibotan nga walay kasakit