Isalikway ang Propaganda ni Satanas

‘AYAW palimbong. Dili mo tabangan sa inyong Diyos. Surender na kay kon dili makatilaw mo sa among kapungot!’ Mao ni diwa sa mensahe ni Rabsake, usa ka sinugo ni Haring Senakerib sa Asirya, ngadto sa mga molupyo sa Jerusalem. Ang kasundalohan sa hari nakasulod na sa Juda. Maoy tuyo sa sinugo nga paluyahon ug hadlokon ang mga tawo sa Jerusalem aron sila mosurender.—2 Hari 18:28-35.

Ang mga Asiryanhon gibantog sa ilang kabangis. Hadlokon nila ang ilang mga kaaway pinaagi sa pagpahibalo kanila sa makalilisang nga mga detalye sa ilang mapintas nga pagtratar sa mga binihag. Sumala sa historyano nga si Philip Taylor, ilang nabatasan “ang pagpahinabog kalisang ug paggamit ug propaganda, nga gilaraw aron sa pagkontrolar sa ilang mga nasakop, ug ang paghadlok sa posibleng mga kaaway pinaagig detalyadong mga taho kon unsa sila kabangis ug pagmaniobra sa ilang mga hunahuna.” Ang propaganda maoy epektibong hinagiban. “Daoton [niana] ang hunahuna,” miingon si Taylor.

Ang matuod nga mga Kristohanon “adunay pakigdumog, dili batok sa dugo ug unod, kondili batok . . . sa daotang mga puwersa nga espirituhanon,” sa ato pa, batok sa espiritung mga linalang nga mirebelde sa Diyos. (Efe. 6:12) Ang panguna kanila mao si Satanas nga Yawa. Siya usab magpahinabog kalisang ug mogamit ug propaganda.

Nangangkon si Satanas nga iyang mabungkag ang integridad sa matag usa kanato. Sa adlaw sa patriarkang si Job, si Satanas miingon kang Jehova nga Diyos: “Ang tanang butang nga anaa sa usa ka tawo iyang ihatag tungod sa iyang kalag.” Sa ato pa, kon pit-oson ang tawo, sa ngadtongadto mabungkag ang iyang integridad sa Diyos. (Job 2:4) Husto ba si Satanas? Duna bay limitasyon ang atong pag-antos—nga lapas niana ato nang isalikway ang mga prinsipyo aron lang mabuhi? Kana ang gusto ni Satanas nga atong hunahunaon. Busa, iyang gigamit ang malimbongong propaganda aron itisok kana sa atong hunahuna. Atong susihon ang pipila sa iyang mga taktika sa pagbuhat niana ug kon sa unsang paagi kita makasukol kaniya.

Ang Ilang “Patukoranan Anaa sa Abog”

Gigamit ni Satanas si Elipaz, usa sa tulo ka higala nga miduaw kang Job, sa pagpangatarongan nga ang tawo huyang kaayo nga dili kini makasukol kang Satanas. Nagtumong sa mga tawo ingong “kadtong nagapuyo sa mga balay nga yutang-kulonon,” iyang gisultihan si Job: “[Ang ilang] patukoranan anaa sa abog! Ginadugmok sila nga mas dali pa kay sa usa ka tangkob. Gikan sa buntag hangtod sa gabii sila gigupokgupok; sila nangalaglag hangtod sa kahangtoran nga walay usa nga nagtagad.”—Job 4:19, 20.

Sa laing teksto, kita gipakasama sa “mga sudlanan nga kulonon”—daling mabuak. (2 Cor. 4:7) Kita huyang tungod sa napanunod nga sala ug pagkadili-hingpit. (Roma 5:12) Kon kita lamang sa atong kaugalingon, kita walay panalipod batok sa pag-atake ni Satanas. Apan ingong mga Kristohanon, kita adunay tabang. Bisan pa sa atong kahuyangon, kita bililhon sa mga mata sa Diyos. (Isa. 43:4) Dugang pa, si Jehova mohatag ug balaang espiritu niadtong nagapangayo niana. (Luc. 11:13) Ang iyang espiritu makahatag kanatog “gahom nga labaw sa kasarangan,” nga magtabang kanato sa pagsagubang sa bisan unsang kalisdanan nga ipadangat ni Satanas. (2 Cor. 4:7; Filip. 4:13) Kon kita mobarog batok sa Yawa, nga “malig-on sa pagtuo,” ang Diyos mohatag kanatog kusog ug kaisog. (1 Ped. 5:8-10) Busa, dili kita angayng mahadlok kang Satanas nga Yawa.

Ang Tawo “Nagainom sa Pagkadili-Matarong”

“Unsa ba ang may-kamatayong tawo nga siya mahimong hinlo, o pakamatarongon ang usa nga gipakatawo sa usa ka babaye?” nangutana si Elipaz. Dayon gitubag niya ang iyang pangutana: “Tan-awa! Sa iyang mga balaan [ang Diyos] walay pagsalig, ug ang kalangitan dili mahinlo sa iyang mga mata. Unsa pa kaha kon ang usa dulumtanan ug hiwi, usa ka tawo nga nagainom sa pagkadili-matarong nga sama lang ug tubig!” (Job 15:14-16) Gustong patuohon ni Elipaz si Job nga walay tawong matarong sa panan-aw ni Jehova. Ang Yawa naggamit usab sa negatibong panghunahuna aron paluyahon kita. Buot niya nga kita mahasol kanunay sa atong nangaging mga kasal-anan, mahimong sobra ka hinawayon-sa-kaugalingon, ug maghunahuna nga wala na kitay paglaom nga mapasaylo. Gusto usab niya nga kita maghunahuna nga sobra ra ang gidahom ni Jehova kanato ug nga kita dili takos sa Iyang kaluoy, pagpasaylo, ug tabang.

Siyempre, kitang tanan “nakasala ug wala makaabot sa himaya sa Diyos.” Walay tawong dili-hingpit nga makatuman sa hingpit nga mga sukdanan ni Jehova. (Roma 3:23; 7:21-23) Apan, wala kana magpasabot nga kita walay bili kaniya. Si Jehova nahibalo nga “ang orihinal nga halas, ang usa nga gitawag Yawa ug Satanas,” mao ang nagpahimulos sa atong pagkamakasasala. (Pin. 12:9, 10) Ang Diyos nasayod nga “kita abog” ug dili siya magsigeg ‘pangitag sayop’ kanato.—Sal. 103:8, 9, 14.

Kon atong talikdan ang daotang dalan ug moduol kang Jehova uban ang mahinulsolong kasingkasing, “siya magpasaylo sa madagayaon gayod.” (Isa. 55:7; Sal. 51:17) Bisan pag ang atong mga sala maoy “sanag-pula, kini papution sama sa niyebe,” nag-ingon ang Bibliya. (Isa. 1:18) Busa, magmadeterminado kita nga dili gayod mohunong sa pagbuhat sa kabubut-on sa Diyos.

Tungod sa atong pagkamakasasala, dili gayod kita makabaton ug matarong nga baroganan atubangan sa Diyos. Si Adan ug Eva nawad-an sa ilang kahingpitan ug paglaom nga mabuhi sa walay kataposan, mao man usab kita. (Roma 6:23) Apan, tungod sa iyang dakong gugma sa katawhan, si Jehova mihimog tagana aron mapasaylo ang atong mga sala kon kita magpasundayag ug pagtuo sa halad lukat sa iyang Anak, si Jesu-Kristo. (Mat. 20:28; Juan 3:16) Pagkatalagsaong pasundayag kana sa “dili-takos nga kalulot” sa Diyos! (Tito 2:11) Mapasaylo diay ang atong mga sala! Nan, nganong magpaimpluwensiya man kita kang Satanas sa paghunahuna nga kita dili gayod mapasaylo?

“Tandoga Hangtod ang Iyang Bukog ug ang Iyang Unod”

Si Satanas nangangkon nga si Job dili makapabiling matinumanon kon makaagom ug grabeng balatian. Gihagit ni Satanas si Jehova: “Tandoga hangtod ang iyang bukog ug ang iyang unod ug tan-awa kon dili ka ba niya tunglohon sa imong nawong mismo.” (Job 2:5) Sa walay duhaduha, malipay ang Kaaway sa Diyos kon kita mobating walay pulos tungod sa atong kaluyahon.

Apan, dili kita isalikway ni Jehova kon dili na nato mahimo ang sama sa atong gibuhat kaniadto sa pag-alagad kaniya. Komosta kon ang atong suod nga higala gidagmalan ug nabaldado? Momenos ba ang atong pagtan-aw kaniya tungod kay wala na kaayo siyay mahimo alang kanato? Dili gayod! Ato gihapon siyang mahalon—ilabina kon nabaldado siya tungod sa pagtabang kanato. Dili ba labaw pa niana ang buhaton ni Jehova? “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan,” nag-ingon ang Bibliya.—Heb. 6:10.

Ang Kasulatan naghisgot bahin sa “usa ka kabos nga babayeng balo” nga lagmit nagsuportar sa pagsimba sa Diyos sulod na sa daghang katuigan. Sa dihang nakita siya ni Jesus nga naghulog ug “duha ka gagmayng sensilyo nga kubos kaayog bili” sa panudlanag bahandi sa templo, naghunahuna ba si Jesus nga siya walay pulos ug walay bili ang iyang amot? Sa kasukwahi, gidayeg siya ni Jesus tungod kay gihimo niya ang kutob sa iyang maarangan sa pagsuportar sa matuod nga pagsimba.—Luc. 21:1-4.

Kon kita magpabiling matinumanon, kita makaseguro nga ang atong relasyon kang Jehova dili mabungkag, bisan unsa pa kadako ang kadaot nga ipahinabo kanato sa pagkadili-hingpit, kini man pagkatigulang o balatian. Dili gayod talikdan sa Diyos ang nagmatinumanon kaniya tungod lang kay nalimitahan sa kalisdanan ang ilang pag-alagad kaniya.—Sal. 71:9, 17, 18.

Dawata “ang Helmet sa Kaluwasan”

Sa unsang paagi nato maprotektahan ang atong kaugalingon batok sa propaganda ni Satanas? Si apostol Pablo misulat: “Magpadayon sa pagbaton ug gahom diha sa Ginoo ug diha sa pagkagamhanan sa iyang kusog. Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.” Ang usa ka bahin nianang espirituwal nga armadura mao “ang helmet sa kaluwasan.” (Efe. 6:10, 11, 17) Maylabot sa propaganda ni Satanas, kinahanglang dawaton nato ang maong helmet ug kanunay kanang isul-ob. Ang helmet magsilbing proteksiyon sa ulo sa usa ka sundalo. Ang atong “paglaom sa kaluwasan”—ang atong pagsalig sa katumanan sa mga saad sa Diyos maylabot sa iyang mahimayaong bag-ong kalibotan—manalipod sa atong hunahuna batok sa kabakakan ni Satanas. (1 Tes. 5:8) Kinahanglang huptan natong buhi ug lig-on ang atong paglaom pinaagi sa makugihong personal nga pagtuon sa Kasulatan.

Si Job milahutay sa mapintas nga pag-atake ni Satanas. Lig-on kaayo ang pagtuo ni Job sa pagkabanhaw nga bisan gani ang hulga sa kamatayon wala makapaluya kaniya. Hinunoa, siya miingon kang Jehova: “Ikaw motawag, ug ako motubag kanimo. Kay ikaw mangandoy sa buhat sa imong mga kamot.” (Job 14:15) Bisan pag mamatay si Job tungod sa pagpabiling matinumanon, siya masaligon nga ang gugma sa Diyos sa Iyang matinumanong mga alagad magtukmod Kaniya sa pagbanhaw kanila.

Hinaot nga aduna kitay susamang pagsalig sa matuod nga Diyos. Si Jehova makahimo sa pagwagtang sa bisan unsang kadaot nga mahimong ipahinabo ni Satanas ug sa iyang mga ginsakpan. Hinumdomi usab nga si Pablo nagpasalig kanato: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Cor. 10:13.

[Hulagway sa panid 20]

Gipabilhan ni Jehova ang imong matinumanong pag-alagad

[Hulagway sa panid 21]

Dawata ang helmet sa kaluwasan, ug kanunay kanang isul-ob