Mga Pangutana Gikan sa mga Magbabasa
Ang Salmo 102:26 nag-ingon nga ang yuta ug ang mga langit “mangahanaw.” Kana bang mga pulonga nagpasabot nga malaglag ang planetang Yuta?
Sa dihang nag-ampo kang Jehova, ang salmista miingon: “Sa kanhi pa imong gipahimutang ang mga patukoranan sa yuta, ug ang mga langit maoy buhat sa imong mga kamot. Sila mangahanaw, apan ikaw magapabilin; ug sama gayod sa usa ka besti silang tanan madunot. Sama gayod sa besti sila imong ilisdan, ug wala na silay silbi.” (Salmo 102:25, 26) Ang konteksto nagpakita nga kining mga bersikuloha naghisgot, dili sa kalaglagan sa yuta, kondili sa pagkawalay-kataposan sa Diyos. Gipakita usab sa konteksto kon nganong kanang hinungdanon nga kamatuoran makapahupay alang sa mga alagad sa Diyos.
Ang salmista, nga lagmit gidestiyero sa Babilonya, nagsugod pinaagi sa paghubit sa iyang mga kasakitan. Siya nagmulo nga ang iyang kinabuhi mahanaw lamang “sama sa aso.” Ang grabeng kasakit sa emosyon nagdaot sa iyang lawas, nga tungod niana iyang gibati nga ang iyang mga bukog “nagbaga sama gayod sa dapog.” Gikapoy kaayo siya, nga “nalaya ingon sa tanom,” ug gibatig kamingaw ‘sama sa usa ka langgam nga nag-inusara sa ibabaw sa atop.’ Siya nawad-ag ganang mokaon tungod sa iyang mga pagsulay ug ang iyang mga adlaw napunog pagbangotan. (Salmo 102:3-11) Bisan pa niana, ang salmista wala mawad-ig paglaom. Nganong wala man? Tungod sa gisaad ni Jehova nga buhaton niya sa Zion o Jerusalem.
Bisag nalaglag ang Zion, si Jehova nagsaad nga kini ipasig-uli. (Isaias 66:8) Busa, ang salmista masaligon nga miingon kang Jehova: “Ikaw maluoy sa Zion, kay kini mao ang panahon sa pagpakita kaniya ug kaluoy, kay ang tinudlong panahon miabot na. Kay pagatukoron gayod ni Jehova ang Zion.” (Salmo 102:13, 16 ) Dayon ang salmista mihisgot pag-usab sa iyang personal nga pag-antos. Siya nangatarongan, sa diwa, nga kon mapasig-uli ang naawaaw nga Jerusalem pinaagi sa gahom sa Diyos, si Jehova tinong makaluwas kaniya gikan sa iyang makaluluoyng kahimtang. (Salmo 102:17, 20, 23) Ug aduna pay laing butang nga nakatukmod sa salmista nga mosalig kang Jehova sa bug-os. Unsa? Ang kamatuoran nga ang Diyos buhi sa walay kataposan.
Ang walay-kataposang paglungtad ni Jehova dako kaayog kalainan kon itandi sa kamubo sa kinabuhi mismo sa salmista. “Ang imong katuigan maoy hangtod sa tanang kaliwatan,” siya miingon kang Jehova. (Salmo 102:24) Dayon miingon ang salmista: “Sa kanhi pa imong gipahimutang ang mga patukoranan sa yuta, ug ang mga langit maoy buhat sa imong mga kamot.”—Salmo 102:25.
Apan bisan ang dugay nang paglungtad sa yuta ug sa mga langit dili ikatandi sa walay-kataposang paglungtad sa Diyos. Ang salmista midugang: “Sila [yuta ug mga langit] mangahanaw, apan ikaw magapabilin.” (Salmo 102:26) Ang pisikal nga yuta ug mga langit mahimong mahanaw. Tinuod, si Jehova miingon sa ubang bahin sa Bibliya nga sila molungtad sa walay kataposan. (Salmo 119:90; Ecclesiastes 1:4) Apan mahimo silang laglagon kon maoy katuyoan sa Diyos. Sa kasukwahi, ang Diyos dili mamatay. Ang pisikal nga kalalangan ‘nagbarog hangtod sa kahangtoran’ tungod lamang kay ang Diyos nagmentinar kanila. (Salmo 148:6) Kon si Jehova mohunong sa pagbag-o sa pisikal nga kalalangan, nan “sama gayod sa usa ka besti silang tanan madunot.” (Salmo 102:26) Maingon nga ang tawo mas modurar kay sa iyang besti, si Jehova usab makalungtad ug dugay kay sa iyang mga linalang—kon buot niyang buhaton kana. Apan, nahibalo kita sumala sa ubang mga teksto nga dili kana mao ang iyang kabubut-on. Ang Pulong sa Diyos nagpasalig kanato nga gitino ni Jehova nga ang literal nga yuta ug mga langit magpabilin hangtod sa kahangtoran.—Salmo 104:5.
Makapahupay gayod ang pagkahibalo nga si Jehova kanunay anaa aron sa pagtuman sa tanan niyang mga saad. Bisan unsang pagsulay ang modangat kanato, sa dihang kita motuaw kaniya, kita makasalig nga “hatagan gayod niya ug pagtagad ang pag-ampo niadtong gihukasan sa tanang butang, ug dili tamayon ang ilang pag-ampo.” (Salmo 102:17) Oo, ang pasalig ni Jehova sa iyang tabang nga makaplagan sa Salmo 102 mas lig-on pa kay sa yuta nga atong gitungtongan.