Ang Imo Bang mga Pag-ampo ‘Giandam Ingon sa Insenso’?
“Hinaot nga ang akong pag-ampo andamon ingon sa insenso sa atubangan nimo.”—SALMO 141:2.
1, 2. Nagsimbolo sa unsa ang pagsunog ug insenso?
SI Jehova nga Diyos nagsugo sa iyang manalagnang si Moises nga mag-andam ug sagradong insenso aron magamit diha sa tabernakulo sa pagsimba sa Israel. Ang balaang pormula nagkinahanglan ug upat ka pilo nga aromatikong sinagol. (Exodo 30:34-38) Humot kaayo kadto.
2 Ang pakigtugon sa Kasugoan nga niana gidala ang nasod sa Israel nagtagana alang sa pagsunog ug insenso sa adlaw-adlaw. (Exodo 30:7, 8) Ang paggamit ba sa insenso may linaing kahulogan? Oo, kay ang salmista miawit: “Hinaot nga ang akong pag-ampo andamon ingon sa insenso sa atubangan nimo [Jehova nga Diyos], ang pagbayaw sa akong mga kamot ingon sa halad nga lugas sa kagabhion.” (Salmo 141:2) Sa basahon sa Pinadayag, si apostol Juan naghubit niadtong anaa sa palibot sa langitnong trono sa Diyos ingon nga dunay bulawang mga panaksan nga puno sa insenso. “Ug,” matod sa dinasig nga talaan, “ang insenso nagakahulogan sa mga pag-ampo sa mga balaan.” (Pinadayag 5:8) Busa, ang pagsunog sa humot nga insenso nagsimbolo sa dalawatong mga pag-ampo nga gitanyag sa mga alagad ni Jehova sa adlaw ug gabii.—1 Tesalonica 3:10; Hebreohanon 5:7.
3. Unsay angayng motabang kanato sa ‘pag-andam sa atong mga pag-ampo ingon sa insenso sa atubangan sa Diyos’?
3 Aron dawaton sa Diyos ang atong mga pag-ampo, kinahanglang mag-ampo kita ngadto kaniya sa ngalan ni Jesu-Kristo. (Juan 16:23, 24) Apan unsaon nato pagpauswag ang kalidad sa atong mga pag-ampo? Aw, ang pagkonsiderar sa pipila ka Kasulatanhong mga pananglitan angayng motabang kanato sa pag-andam sa atong mga pag-ampo ingon sa insenso sa atubangan ni Jehova.—Proverbio 15:8.
Pagtanyag ug mga Pag-ampo Diha sa Pagtuo
4. Sa unsang paagi ang pagtuo nalangkit sa dalawatong pag-ampo?
4 Aron ang atong mga pag-ampo mosaka ngadto sa Diyos ingong humot nga insenso, kinahanglang mag-ampo kita diha sa pagtuo. (Hebreohanon 11:6) Sa dihang ang Kristohanong mga ansiyano makakaplag ug usa ka masakiton sa espirituwal nga tawo nga modawat sa ilang Kasulatanhong tabang, ang ilang “pag-ampo sa pagtuo magpaayo sa usa nga nagaluya.” (Santiago 5:15) Ang mga pag-ampo nga gitanyag diha sa pagtuo makapahimuot sa atong langitnong Amahan, mao man usab ang mainampoong pagtuon sa Pulong sa Diyos. Ang salmista nagpasundayag ug maayong tinamdan sa dihang miawit siya: “Pagabayawon ko ang akong mga kamot ngadto sa imong mga sugo nga akong gihigugma, ug magapalandong ako sa imong kabalaoran. Tudloi ako sa pagkamaayo, kinaadman ug kahibalo mismo, kay mituo ako sa imong mga sugo.” (Salmo 119:48, 66) ‘Ibuklad nato ang atong mga kamot’ diha sa mapainubsanong pag-ampo ug magpasundayag ug pagtuo pinaagi sa pagsunod sa mga sugo sa Diyos.
5. Unsay angay natong buhaton kon nakulangan kita ug kaalam?
5 Ibutang ta nga nakulangan kita sa kaalam nga gikinahanglan sa pagsagubang sa usa ka pagsulay. Tingali wala kita makaseguro nga ang usa ka linaing tagna sa Bibliya nagakatuman na karon. Inay tugotan kini nga mopahuyang kanato sa espirituwal, mag-ampo kita alang sa kaalam. (Galacia 5:7, 8; Santiago 1:5-8) Siyempre, dili kita makadahom nga motubag ang Diyos kanato sa talagsaong paagi. Kinahanglang magpakita kita ug kasinsero sa atong mga pag-ampo pinaagi sa pagbuhat kon unsay gidahom niya sa tanan niyang katawhan nga buhaton. Kinahanglang makig-ambit kita sa makapalig-on-sa-pagtuo nga pagtuon sa Kasulatan uban sa tabang sa mga publikasyon nga gitagana pinaagi sa “kasaligan ug mabuot nga ulipon.” (Mateo 24:45-47; Josue 1:7, 8) Kinahanglan usab kitang mouswag sa kahibalo pinaagi sa pagpakig-ambit diha sa mga tigom sa katawhan sa Diyos sa regular nga paagi.—Hebreohanon 10:24, 25.
6. (a) Kitang tanan kinahanglang makaamgo sa unsa mahitungod sa atong adlaw ug sa katumanan sa mga tagna sa Bibliya? (b) Dugang pa sa pag-ampo alang sa pagbalaan sa ngalan ni Jehova, unsay angay natong buhaton?
6 Karon, ang ubang mga Kristohanon nagapangagpas sa mga intereses ug mga karera nga nagpaila nga wala na sila makaamgo nga kita anaa na sa hinapos nga bahin sa “panahon sa kataposan.” (Daniel 12:4) Ang kaubang mga magtutuo haom nga makaampo nga ang maong mga tawo magpukaw o magpalig-on sa ilang pagtuo diha sa Kasulatanhong pamatuod nga ang presensiya ni Kristo nagsugod sa 1914 sa dihang si Jehova nagpahimutang kaniya ingong langitnong Hari ug nga siya nagamando taliwala sa iyang mga kaaway. (Salmo 110:1, 2; Mateo 24:3) Kitang tanan kinahanglang makaamgo nga ang gitagnang mga hitabo sama sa kalaglagan sa bakak nga relihiyon—ang “Dakong Babilonya”—sa satanikong pag-atake ni Gog sa Magog sa katawhan ni Jehova, ug sa pagluwas kanila sa Diyos nga Labing Gamhanan panahon sa gubat sa Armagedon mahimong mahitabo uban sa makapakurat nga kahinanali ug mahimong mahitabo ang tanan sulod sa daw mubong yugto sa panahon. (Pinadayag 16:14, 16; 18:1-5; Ezequiel 38:18-23) Busa mag-ampo kita alang sa tabang sa Diyos nga magpabiling nagtukaw sa espirituwal. Hinaot kitang tanan kinasingkasing nga mag-ampo alang sa pagbalaan sa ngalan ni Jehova, sa pag-abot sa iyang Gingharian, ug sa pagkatuman sa iyang kabubut-on dinhi sa yuta maingon sa langit. Oo, hinaot magpadayon kita sa pagpasundayag ug pagtuo ug paghatag ug pamatuod nga sinsero ang atong mga pag-ampo. (Mateo 6:9, 10) Sa pagkatinuod, hinaot nga ang tanang nahigugma kang Jehova mangita pag-una sa Gingharian ug sa iyang pagkamatarong ug makabaton sa kinadak-ang pagpakig-ambit sa pagsangyaw sa maayong balita nga maarangan sa dili pa moabot ang kataposan.—Mateo 6:33; 24:14.
Dayega ug Pasalamati si Jehova
7. Unsay nakapadayeg kanimo mahitungod sa pag-ampo ni David nga ang bahin niana gisulat diha sa 1 Cronicas 29:10-13?
7 Ang usa ka hinungdanong paagi sa ‘pag-andam sa atong mga pag-ampo ingon sa insenso’ mao ang pagpahayag ug kinasingkasing nga pagdayeg ug pasalamat sa Diyos. Si Haring David nagtanyag ug ingon niana nga pag-ampo sa dihang siya ug ang katawhan sa Israel miamot ngadto sa pagtukod sa templo ni Jehova. Si David miampo: “Dalayegon ikaw, Oh Jehova ang Diyos sa Israel nga among amahan, gikan sa panahong walay tino bisan ngadto sa panahong walay tino. Imo, Oh Jehova, ang pagkadako ug ang pagkagamhanan ug ang katahom ug ang kahalangdon ug ang dignidad; kay ang tanang butang sa mga langit ug sa yuta imo man. Imo ang gingharian, Oh Jehova, ang Usa nga gipataas ingong pangulo ibabaw sa tanan. Ang bahandi ug ang himaya nagagikan kanimo, ug ikaw nagagahom ibabaw sa tanan; ug sa imong kamot anaa ang kagahom ug ang kusog, ug sa imong kamot anaa ang katakos sa pagpadako ug paghatag ug kusog sa tanan. Ug karon, Oh among Diyos, kami nagapasalamat kanimo ug nagadayeg sa imong matahom nga ngalan.”—1 Cronicas 29:10-13.
8. (a) Unsang mga pulong sa pagdayeg diha sa Salmo 148 ngadto sa 150 ang ilabinang nakatandog sa imong kasingkasing? (b) Kon pareho ang atong gibati sa gipahayag diha sa Salmo 27:4, unsay atong buhaton?
8 Pagkaanindot nga mga pahayag sa pagdayeg ug pagkamapasalamaton! Ang atong mga pag-ampo dili tingali sama ka larino, apan mahimo kining sama ka kinasingkasing. Ang basahon sa mga Salmo napuno sa mga pag-ampo sa pasalamat ug pagdayeg. Ang piniling mga pulong sa pagdayeg makaplagan diha sa Salmo 148 ngadto sa 150. Ang pagkamapasalamaton ngadto sa Diyos gipahayag diha sa daghang salmo. “Usa ka butang ang gipangayo ko kang Jehova,” miawit si David. “Mao kini ang akong pagapangitaon, nga makapuyo ako sa balay ni Jehova sa tanang adlaw sa akong kinabuhi, aron sa pagtan-aw sa katahom ni Jehova ug sa pagtan-aw nga mapabilhon sa iyang templo.” (Salmo 27:4) Molihok kita nga kaharmonya sa maong mga pag-ampo pinaagi sa pagpakig-ambit nga masiboton sa tanang kalihokan sa gitigom nga mga panon ni Jehova. (Salmo 26:12) Ang pagbuhat niini ug pagpamalandong sa Pulong sa Diyos sa adlaw-adlaw maghatag kanato ug daghang katarongan nga moduol kang Jehova uban ang kinasingkasing nga pagdayeg ug pasalamat.
Mapainubsanong Pangitaa ang Tabang ni Jehova
9. Sa unsang paagi nag-ampo si Haring Asa, ug uban sa unsang sangpotanan?
9 Kon kita nagaalagad kang Jehova nga bug-os-kasingkasing ingong iyang mga Saksi, makaseguro kita nga siya mamati sa atong mga pag-ampo alang sa tabang. (Isaias 43:10-12) Tagda si Haring Asa sa Juda. Ang unang 10 ka tuig sa iyang 41-ka-tuig nga paghari (977-937 W.K.P.) gitiman-an sa kalinaw. Unya ang Juda gisulong sa usa ka milyong kasundalohan ubos kang Zera ang Etiopianhon. Bisan tuod nalabwan pag-ayo sa gidaghanon, si Asa ug ang iyang mga sundalo migula aron sa pagsugat sa mga manunulong. Apan, sa wala pa ang gubat si Asa mainitong nag-ampo. Giila niya ang gahom ni Jehova sa pagluwas. Nangamuyo alang sa tabang, ang hari miingon: “Kanimo kami nagasalig, ug sa imong ngalan kami mianhi batok niining panon. Oh Jehova, ikaw mao ang among Diyos. Ayaw itugot nga ang tawong mamatay modaog batok kanimo.” Ang bug-os nga kadaogan misangpot samtang giluwas ni Jehova ang Juda alang sa iyang dakong ngalan. (2 Cronicas 14:1-15) Luwason man kita sa Diyos gikan sa pagsulay o palig-onon kita aron makalahutay niana, walay duhaduha nga siya mamati sa atong mga pangamuyo alang sa iyang tabang.
10. Kon wala kita mahibalo kon unsaon pagsagubang ang usa ka kalisdanan, sa unsang paagi makatabang ang pag-ampo ni Haring Jehosafat?
10 Kon wala kita mahibalo kon unsaon pagsagubang ang usa ka kalisdanan, makasalig kita nga si Jehova mamati sa atong mga pangaliya alang sa tabang. Giilustrar kini sa mga adlaw sa Judeanhong Haring Jehosafat, kansang 25-ka-tuig nga paghari nagsugod sa 936 W.K.P. Sa dihang ang Juda gihulga sa tiningob nga puwersa sa Moab, Ammon, ug sa bukirong rehiyon sa Seir, si Jehosafat nangamuyo: “Oh among Diyos, dili mo ba sila pagahukman? Kay kanamo walay gahom atubangan niining dakong panon nga mianhi batok kanamo; ug kami sa among kaugalingon wala mahibalo kon unsay angay namong pagabuhaton, apan ang among mga mata gitutok kanimo.” Gitubag ni Jehova kanang mapainubsanong pag-ampo, nga nakig-away alang sa Juda pinaagi sa paglibog sa panon sa mga kaaway mao nga sila nagpinatyanay sa usag usa. Ingong sangpotanan, ang palibot nga mga nasod nangahadlok, ug ang kalinaw milungtad diha sa Juda. (2 Cronicas 20:1-30) Sa dihang nakulangan kita sa kaalam nga gikinahanglan sa pagsagubang sa kalisdanan, sama kang Jehosafat kita makaampo: ‘Kami wala mahibalo kon unsay angay namong buhaton, apan ang among mga mata gitutok kanimo, Jehova.’ Ang balaang espiritu mahimong magpahinumdom kanato sa Kasulatanhong mga punto nga gikinahanglan sa pagsulbad sa suliran, o ang Diyos mahimong motabang kanato sa paagi nga molabaw sa tawhanong pangatarongan.—Roma 8:26, 27.
11. Unsay atong makat-onan mahitungod sa pag-ampo gikan sa mga lihok ni Nehemias maylabot sa kuta sa Jerusalem?
11 Hayan kinahanglan kitang molahutay diha sa pag-ampo alang sa tabang sa Diyos. Si Nehemias nagbakho, mihilak, nagpuasa, ug nag-ampo sulod sa mga adlaw mahitungod sa nagun-ob nga kuta sa Jerusalem ug sa walay-paglaom nga kahimtang sa mga molupyo sa Juda. (Nehemias 1:1-11) Ang iyang mga pag-ampo dayag nga misaka ngadto sa Diyos sama sa humot nga insenso. Usa ka adlaw niana ang Persianhong Haring Artajerjes nangutana sa masulub-ong Nehemias: “Unsa ba ang imong pangayoon?” “Dihadiha,” nagtaho si Nehemias, “ako miampo sa Diyos sa mga langit.” Kadtong mubo ug hilom nga pag-ampo gitubag, kay si Nehemias gitugotan sa pagtuman sa gipangandoy sa iyang kasingkasing pinaagi sa pag-adto sa Jerusalem aron sa pagtukod pag-usab sa nagun-ob nga kuta niini.—Nehemias 2:1-8.
Pasagdi si Jesus nga Motudlo Kanimo Kon Unsaon Pag-ampo
12. Sa imong kaugalingong mga pulong, unsaon nimo pagsumaryo ang pangunang mga punto sa modelong pag-ampo ni Jesus?
12 Sa tanang pag-ampo nga gitala diha sa Kasulatan, ilabinang naghatag ug leksiyon ang modelong pag-ampo nga gitanyag ni Jesu-Kristo ingong humot nga insenso. Matod sa Ebanghelyo ni Lucas: “Usa sa mga tinun-an [ni Jesus] miingon kaniya: ‘Ginoo, tudloi kami unsaon sa pag-ampo, ingon nga gitudloan usab ni Juan ang iyang mga tinun-an.’ Unya siya miingon kanila: ‘Sa dihang kamo mag-ampo, umingon, “Amahan, balaana ang imong ngalan. Paanhia ang imong gingharian. Hatagi kami sa among tinapay alang sa adlaw sumala sa kinahanglanon nianang adlawa. Ug pasayloa kami sa among mga sala, kay kami usab sa among kaugalingon nagapasaylo sa matag usa nga utangan kanamo; ug ayaw kami dad-a ngadto sa tintasyon.”’” (Lucas 11:1-4; Mateo 6:9-13) Konsiderahon nato kining maong pag-ampo, dili sa tuyo nga memoryahon kondili sa katuyoan nga magsilbing giya.
13. Unsaon nimo pagpatin-aw ang kahulogan sa mga pulong nga, “Amahan, balaana ang imong ngalan”?
13 “Amahan, balaana ang imong ngalan.” Ang pagtawag kang Jehova nga Amahan maoy usa ka linaing pribilehiyo sa iyang dedikadong mga alagad. Ingong ang mga anak moduol dayon sa usa ka maluluy-ong amahan uban sa bisan unsang kabalaka, kinahanglang mogugol kita ug panahon sa regular nga may-dignidad ug matinahurong pag-ampo ngadto sa Diyos. (Salmo 103:13, 14) Ang atong mga pag-ampo kinahanglang magbanaag sa atong kabalaka mahitungod sa pagbalaan sa ngalan ni Jehova tungod kay nangandoy kita nga makita kana nga mawad-an sa pasipala nga gihan-ok diha niana. Oo, buot nato nga ang ngalan ni Jehova mahilain ug huptang balaan, o sagrado.—Salmo 5:11; 63:3, 4; 148:12, 13; Ezequiel 38:23.
14. Unsay kahulogan sa pag-ampo, “Paanhia ang imong gingharian”?
14 “Paanhia ang imong gingharian.” Ang Gingharian mao ang pagmando ni Jehova nga gipahayag pinaagi sa langitnong Mesiyanikong kagamhanan diha sa mga kamot sa iyang Anak ug sa kauban ni Jesus nga “mga balaan.” (Daniel 7:13, 14, 18, 27; Pinadayag 20:6) Sa dili madugay kini “moabot” batok sa tanang yutan-ong mga magsusupak sa pagkasoberano sa Diyos, nga magwagtang kanila gikan sa esena. (Daniel 2:44) Unya ang kabubut-on ni Jehova matuman dinhi sa yuta, maingon man sa langit. (Mateo 6:10) Pagkadakong kangaya ang ipahinabo niana ngadto sa tanang linalang nga maunongong nagaalagad sa Unibersohanong Soberano!
15. Nagpakita ug unsa ang pagpangayo kang Jehova sa ‘atong tinapay nianang adlawa’?
15 “Hatagi kami sa among tinapay alang sa adlaw sumala sa kinahanglanon nianang adlawa.” Ang pagpangayo kang Jehova sa pagkaon “nianang adlawa” nagpakita nga wala kita mangayog daghan kaayong pagkaon kondili ang atong adlaw-adlaw lamang nga panginahanglan. Bisan tuod nagasalig kita nga motagana ang Diyos, motrabaho usab kita ug mogamit sa bisan unsang hustong mga paagi nga mabatonan nato aron makabaton ug pagkaon ug ubang mga kinahanglanon. (2 Tesalonica 3:7-10) Siyempre, kinahanglang pasalamatan nato ang atong langitnong Magtatagana tungod kay ang iyang gugma, kaalam, ug gahom nagpaluyo niining maong mga tagana.—Buhat 14:15-17.
16. Sa unsang paagi madawat nato ang kapasayloan sa Diyos?
16 “Pasayloa kami sa among mga sala, kay kami usab sa among kaugalingon nagapasaylo sa matag usa nga utangan kanamo.” Sanglit dili kita hingpit ug makasasala, dili kita bug-os nga makaabot sa hingpit nga mga sukdanan ni Jehova. Busa, kinahanglang mag-ampo kita alang sa iyang kapasayloan pinasikad sa halad lukat ni Jesus. Apan kon buot nato nga ang “Tigpatalinghog sa pag-ampo” magpadapat sa bili sa maong halad nganha sa atong mga sala, kinahanglang magmahinulsolon kita ug andam nga modawat sa bisan unsang disiplina nga iyang ihatag kanato. (Salmo 65:2; Roma 5:8; 6:23; Hebreohanon 12:4-11) Dugang pa, makadahom lamang kita nga pasayloon sa Diyos kon kita ‘magpasaylo sa mga utangan kanato,’ kadtong nakasala batok kanato.—Mateo 6:12, 14, 15.
17. Unsay kahulogan sa mga pulong nga, “Ayaw kami dad-a ngadto sa tintasyon”?
17 “Ayaw kami dad-a ngadto sa tintasyon.” Ang Bibliya usahay moingon nga si Jehova nagabuhat sa mga butang sa dihang gitugotan lamang niya kini. (Ruth 1:20, 21) Ang Diyos dili motental kanato aron makasala. (Santiago 1:13) Ang mga tentasyon sa paghimog daotan nagagikan sa Yawa, sa atong makasasalang unod, ug niining kalibotana. Si Satanas mao ang Maninental nga naningkamot sa pagmaniobra kanato ngadto sa pagpakasala batok sa Diyos. (Mateo 4:3; 1 Tesalonica 3:5) Sa dihang mohangyo kita nga, “Ayaw kami dad-a ngadto sa tintasyon,” naghangyo kita sa Diyos nga dili kita tugotan nga mapakyas sa dihang kita gitental sa pagsupak kaniya. Makagiya siya kanato aron dili kita madala ug dili madaog ni Satanas, ang “tuman-kadaotang usa.”—Mateo 6:13; 1 Corinto 10:13.
Pagbuhat nga Kaharmonya sa Imong mga Pag-ampo
18. Sa unsang paagi kita makabuhat nga kaharmonya sa atong mga pag-ampo alang sa usa ka malipayong kaminyoon ug pamilyahanong kinabuhi?
18 Ang modelong pag-ampo ni Jesus nagkobre sa pangunang mga puntos, apan makaampo kita mahitungod sa bisan unsang butang. Pananglitan, makaampo kita mahitungod sa atong tinguha sa usa ka malipayong kaminyoon. Aron mahuptan ang kaputli hangtod sa pagkaminyo, mahimo kitang mag-ampo alang sa pagpugong sa kaugalingon. Apan mobuhat kita nga kaharmonya sa atong mga pag-ampo pinaagi sa paglikay sa imoral nga literatura ug kalingawan. Magmadeterminado usab kita sa ‘pagminyo lamang diha sa Ginoo.’ (1 Corinto 7:39; Deuteronomio 7:3, 4) Kon minyo na, kinahanglan kitang mobuhat nga kaharmonya sa atong mga pag-ampo alang sa kalipay pinaagi sa pagpadapat sa tambag sa Diyos. Ug kon makabaton kita ug mga anak, dili pa igo nga mag-ampo nga sila mahimong matinumanong mga alagad ni Jehova. Kinahanglang buhaton nato ang tanan nga atong maarangan sa pagtisok sa mga kamatuoran sa Diyos diha sa ilang kaisipan pinaagi sa pagtuon sa Bibliya ug sa regular nga pagtambong sa Kristohanong mga tigom uban kanila.—Deuteronomio 6:5-9; 31:12; Proverbio 22:6.
19. Unsay angay natong buhaton kon kita mag-ampo mahitungod sa atong ministeryo?
19 Kita ba nagaampo alang sa mga panalangin diha sa ministeryo? Nan molihok kita nga kaharmonya sa maong mga pag-ampo pinaagi sa pagbaton ug makahuloganong pakig-ambit sa buluhatong pagsangyaw sa Gingharian. Kon kita mag-ampo alang sa mga kahigayonan nga motabang sa uban nga makasubay diha sa dalan ngadto sa walay-kataposang kinabuhi, kinahanglan kitang maghupot ug maayong mga talaan sa mga interesado ug magmaandam sa paglakip sa pagdumala ug mga panagtuon sa Bibliya sa balay diha sa atong eskedyul. Komosta kon mangandoy kita nga mosulod sa bug-os-panahong buluhatong pagsangyaw ingong payunir? Nan mohimo kitag mga lakang nga kaharmonya sa atong mga pag-ampo pinaagi sa pagpauswag sa atong kalihokan sa pagsangyaw ug pinaagi sa pagpakig-ambit diha sa ministeryo uban sa mga payunir. Ang paghimo sa maong mga lakang magpakita nga kita nagabuhat nga kaharmonya sa atong mga pag-ampo.
20. Unsay konsiderahon sa sunod nga artikulo?
20 Kon kita matinumanong nagaalagad kang Jehova, makasalig kita nga siya magatubag sa atong mga pag-ampo nga kaharmonya sa iyang kabubut-on. (1 Juan 5:14, 15) Tataw, napupo ang mapuslanong mga punto gikan sa pagsusi sa pipila ka pag-ampo nga gisulat diha sa Bibliya. Ang atong sunod nga artikulo magkonsiderar sa ubang mga lagda sa Kasulatan alang niadtong nagtinguha sa ‘pag-andam sa ilang mga pag-ampo ingon sa insenso sa atubangan ni Jehova.’
Unsaon Nimo Pagtubag?
◻ Nganong motanyag kita ug mga pag-ampo diha sa pagtuo?
◻ Unsay papel nga gidula sa pagdayeg ug pasalamat diha sa atong mga pag-ampo?
◻ Nganong masaligon kitang makapangayo sa tabang ni Jehova diha sa pag-ampo?
◻ Unsa ang pipila ka pangunang mga punto sa modelong pag-ampo?
◻ Sa unsang paagi kita makabuhat nga kaharmonya sa atong mga pag-ampo?
[Hulagway sa panid 12]
Sama kang Haring Jehosafat, usahay kita tingali kinahanglang moampo: ‘Kami wala mahibalo kon unsay angay namong pagabuhaton, apan ang among mga mata gitutok kanimo, Jehova’
[Hulagway sa panid 13]
Nag-ampo ka ba nga kaharmonya sa modelong pag-ampo ni Jesus?