Ika-132 nga Graduwasyon sa Gilead

Mga Manlalaban sa Kamatuoran

ANG Marso 10, 2012 maoy espesyal nga adlaw sa educational center sa mga Saksi ni Jehova sa Patterson, New York. Libolibo ka desenteg-pamiste nga mga tawo, lakip na ang mga bisita gikan sa lainlaing nasod, ang nagkatigom aron motambong sa graduwasyon sa ika-132 nga klase sa Watchtower Bible School of Gilead. Daghan ang didto sa awditoryum sa Patterson; ang uban nanan-aw sa maong programa nga gisalida sa lainlaing dapit sa Bethel. Tanantanan, 9,042 ang nanambong.

Naghinamhinam ang tanan. Dili sama niadtong nakatungha sa nag-unang mga klase, ang tanang estudyante nga mograduwar naggikan sa lainlaing matang sa espesyal nga bug-os-panahong pag-alagad—mga Bethelite, espesyal payunir, nagapanawng magtatan-aw, o mga misyonaryo—bisag wala pa sukad makatungha sa Gilead. Unsa pa may mensahe alang niining eksperyensiyadong mga estudyante?

Nasayran dayon kini sa mga nanambong. Si Gerrit Lösch, usa ka membro sa Nagamandong Lawas sa mga Saksi ni Jehova, maoy tsirman sa programa ug naghatag sa pangbukas nga pakigpulong. Iyang gipatungha ang makapukaw sa hunahunang pangutana, “Ikaw ba Usa ka Manlalaban?” Iyang gisaysay nga ang mga Kristohanon maoy mga manlalaban sa kamatuoran, nga nagdepensa sa tanang Kristohanong pagtulon-an. Ang pagdepensa sa kamatuoran wala lang maglangkit sa pagtudlo sa mga tawo sa kamatuoran kondili sa pagtabang usab nila nga mahigugma niana.

“Giunsa nato pagkahibalo nga atong nabatonan ang kamatuoran?” nangutana si Brader Lösch. Siya miingon nga dili kana mapamatud-an sa gidaghanon sa modawat niana. Bisan tuod minilyon karon ang midawat sa putling pagsimba, niadtong Pentekostes 33 C.E., diyutay lang sila. Iyang gihisgotan ang lima ka paagi diin atong mahibaloan nga nabatonan nato ang kamatuoran: (1) Kita nagpabilin sa pagtulon-an ni Jesus, (2) kita nahigugma sa usag usa, (3) kita nagsunod sa taas nga moral nga sukdanan, (4) kita nagpabiling neyutral sa mga panagbangi niining kalibotana, ug (5) kita gipili sa Diyos nga magdala sa iyang ngalan.

“Padayong Sunda ug Tumana ang Direksiyon”

Naghunahuna ang mamiminaw kon unsay sunod nilang madunggan sa dihang si Geoffrey Jackson sa Nagamandong Lawas misulod sa entablado nga nagdalag maleta! Ang iyang pakigpulong nag-ulohang, “Padayong Sunda ug Tumana ang Direksiyon,” nga gibase sa Isaias 50:5. Ang maong bersikulo nagtagna bahin kang Jesus: “Ako, sa akong bahin, dili masuklanon. Wala ako moliko sa sukwahing direksiyon.”

Giawhag ni Brader Jackson ang mga estudyante nga magmaabtik sa pag-ila sa direksiyon ni Jehova pinaagi sa iyang balaang espiritu, sa Bibliya, ug sa iyang organisasyon. Sa sambingay sa mga talanton, diha sa Mateo 25:14-30, ang matag ulipon, sa diwa, nakadawat ug samang gidaghanon kay ang nadawat nila maoy sumala sa ilang katakos. Gidahom nga sila mohimo sa ilang kinamaayohan. Ang duha ka ulipon gikomendahan ug gitawag nga “maayo ug kasaligan.” Ang pagkamatinumanon wala lang magdepende sa mga resulta kondili sa padayong pagsunod ug pagtuman sa direksiyon.

Ang ikatulong ulipon gitawag nga “daotan ug tapolan” ug “walay-silbi.” Ngano man? Gilubong niya ang iyang talanton. Ang usa ka talanton dili sensilyo, kondili maoy yunit sa timbang nga katumbas sa 6,000 ka denario, nga motimbang ug 20 kilos. Mao kanay timbang sa maleta nga tugotang dad-on sa usa ka tawo nga mobiyahe sa laing nasod. Dili sayon ang paglubong ug bisan unsa nga ingon kadako sa maleta. Busa ang ulipon dunay gibuhat—iyang gilubong ang talanton—apan dili kana ang gisugo kaniya. Sa susama, ang usa ka misyonaryo puliki tingali—apan puliki sa unsa? Sa paghimo bag tag-as nga mga sulat, pag-surf sa Internet, pagpakighugoyhugoy, o pagnegosyo? Kini mahimong makapakapoy kaayo niya, apan wala niya buhata ang gisugo kaniya. Si Brader Jackson mihinapos: “Sunda kanunay ang direksiyon!”

“Ayaw Pagduhaduha”

Kini ang tema sa pakigpulong ni Anthony Morris, membro sa Nagamandong Lawas. “Sa Bibliya ang pagtuo ug pagduhaduha magkasumpaki,” siya miingon. “Ang pagtuo makawala sa pagduhaduha.” Si Satanas milampos sa pagtisok ug pagduhaduha sa hunahuna sa hingpit nga babayeng si Eva, busa mahimo sab niya na kanato. “Palig-ona ang inyong pagtuo, ug ang pagduhaduha mawala,” miingon si Brader Morris. Iyang gihisgotan ang asoy bahin kang Pedro, kinsa “milakaw sa ibabaw sa tubig” apan unya, sa “pagkakita sa unos,” siya nahadlok ug misugod pagkaunlod. Sa dihang gikuptan siya ni Jesus, si Jesus nangutana: “Nganong gidaog ka man sa pagduhaduha?” (Mateo 14:29-31) “Kay kamong mga misyonaryo puliki man sa bug-os-panahong pag-alagad, ang uban tingali makadayeg sa tanan ninyong gibuhat, nga sama rag naglakaw kamo sa ibabaw sa tubig, apan sa dihang moabot ang mga unos sa kinabuhi, ayaw pagpadaog sa pagduhaduha.”

Si Brader Morris nagpadayon sa pag-ingon nga bisag lisod atubangon ang samag unos nga mga panahon, sa ngadtongadto molurang ra kini. Bahin sa malisod nga panahon, iyang gitambagan ang mga estudyante nga tagdon ang gibuhat ni Pablo ug Silas sa dihang nabilanggo sila sa Filipos. Ang Buhat 16:25 nag-ingon: “Sa mga tungang gabii si Pablo ug si Silas nanag-ampo ug nanagdayeg sa Diyos pinaagig awit; oo, ang mga binilanggo nakadungog kanila.” Matikdi kini: Sila wala lang moampo, sila nanag-awit. Kusog ang ilang pag-awit kay nadunggan kini sa ubang binilanggo. Kadaghanan nato, matod ni Brader Morris, dili kaayo nindot ug tingog, apan dili ta angayng maulaw sa pag-awit, ilabina sa dihang nag-atubag mga problema. Gitapos ni Brader Morris ang iyang pakigpulong pinaagi sa pagbasa sa liriko sa “Lahutay Hangtod sa Kataposan,” Awit numero 135 sa songbok nga Mag-awit Kang Jehova.

Ubang Makapadasig nga mga Pakigpulong

“Mahigugma Ka ba sa Igong Gidaghanon sa mga Adlaw?” Kini ang ulohan sa pakigpulong ni Robert Luccioni, nga taga-Purchasing Department. Ang tema gipasukad sa giingon ni Haring David sa Salmo 34:12. Ang pakigpulong ni Brader Luccioni naghisgot kon unsaon pag-atubang sa malisod nga mga panahon ug mahuptan gihapon ang maayong relasyon kang Jehova. Daghan ang makat-onan sa asoy sa 1 Samuel kapitulo 30. Samtang si David, iyang mga sakop, ug ang ilang mga pamilya nangalagiw gikan kang Haring Saul, sila nagtagotago sa Ziklag. Sa dihang ang ilang mga pamilya gibihag sa nanulong nga mga Amalekanhon, gibasol nila si David ug buot niya siyang batoon. Unsay reaksiyon ni David? Wala siya maluya kondili ‘gipalig-on niya ang iyang kaugalingon pinaagi kang Jehova nga iyang Diyos.’ (1 Samuel 30:6) Siya nagpakisayod kang Jehova, milihok sumala sa pagtultol sa Diyos, ug nagluwas sa mga binihag. Giingnan sa mamumulong ang mga estudyante nga kon sila mosalig usab kang Jehova ug mosunod sa iyang sugo, sila mahigugma sa igong gidaghanon sa mga adlaw aron makita ang maayo. Sila magmalipayon diha sa bililhong pribilehiyo nga gihatag kanila.

“Pabiling Magtukaw.” Kini ang tema sa pakigpulong ni Michael Burnett, usa sa mga instruktor sa Gilead School. Ang mga Israelitas nagbahin sa gabii, gikan sa pagsalop sa adlaw hangtod sa pagsubang niini, ngadto sa tulo ka hugna sa pagbantay nga tagup-at ka oras. Ang kataposan, nga gikan sa alas 2:00 s.b. hangtod sa alas 6:00 s.b., mao ang kinangitngitan, kinabugnawan, ug kinalisdang panahon sa pagpabiling magtukaw. Ang salmista kanunayng namalandong sa pulong ni Jehova aron dili siya makatulog sa kataposang hugna sa pagbantay sa gabii. (Salmo 119:148) “Kinahanglang magmabinantayon mo,” giingnan ni Brader Burnett ang mga estudyante. “Kamo makasinatig mangiob ug makapaluyang mga panahon ug makita ninyo ang mga epekto sa bugnaw, ug walay-gugmang kalibotan. Kinahanglang planohon ninyo kon unsay inyong buhaton kon moabot nang mga panahona.” Dayon, gipahinumdoman niya sila sa pagpadayon sa pagtuon sa lalom ug detalyadong mga bahin sa Bibliya aron makapabilin silang magtukaw sa espirituwal. Giilustrar ni Brader Burnett ang iyang punto: “Kada adlaw, mag-ampo kamo kang Jehova kay buot ninyo siyang mahimong higala. Busa, tugoti si Jehova, ingong inyong higala, nga makigsulti kaninyo kada adlaw pinaagi sa Bibliya. Lawom na kaayo ang kagabhion, busa planoha kon unsaon ninyo paggamit ang inyong mga adlaw, ug nianang paagiha makapabilin kamong magtukaw.”

“Gibansay Alang sa Buluhaton sa Umaabot.” Kini nga tema, nga gibase sa 1 Pedro 5:10, maoy napili ni Mark Noumair, laing instruktor sa Gilead. Siya nangutana sa mga estudyante: “Sanglit eksperyensiyado na man mo nga mga ministro, nganong gidapit pa man mo sa Watchtower Educational Center?” Ang iyang tubag mao kini: “Tungod kay kamo mga hanas na sa inyong natad. Daghang propesyonal ang mo-leave sa trabaho aron motambong ug mga klase nga makadugang sa ilang kahanas. Sa milabayng lima ka bulan, si Jehova ‘nagpalig-on’ ug ‘nagpakusgan’ kaninyo pinaagi sa makugihong pagtuon sa iyang Pulong ug organisasyon aron inyong maabaga ang bug-at nga mga responsabilidad nga inyong madawat. Ang lig-ong mga haliging kahoy dili mabawog, mahiwi, o mabali bisan pa sa kabug-at sa tinukod. Ang resulta sa inyong pagbansay mapadayag samtang makauban ninyo ang inyong mga igsoon sa pagtuo diha sa buluhaton. Tungod ba sa mga kabug-at mobiya kamo sa mga prinsipyo sa Diyos, o magpabilin kamong lig-on, nga nahiuyon sa inyong nakat-onan sa Pulong sa Diyos? Ang usa nga kusgan makapas-an ug luwan. Ang kalig-on sa kahoy nagdepende sa kadasok sa mga lanotlanot sa sulod niini. Ang inyong kalig-on nagdepende usab sa inyong sulod nga pagkatawo. Gidala kamo ni Jehova dinhi aron mahimong lig-on, kasaligan, ug kapiyalan sa buluhaton sa umaabot. Gihimo sa Diyos ang iyang bahin, busa nanghinaot mi nga buhaton ninyo ang inyong bahin ug tugotan ninyo ang inyong ‘Dakong Instruktor’ nga magtapos sa inyong pagbansay.”

Mga Eksperyensiya ug Interbiyo

Panahon sa mga graduwasyon sa Gilead, makapadasig gayod nga madunggan ang kasinatian sa mga estudyante. Sa usa ka bahin sa programa, gipasundayag sa mga estudyante ang pipila ka di pa dugayng kasinatian nila sa pagsangyaw. Pananglitan, ang usa ka magtiayong Pranses naghulat ug unom ka oras sa erport sa ilang pagpaingon sa Gilead School. Sa restawran sa erport, nakig-estorya sila sa duha ka lalaki nga naghulat usab sa ilang flight. Sa dihang ang usa sa mga lalaki miingon nga siya taga-Malawi, ang magtiayon nakigsulti kaniya sa pinulongang Chichewa. Kay natingala, nangutana siya kon nganong makamao sila niana. Sila miingon nga mga misyonaryo sila kaniadto sa Malawi. Sa dihang ang lain miingon nga siya taga-Cameroon, ang magtiayon nakigsulti kaniya sa French, nga gikatingala niini. Ang duha ka lalaki dakog pagtahod sa mga Saksi ni Jehova, ug gisangyawan sila sa mga misyonaryo.

Duha ka magtiayong estudyante ang giinterbiyo ni Nicholas Ahladis, nga nagtrabaho sa Translation Services. Ang usa ka magtiayon mibiya sa Australia aron magmisyonaryo sa gubot nga nasod sa East Timor. Ang laing magtiayon mibiya sa Korea aron moalagad sa Hong Kong. Sila naghinamhinam sa pagbalik sa ilang langyawng mga asaynment aron ipadapat ang ilang nakat-onan sa Gilead.

Human mahatag ang mga diploma, ang usa ka estudyante nga nagrepresentar sa klase nagbasa sa usa ka sulat-pasalamat alang sa instruksiyon nga ilang nadawat. Dayon, si Brader Lösch, sa iyang panapos nga komento, migamit ug pipila ka maanindot nga masambingayong mga pulong, nga nag-ingong ang kamatuoran sama katahom sa balangaw, sama sa lunhawng dapit sa desyerto, ug sama sa angkla diha sa balorong kadagatan. “Pagkadakong panalangin nga mahibalo sa kamatuoran,” siya miingon. “Mahimong manlalaban sa kamatuoran, ug tabangi ang uban nga mahimong mga manlalaban usab.”

[Chart/Mapa sa panid 31]

ESTADISTIKA SA KLASE

12 ka nasod nga girepresentahan

36 aberids nga edad

20 aberids nga tuig sukad sa bawtismo

15 aberids nga tuig sa bug-os-panahong pag-alagad

[Mapa]

(Alang sa aktuwal nga pagkahan-ay, tan-awa ang publikasyon)

Ang mga estudyante giasayn sa mga nasod nga gipakita sa ubos:

MGA NASOD NGA GIPADALHAN

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Hulagway sa panid 31]

Ika-132 nga Klase nga Migraduwar sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.