Kon Unsay Kahulogan sa Pagkamapaubsanon ni Jehova Alang Kanato
SI David nahibalo kon unsay kalisdanan. Giantos niya ang pagmaltratar ni Haring Saul, ang iyang abughoan nga ugangan. Tulo ka higayon nga misulay si Saul sa pagpatay kang David pinaagig bangkaw ug sa daghang tuig si Saul way-hunong nga naggukod kaniya, nga tungod niana, siya nahimong kagiw. (1 Samuel 18:11; 19:10; 26:20) Bisan pa niana, si Jehova nagauban kang David. Giluwas siya ni Jehova dili lang gikan kang Saul kondili gikan usab sa uban pang mga kaaway. Busa, masabtan nato ang gibati ni David, nga gipahayag diha sa usa ka awit: “Si Jehova mao ang akong dakong bato ug ang akong salipdanan ug ang akong Magtatagana ug kaikyasan. . . . Ihatag mo [Jehova] kanako ang imong taming sa kaluwasan, ug ang imong pagpaubos mao ang nagpadako kanako.” (2 Samuel 22:2, 36) Naangkon ni David ang usa ka sukod sa kabantog diha sa Israel. Apan, sa unsang paagi nalangkit ang pagpaubos ni Jehova?
Sa dihang ang Kasulatan maghisgot kang Jehova ingong mapaubsanon, kini wala magpasabot nga siya limitado sa usa ka paagi o siya ulipon sa uban. Hinunoa, kining matahom nga hiyas nagpaila nga siya adunay halalom nga pagbati alang sa mga tawo nga sinserong naningkamot nga makabaton sa iyang pag-uyon ug siya nagpaabot sa iyang kaluoy ngadto kanila. Sa Salmo 113:6, 7, atong mabasa: “[Si Jehova] nagapaubos aron sa pagtan-aw sa langit ug sa yuta, nga nagabangon sa timawa gikan sa abog.” Ang iyang ‘pagpaubos’ nagkahulogan nga “siya midungo aron sa pagtan-aw” o “iyang gipaubos ang Iyang kaugalingon aron sa pagtan-aw.” (Today’s English Version; Young’s Literal Translation of the Holy Bible) Busa gikan sa kalangitan si Jehova mismo “midungo,” o ‘nagpaubos sa iyang kaugalingon,’ aron sa pagpatalinghog kang David, nga usa ka dili-hingpit apan mapainubsanon nga tawo kinsa buot moalagad sa Diyos. Busa, si David nagpasalig kanato: “Si Jehova hataas, apan siya makakita sa mapainubsanon.” (Salmo 138:6) Ang maluluy-on, mapailobon, ug mabination nga paagi sa pagpakiglabot ni Jehova kang David angayng magdasig kanatong tanan nga naningkamot sa pagbuhat sa kabubut-on sa Diyos.
Bisan tuod giokupar ni Jehova ang labing binayaw nga posisyon sa uniberso ingong Soberano, siya andam nga makiglabot sa matag usa kanato. Kini mohatag kanatog kompiyansa nga kita makasalig sa iyang dili-mapakyas nga tabang bisan sa labing malisod nga mga kahimtang. Dili kita angayng mahadlok nga basig iya kitang kalimtan. Mahitungod sa iyang katawhan sa karaang Israel, si Jehova haom nga gihisgotan ingong usa “nga nahinumdom [kanila] panahon sa [ilang] timawa nga kahimtang: kay ang iyang mahigugmaong-kalulot maoy hangtod sa panahong walay tino.”—Salmo 136:23.
Ingong modernong-adlaw nga mga alagad ni Jehova, kita mag-antos tingali ug kalisdanan sama kang David. Mahimong mag-atubang kita ug pagbiaybiay gikan niadtong wala makaila sa Diyos, o tingali nakigbisog kita sa dili-maayong panglawas o nagbangotan. Bisag unsa pay kahimtang, kon sinsero ang atong kasingkasing, kita makaduol kang Jehova diha sa pag-ampo, nga mangaliyupo sa iyang kaluoy. Si Jehova ‘modungo’ aron sa pagmatikod kanato ug sa pagpatalinghog sa atong mga pag-ampo. Ang inspiradong salmista misulat: “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.” (Salmo 34:15) Wala ba matandog ang imong kasingkasing sa pagpamalandong sa makapadaning hiyas ni Jehova nga pagkamapaubsanon?
[Mga hulagway sa panid 30]
Maingon nga gidungog niya ang mga pag-ampo ni David, si Jehova andam nga magpatalinghog sa atong mga pag-ampo karon