Usa ka Jerusalem nga Tukma sa Ngalan Niini
“Magmalipayon kamo sa walay kataposan tungod sa gihimo ko. Kay ania karon gihimo ko ang Jerusalem nga usa ka kalipay.”—ISAIAS 65:18.
1. Unsay gibati ni Esdras bahin sa piniling siyudad sa Diyos?
INGONG madasigong estudyante sa Pulong sa Diyos, gipabilhan sa Hudiyohanong saserdote nga si Esdras ang pagkalangkit kas-a sa Jerusalem sa putling pagsimba ni Jehova. (Deuteronomio 12:5; Esdras 7:27) Ang iyang gugma sa siyudad sa Diyos gibutyag diha sa bahin sa Bibliya nga siya gidasig sa pagsulat—ang Una ug Ikaduhang Cronicas ug Esdras. Niining makasaysayanhong mga rekord, ang ngalang Jerusalem makaplagan halos 25 porsiyento sa kapin sa 800 ka higayon nga kini makita diha sa tibuok Bibliya.
2. Unsang matagnaong kahulogan ang atong masabtan sa gipasabot sa ngalang Jerusalem?
2 Diha sa Biblikanhong Hebreohanon, ang “Jerusalem” masabot nga anaa sa porma sa Hebreohanong pinulongan nga gitawag ug tinagurhang porma. Ang tinagurhang porma kasagarang gamiton alang sa mga butang nga magkaparis, sama sa mga mata, dalunggan, kamot, ug mga tiil. Niining tinagurhang porma, ang ngalang Jerusalem malantaw ingong matagnaon sa usa ka pakigdait nga matagamtam sa katawhan sa Diyos diha sa duha ka pilong kahulogan—sa espirituwal ug pisikal. Ang Kasulatan wala magbutyag kon si Esdras bug-os ba gayod nakasabot niini. Apan, ingong saserdote iyang gihimo ang iyang labing maayo sa pagtabang sa mga Hudiyo nga makatagamtam ug pakigdait uban sa Diyos. Ug dayag nga siya nagkugi pag-ayo aron ang Jerusalem mahimong tinuod sa kahulogan sa ngalan niini, nga mao, “Pagpanag-iya, [o, Sukaranan] sa Duha-ka-Pilong Pakigdait.”—Esdras 7:6.
3. Pila ka tuig pa ang milabay una pa kita gihatagan pag-usab ug dugang kasayoran sa mga kalihokan ni Esdras, ug sa unsang mga kahimtang nga siya atong nakita?
3 Ang Bibliya wala maghisgot kon diing dapita si Esdras sa panahon sa 12 ka tuig nga kal-ang tali sa iyang pagduaw ngadto sa Jerusalem ug sa pag-abot ni Nehemias sa siyudad. Ang dili-maayong espirituwal nga kahimtang sa nasod sulod niadtong panahona nagsugyot nga wala didto si Esdras. Bisan pa, atong makita si Esdras nga nag-alagad pag-usab ingong matinumanong saserdote sa Jerusalem human gilayon sa pagkatukod pag-usab sa kuta sa Jerusalem.
Usa ka Talagsaong Adlaw sa Asembliya
4. Unsay hinungdanon sa unang adlaw sa ikapitong bulan sa Israel?
4 Ang kuta sa Jerusalem igo gayod nga natapos alang sa hinungdanong pista sa bulan sa Tisri, ang ikapitong bulan sa relihiyosong kalendaryo sa Israel. Ang unang adlaw sa Tisri maoy usa ka linaing pista sa himatayon ang bulan nga gitawag ug Pista sa Paghuyop sa Trompeta. Niadtong adlawa, ang mga saserdote naghuyop sa mga trompeta samtang nagtanyag ug mga halad ngadto kang Jehova. (Numeros 10:10; 29:1) Kining adlawa nag-andam sa mga Israelinhon alang sa tinuig nga Adlaw sa Pagtabon sa Sala sa ika-10 sa Tisri ug sa malipayong Pista sa Panagtigom gikan sa ika-15 ngadto sa ika-21 sa mao gihapong bulan.
5. (a) Sa unsang paagi gipahimuslan ni Esdras ug Nehemias ang “unang adlaw sa ikapitong bulan”? (b) Nganong nanghilak ang mga Israelinhon?
5 Sa “unang adlaw sa ikapitong bulan,” “ang tanang katawhan” nagtigom, lagmit nadasig ni Nehemias ug Esdras sa pagtigom. Ang kalalakin-an, kababayen-an, ug ang “tanang may igong kabuot sa pagpaminaw” giapil. Busa, ang kabataan atua didto ug namati pag-ayo samtang nagbarog si Esdras sa pulpito ug nagbasa sa Kasugoan “sukad sa sayo sa buntag hangtod sa kaudtohon.” (Nehemias 8:1-4) Sa matag karon ug unya, gitabangan sa mga Levihanon ang mga tawo sa pagsabot kon unsay gibasa. Kini nagpahilak sa mga Israelinhon sa nakaamgo sila sa pagkadako sa kapakyasan nila ug sa ilang mga katigulangan sa pagsugot sa Kasugoan sa Diyos.—Nehemias 8:5-9.
6, 7. Unsay makat-onan sa mga Kristohanon sa gihimo ni Nehemias sa pagpahunong sa mga Hudiyo sa paghilak?
6 Apan dili kini panahon sa mabakhoong paghilak. Panahon kadto sa pista, ug ang katawhan bag-o pang nakatapos sa pagtrabaho sa pagtukod-pag-usab sa kuta sa Jerusalem. Busa gitabangan sila ni Nehemias nga makabaton ug hustong kaisipan pinaagi sa pag-ingon: “Lakaw, kaon sa matambok nga mga butang ug inom sa matam-is nga mga butang, ug pagpadala ug mga bahin ngadto sa usa nga walay giandam; kay kining adlawa balaan ngadto sa atong Ginoo, ug ayaw kaguol, kay ang kalipay ni Jehova maoy inyong salipdanan.” Sa masinugtanon, “ang tanang katawhan milakaw aron sa pagkaon ug sa pag-inom ug sa pagpadalag mga bahin ug sa paghimog dakong panagsadya, kay ilang nasabtan ang mga pulong nga gibutyag ngadto kanila.”—Nehemias 8:10-12.
7 Ang katawhan sa Diyos karon daghan kaayog makat-onan gikan niining asoya. Angay isilsil sa hunahuna niadtong nakapribilehiyo sa pagkabaton ug mga bahin sa mga tigom ug mga asembliya ang gihisgotan sa ibabaw. Dugang pa sa pagtaganag tambag sa pagtul-id nga gikinahanglan usahay, ang maong mga okasyon nagpasiugda sa mga kaayohan ug mga panalangin nga mosangpot gumikan sa pagkab-ot sa mga kinahanglanon sa Diyos. Ang komendasyon ihatag tungod sa maayong buhat nga gihimo ug ang pagdasig sa paglahutay itagana. Ang katawhan sa Diyos angay mamauli gikan sa maong mga panagkatigom nga malipayon ug kasingkasing tungod sa makapadasig nga instruksiyon nga ilang nadawat gikan sa Pulong sa Diyos.—Hebreohanon 10:24, 25.
Laing Malipayong Panagkatigom
8, 9. Unsang linaing tigom ang nahitabo sa ikaduhang adlaw sa ikapitong bulan, nga misangpot ug unsa alang sa katawhan sa Diyos?
8 Sa ikaduhang adlaw sa maong linain nga bulan, “ang mga ulo sa mga amahan sa tanang katawhan, ang mga saserdote ug mga Levihanon, tingob nga nagtigom ngadto kang Esdras nga magkokopya, aron makabaton ug pagsabot sa mga pulong sa kasugoan.” (Nehemias 8:13) May katakos gayod si Esdras sa pagdumala niining tigoma, sanglit iyang “giandam ang iyang kasingkasing sa pag-usisa sa kasugoan ni Jehova ug sa pagbuhat niini ug sa pagtudlo sa Israel sa kabalaoran ug sa hustisya.” (Esdras 7:10) Tino, gipasiugda niining tigoma ang mga bahin diin kinahanglang sundon pag-ayo sa katawhan sa Diyos ang pakigtugon sa Kasugoan. Ang hatagag pangunang pagtagad mao ang panginahanglan sa paghimog hustong mga pagpangandam sa pagsaulog sa umaabot nga Pista sa mga Balongbalong.
9 Kining usa ka semanang pista gihimo sa hustong paagi, uban sa tanang katawhan nga nagpuyo diha sa temporaryong mga puy-anan nga hinimo gikan sa mga sanga ug mga dahon sa nagkalainlaing mga kahoy. Gitukod sa mga tawo kining maong mga balongbalong diha sa ilang patag nga mga atop, sa ilang mga tugkaran, sa mga sawang sa templo, ug sa mga plasa sa Jerusalem. (Nehemias 8:15, 16) Pagkamaayong higayon kini sa pagtigom sa katawhan ug sa pagbasa ngadto kanila sa Kasugoan sa Diyos! (Itandi ang Deuteronomio 31:10-13.) Kini gihimo sa matag adlaw, “gikan sa unang adlaw hangtod sa kataposang adlaw” sa pista, nga misangpot ug “dakong kalipay” sa bahin sa katawhan sa Diyos.—Nehemias 8:17, 18.
Dili Gayod Nato Angay Pagabiyaan ang Balay sa Diyos
10. Nganong gihikay ang linaing panagkatigom sa ika-24ng adlaw sa ikapitong bulan?
10 Adunay hustong panahon ug dapit sa pagtul-id sa seryosong mga kakulangan taliwala sa katawhan sa Diyos. Tingali nakaamgo nga mao na kini ang panahon, naghikay si Esdras ug Nehemias ug usa ka adlaw sa pagpuasa sa ika-24 sa bulan sa Tisri. Gibasa na usab ang Kasugoan sa Diyos, ug gisugid sa mga tawo ang ilang mga sala. Dayon gisublig-balik sa mga Levihanon ang maluluy-ong mga pakiglabot sa Diyos uban sa iyang badlongong katawhan, nagpahayag ug matahom nga mga ekspresyon sa pagdayeg ngadto kang Jehova, ug naghimog “usa ka kasaligang kahikayan” nga gitiman-an sa timre sa ilang mga prinsipe, mga Levihanon, ug mga saserdote.—Nehemias 9:1-38.
11. Sa unsang “kasaligang kahikayan” nanaad ang mga Hudiyo nga ilang sundon?
11 Ang mga tawo sa katibuk-an nanumpa sa pagtuman sa nasulat nga “kasaligang kahikayan.” Sila “maglakaw diha sa kasugoan sa matuod nga Diyos.” Ug sila miuyon nga dili makigminyo uban “sa mga katawhan sa yuta.” (Nehemias 10:28-30) Dugang pa, ang mga Hudiyo nanaad sa pagtuman sa Igpapahulay, sa paghatag ug tinuig nga pinansiyal nga amot sa pagsuportar sa matuod nga pagsimba, sa pagtaganag kahoy alang sa halad sa halaran, sa paghatag sa panganay sa ilang mga kahayopan ug sa mga karnero alang sa mga halad, ug sa pagdala sa inunahang mga bunga sa ilang yuta ngadto sa mga komedor sa templo. Tin-aw, sila determinado nga ‘dili mobiya sa balay sa ilang Diyos.’—Nehemias 10:32-39.
12. Unsay nalangkit sa dili pagbiya sa balay sa Diyos karong adlawa?
12 Karong adlawa, ang katawhan ni Jehova kinahanglang mag-amping sa dili pagbiya sa ilang pribilehiyo sa ‘paghatag ug sagradong pag-alagad’ diha sa mga sawang sa dakong espirituwal nga templo ni Jehova. (Pinadayag 7:15) Kini naglangkit sa regular kinasingkasing nga mga pag-ampo alang sa kauswagan sa pagsimba ni Jehova. Ang pagkinabuhi nga nahiuyon sa maong mga pag-ampo nagkinahanglag pagpangandam alang sa Kristohanong mga tigom ug pagpakigbahin niini, pagpakig-ambit sa mga kahikayan sa pagsangyaw sa maayong balita, ug pagtabang sa mga interesado pinaagi sa pagbalik ug, kon posible, pagdumalag mga pagtuon sa Bibliya uban kanila. Daghan niadtong walay tinguha sa pagbiya sa balay sa Diyos naghatag ug pinansiyal nga mga amot alang sa buluhatong pagsangyaw ug sa pagmentinar sa mga dapit sa matuod nga pagsimba. Kita mahimong makahatag usab sa atong materyal nga tabang sa pagtukod sa gikinahanglan pag-ayong mga dapit nga katigoman maingon man sa paghupot niini nga mahinlo ug maayong pagkaareglar. Usa ka hinungdanong paagi sa pagpasundayag ug gugma sa espirituwal nga balay sa Diyos mao ang pagpatunhay sa pakigdait taliwala sa isigkamagtutuo ug sa pagtabang sa tanan nga nagkinahanglan ug materyal o espirituwal nga tabang.—Mateo 24:14; 28:19, 20; Hebreohanon 13:15, 16.
Usa ka Malipayong Inagurasyon
13. Unsang dinaliang butang ang nagkinahanglan ug pagtagad una pa masugdan ang inagurasyon sa kuta sa Jerusalem, ug unsang maayong panig-ingnan ang gihatag sa daghan?
13 Ang “kasaligang kahikayan” nga gitiman-an sa timre sa mga adlaw ni Nehemias nag-andam sa karaang katawhan sa Diyos alang sa adlaw sa inagurasyon sa kuta sa Jerusalem. Apan laing dinaliang butang ang nagkinahanglan ug pagtagad. Nalibotan na karon sa usa ka dakong kuta nga may 12 ka ganghaan, ang Jerusalem nagkinahanglan ug mas dakong populasyon. Bisan tuod nagpuyo ang pipila ka Israelinhon didto, “ang siyudad halapad ug dako, ug diyutay lamang ang mga tawo nga nagpuyo didto.” (Nehemias 7:4) Aron masulbad kining problemaha, ang mga tawo “nagripa sa pagpasulod ug usa gikan sa matag napulo aron sa pagpuyo diha sa Jerusalem ang balaang siyudad.” Ang mainandamong pagsanong niining kahikayana nagpukaw sa mga tawo sa pagpanalangin “sa tanang tawo nga miboluntaryo sa pagpuyo sa Jerusalem.” (Nehemias 11:1, 2) Pagkamaayong panig-ingnan alang sa matuod nga mga magsisimba karong adlawa kansang mga kahimtang nagtugot kanila sa pagbalhin sa mga dapit diin mas dako ang panginahanglan ug hamtong nga Kristohanong tabang!
14. Unsay nahitabo sa adlaw sa inagurasyon sa kuta sa Jerusalem?
14 Wala magdugay gisugdan ang hinungdanong mga pagpangandam alang sa dakong adlaw sa inagurasyon sa kuta sa Jerusalem. Ang mga musikero ug mga mag-aawit gitigom gikan sa kanait nga mga siyudad sa Juda. Kini giporma ngadto sa duha ka dagkong koro sa pagpasalamat, ang matag usa sundan ug usa ka prosesyon. (Nehemias 12:27-31, 36, 38) Ang mga koro ug mga prosesyon nagsugod gikan sa usa ka dapit sa kuta nga kinalay-an sa templo, tingali gikan sa Ganghaan sa Walog, ug nagmartsa sa magkaatbang nga mga direksiyon hangtod nga nagtagbo sila diha sa balay sa Diyos. “Sila nanaghalad ug dagkong mga halad niadtong adlawa ug nagmasadyaon, kay ang matuod nga Diyos naglipay kanila uban sa dakong kalipay. Ug ang kababayen-an ug ang mga kabataan usab nagmasadyaon, mao nga ang panagsadya sa Jerusalem nadungog bisan ngadto sa halayo.”—Nehemias 12:43.
15. Nganong ang pagpahinungod sa kuta sa Jerusalem dili hinungdan sa dumalayon nga kalipay?
15 Ang Bibliya wala maghatag ug petsa niining malipayong selebrasyon. Walay duhaduha, kadto maoy labing talagsaong bahin, kon dili man ang kinatayuktokan, sa pagtukod-pag-usab sa Jerusalem. Siyempre, daghan pa kaayong buluhaton sa pagpanukod ang kinahanglang himoon sa sulod sa siyudad. Sa ngadtongadto, ang mga lungsoranon sa Jerusalem nawad-an sa ilang maayong espirituwal nga baroganan. Pananglitan, sa dihang miduaw si Nehemias sa siyudad sa ikaduhang higayon, iyang nakita nga gibiyaan na usab ang balay sa Diyos ug nga ang mga Israelinhon nakigminyo pag-usab sa mga babayeng pagano. (Nehemias 13:6-11, 15, 23) Kining samang dili-maayong mga kahimtang gipamatud-an diha sa mga sinulat ni manalagnang Malaquias. (Malaquias 1:6-8; 2:11; 3:8) Busa ang pagpahinungod sa kuta sa Jerusalem wala mahimong hinungdan sa dumalayon nga kalipay.
Usa ka Hinungdan sa Walay Kataposang Kalipay
16. Unsang kulbahinam nga mga hitabo ang gipaabot sa katawhan sa Diyos?
16 Karong adlawa, ang katawhan ni Jehova nangandoy sa panahon sa dihang modaog ang Diyos batok sa tanan niyang mga kaaway. Kini magsugod uban sa kalaglagan sa “Dakong Babilonya”—usa ka mahulagwayong siyudad nga gilangkoban sa tanang matang sa bakak nga relihiyon. (Pinadayag 18:2, 8) Ang kalaglagan sa bakak nga relihiyon magtimaan sa unang hugna sa umaabot nga dakong kasakitan. (Mateo 24:21, 22) Anaa usab sa atong unahan ang usa ka tinuod nga hinungdanon kaayong okasyon—ang langitnong kaminyoon ni Ginoong Jesu-Kristo ngadto sa iyang pangasaw-onon nga 144,000 ka lungsoranon sa “Bag-ong Jerusalem.” (Pinadayag 19:7; 21:2) Kita dili makasulti kon kanus-a gayod mabug-os kanang kulbahinam nga kaminyoon, apan seguradong malipayon gayod kini nga okasyon.—Tan-awa Ang Bantayanang Torre, Agosto 15, 1990, mga panid 30-1.
17. Unsay atong nahibaloan bahin sa pagkabug-os sa Bag-ong Jerusalem?
17 Apan kita nahibalo nga duol na kaayong mabug-os ang Bag-ong Jerusalem. (Mateo 24:3, 7-14; Pinadayag 12:12) Dili sama sa yutan-ong siyudad sa Jerusalem, dili gayod kini mahimong hinungdan sa pagkahigawad. Tungod kini kay ang tanang lungsoranon niini maoy dinihogan-sa-espiritu, nasulayan, ug nadalisay nga mga sumusunod ni Jesu-Kristo. Sa ilang pagkamatinumanon hangtod sa kamatayon, ang matag usa nakapamatuod na nga maunongon sa walay kataposan ngadto sa Soberano sa Uniberso, si Jehova nga Diyos. Kana dako kaayog kahulogan alang sa nahibilin sa katawhan—sa mga buhi ug sa mga patay!
18. Nganong kita ‘magmaya ug magmalipayon sa walay kataposan’?
18 Palandonga kon unsay mahitabo sa dihang ibali sa Bag-ong Jerusalem ang pagtagad niini ngadto sa mga tawo nga nagpasundayag ug pagtuo sa halad lukat ni Jesus. “Tan-awa!” nagsulat si apostol Juan. “Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.” (Pinadayag 21:2-4) Dugang pa, gamiton sa Diyos kining samag-siyudad nga kahikayan sa pagtuboy sa katawhan ngadto sa tawhanong kahingpitan. (Pinadayag 22:1, 2) Pagkakatingalahang mga katarongan kini aron ‘magmaya ug magmalipayon sa walay kataposan tungod niadtong gihimo karon sa Diyos’!—Isaias 65:18.
19. Unsang espirituwal nga paraiso diin ngadto niini ginatigom ang mga Kristohanon?
19 Apan, ang mga tawong mahinulsolon dili na kinahanglang maghulat nianang panahona aron madawat ang tabang gikan sa Diyos. Sa tuig 1919, si Jehova nagsugod sa pagtigom sa kataposang mga sakop sa 144,000 ngadto sa usa ka espirituwal nga paraiso, diin ang mga bunga sa espiritu sa Diyos—sama sa gugma, kalipay, ug pakigdait—dagaya. (Galacia 5:22, 23) Usa ka talagsaong bahin niining espirituwal nga paraiso mao ang pagtuo sa dinihogang mga molupyo niini, kinsa sa katingalahan mabungahon kaayo sa pagpanguna sa pagsangyaw sa maayong balita sa Gingharian sa Diyos diha sa tanang gipuy-ang yuta. (Mateo 21:43; 24:14) Tungod niini, duolan sa sayis milyones ka “ubang mga karnero,” nga adunay yutan-ong paglaom, ang gitugotan usab sa pagsulod sa espirituwal nga paraiso ug sa pagpahimulos sa mabungahong buluhaton. (Juan 10:16) Sila kuwalipikado alang niini pinaagi sa pagpahinungod sa ilang kaugalingon ngadto kang Jehova nga Diyos pinasukad sa ilang pagtuo sa halad lukat sa iyang Anak, si Jesu-Kristo. Ang ilang pagpakig-uban sa umaabot nga mga sakop sa Bag-ong Jerusalem sa pagkamatuod napamatud-ang usa ka panalangin. Busa, pinaagi sa iyang mga pagpakiglabot sa dinihogang mga Kristohanon, napahimutang ni Jehova ang malig-ong pundasyon alang sa “usa ka bag-ong yuta”—usa ka katilingban sa mahinadlokon-sa-Diyos nga mga tawo nga magapanunod sa yutan-ong dapit sa langitnong Gingharian.—Isaias 65:17; 2 Pedro 3:13.
20. Sa unsang paagi ang Bag-ong Jerusalem tinuod sumala sa kahulogan sa ngalan niini?
20 Ang malinawong mga kahimtang nga gitagamtam karon sa katawhan ni Jehova sa ilang espirituwal nga paraiso sa dili madugay masinati diha sa pisikal nga paraiso dinhi sa yuta. Kana mahitabo sa dihang ang Bag-ong Jerusalem mokanaog gikan sa langit sa pagpanalangin sa katawhan. Sa duha ka pilong paagi, matagamtam sa katawhan sa Diyos ang malinawong mga kahimtang nga gisaad diha sa Isaias 65:21-25. Ingong nahiusang mga magsisimba ni Jehova diha sa espirituwal nga paraiso, ang mga dinihogang magpahimutang pa sa ilang dapit diha sa langitnong Bag-ong Jerusalem ug kadtong sakop sa “ubang mga karnero” nagatagamtam na karon sa hinatag-sa-Diyos nga pakigdait. Ug ang maong pakigdait moabot pa ngadto sa pisikal nga Paraiso, sa dihang ‘matuman ang kabubut-on sa Diyos sa tibuok yuta, maingon man sa langit.’ (Mateo 6:10) Oo, ang mahimayaong langitnong siyudad sa Diyos mapamatud-ang tinuod sa ngalang Jerusalem ingong malig-ong ‘Sukaranan sa Duha-ka-Pilong Pakigdait.’ Hangtod sa hangtod, kini mobarog ingong dalayegong kadungganan ngadto sa Dakong Maglalalang niini, si Jehova nga Diyos, ug sa Pamanhonong Hari niini, si Jesu-Kristo.
Nakahinumdom Ka Ba?
◻ Unsay natapos sa dihang gitigom ni Nehemias ang katawhan sa Jerusalem?
◻ Unsay kinahanglang buhaton sa karaang mga Hudiyo aron dili mabiyaan ang balay sa Diyos, ug kita giawhag sa pagbuhat ug unsa?
◻ Sa unsang paagi ang “Jerusalem” nalangkit sa pagpatunghag dumalayong kalipay ug pakigdait?
[Mapa sa panid 23]
(Alang sa aktuwal nga pagkahan-ay, tan-awa ang publikasyon)
MGA GANGHAAN SA JERUSALEM
Ang mga numero naghawas sa presenteng-adlawng gihabogon sa metros
GANGHAAN SA ISDA
GANGHAAN SA KARAANG SIYUDAD
GANGHAAN SA EPHRAIM
ESKINANG GANGHAAN
Lapad nga Kuta
Plasa
GANGHAAN SA WALOG
SEGUNDA KUWARTO
Unang Kuta sa Amihanan
SIYUDAD NI DAVID
GANGHAAN SA NAGTIPUN-OG-NGA-ABO
Walog sa Hinnom
Kastilyo
GANGHAAN SA KARNERO
GANGHAAN SA GUWARDIYA
Dapit sa Templo
GANGHAAN SA PAGSUSI
GANGHAAN SA KABAYO
OPHEL
Plasa
GANGHAAN SA TUBIG
Tuboran sa Gihon
GANGHAAN SA TUBORAN
Tanaman sa Hari
En-rogel
Tyropoeon (Sentral) nga Walog
Bul-oganang Walog sa Kidron
740
730
730
750
770
770
750
730
710
690
670
620
640
660
680
700
720
740
730
710
690
670
Ang posibleng gidak-on sa kuta sa Jerusalem sa panahon sa pagkalaglag sa siyudad ug sa dihang nanguna si Nehemias sa pagtukod pag-usab sa kuta