Sila Nakaila sa Ngalan sa Diyos
ANG unang bahin sa basahon nga nahibaloang gisulat ug gipatik sa Amerikanhong mga koloniya sa Inglaterra mao ang Bay Psalm Book. Ang orihinal nga edisyon niini gipatik ni Stephen Daye sa Massachusetts Bay Colony sa tuig 1640. Kadtong sayo nga publikasyon naundan sa basahon sa Bibliya sa mga Salmo, nga gihubad gikan sa Hebreohanon ngadto sa Ingles nga pinulongan nga maoy gigamit ug gisulat niadtong panahona.
Ang usa ka talagsaong bahin sa Bay Psalm Book mao ang paggamit sa balaang ngalan diha sa pipila ka bersikulo. Busa, ang bisan kinsa nga mibasa nianang publikasyona balik niadto sa mga 350 ka tuig kanhi nakaila sa ngalan sa atong Maglalalang. Niana nga edisyon, pananglitan, ang Salmo 83:17, 18 mabasa: “Ibutang sila sa kalibog, ug labihan nga kagubot: oo, ibutang sila sa kaulawan, ug pasagding mangamatay. Aron ang tawo makaila; nga ikaw lamang kansang ngalan mao si IEHOVAH, ikaw lamang sa ibabaw sa tibuok nga yuta ang dalayegon nga labing hataas.”
Siyempre, ang labing hataas nagkinahanglan ug labaw pa kay sa atong pagkaila lamang sa iyang ngalang Jehova (Iehovah). Diha sa Bay Psalm Book, ang Salmo 1:1, 2 nag-ingon nga ang “bulahan nga tawo” dili magalakaw sa tambag sa daotan, “kondili anaa sa balaod ni Iehovah, ang iyang kalipay.” Ang rebisadong New England Psalms sa 1648 nag-ingon: “Apan diha sa balaod ni Jehova ang iyang bug-os nga kalipay.”
Dinhi ang ika-20ng siglo nga New World Translation of the Holy Scriptures mabasa: “Malipayon ang tawo nga wala maglakaw sa tambag sa mga daotan, ug diha sa dalan sa mga makasasala wala magtindog, ug diha sa lingkoranan sa mga mayubiton wala molingkod. Apan ang iyang kalipay anaa sa balaod ni Jehova, ug diha sa iyang balaod siya nagabasa sa mahinay sa adlaw ug sa gabii.”
Aron mahimong tinuod nga malipayon, kinahanglang isalikway sa usa ka tawo ang tambag sa mga daotan. Kinahanglang dili siya mosunod sa panig-ingnan sa mga makasasala ug dili makig-uban diha sa walay-diyos nga mga mayubiton. Lakip sa ubang mga butang, kinahanglang dili siya makig-uban sa mga tawo kang kansang tambag ug paggawi makadaldal kaniya sa seksuwal nga imoralidad, pag-abuso sa droga, ug ubang mga buhat nga supak sa balaod sa Diyos. Oo, ang tinuod nga kalipay nagadepende sa pagkakat-on mahitungod sa matuod nga Diyos, kansang ngalan mao si Jehova, ug sa pagpadapat sa iyang balaod sumala sa gipadayag diha sa Bibliya.