Ang Aktibong Pagpangulo ni Kristo Karong Adlawa

“Ako magauban kaninyo sa tanang adlaw hangtod sa konklusyon sa sistema sa mga butang.”—MATEO 28:20.

DIHANG dayon nang biyaan ni Kristo ang iyang mga tinun-an ug mobalik sa langit niadtong 33 K.P., iyang “gitugyan kanila ang iyang mga katigayonan.” Kini nagalangkit sa pagkahimong “mga sinugo nga puli ni Kristo” ug pagbuhat sa buluhaton sa pagwali nga iyang gisugdan, nga ipaabot kana ngadto sa “kinalay-ang bahin sa yuta.” Una mobiya kanila, iyang gisugo sila sa “paghimog mga tinun-an sa katawhan sa tanang nasod.” May ebidensiya ba kita nga siya matinagdanon kon giunsa nila pagtuman ang maong sugo? Kita duna gayod!​—Mateo 25:14; 2 Corinto 5:20; Buhat 1:8; Mateo 28:19.

² Kapin sa 60 ka tuig tapos mosaka si Kristo sa langit, iyang gipakita nga gibantayan niya pag-ayo ang mga kalihokan sa Kristohanong mga kongregasyon sa yuta. Sa pinadayag nga gihatag kang apostol Juan, usa ka membro sa unang-siglong nagmandong lawas, si Jesu-Kristo nagpadalag mga mensahe ngadto sa pito ka kongregasyon nga nahimutang sa Asia Minor. Sa lima kanila siya miingon: “Ako nahibalo sa inyong mga binuhatan.” Ug iyang gipakita nga sinati kaayo siya kon unsay nagkahitabo sa taliwala sa lain pang duha, ang Smirna ug Pergamo. Gihatag niya ang tinong pagdasig ug tambag sa matag kongregasyon. Walay pagduhaduha diha sa ilang mga kaisipan kon kinsa ang ilang aktibong Pangulo.​—Pinadayag 1:11; 2:1–​3:22.

3. Kang kinsa ba gitumong ang pito ka mensahe, ug unsay nagapamatuod niini?

³ Sa pagkamatuod, ang masakop nianang pito ka mensahe dili mao lamang ang pito ka kongregasyon sa Asia. Ang maayong tambag ug mga pasidaan nga nasulod niana mapadapat sa tanang kongregasyon, gikan sa unang siglo hangtod sa “adlaw sa Ginoo,” diin kita ania karon.a Ang mga mata ni Kristo, nga gipakasama sa “nagdilaab nga kalayo,” padayong nagbantay kon unsay nagakahitabo sulod sa “tanang kongregasyon.”​—Pinadayag 1:10; 2:18, 23.

Ang Agalon ug ang Iyang Ulipon

4. Sa unsang paagi si Kristo “milangyaw” ug dayon mipauli “tapos sa hataas nga panahon”?

⁴ Tapos sa pagpanig-ingon sa iyang kaugalingon ngadto sa “usa ka tawo, nga talilangyaw sa laing yuta, [kinsa] nagpatawag sa iyang mga ulipon ug nagpiyal kanila sa iyang mga katigayonan,” si Kristo midugang: “Tapos sa hataas nga panahon ang agalon niadtong mga ulipon miabot ug naghusay kanila.” (Mateo 25:14, 19) Niadtong 33 K.P. si Kristo “misaka ngadto sa langit,” diin siya gipalingkod “sa tuo nga kamot sa Diyos.” (1 Pedro 3:22) “Tapos sa hataas nga panahon,” tapos sa iyang pagkaentrono sa 1914, si Kristo misugod sa ‘pagmando taliwala sa iyang mga kaaway’ pinaagi sa pagtambog kang Satanas ug sa iyang mga demonyo nganhi sa yuta. (Salmo 110:1, 2; Pinadayag 12:7-9) Dayon gitumong niya ang iyang pagtagad nganha sa iyang mga ulipon. Ang panahon miabot na aron sa paghusay kanila. Labaw kay sukad masukad, siya mao ang ilang aktibong Pangulo.

5. Kanus-a moabot ang panahon sa paghusay, ug sa unsang paagi gigantihan ang matinumanon?

⁵ Ang modernong kasaysayan sa katawhan sa Diyos nagapakita nga ang maong panahon sa paghusay miabot niadtong 1918-19. Ang sambingay sa mga talanton nagailustrar unsaon sa Agalon sa paghusay ang nahibilin sa iyang dinihogang mga ulipon. Kinahanglang sila sa tagsatagsa manubag sa paagi sa ilang paggamit sa iyang mga katigayonan, “ang matag usa sumala sa iyang katakos,” o sa espirituwal nga mga posibilidad. Kadtong nagmabungahon misulod sa kalipay sa ilang Agalon, kinsa miingon kanila: “Sa diyutay kasaligan ka. Sa daghang butang pagapiyalan ko ikaw.”​—Mateo 25:15, 20-23.

6. Nahimong unsa sa tiningob ang maong matinumanong dinihogang mga Kristohanon, ug unsay gipaatiman kanila sa ilang Agalon?

⁶ Ang maong indibiduwal dinihogang mga Kristohanon nakaplagan nga matinumanong mga embahador o sinugo sa karon nagamandong Hari, nga buot mohimog mga tinun-an alang sa ilang Agalon. Sa tiningob sila nakaplagan nga mao ang “ulipon” nga bahin kanila ang ilang Agalon miingon: “Kinsa ba ang matinumanon ug maalamong ulipon nga itudlo sa iyang agalon sa pagdumala sa iyang panimalay, sa paghatag kanila sa ilang pagkaon sa hustong panahon? Malipayon kadtong ulipona nga sa pag-abot sa iyang agalon mahiabtan siyang nagabuhat sa ingon. Sa pagkatinuod magaingon ako kaninyo, Igatudlo niya siya sa pagdumala sa tanan niyang katigayonan.”​—Mateo 24:45-47.

7. (a) Sa unsang paagi midaghan ang “katigayonan” ni Kristo sukad 1914? (b) Unsay nagapakita nga si Kristo mao usab ang aktibong Pangulo sa “ubang mga karnero”?

⁷ Ang “katigayonan” ni Kristo midaghan pa sukad 1914. Siya gisapotan sa “harianong gahom,” nga naglangkit sa dugang pagbulot-an ug dagko pang mga responsabilidad. (Lucas 19:11, 12) Iya unang gitigom ang nahibilin sa “mga anak sa gingharian,” ang 144,000 dinihogang mga Kristohanon nga “gipalit gikan sa taliwala sa katawhan” aron mahimong mga hari ug mga saserdote uban kaniya sa langit. (Mateo 13:38; Pinadayag 14:1-4; 5:9, 10) Dayon, ingong gipaila sa kasaysayan sukad sa 1935, siya nagtigom sa “usa ka dakong panon” sa “ubang mga karnero” nga bahin kanila siya miingon: “Sila akong pagadad-on usab.” (Pinadayag 7:9, 10; Juan 10:16) Oo, siya mao ang Usa nga nagadala niining “mga karneroha,” ug siya mahimong ilang aktibong Pangulo. Makaiikag, ang Gregong teksto nagkahulogan sa literal, “Ug kadtong gikinahanglan nga akong pagapangulohan.” Sa unsang paagi siya aktibong nagapangulo sa tanan niyang “mga karnero” karong adlawa?

Mga Magtatan-aw Diha sa Tuo nga Kamot ni Kristo

8, 9. (a) Unsang panan-awon ang nadawat ni apostol Juan? (b) Unsay gihulagwayan sa pito ka kandiliro ug sa pito ka bituon?

⁸ Si apostol Juan, usa ka membro sa nagamandong lawas sa unang Kristohanong kongregasyon, nakabaton sa usa ka panan-awon nga niana iyang “nakita ang pito ka bulawang kandiliro, ug sa taliwala sa mga kandiliro ang daw ingog anak sa tawo . . . Ug nagkupot siya sa iyang tuo nga kamot ug pito ka bituon.” Si Jesu-Kristo nagpatin-aw kang Juan: “Mahitungod sa balaang tinago sa pito ka bituon nga imong nakita diha sa akong tuo nga kamot, ug sa pito ka bulawang kandiliro: Ang pito ka bituon nagkahulogan sa mga manulonda sa pito ka kongregasyon, ug ang pito ka kandiliro nagkahulogan sa pito ka kongregasyon.”​—Pinadayag 1:12-20.

⁹ Sa pagkomento bahin niining kasulatana, ang librong “Then Is Finished the Mystery of God” nagaingon: “Ang maong ‘mga manulonda’ dili ba makita? Dili kay ingon. Nadawat ni apostol Juan ang tibuok Pinadayag gikan kang Jesu-Kristo pinaagi sa usa ka langitnong manulonda, ug dili makataronganon nga siya mosulat pagbalik ngadto sa mga manulonda sa langit, diha sa dili-makitang dominyo. Dili nila kinahanglan ang mga mensahe nga gisulat ngadto sa pito ka kongregasyon sa Asia. Ang paninugdang kahulogan sa titulong ‘manulonda’ maoy ‘mensahero; magdadala sa mensahe.’ . . . Kay kining pito ka simbolikong bituon nga nakita anaa sa tuo nga kamot ni Jesus, sila gipaatiman kaniya ug ilalom sa iyang pagtultol, kay ang iyang ‘tuo nga kamot’ sa gipadapat nga gahom makaarang sa pagtultol ug pagpanalipod kanila. . . . Maingon nga ang ‘pito ka kandiliro’ diha sa ‘adlaw sa Ginoo’ sa panan-awon naghulagway sa tanang matuod Kristohanong kongregasyon niining presente, tinuod nga ‘adlaw sa Ginoo’ sukad 1914 K.P., busa ang ‘pito ka bituon’ nagasimbolo sa tanang inanak-sa-espiritu, dinihogan samag-manulondang mga magtatan-aw sa maong mga kongregasyon karong adlawa.”b—Mga panid 102-4.

10. Unsang midaghang “katigayonan” ang gipaatiman sa ulipon?

¹⁰ Kining dinihogang mga magtatan-aw diha sa tuo nga kamot ni Kristo ngatanan maoy bahin sa kolektibo o tiningob nga “ulipon” si kinsa Iyang gitudlo “ibabaw sa tanan niyang katigayonan.” Tungod kay ang Agalon sa ulipon gisapotan man sa dagkong mga responsabilidad sukad 1914, ang “tanan niyang katigayonan” nagalangkit gayod sa daghan pang butang alang sa ulipon kay sa nangagi. Sa usa ka butang, ingong “mga sinugo nga puli ni Kristo,” ang nahibilin karon maoy mga sinugo sa usa ka nagamandong Hari nga nagamando sa natukod nga Gingharian. (2 Corinto 5:20) Sila ang gipadumala sa tanang espirituwal nga butang nga iya sa Agalon sa yuta. Kinahanglang sila magaalagad ingong katumanan sa mga tagna nga mapadapat sukad sa pagkatukod sa Gingharian. Kini nagaapil sa pagwali “niining maayong balita sa gingharian . . . sa tibuok gipuy-ang yuta alang sa usa ka pamatuod.” (Mateo 24:14) Labaw kay sukad masukad, kinahanglang magpadayon sila sa paghimog “mga tinun-an sa katawhan sa tanang nasod,” sa ingon matigom ang dili-maihap nga “dakong panon.” (Mateo 28:19, 20; Pinadayag 7:9) Oo, kining “tilinguhaong mga butang sa tanang nasod” maoy bahin sa midaghang “katigayonan” ni Kristo sa yuta.​—Haggeo 2:7.

11. (a) Tungod sa midaghang “katigayonan” unsay gikinahanglan? (b) Kinsa ang nagatultol sa buluhaton, ug sa unsang paagi?

¹¹ Kining tanan nagkahulogan sa dugang buluhaton alang sa tiningob nga “ulipon,” sa labi pang dakong natad sa kalihokan, nga moabot sa literal sa “tibuok gipuy-ang yuta.” Nagkinahanglan usab kinig dagko pang hedkuwarter ug pasilidad sa sanga aron sa pagdumala sa buluhaton ug sa pag-imprenta ug pagpanagtag sa mga basahon alang sa pagsangyaw ug sa personal nga pagtuon. Sama sa unang siglo, kining buluhatona ginatuman ilalom sa aktibong pagpangulo ni Jesu-Kristo, kinsa masambingayong anaa “sa taliwala sa mga kandiliro,” o mga kongregasyon. Siya nagadumala kanila pinaagi sa dinihogang mga magtatan-aw, si kinsa simboliko niyang gikuptan “sa iyang tuo nga kamot.” (Pinadayag 1:13, 16) Sama sa unang Kristohanong mga panahon, ang usa ka grupo sa maong dinihogang mga magtatan-aw naglangkob sa makita nga Nagamandong Lawas sa kongregasyon ni Kristo sa yuta. Ang iyang “tuo nga kamot” sa gipadapat nga gahom nagatultol sa maong mga lalaking matinuohon samtang ilang ginadumala ang buluhaton sa Gingharian.

Pinaagi sa Espiritu

12, 13. (a) Tungod sa dakong pag-uswag, unsang pangutana ang motungha? (b) Giunsa paggamit ni Kristo ang espiritu aron sa pagtagana sa panginahanglan sa mga magtatan-aw taliwala sa iyang mga tinun-an sa yuta?

¹² Tungod kay ang “ubang mga karnero” karon mikabat na sa kapin sa tulo ka milyon, nga naorganisar ngadto sa mga 52,000 ka kongregasyon, dayag nga ang dinihogang nahibilin nagkinahanglag tabang aron sa pag-atiman sa katigayonan sa Agalon sa yuta. Wala moabot ug 9,000, apil ang daghang igsoong babaye, ang nakig-ambit sa mga emblema sa Memorial, busa wala ganiy usa ka dinihogang magtatan-aw sa matag kongregasyon. Nagkahulogan ba kining si Jesu-Kristo dili mao ang nagadumala sa mga kongregasyon diin walay inanak-sa-espiritung “manulonda,” o ‘bituon’?

¹³ Wala gayod! Sumala sa atong nakita sa miaging artikulo, sa unang siglo si Kristo aktibong nangulo sa iyang kongregasyon pinaagi sa balaang espiritu. Karong adlawa iyang gigamit ang inanak-sa-espiritung mga membro sa Nagamandong Lawas aron sa pagtudlog mga magtatan-aw nga pinili gikan sa taliwala sa “ubang mga karnero.” Kinahanglang sila makakab-ot sa samang mga kinahanglanon sa dinihogang mga ansiano, sumala sa gihan-ay sa mga kasulatan sama sa 1 Timoteo 3:1-7 ug Tito 1:5-9. Kining Kasulatanhong mga kuwalipikasyon gisulat ilalom sa pagtultol sa balaang espiritu. Ang mga rekomendasyon ug mga pagtudlo gihimo tapos sa pag-ampo ug ilalom sa giya sa balaang espiritu. Ngadto nianang dili-dinihogang mga ansiano ang tambag ni Pablo mapadapat uban ang samang puwersa: “Bantayi ninyo ang inyong kaugalingon ug ang tibuok nga panon, nga niana kamo gitudlo sa balaang espiritu nga mga magtatan-aw.”​—Buhat 20:28.

14. (a) Sa unsang paagi ang tagna sa Isaias 32:1, 2 ginatuman na? (b) Sa unsang paagi ang tanang ansiano magpasakop sa “tuo nga kamot” ni Kristo?

¹⁴ Busa, sa tinagpulo ka libong kongregasyon, ang matarong nagamandong Haring Jesu-Kristo nagagamit sa “ubang mga karnero” ingong “mga prinsipe” aron sa pagpanalipod sa iyang “mga karnero” gikan sa espirituwal nga hangin, bagyo, ug hulaw. (Isaias 32:1, 2) Sama kang David sa kakaraanan, ang mga ansiano, kon kaha sakop sa dinihogan o sa “ubang mga karnero,” nagaampo kang Jehova: “Ang imong espiritu maayo; hinaot kini magatultol kanako sa yuta sa pagkamatarong.” (Salmo 143:10) Pinaagi sa iyang Anak, iyang ginahatag kanila ang Iyang espiritu, ug si Jesus nagagamit niining galamitona sa aktibong paagi sa pagpangulo sa iyang mga tinun-an sa yuta. Natural lamang, ang tanang ansiano kinahanglang magpasakop sa “tuo nga kamot” sa paggahom, paggiya, ug pagtultol ni Kristo, nga iyang ginahimo pinaagi sa espiritu ug sa inanak-sa-espiritung mga membro sa Nagamandong Lawas.

Pinaagi sa mga Manulonda

15. Unsa pa ang laing galamiton ni Kristo sa aktibong pagpangulo sa iyang mga tinun-an sa yuta?

¹⁵ Ang miaging artikulo naghisgot nga ang mga manulonda gigamit sa unang siglo aron sa paggiya ug sa pagluwas sa unang mga Kristohanon ug sa pagtabang kanila sa ilang buluhaton sa pagwali. Makataronganon ba ang paghunahuna nga ang atong nagamandong Haring Jesu-Kristo dili na mogamit ug mga manulonda sa aktibong pagpangulo sa iyang mga tinun-an karong adlawa? Dili lamang kini dili makataronganon kondili dili usab kasulatanhon.

16, 17. Unsa ang atong pamatuod nga gigamit ni Kristo ang mga manulonda sa pag-ani sa “mga anak sa gingharian” ug sa pagtigom sa “ubang mga karnero”?

¹⁶ Sumala sa sambingay ni Jesus sa trigo ug sa bunglayon, ang panahon sa pag-ani moabot sa “konklusyon sa sistema sa mga butang,” nga nagsugod sa 1914. Sa panahon sa pag-ani, “ang mga anak sa gingharian” mahilain gikan sa “mga anak sa usang daotan.” Kinsay gamiton sa Agalon sa pagpangani? “Ang mga mag-aani mao ang mga manulonda.” Si Kristo midugang: “Ang Anak sa tawo magapadala sa iyang mga manulonda, ug ilang tapokon ug hakoton pagawas sa iyang gingharian ang tanang butang magpahinabo sa pagkapandol ug ang mga tawo nga nagabuhat sa kalapasan.” (Mateo 13:37-41) Si Kristo nagagamit sa mga manulonda aron sa pagpanalipod sa iyang mga igsoon sa yuta.

¹⁷ Apan komosta man ang “ubang mga karnero”? Si Kristo nagagamit bag mga manulonda aron tapokon sila? Segurado! Ang iyang sambingay sa mga karnero ug sa mga kanding nagaingon: “Inig-abot sa Anak sa tawo diha sa iyang himaya, ug ang tanang manulonda uban kaniya, unya siya molingkod sa iyang mahimayaong trono. Ug ang tanang kanasoran pagatapokon sa iyang atubangan, ug iyang pagalainon ang katawhan gikan sa usag usa, maingon sa magbalantay sa mga hayop nga magalain sa mga karnero gikan sa mga kanding.” (Mateo 25:31, 32) Si Kristo nagagamit sa iyang mga manulonda sa maong buluhaton sa pagbahinbahin. Maingon nga gitultolan sa usa ka manulonda ang mga lakang ni Filipe ngadto sa Etiopianhong eunuko, daghan usab ang ebidensiya karong adlawa nga gigamit ni Kristo ang iyang mga manulonda sa pagtultol sa mga lakang sa iyang mga Saksi ngadto sa mga karnerohon. Daghang tawo ang nagpamatuod sa kamatuoran nga sila miampo alang sa tabang una pa gayod motuktok ang usa ka Saksi sa ilang pultahan.​—Buhat 8:26, 27.

Bug-os nga Pagsalig sa Pagtultol ni Kristo

18, 19. Pinasukad sa nahitabo sa unang siglo, sa unsa kita masaligon?

¹⁸ Sa unang siglo, wala kanunay itugot sa kahimtang nga gamiton ni Kristo ang nagamandong lawas sa Jerusalem aron sulbaron ang usa ka problema. Sa dihang si Pablo nahilain didto sa amihanang Asia Minor ug kinahanglang mahibalo kon unsang teritoryoha ang sunod buksan, si Kristo milihok pinaagi sa espiritu. (Buhat 16:6-10) Karong adlawa ang mga Saksi ni Jehova masaligon nga si bisan kinsa sa ilang mga igsoon nga mahilaing temporaryo gikan sa Nagamandong Lawas tungod sa paglutos nailalom gihapon sa aktibong pagpangulo ni Kristo, pinaagi sa espiritu ug sa manulondaanong pagpaluyo.

¹⁹ Niadtong unang Kristohanong mga panahon, ang pila ka desisyong gihimo sa nagamandong lawas tingali malisod sabton niadtong panahona. Pihong kana matuod sa dihang si Pablo gisugo sa pagbalik sa Tarso o sa dihang siya gipaadto sa templo tapos sa iyang ikatulong misyonaryong panaw. (Buhat 9:30; 21:23-25) Bisan pa niana, si Kristo sa aktuwal maoy nagpaluyo sa maong mga desisyon. (Buhat 22:17-21; 23:11) Karong adlawa kita makasalig nga bisan unsa ang itugot ni Kristo nga mahitabo taliwala sa iyang mga tinun-an sa yuta dunay hamiling katuyoan sa luyo niini, sama gayod sa unang siglo.

20. Sa unsa kita kombinsido, ug unsa ang atong determinasyon?

²⁰ Busa, dihang atong mabasa diha sa Bibliya nga si Kristo “mao ang ulo sa lawas, ang kongregasyon,” kita kombinsido nga siya dili lamang Ulo sa ngalan. (Colosas 1:18) Kita nahibalo, gikan sa kasinatian, nga siya usa ka tinuod, aktibong Ulo. Kon kita mobasa sa basahong Mga Buhat ug makita sa unsang paagi si Kristo nagtultol sa mga butang taliwala sa unang mga Kristohanon, kita makapaniid nga siya nagagamit sa samang mga galamiton karong adlawa. Atong makita ang ebidensiya sa paggamit ni Kristo sa balaang espiritu, mga manulonda, ug sa “matinumanon ug maalamong ulipon” ug sa Nagamandong Lawas niini, aron sa pagtudlo sa mga ansiano nga may katakos sa espirituwal nga paagi. Kay masaligon sa aktibong pagtultol ni Kristo sa mga butang, kita determinadong mopadayon sa “pagpahayag sa kamatuoran” ug sa pagtubo pinaagi sa gugma “diha sa tanang butang ngadto kaniya nga mao ang ulo, si Kristo.”​—Efeso 4:15.

[Mga footnote]

Pangunang mga Puntong Hinumdoman

◻ Unsa ang atong pamatuod nga gibantayan pag-ayo ni Kristo ang mga kalihokan sa unang-siglong mga kongregasyon?

◻ Kinsay gitudlo ni Kristo sa pagdumala sa tanan niyang “katigayonan,” ug unsay naapil niini?

◻ Kinsay gisimbolohan sa pito ka bituon diha sa tuo nga kamot ni Kristo?

◻ Sa unsang paagi gigamit ni Kristo ang balaang espiritu, mga manulonda, ug ang dinihogang Nagamandong Lawas sa pagpangulo sa iyang kongregasyon karong adlawa?

◻ Nganong kita bug-os makasalig sa pagtultol ni Kristo sa mga butang karong adlawa?

1. Sa unsang paagi gitugyan ni Kristo ang iyang “mga katigayonan” ngadto sa iyang mga tinun-an?

2. Unsay nagapakita nga si Kristo nagbantay pag-ayo sa mga kalihokan sa unang-siglong mga kongregasyon?

[Kahon sa panid 20]

Ang mga pagsulay nga moabot tungod sa mga gubat, mga rebolusyon o laktod nga paglutos ug opisyal nga mga pagdili maghimo tingaling imposible nga makatuman ka sa Kristohanong pagsimba sa bug-os organisadong paagi. Motungha tingali ang mga kahimtang nga magpaimposible sa paghimog dagkong mga tigom sa kongregasyon. Ang kontak sa sangang buhatan tingali temporaryong maputol. Ang mga pagduaw sa mga magtatan-aw sa sirkito tingali mahunong. Tingali dili moabot ang bag-ong mga basahon. Kon bisan hain niining mga butanga mahitabo kanimo, unsay imong buhaton?

Ang tubag mao: Nianang kahimtanga, buhata ang kutob sa imong mahimo, ug ang labing dako nga imong maarangan, sa maputling pagsimba. Ang personal nga pagtuon angay himoon. Kasagarang ang ginagmayng mga pundok sa mga igsoon makatagbo alang sa pagtuon diha sa mga balay. Ang mga basahong gitun-an sa nangagi ug ang Bibliya mismo magamit nga pasikaranan sa mga tigom. Dili makulbaan o mabalaka. Kasagaran, sa dili madugay matukod ang usa ka matang sa komunikasyon uban sa responsableng mga igsoon. Ang Nagamandong Lawas mangitag mga paagi sa pagkontak sa mga igsoon.

Apan bisan pag mahibulag ka gikan sa tanan nimong Kristohanong igsoon, ibutang sa hunahuna nga wala ka mahibulag gikan kang Jehova ug sa iyang Anak si Jesu-Kristo.​—Organisado sa Pagtuman sa Atong Ministeryo, panid 168.

[Hulagway sa panid 17]

Si Kristo sa simboliko anaa sa tunga sa mga kongregasyon, nga nagakupot sa mga magtatan-aw sa iyang tuo nga kamot