Gituman Nila ang Kabubut-on ni Jehova

Ang Integridad ni Job Gigantihan

SI Job maoy usa ka tawong maluluy-on, tigpanalipod sa mga balo, mga ilo, ug sa mga sinakit. (Job 29:​12-17; 31:​16-21) Unya, sa kalit kaayo, midangat kaniya ang katalagman, nawad-an sa iyang katigayonan, sa iyang mga anak, ug sa iyang kahimsog. Ikasubo, kining hamili nga tawo kinsa maoy usa ka tigpaluyo sa mga dinaogdaog nakadawat ug diyutayng tabang sa panahon sa iyang panginahanglan. Bisan ang iyang kaugalingong asawa misulti kaniya nga “tungloha ang Diyos ug magpakamatay!” Ug ang iyang “mga higala” nga si Elipaz, Bildad, ug Zopar walay gitaganang kahupayan. Hinunoa, sila nagpasumbingay nga si Job nakasala ug busa takos sa iyang kasakit.​—Job 2:​9; 4:​7, 8; 8:​5, 6; 11:​13-15.

Bisan pa sa tumang pag-antos, si Job nagpabiling matinumanon. Tungod niini, si Jehova sa kataposan nagpakitag kaluoy kang Job ug nagpanalangin kaniya. Ang asoy kon sa unsang paagi iyang gibuhat kini nagtaganag kasegurohan sa tanang maghuhupot sa integridad nga mga alagad sa Diyos nga pag-abot sa panahon sila usab pagagantihan.

Pagkalingkawas ug Pagpasig-uli

Una, gibadlong ni Jehova si Elipaz, Bildad, ug Zopar. Nagtumong kang Elipaz, dayag ang kamagulangan, siya miingon: “Ang akong kasuko nasugniban batok kanimo ug sa duha mo ka kauban, kay kamo wala magsulti sa tinuod bahin kanako ingon sa akong alagad nga si Job. Ug karon magkuha kamo ug pito ka laki nga baka ug pito ka laking karnero ug umadto sa akong alagad nga si Job, ug kamo maghalad ug usa ka halad-nga-sinunog alang sa inyong kaugalingon; ug si Job nga akong alagad maoy mag-ampo alang kaninyo.” (Job 42:​7, 8) Hunahunaa ra kon unsay gipasabot niini!

Gikinahanglan ni Jehova ang usa ka hinungdanong halad gikan kang Elipaz, Bildad, ug Zopar, lagmit aron isilsil kanila ang gidak-on sa ilang sala. Sa pagkamatuod, gituyo man o wala tuyoa, ilang gipasipalahan ang Diyos pinaagi sa pag-ingon nga siya ‘walay pagsalig sa iyang mga alagad’ ug dili gayod hinungdanon kon si Job nagmatinumanon o wala. Miingon pa gani si Elipaz nga sa mga mata sa Diyos si Job sama rag bili sa anunugba! (Job 4:​18, 19; 22:​2, 3) Dili ikahibulong nga si Jehova miingon: “Kamo wala magsulti sa tinuod bahin kanako”!

Apan dili kay kana ra. Si Elipaz, Bildad, ug Zopar nakasala usab batok kang Job mismo pinaagi sa pagsulti kaniya nga ang iyang mga suliran maoy tungod sa iyang kaugalingong binuhatan. Ang ilang way basehanan nga mga akusasyon ug bug-os nga kakulang sa empatiya maoy nagpalagot ug nagpaguol kang Job, nga nagpahinabo kaniya sa pagtuaw: “Hangtod kanus-a ang inyong pagsamok sa akong kalag ug pagdugmok kanako pinaagi sa mga pulong?” (Job 10:​1; 19:2) Handurawa ang pagpanglipaghong sa mga nawong niining tulo ka lalaki sanglit sila karon kinahanglang motanyag kang Job ug halad tungod sa ilang mga sala!

Apan si Job wala magpasigarbo tungod sa ilang kaulawan. Sa pagkamatuod, gibaod ni Jehova nga siya mag-ampo alang sa iyang mga magsusumbong. Gibuhat ni Job kon unsay gisugo kaniya, ug niini siya gipanalanginan. Una, giayo ni Jehova ang iyang makahahadlok nga sakit. Dayon, ang mga igsoong lalaki, mga igsoong babaye, ug kanhing mga kaila ni Job miabot aron paghupay kaniya, “ug ang tagsatagsa kanila naghatag kaniya ug usa ka buok nga salapi ug ang tagsatagsa usa ka buok nga singsing nga bulawan.”a Dugang pa, si Job “nakabaton ug napulog upat ka libong karnero ug unom ka libo nga kamelyo ug usa ka libo nga baka ug usa ka libo nga asno nga baye.”b Ug dayag nga ang asawa ni Job nakig-uli kaniya. Pag-abot sa panahon, si Job gipanalanginan ug pito ka anak nga lalaki ug tulo ka anak nga babaye, ug siya nagpuyo sa pagsud-ong sa upat ka kaliwatan sa iyang mga anak.​—Job 42:​10-17.

Mga Leksiyon Alang Kanato

Si Job naghatag ug maayong panig-ingnan alang sa modernong-adlaw nga mga alagad sa Diyos. Siya “walay ikasaway ug matarong,” usa ka tawo nga si Jehova mapasigarbohong motawag nga “akong alagad.” (Job 1:​8; 42:​7, 8) Apan, wala kini magpasabot nga si Job hingpit. Sa usa ka yugto sa panahon sa iyang mga pagsulay, siya sayop nga nagtuo nga ang Diyos mao ang hinungdan sa iyang katalagman. Iya pa ganing gisaway ang paagi sa Diyos sa pagpakiglabot sa tawo. (Job 27:​2; 30:​20, 21) Ug iyang gipahayag ang iyang kaugalingong pagkamatarong inay kay sa iya sa Diyos. (Job 32:2) Apan wala isalikway ni Job ang Maglalalang, ug siya mapainubsanong midawat sa pagtul-id gikan sa Diyos. “Ako nagsulti, apan wala ako makasabot,” siya miangkon. “Himoon ko ang usa ka pagbakwi, ug ako maghinulsol sa abog ug abo.”​—Job 42:​3, 6.

Sa dihang ilalom sa pagsulay kita usab mahimong maghunahuna, mosulti, o molihok sa paagi nga dili angay. (Itandi ang Ecclesiastes 7:7.) Bisan pa niana, kon lalom ang atong gugma sa Diyos, dili kita morebelde batok kaniya o mayugot tungod kay siya nagtugot kanato nga makaagom sa mga kalisdanan. Hinunoa, atong mentinahon ang atong integridad ug sa ingon sa kataposan magaani ug dakong panalangin. Ang salmista miingon kang Jehova: “Sa usa nga maunongon ikaw magpakita sa pagkamaunongon.”​—Salmo 18:25.

Sa wala pa mapasig-uli si Job sa usa ka mahimsog nga kahimtang, si Jehova nagsugo nga iyang iampo kadtong nakasala batok kaniya. Pagkamaayong panig-ingnan alang kanato! Nagsugo si Jehova nga atong pasayloon kadtong nakasala batok kanato sa dili pa pasayloon ang atong mga sala. (Mateo 6:​12; Efeso 4:32) Kon dili kita andam nga mopasaylo sa uban sa dihang adunay maayong basehanan sa pagbuhat niana, makadahom ba kita kang Jehova nga magmaluluy-on kanato?​—Mateo 18:​21-35.

Kitang tanan makaatubang ug mga pagsulay matag karon ug unya. (2 Timoteo 3:12) Bisan pa niana, sama kang Job kita makahupot sa integridad. Pinaagi sa pagbuhat niana, kita magaani ug usa ka dakong ganti. Si Santiago misulat: “Tan-awa! Among ginapahayag nga malipayon kadtong mga nakalahutay. Kamo nakadungog sa pag-agwanta ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.”​—Santiago 5:11.

[Mga footnote]